تاختالي کؤيدن‌ مکتوب‌لار

بولگه لر سرويسي: سئويملي دوستوم ائششک اريسي!بيلميرم مکتوبلاريم سني بئزديريرمي؟ بلکه ده »اؤلسيدي جانيم قورتاراردي« ـ دئيه گيلئيلنيرسن.

 يازار: عزيزنسين

چئويرن: اسماعيل شيخلي

کؤچورن: علي آغ‌گونئيلي

بولگه لر سرويسي: سئويملي دوستوم ائششک اريسي!بيلميرم مکتوبلاريم سني بئزديريرمي؟ بلکه ده »اؤلسيدي جانيم قورتاراردي« ـ دئيه گيلئيلنيرسن.
دوغرودان دا اؤلوب قورتارسايديم منيم ده جانيم دينجه‌لردي، سنين ده.آمما اوول کي مکتوبلاريمدا يازديغيم کيمي نه اؤلمک آساندير، نه ده ياشاما.بلکه ده اؤلمک داها آساندير، آمما بونون رسميتي چوخ اوزون چکير.اؤلو اوچون رسمي ايشلرين نه دئمک اولدوغونو خسته‌خانا زئرزمي‌سينده کي اؤلولردن اؤيرنديم.اؤلولرين بيريني ايکي خاديمه زئرزمي‌دن چيخارارکن يانيمدا ياتان اؤلو قادين:
– نه يامان باختلي آداميميش ـ دئدي ـ دؤرد گون اول اؤلوسونو بورايا گتيرميشديلر، ايندي آپارديلار.بيزيم ده بختيميز آچيلسايدي بيزي ده گؤتوررديلر.دئيه‌سن بو آدامين ضمانتي وار.
– نه دانيشيرسينيز خالا، بيزيم هاميميز اؤلويوک.اؤلونون ده بختي ضمانتي اولارمي!؟ بونلارين تأثيري وارمي؟
– البته وار.سن يئني گلديييندن بونلاري بيلميرسن.ائله مني‌ميثال گؤتوره بيلرسن، تامام ـ کامال اؤلدويوم گون مني عسگرلييه چاغيرديلار.
من گولميه باشلاياندا ياشلي قادين:
– سوس! ـ دئدي ـ اؤزوندن چيخما.اؤلولره ده ديري‌لر کيمي، اؤزوندن چيخماق ياراماز.
– راضي‌يام آما سيزين ان آزي آلتميش ياشينيز اولار.
– آلتميش يئددي ياشيمدايام. منيم اوشاقلاريم آلتميش يئددي ياشيندا اولدغوما شاهيدليک ائده بيلرلر. سونرا دا محکمه قراري ايله قادين اولدوغوم ثبوت ائديله‌جک، داها سونرا اؤلدويوم اورتايا چيخاجاق. بونلاري ثبوت ائده بيلمه‌سم مني عسکر آپاراجاق‌لار.
– بس اوشاقلارينيز نييه بو ايشي حل ائتميرلر؟
– چوخ اللشديلر. ياشيمين آتميش يئددي اولدوغونو و قادينليغيمي ثبوت ائتديلر، اما اؤلو اولدوغومو اثباتا چاتديرا بيلميرلر.
– نييه کي؟
– کؤمور کاغيذي منيم آديمادير. تزه‌دن کؤمور کاغيذي آلماغين نقدر چتين ايش اولدوغونو بيلميرسينيزمي؟ منيم اؤلموش اولدوغومو بيلسه‌لر کؤمورکاغيذي باتاجاق. ائوده کي‌لر ده کيم بيلير نقدر سويوقدا تيتره‌شجک‌لر. ايندي اوشاقلاريم کؤمور آلا بيلمک اوچون منيم اؤلدويومو گيزلي ساخلاييرلار. بئله اولسا، اوندا مني عسگر آپاراجاقلار. منيم اؤلدويومو ثبوت ائتمسه‌لر‌ميراثيمي آلا بيلمييه‌جک‌لر. باخ مني قورخويا سالان بودور. اوشاقلاريم دا چاش ـ باش قاليب‌لار. بيلميرلر‌ميراثدان‌مي کئچسين‌لر، کؤمور کاغيذيندان‌مي، يوخسا مني عسگرلييه‌مي گؤندرسين‌لر!؟ هئچ جور قرارا گله بيلميرلر. باخ بونا گؤره بورادا گؤزله‌ييب قالميشام. بورادا گؤردوکلرينين هره‌سي‌نين بير دردي وار. باخ بو دلي قانلي اوغلاني گؤرورسن‌مي‌؟ اؤلوموندن ايکي گون اول توتولماسي حاققيندا قرار چيخارتميشديلار. اگر ايندي حقيقتاً اؤلموش اولدوغونو ثبوت ائده بيلسه‌لر توتماياجاق‌لار. اونا گؤره بورادا اوزانيب گؤزله‌يير. توتولماقدان ياخاسيني قورتارماق اوچون يالاندان ييخيليب «اؤلموشم» دئمه‌ديييني نه دن بيله‌سن؟
– دوکتورلار تصديق ائده بيلمزلر؟– اوغلوم، دوکتورلرين ديريلردن باشي چيخمير، اؤلونون اؤلو اولدوغونو هاردان بيله بيلرلر؟ باخ بو دووارين دييبينده ياتان قادين دوز دوققوز دفه اؤلوب ديريليب «بو دونيادا ياشاماغين دادي دوزو قالماييب» ـ دئيه تيرتاپ اوزانيرميش، قبيره ساللاييب اوستونو تورپاقلاماق ايسته‌ين‌ده، سيچراييب قالخيرميش آياغا.– دوکتورلارين يئرينه من اولسايديم باسديرتديرارديم.
– آي اوغول دوکتورلارين باشيني قاشيماغا واختلاري هاردادير، هر سحر خسته‌خانايا گليب ساعات اوندان اون بيره قده‌ر خسته‌لري معاينه ائديرلر. بوآروادي بورادا ساخلاييرلار کي، دوغرودان اؤلوب ـ اؤلمه‌دييني دقيقلشديرسينلر. سندلري تامام حاضير اولان کيمي باسديراجاق‌لار.
بو واخت يوغون بير سس ائشيتديم :
– بو ايشلر اوزون چکه‌جک.
باخديم سول يانيمدا اوزانميش توتوش ـ موتوش بير اؤلو دانيشيردي.
– سيز ده اؤلوسونوز‌؟ دئيه سوروشدوم
ساکيت وسرت بير طرزده :
– خئيير من اؤلمه‌ميشم، وفات ائتميشم ـ دئدي. سيز قزئت ـ زاد اوخومورسونوز‌؟
– اوخويورام.
– منيم وفات ائتدييمي قزئتلرده اوخوماميسينيز‌؟ بوتون قزئت‌لر منيم وفاتيمين حاققيندا يازميشديلار.
– يازميشديلار؟
– يوخ، وفات ائله‌مه‌ييمين حاقيقيندا اعلان چيخميشدي. عائله‌م بير اعلان، يولداشلاريم بير اعلان، ايشلهدييم شرکت ده بير اعلان وئرميشدي. بونلاري کور دا گؤرردي.
– گؤزومدن قاچيب
– وفاتيم حاققيندا ائله گؤزه‌ل اعلان وئرميشديلر کي، اينانين وفات ائتدييمه سئوينديم. اعلانين سؤزلرينين هاميسي ياديمدادير. دينله‌يين ازبردن دئييم: »چوخ آغير بير ايتگي« ـ بيرينين باشليغي بئله ايدي، اوبيرينين باشليغي دا بو جوردو. »علمي بير ضييا. .« »باباميز دوستوموز قايينيميزين قارداشي اوغلوموز کوره‌کنيميز مملکتيميزين تانينميش خاديم‌لريندن بيري »آل گتير« شيرکتي‌نين تشکيلاتچيسي،»گل آل«‌شيرکتي‌نين شريک‌لريندن بيري، باش وزير سولو سليمان پاشانين نوه‌لريندن بيري، ماحمود پاشانين توره‌مه‌سي، قاسيم پاشانين نتيجه‌سي، بايرام پاشانين کوره‌کني‌نين قارداشي اوشاقلاريندا بيري. .او يئنه صادالاماق ايسته‌ييردي، سؤزونو کسديم:
– ذات‌ي عالينيزي تانيديم بي افندي. بسدير اؤزونوزه زحمت وئرمه‌يين بيلديم، اونلاردانسينيز. بس نه عجب سيز ده بورادا گؤزله‌ييرسينيز
– باسديرماغا يئر تاپميرلار. البته قوهوم ـ اقربالاريميزين باسديريلديقي قبرستانليقدا يئر وار. ايندي اوردا يوخسول‌لاري باسديريرلار. مني تزه قبرستانليقدا باسديراجاقلار. اورادا کي، قبيرلر لوکس قبيرلردير. آدلي ـ سانلي آداملاري اورادا باسديريرلار. همين قبرستانليقدا يئر تاپيلمير. هاميسيني توتوبلار. منه بير نئچه فبريستانليقدا يئر وئريبلر، آما عائله‌ميز بينمه‌ييب. اونلار منه گؤزه‌ل منظره‌لي يئرده قبير آختاريلار.
– البته بونلار اؤلو اوچون دئييل، زيارته گلن‌لر اوچوندور. قوهوم ـ اقربام الينده چيچک مزاريمين اوستونه گلنده منظره‌لي بير يئرده اوتورماق ايسته‌ييرلر. »بو گؤ زه‌ل دونياني نييه قويوب گئتدين‌؟« دئيه مندن چوخ اؤز حاللارينا آغلاياندا ايسته يير‌لر کي اوتوردوقلاري يئر گؤزه ل اولسون اگر منيم مزاريم پيس يئرده اولسا بو دونيانين گؤزه‌ليي ني دويا بيلرلرمي‌؟ سبب تکجه بو دئييل. عائله‌ميزين ده شرفي وار. عائله‌م ايسته‌يير کي، شرفيميزه اويغون آديميزا ـ سانيميزا لاييق بير قبير دوزه لتسين. مادام کي عائله‌ميز اؤز شرفينه لاييق بير ايش گؤرمک فيکرينه دوشوب، دئمک مطلق قارا بورسا مزارليغيندان يئر آلاجاقلار. باشقا مسئله ده وار. اوچ آي بوندان اول بيزيم رقيب شيرکتيميزين ياراديجيلاريندان بيري اؤلموشدو. اونا قارا بورسادا چوخ باهالي بير قبير يئري آلديلار. اگر من اوندان اوجوز بير يئرده دفن ائديلسم، هم عائله‌مين شرفي ايکي قپه‌ليک اولار، هم ده شرکتيميزين تجارت ايشي حؤرمتدن دوشر. باشا دوشدون. باخ بونا گؤره شريک‌لريم مندن اؤتور چوخ باهالي بير قبيريئري آختاريرلار.
– تاپا بيلمه‌ديلر؟– نئجه يعني تاپا بيلمه‌ديلر. آي ـ هاي! بورساداکي قبير يئرلريني بيزيم شرکت ساتين آليب. داها دوغروسو من اؤزوم آلميشام. قارا بورسا قبريستان‌ليغي بيزيمدير، آنجاق مني اورادا تئز باسديرسالار قارا بورسانين قيمتي دوشر. اؤزلري ايشي لنگي‌دير‌لر کي، رئکلام اولسون. قبيرلرين قيمتي آرتسين. دوشوندون؟
سئويملي قارداشيم ائششک آريسي!
بوردا يازيلاجاق شئي چوخدور. اؤلولر دونياسي ديري‌لر دونياسيندان هئچ ده گئري قالمير. هردن بير نه ائده‌جه‌ييم حاققيندا دوشونورم. اؤلمکدن امتناع‌مي ائديم دئييرسن‌؟ اؤلمه‌يين بو قده‌ر ظولم اولدوغونو بيلسه‌يديم هئچ اولدن بو ايشه گيريشمزديم؟ ايشلريم ساهمانا دوشسه، اؤلمه‌ييم رسمن تصديقلنسه، بيرآز يورغونلوغومو دررديم.
قارداشيم ائششک آريسي!
اگر اؤله‌جکسن‌سه، آمان گوندور، واختيندا اؤل. يوخسا بو گئديشله گئتسه بوتون قبريستان‌ليق‌لار باهالاناجاق، لاپ قارا بورسا قبريستان‌ليغيندا کي کيمي، قبرين قيمتي قيامته قالخاجاق، اوندا نه ائليه‌جک‌سن‌؟ ياتماغا قبير ده تاپا بيلميجک سن ائشيتدين‌مي، واختيندا اؤل، سونرا اؤله‌ده بيلمييه‌جک‌سن قارداش!
گؤزلريندن برک ـ برک اؤپورم
سالام واحترام: اؤلموش ائششک آريسي

منبع :