خيالسيز کدر

بولگه لر سرويسي:عهده‌چيليک اؤن سيرادا گئده‌ن اساس سؤزدور.

ناصر داوران

»اوختاي وطنخواه«ين»بئله‌دير تانيديغيميز انسانلار« شعري‌نين تنقيدي
بولگه لر سرويسي:عهده‌چيليک اؤن سيرادا گئده‌ن اساس سؤزدور.

شاعر جمعيتيميزين معاش چتينليک‌‌لري‌، سياسي گرگينليک‌‌لري‌ و کولتور دورومونو دريندن دويور و آغلايير. ايشسيزليک و اوندان قايناقلانان اوسانديريجي سونوج‌‌لارين کابوس کيمي اؤلکه‌ميزي قاپساماسي، ضيالي‌‌لارين هده‌لي ياشاييشي، سياسي لاقيدلييين عموميلشمه‌سي، اخلاقياتين انسانلار آرا اوجوزلاشماسي شاعري هيجانلانديرير، قلمينه آجي ياخير. اوزاقدان دوروب باخماغين نه فايداسي؟ بير ايش گؤره بيلمه‌سه‌ده باغيرا بيلر کي، گؤينرتيسيني اوخوجويلا پايلاشا بيلر کي. هله بلکه ده اوخوجودا بير ايز بوراخيب، اونو گره‌کلي دوشونمه‌‌لره يؤنلده‌جک ده. بير آدام بيزيم مملکتي گؤرمه‌ميش اولسا دا، اوختايين همين شعريندن حياتيميزين گنج بؤلومونه عايد اوبيئکتيو معلوماتلار الده ائده بيلر. سانکي دؤيوش ميدانيندان راپورت وئرن بير ژورناليست، هر آن باشقا بير سنگردن باشقا راپورت گؤندرير دينله‌ييجي‌‌لرينه. ايشسيزلييين، يوخسوللوغون دورلو دورلو دؤزولمز سونوج‌لاري، گنج عائله‌‌لرين قورولماميش داغيلماسي، کبين يوکونو داشييا بيلمه‌دييي حالدا قيزيلين گون به گون باهالاشماسينا معروض قالان گنجين دوستاق مجبوريتي، انتحار دوشونجه‌سي‌نين يايغينليغي، ايکي اوزلولوک، اينامسيزليق، نزولخورلوق، آليشقانليق، عالي تحصيلاتين قيمتسيزلييي، فيکير آدام‌‌لاريني توشلايان سياسي هده‌‌لر و… اونون وئردييي راپورتا يئرلشن موتيو‌لردن عبارتدير. بونلاردان بعضيسي شرفلي ياشاماغي آدام ساتماغا، چؤره‌ک اوغورلاماغا اوستون بيلير‌لر. اونلار آزا قاتلاشير، ياوان چؤره‌يه قاتلاشير، آمما اينانماديغي شعير‌لر يازيب، اؤدول آلاماغا راضيلاشميرلار. اگزيستانسيال دوشونه‌رک، سئوديک‌‌لري‌ کيمي، اينانديق‌لاري کيمي ياشاييرلار، اؤيود وئرن‌‌لري‌، لوغاز قوشان‌لاري دا وئجه آلميرلار. هاميسي بورجلودورلار، اؤزو ده آداملارا دئييل، بانکلارا. سانکي سککيز ميليارد آدامي ساغمال کيمي دوشونن بير قدرتلي تشکيلاتين ييرتيجيليغيندان شکايت ائتمک ايسته‌يير شاعر. گئجه گوندوز انسان‌‌لارين امه‌يينه احتراصلا ياناشان بو قورخونج دلبرين ايچ قاتيني نمايش ائتديرمک ايسته‌يير. نزولخورلار دا بانکلاردان ييرتيجي. شاعره و اونون دوست‌‌لارينا نزول وئرن‌لر ده همين ايشي گؤرور‌لر، اؤزو ده لاپ شدتلي. بونجا چتينليک‌‌لره، بونجا آغيرليقلارا دؤزه بيلمه‌ين بو الي بوش گنج‌لر بعضا انتحار فيکرينه دوشور‌لر. اؤز حيات‌‌لارينا سون قويماقلا اعتراض بايراغي قالديريرلار اونلار. شعرين آيري يؤن‌‌لري‌ ده اولماليدير آنجاق.بونلارا اؤنمسيزجه‌سينه ياناشير شاعر. خيال تماميله اونودولوب بو شعيرده. شعرين خيالي مؤوقعي يوخدور، سؤزجوک‌لر تماميله سؤزلوک‌‌لري‌ تمثيل ائدير. شاعر شعريني گوجلنديرمک اوچون بو امکاندان محروم قالير. اونون بوراخا بيله‌جک ايز‌‌لري‌نين ساحه‌سي کيچيلير ايستر ايسته‌مز. ايماژيستي شعرين، ايماژدان باشقا، هر نه‌يي بو شعيرده وار: ديل کوتله‌نين دانيشيق ديلي‌دير، شعرين آزاجيق اوزونلوغونا رغما ايجازدان فايدالانماسي گؤزه چارپير، اوندا دانيشيلان موتيو‌لر(ايشسيزليکدن باشقا) تکرار اولمور، سؤز‌لر آچيق و ابهامسيزدير و شعار اونون نقصان کيمي دويولان اؤزللييي‌دير.
اوختايين بو شعري فروغون «دلم براي باغچه مي‌سوزد» شعريني يادا سالير. بوتون ادبي اثر‌لر، ايستر رمان اولسون، ايستر شعير، بينامتنيت اؤزلليييندن فايدالانماقدادير. اوختايين شعري ده هکذا. بو ايکي شعيرده، وئريلن راپورتلارا اساسا، فورما بنزرلييي وار بير آز. بير آز دئيه‌رک، تآکيد ائتملي‌يم کي فورماني يالنيز ظاهري بنزرليک‌لر تشکيل ائله‌مير. اصلينه دورسان فورماني تشکيل ائله‌ين عنصر‌لر، شعرين اساس آيتم‌‌لري‌ کيمي تانينميش، شکيل، محتوا، خيال و ديلدن عبارتدير. فروغون شعرينده گوجلو خيال گئدير، حالبو کي اوختايين شعرينده خيالدان هئچ بير ايز يوخ. بو دا بو ايکي شعرين اساس فرقي‌دير. آنجاق محتوا باخيميندان ياخينليق‌لاري چوخدور اون‌‌لارين. هر ايکي شاعرين آتاسي بير بيرينه بنزه‌يير. فروغون آتاسي عهده‌چيليکدن قاچاراق، سحردن آخشاما اؤز اوتاغيندا اسکي دؤوره عايد شعره و تاريخه سيغينير:پدر ميگويد:»از من گذشته است/ازمن گذشته است/من بار خود را بردم/و کار خود را کردم«و در اتاقش، از صبح تا غروب،يا شاهنامه مي خوانديا ناسخ‌التواريخ.اوختايين آتاسي يالنيز خبر‌‌لري‌ دينله‌مک‌له مشغول اولور:آتام خبر‌لرده دئييلن سؤز‌‌لري‌ ازبر‌لر.اوردا شاعرين قونشو‌لاري باخچا‌‌لاريندا قومبارا و آفتامات اکير‌لر، بوردا اعتراض اوچون انتحارا فيکيرلشير‌لر.اوختايين شعرينده بير شئي ده وار کي من اونا قاتيلا بيلميرم. او دا قادين حياتينا لاقيدليک‌له ياخينلاشماسي‌دير، اؤزوده دولايي ياخينلاشماسي. رستم حيات يولداشيندان بوشانير، اونون کبين قراريني يئرينه يئتيرمک امکاني يوخدور، اودور کي زندان چکمه‌يه مجبور اولور. اصلينده بوشانديغي کيمسه اونو زندانا سالديريب. اون‌بير ايلدير ده زنداندادير. قادين‌‌لارين خيلي اورتاق پروبلئم‌‌لري‌ وار. بون‌‌لارين هئچ بيريسي اوختايين شعرينه يول تاپا بيلمه‌ييب الا کبين مساله‌سي و اونون واسطه‌سيله احتراص. قيزيل سئوگييه غالب گلير اونون حياتيندا سانکي. منجه قادين حياتيني بو کيمي آشاغيلاشديرماق هئچ ده ياراماز. قادين‌‌لارين سايسيز چتينليک‌‌لريني دويمادان يالنيز کبين مساله‌سينه توخونماق، او دا منفي باخيمدان، جمعيت‌‌لرين ياريسيني اونودماق و دانماق دئمکدير.

منبع :