قارانليق، زيندان دووارلار بو تايي‌ديليم آچيلمير … دوشونوشونو دايانديريب اؤزون سکوته بوراخدي. اصلينده ائو‌هاواسين سکوت بوروموشدو، بئينين سکوته بوراخدي. بيريسي‌له دانيشيب شعرين اوخوماق ايسته‌ييردي آمما کيم‌له، ياخود کيملرله باش باشا قويدوغونو چوخدا ياخشي بيلميردي. گوزلريني قاپي‌سينا ‌ديکدي، شوبهه‌لي شوبهه‌سيز اونونلا خوسونلاشماق ايسته‌دي، واز کئچدي – بلکه‌ده آرخاسيندا بيري وار ‌دييه. قاپيدا اؤنونده دورانلارين گؤزونه زيلله‌دي گؤزونو…او زيلله‌دي آمما بير گؤز گؤرمه‌دي…گوره‌مه‌دي. بلکه ده مانکن‌لرميش قاپي‌نين او تاييندا، مانکن‌ده باخار گؤز اولماز‌ دييه. بو مانکن‌لر ساققالي – ساققالسيز، گوزلو – گؤزسوز، باشلي_ باش‌سيز، قولاغلي – قولاغسيز، دوداقلاري ايسته‌نيلن زامان آچيلان… گؤزلويون تاغدي. گؤزلوک آرخاسيندان قاپي‌سينا باخدي…قاپي باغلي. دوداغينين اوجو قاچدي. بو قاچيش اوزاناراق بوتون دوداغيني بورودو. بوغازيندا کؤتوک‌سوز بير سس دوداغلارينا هجوم ائدرک اونلاري آييريب گولوشه ساري سوروکله‌دي. گولوشونون سببين بيليردي. گؤزلرين قاپيدان آيريب دوآرلارا ساري اويناتدي…هاوا بولوت‌… دومانلار بوروق- بوروق، بيربيرينين ايچينده اويناييب بوتونلشير، قاطارا چئوريليرديلر. قاطارلار چمن‌لري، آغاجلارين يارپاقلاريني‌سييره‌رک اينجه سو دامجي‌لاريلا اونلارين اوزه‌رين بزه‌ميشدي. بو کئچن گئجه‌دن دوام ائتميشدي. گئجه‌نين قارانليغيندا يويولموش يارپاقلار هه‌له‌ده ترلرين قوروتماميشلار. اؤزون يالنيز گوروردو، آمما يالنيزلانميردي او.‌سيخ دومان هر طرفين بوروموشدو. گؤزون اوزاقلارا زيلله‌دي، گورمک مومکون اولماديغيندا شئحلي چمنه زيلله‌ييب دوردوغو يئرده دوردو. بولاغين سويونون اينجه و‌هاوالي سسي بئينينده اولان سوکوتو پوزموشدو. سسه ساري ياووقلادي. – اوتور… بولاق، يان طرفده‌کي ياستي بير داشي گؤستررک، اونا دئدي. گولوش دوداغيندان ياواش ياواش پوزولاراق، – بيري وارميش منيمله دانيشان… مني گؤره‌ن…اؤزو اؤزونه دئييب ياستي داشين اوستونده اوتوردو. قولاغلارين بولاغين شيکسته‌سينه اويدورب کؤنلونون تار کاماني‌يلا اونونلا يولا دوشدو. عزيزينم اويان گول اويان بولبول اويان گول »بولبول« فغان ائيله‌يير نه ياتميسان »اويان«، »گول« آمما بولاغين، اؤزونه قارشي چوخ سؤزو اولدوغو عاغلينا هوپوب داياندي. – نه دورموسان؟ بولاغ دئدي. – نه ائدمه‌لييم!؟ سوروشدو اؤزونو ياشلي، آغ‌ساققال بيريسي‌نين قارشيسيندا حيسس ائدرک نه ائتدييني بيلميردي. – گؤزونو زيلله گؤزومه، نه دورموسان؟ بولاغ آمرانه آمما محبت دولو سسله دئدي. – من گؤزومو آسماغا گؤز آختاريرديم…! سئوينرک دئييب گؤزون بولاغين گؤزونه‌ ديکدي. بولاغين‌سينه‌سينده قات – قات دئپولانان دنه‌ي‌لري، سؤزلري حيسس ائديب اؤزون بير بولاق ساليندا دئييل، دنيز سالينده بولدو. – ايندي ياخشي گؤزومه باخ، نه گؤرورسن؟ بولاغ سوروشدو. – آمما من بوردا بير نچه باليغدان سوائي بير شئي گؤرمورم، اونلاردا اؤزلريله اوغراشيب مني گؤرمورلر، منيم قاپي‌مين آرخاسينداکيلار کيمي، بلکه ده اؤلوبلر! دئدي. – يوخ اؤلمييب‌لر، من اؤلسم اونلاردا اؤلرلر، من ايسه تا دايانماميشام اؤلمه‌رم، اؤلوم سکون‌دادير. باخما منيم »گؤزو« مون خيرداليغينا، بير اوجوم ده‌نيزه بير اوجوم ايسه ساوالان‌آ باغلي‌دير. آنام ساوالان، آخاريم ده‌نيز‌دير. آخاريما قوشولان آزاد دريا عالمينه قووشار. هله اونلار شوبهه‌ده‌ديرلر، عجبا »خيرداجا قارا باليغ« مقصده يئتتي‌مي؟ عجبا بو دار »گؤز« دن باشقا بير يئر وارمي؟ بلکه‌ده »خيرداجا قارا باليغ«ي بيريسي يئدي!؟ ايش بئله گئدسه…‌دييرَک، بولاغ دئدي. بولاغ باخيشيلا اؤز آخارينان آخيب اونا گوستردي… گؤزلويون گوزدن آليب قاپييا باخدي. – »خيرداجا قارا باليغ« مقصده يئتتي‌مي!؟ يوخ …قاپي‌يا دئدي. قاپي خيسين‌خيسين باخاراق دئدي: – مندن نييه سوروشورسان!؟ – سندن باشقا بوردا منيم کيميم وار کي؟ او دئدي – من سنينم مي؟ قاپي سوروشدو. آمما بو سوآلي ائدرک اؤزو اؤزونه دئدي: – “هرکسين ائوينين قاپيسي اؤزونوندور البت، قاپيدان کيمين چيخيب کيمين گيره‌جه‌يي قاپي صاحيب‌ينين ايختيياريندا، قاپي‌نين آچيليب اؤرتولمه‌سي ائو ايچينده‌کيندن آسيلي اولوب اونا امنيت ساغلار… بو ائل قايداسي‌دير، بشريت قانونودور، بونا شوبهه يوخ.” – بونا شوبهه‌ن‌مي‌وار!؟ سوروشدو. بو سفر قاپي معنالي گولومسييرک سوروشدو: – او زامان نه‌دن بيلميرسن‌هانسي ايلين‌هانسي فصلي‌دير؟‌هانسي آيي‌دير؟‌هانسي گونودور؟‌هارادا اولدوغونو، ساعاتي بيله بيلميرسن! من سنينم‌مي؟ – البت! بودور آچارين. دئدي. – آچار سنيندير، دوغرو…آمما “آچار سنيندير” قده‌ر سنينم. سن »ماليک« اولدوغون قاپيني آچيرلار، اؤرتورلر، ايسته‌ديکلري زامان. من نئچه اَللر اسيري‌‌يَم بوردا، سنده »يوللار« اسيري سن منيم آستانام‌دا. قاپي دئدي. – چوخ شئي‌لر بيلير قاپي، من بيلمديييم- اؤزو اؤزونه دئدي. – بلکه ده باشينين بلاسي اولدوغوندان بونلار‌هاميسي… خيرداجا قارا باليغ… بولاغ‌ين سؤزلري…آمما دومانلارين دا‌سينه‌سي دولويدو…بنوشه‌لر بولاعين يانينداکي بؤيوک داشين ‌ديبينده، بويونلاري بوکولموش، يازيق اينسالار تک، آمما عطيرلري بوتون يان يؤره‌ني بوروموشدو…نه دن ساييلميرديلار!؟ آيري اولسايديلاردا آمما عطير‌لري عيني ايدي، اؤزلري ده واحيد اولسايديلار او عطيرنن بوتون باغي آلارديلار اونلار…بلکه ده بيرگون … اولمايينجا مانکن‌ديلر اونلاردا… مانکن‌لر … گؤزسوز، قولاغسيز، باش‌سيز مانکن‌لر …دوداغلاري بيربيرينده بيتسه ده واحيد بير سوز ائتديريلمک اوچون آچيليب، يئنه ده بيتر…موزيک‌سيز کُر قوروپو کيمي… قاپي ‌دينلييردي اونون بئينيندَن گئچن‌لري. يئترينجه سکوت ائتدييني باشا دوشوب دئدي: – آچ مني دور آستانام دا…  قاپينين سؤزون کسه‌رک – بس مانکن‌لر؟ سوروشدو قاپيدان. – اونلاردا سَنون جينسون‌دن‌دير بير نوعي، آمما…قاپينين سؤزين کسدي. – بس خيرداجا قارا باليغ؟ دئييب قاپيني آچيب آستاناسيندا دوردو. مانکن‌لر ‌سيرا ايله، اينتيظاملا دايانميشلار. اوزاقدان قول قولا وئرديکلري گؤرونسه‌ده آمما باشقا باشقا قوطولاردا اولدوقلاري بَللي ايدي. اوزلري بير يئره، گؤزلري سانکي “کيمسه”‌يه زيلله‌نيب. گؤزلريني، مانکن‌لرين باخيش آخيشينا تاپشيردي بير آنليغا. چيخمازليق…‌هاواسيزليق… مانکن‌ليک! – بولاغ، »آخيشيم دنيزه ساري…حيات حرکت‌ده… موجوللانماق اؤلوم کيمي‌دير موجولانان باليغلاري، “خيرداجا قارا باليغ”ي گوستررک دئميشدي… – منيم‌له ‌اوچ… دئدي! – نئجه اوچوم؟ مومکون مو؟ دئدي. – ايسترسن‌سه مومکون اولار، دئدي. – بو نئجه اولدو؟ بيلينج‌لي بيريسينين يانيندا اؤزون حيس ائدرک سوروشدو. – قاپي‌سين آچانا بو ايمکان حاضير، آمما ايسترسه اوچا بيلر، ايسته‌مه‌ين حالدا بولاغين آوارا باليغلاري و ياخود مانکن اولا بيلر. اينديسه قاناد چالماق، اوچماق زاماني‌دير، منيم‌له اوچ…هادي قاناد چال… دئدي. مهربان، ساده، آهنگلي سسي، معنالي سؤزلري بير دوغما وجودون يانيندا اولماسيني حيسس ائتديردي اونا. بو دويغو اونوندا وجودونا، روحونا قودرت هوپدوراراق اوچماغين آلقيشلاييردي. آياغين قاپينين آستاناسيندان اوزمه‌يه قورخوردو. ايستر ايسته‌مزه دوچار اولموشدو، آمما سئويردي اورکدن اوچماغي. قاپي، اؤنونده‌کي جيغيرلارا ايشاره ائدرک دئدي:– اوچمازسان بو جيغيرلارين بيريني توتوب گئتمه‌لي‌سن، بيلينجسيز، کور…ياخود مانکن‌لر دسته‌سينه قوشولمالي‌سان، يوخسا… خيرداجا قارا باليغي گؤرمک ايسترسن‌سه قاررانقوشلا اوچ … قاررانقوش دوغما سسيله، دوغما نفسي‌له يئني‌دن اوزون اونا ساري چئويريب دئدي: – زامان‌ين، مکان‌ين دار چَرچيوه‌سيندن قورتارماغا، گئنيش گؤروش آچيسي لازيم، گنيش گؤروش آچيسينا اَل تاپماق اوچون قاپيني آچيب دار‌ديوارلاردان قورتارماق گره‌کير. بو ايش او قدرده آسان دئييل، آمما ايستک اولسا اؤزوده عينادلا ايستک…بو اولار، عينادلا ايستک باش ‌قالديري‌دير، بو ايستک عشقه آرخالانير…عشق قاناد‌دير، قاناد اوچوش دور، اوچوش دار ‌ديوارلار، دار بولاق گؤزون ترک ائديب »دنيزه« ساري گئدنلرله يولداش اولماقدي. او، قاررانقوشون سانباللي و معنالي دانيشيق‌لاري عالمينده سئير ائديردي. اوخودوغو کيتابلارين جمله‌لريني خاطيرلاييردي… – کيتابلار…کيتابلار جمله‌سي اوچوشا گرک… يولجولوغو باشلاييب دوام ائتمه يه گرک. اؤزو اؤزونه دئييردي. قاررانقوش: – اوچوش يوکسليش‌دي، يوکسلديکجه دونياني گئنيش چاپدا گؤررسن، آمما يوکسليشين اووچولاري، گودولمه‌لري ده وار.قاررانقوشلار… اونلار بؤيوک بير قاطار کيمي‌اؤز نغمه‌لريله هر‌ ديياردان قاطارلارينا يول يولداشي آلاراق باهارا دوغرو قاناد چاليرلار. اونلار ظاليم اووچو يولداشلارينين کؤکسولرين پارچالاماسينا باخمياراق شن باهارا دوغرو قاناد چاليرلار. اونلار باهار ائلچيسي‌ديرلر.