تاختالي کؤيدن مکتوب‌لار

بولگه لر سرويسي: هه، اونلارين هانسي‌سا دئميش کي، »سيز منه ايسته‌ديييم يئلکني وئرين، من ده سيزه کيريت آداسيني اوزدوروب گتيريم«.

يازار: عزيز نسين اسماعيل شيخلي

بولگه لر سرويسي:  هه، اونلارين هانسي‌سا دئميش کي، »سيز منه ايسته‌ديييم يئلکني وئرين، من ده سيزه کيريت آداسيني اوزدوروب گتيريم«.
– گتيره بيلرمي؟
– يوخ اونون ايسته‌دييي يئلکني دوز‌لده بيلمه‌ييب‌لر. اگر دوز‌لتميشلر، دريالار پاشاسي کاپيتان آدالاري گمي کيمي حرکته گتيريب، بؤيوک بير ناوگان دوزلدرميش.
– بوش صؤحبتي قورتارين…
– هه، بير يئرده ايته‌له‌يين، هوپ….!
– بير، ايکي، اوچ…
– لاپ يورولدوق، بير آز آرا وئرين. قويون پاپريز چکک.
– او زامانلار چوخدان کئچيب، قارداش، ائله واختلار ايندي هارادادير، گؤزل گونلر ايميش. بيزيم»يانچار(1)«-لاريميز واريميش، اونلارين بيغلارينين هر طرفيندن بير دوشمن عسگري آسارلارميش. باشا دوش، گؤر نئجه بيغ ايميش. موسيقي تاقـيم‌لاريميز واريميش. يانچار طبيلچيسي طبيلي ائله دانقيلدادارميش کي، يئر- گؤي يئريندن اوينارميش، دوشمنين قورخودان باغري ياريليب دوداقلاري پارتلايارميش. يئر- گؤي تير- تير تيتره‌يرميش. گمي‌لرده ائله ايييدلر وارميش کي، بيرجه دفه نعره چکنده دنيزلرده فيرتينا قوپارميش، دوشمن گميلري قرق اولورموش.
– گؤر داها نه اويدورورسان.
– بونلاري تاريخ‌ ده يازيبلار. تاريخ ‌ده. آمما اينديکي حاليميزا باخ. قيرخ- اللي کيشي توپلاشميشيق، بير قيريق ماشيني يئريندن قالديرا بيلميريک.
– واللاه دوغرو دئييرسن. سن او يانچاري گتير، اونون طبيليني ده گتير، قوي آغاجيني دؤشه‌ييب، طبيلي گورولدتسين. گؤر‌ک بو ماشين يئريندن دوراجاق‌مي؟! واللاه دوز سؤزوم‌دور، يانچار طبيلچيسي طبيل چالسا، بو ماشين قاناد آچيب اوچار، هئچ داليندان چاتماق اولماز.
– اونو- بونو بيلميرم، آنجاق آلمان گميسيني ايشله‌ده بيلمه‌ييب‌لر.
– حرکته گلين، دين قارداشلاري، هايدي آسلانلار….
ماشينين ايچينده اوتورماق‌ دان قان‌- تره باتميش شوفئر ديللندي:
– بيرآزجا يئريندن ترپنسه، اؤزو يولا دوشه‌جک.
– گؤره‌سن باشقا اؤلکه‌لرده ايشله‌ين گميلر، قاتارلار، اوتوبوسلار نييه بيزيم مملکته گلن کيمي دايانيرلار؟
– يا ياديرغاييرلار يا دا مملکتين هاواسيندان‌دير.
– بلي، بو ماشينلار، موتورلار او اؤلکه‌نين هاواسينا اويغون دوزلديليب‌لر. بيزيم هاواميز اونلارا يارامايير. ماشين دا اينسان کيمي‌دير. هر هاوادا ياشايا بيلمير. اينسانين کيمي‌سينه داغ هاواسي، کيمي‌سينه دنيز هاواسي، کيمي‌سينه ده سحر هاواسي دوشور.
– سن ايندي دوز سؤز دانيشمادين. بيزيم مملکتين هاواسي کيمي هاوا هاردا وار؟
– استغفوروللا، بيزيم مملکتين هاواسينا سؤز اولا بيلمز، بيرجه گؤزل هاواميز وار. او دا اولماسا ….. من اونو دئمک ايسته‌ميرم، يعني دئمک ايسته‌ييرم کي، اؤز فابريک زاوودلاريميز اولسا، اؤز هاواميزا اويغون ماشينلار دوزلدرديلر.
– دايانين!
– هايدي ايته‌له‌يين!
هم يئرلي‌لريمين وضعييتي مني ائله سارسيتدي کي، آز قالديم اؤلو اولدوغومو اونودام و اونلارا قوشولوب ماشيني ايته‌له‌يم. اؤلو اولماغين پيس جهتي‌ ده بودور کي، ايسته‌سن ده، ايسته‌مه‌سن ده ديريلره کؤمک اليني اوزادا بيلميرسن. بوندان بئتري ده اودور کي، هئچ اولمازسا کناردا دايانيب، »هوپ« دئيه باغيرا دا بيلميرسن.
سئويملي ائششک آريسي،
بيز اؤلولو- ديريلي، بير- بيريميزي قيزيشديرماغا چاليشارکن، بيردن- بيره آرخادان بير ماشين چيخيب بيزيم تعجيلي يارديما ضرب‌له توخونماديمي! بيزيم ماشينين موتورو بو ضربه‌دن هيرس‌لنيب، گورولده‌دي. ماشين کئشيکچي ايتي کيمي قيزيشيب ايره‌لي آتيلدي. آللاهي سئو‌‌ن بيزيم ماشينين قاباغيني کسمه‌سين! ماشينيميز گولـله کيمي گئتمه‌يه- گئتمه‌يه يوخ، اوچماغا باشلادي! شوفئر دوز دئييرميش »بيرآز ترپنسه دايانماياجاق!«. موتور گئتديکجه گورولتوسونو آرتيردي. ماشين قيزيشدي، دؤنگه‌لردن يئل کيمي اؤتدو، شوفئر قورخويا دوشدو. اوزونو کؤمک‌چيسينه توتدو:
– او ماشين بيزي آرخادان چوخ برک ووردو. قورخورام ماشينيميزي داها ساخلايا بيلمه‌يک.
من ايچري‌ده اولدوغومدان باييري گؤره بيلميرديم. آمما باشا دوشدوم کي، ماشين ايلک يارديم خسته‌خاناسي‎نـين يانـيندان کئچدي. شوفئر ماشيني ساخلايا بيلمه‌دي و کؤمک‌چيسينه آجيقلاندي:
– اوغلان ماشينا بئنزين توًکوبسن يوخسا نئفت؟
کؤمکچي سسيني چيخارتمادي. ايستانبول کوچه‌لريني خئيلي دولاشديقدان سونرا دايانديق. شوفئرين کابينه‌سي ياخشي اولدوغوندان چوخ شوکور هئچ بير قضا باش وئرمه‌دي. اؤزومون درديمي چکميرم. ياشاما ايسته‌ين شوفئرله کؤمک‌چيسي‌نين سالامات قالماسينا شوکور اوخويورام.
سئويملي ائششک آريسي،
تعجيلي يارديم ماشينيندان بايرام گزينتي‌سينه اوخشار سياحتيمده باشيما داها نه‌لر گلديييني گله‌جک مکتوبومدا يازاجام. بلکه يئر اوزونده‌کي سياست آداملاري‎نين داوا- دالاشماسينا عايد يازيلاري اوخودوقجا غصّه‌يه باتان سير- صيفتين منيم يازيلاريمي اوخوياندا بير بالاجا آچيلا.
سالامات قال سئويملي ائششک آريسي
اؤلموش ائششک.

منبع :