مني آگورادا يانديرين

بولگه لر سرويسي:ذهنيزي يوْرمايين. توْرپاق آلتداکيلارين هئش بيرينين دوداغي ذاتاً ترپنمز کي سواللارا جواب وئرسين. اگر روح آديندا بير شئي وارسا، يقين کي جيسم عوضينه او جواب وئره‌جاخ.

أليني أنگينه ديرسکله‌ييب، ديک- ديک اوزمه باخير. ائله‌بيل اوزومده آي بيتيب! ياديما گلن سحر أل- اوزومو يوموشام. يولدا گلنده سئرچه‌لرين لوطفونه مشمول اوْلسام اگر، اونو دا بيلميرم! اونون بئله دقتلي باخماغي منيم اؤزومو ده شوبهه‌لنديرير. أليمي‌اوزومه چکيرم. بئله ده جسارتله باخماق اولار آخي..!؟ بلکه سحردن بويانا خبريم اولمادان آغيز- گؤزوم أييليب!؟
خئيلک‌ کئچندن سونرا دئيير:»مه‌يه سيز قبرين اوّل گئجه‌سين گؤروبسوز کي بئله يقين‌ دانيشيسيز؟«سوروشورام: »سيزجه من قبيردن خورتلايان آداما بنزيرم؟«بير آن مني ده فلسفي بير يأس بورويور. دوغوردان دا قبرين اوّل گئجه‌سي نئجه بير گئجه‌دي؟ آنام نئجه بو گئجه‌ني کئچيره‌جک؟ ياني بير هفته‌دي سردخانانين دولابيندا قبرين اوّل گئجه‌سيني گؤزله‌يير؟! ايندييه‌جن کيمسه گليب اوندان سوال- جواب ائله‌مه‌ييب؟ گرکدي کي يالنيز تورپاق آلتيندا سوال- جواب اولسون؟کارمند خانيم سوروشور: »اؤلو فيلسوفدي؟«»يوخ! آنامدي!« دئييرم.
نه‌قدر ادبلي يامان يوْوز باشاريرام، اوره‌ييمده آنامين ديري قالميش ائل- طايفاسينا سوخوشدورورام. ويزا داليسيجا قاچماقدان يورولموشام. هرچند آنامين تعصوبونو کارمند خانيما وئرميرم آمما اوره‌ييمده دئييرم: »يئر قيتليغي‌يدي آرواد..؟ آخي آگورادا يانديرماق دا اولدو وصيت؟! واللاه ساعات قاباغيندا يانديرماق يوز دفه ويزا داليسيجا قاچماقدان راحاتدي.«کارمند خانيم عصبي بير صيفتله آنامين ويزاسي اوچون بير نئچه يئره زنگ ائله‌ييب، يول- يؤندم آختارير.
من ايسه اؤزومو اونون آتماجا سؤزلرينين آغيرليغي آلتدا أزيلميش کيمي‌ حيسّ ائديرم. فيکيرله‌شيرم نئجه جواب وئريم کي هم اونون سؤزلرينين آلتيندا أزيلمه‌ييم، هم ده ايشلري قاريشديرماييم. هر باخيمدان باخديقدا روزومو کوْر ملک ألينده گؤرورم. اؤزو ده گؤزلرينه ياشيل لئنز تاخميش کوْر ملک!او آن قاپي آچيلير، باشي داز، ألينده عصا، ديم- ديک يئريين بير کيشي ايچري گيرير. ائله يئرييير، دييه‌سن ألينده‌کي عصانين بيريني ده قاباقجا اوُدموش.
بدنيني بير آز بوش بوراخسا عصا أنگيندن ائشييه چيخار. کارمند خانيم اونو گؤرجک عصبانيتي پررررّ… اوچوب گئدير.
پؤرتوشمه‌سي سؤنور. منيم سؤزومو آغزيمدا قويوب، گولومسه‌يرکن آياغا قالخيب ايش ميزينين داليسيندان ائشييه چيخيب، کيشي‌له خوش- بئش ائديب، ميزينين قيراغينا بير صندل چکير.»بويورن أيله‌شين پروفسور!«اوره‌ييمده دئييرم: »پروفسوردي اؤزونه. صندل چکمه‌ييوه دئييل، خانيماخانيم!.. من اوندان قاباق گلميشم. اوّل منيم ايشيمي‌يولا سالماليسان.«کارمند خانيم يئرينه گئري دؤنوب أيلشنده هيجانلا پيچيلدايير:»فلسفه اوستادي‌دي پروازي اوستاددي. اصلي- کؤکو تبريزليدي آلماننان گلر.«فلسفه اوستادينين اوزونه باخارکن تاخما بير تبسوم قوندورورام دوداغيمي بوجاغينا. آنامين ياسليسي‌يام. اوندان آرتيق دوداغيمي‌قاچيردا بيلمه‌رم. اوستاد ايسه مني  قوندارما تبسومومه ادب اوزوندن باشيني ترپه‌دير.کارمند خانيم پرفسورو گؤروب اوره‌کله‌نير. بير پروفسورا، بير ده منه باخيب دئيير: »اولماز وصيّتدن واز کئچه‌سيز؟«منسه قاشلاريمي‌ييغيب دئييرم: »يوخ، اولماز! اولسايدي عاغليم قاچميشدي دارالترجمه‌لري دولانيم؟ خانيم، ?? ديله ويزا تقاضاسي يازديرينجا ده‌دم يانيب.«او ايسه عاجيز قالميش آداملار کيمي‌دئيير: »اولماسا عاليم يا بيليجي بيرآدامنان مشورت مصلحت ائله‌يين، فرض ائله‌يين وصيت نذير کيمي‌بير شئيدي. گؤروسن آدام هردن ائله نذير ديير کي، يئرينه قويا بولمور.
عاليم‌لرين يول يؤندملري ده ائله بئلنچي واختلار کارا گلر دااا.«اونون سؤزنه حئيران قاليب، مات- مات اوزونه باخيرام. او ايسه دئدييي سؤزو گئنه تکرار ائله‌يير:»آخي بو دا اولدو وصيّت؟«سؤزلريندن توهين اييسي دوُيورام. عصب‌لريمه توخونور. کاش ميزينين اوستونده بير ليوان سو اولاردي اجازه‌ آلمازدان اونو گؤتوروب بيرنفسه ايچرديم.پروفسور قولاقلارين شوشله‌ييب، بيزيم تارتيشماميزا قولاق آسير.
کارمند خانيم منيم صيفتيمدن عصبي حاليمي‌دوُيوب، دارالترجمه‌دن آلديغيم ?? واراق ويزا تقاضاسي ألينده، يومشاق لحن‌له سوروشور:»دوغوردان هله دئه گؤراخ آگورا‌هارادي؟ نمنه‌دي؟ قبريستاندي؟«من آغزيمي‌آچماميش پروفسور منيم يئريمه جواب وئرير:»قيزيم! آگورا فلسفه‌نين دوغولدوغو يئردي!«کارمند خانيم جانا گلميش بير حالدا دئيير:»بئله ده اؤلوم فلسفه‌سي اولار آخي؟!«من ده يورقونام. اؤلو آنام اولماسايدي، آللاه بيلير آغزيمدان نه‌لر چيخمازدي! آمما دار- دونيادا يالنيز بير آنام وار ايدي. اؤلندن بري قاچاقاچدايام. ويزا داليسيجا قاچماق باشيمي‌ائله قاتيب کي، بير قيز ورثه‌سي کيمي‌هله اؤلوسونه دويونجا آغلايا بيلمه‌ميشم. گؤزلريم دولوخوب. بو ياشيما چاتماغا دئييل، نه آنامين ياشام فلسفه‌سيندن باشيم چيخدي، نه ده اؤلوم فلسفه‌سيندن. يالنيز بونو بيليرم کي، وفالي بير قيز ائولادي تک اونون وصيتيني يئرينه گتيرمک منيم بورجومدو.»سيز غيرمومکون بير ايشين داليسينجاسيز.
يوز ايل قالسا دا، اؤلويه ويزا وئرمزلر. والـلاه، بيلـلاه، من چوخلاريني تانيرام کي عزيزلري اؤلندن سورا وصيتيي امکانسيز اولدوغونا گؤره ورثه‌لرين اؤزو اؤلونون تکليفيني معلوم ائله‌ييبلر.«
پروفسورون باخيشيندان بللي‌دير کي وصيتين نه اولدوغونو بيلمه‌يه جان آتير. سونوندا اؤزونو ساخلايا بيلمه‌ييب، کارمند خانيمدان سوروشور:»قيزيم! بيردن- بيره‌هاردان آگورا عاغليوا چاتدي؟!«او ايسه منه باخيب، سوروشور: »پروفسورا دييه بيللم؟«اذن آلديغينا گؤره، بلي دئمک يئرينه باشيمي‌ترپه‌ديرم. يوخسا اذن وئرمزديم تانيماديغيم آداما بير کلمه مندن سؤز دئسين.
کارمند خانيم منيم ويزا تقاضالاريمي، آنامين وصيتيني، اؤلوسونون بير هفته سردخانادا قالماغيني ناغيل کيمي‌پروفسورا سؤيله‌يير.پروفسور ماجراني ائشيدندن سونرا آنامين وصيت‌نامه‌سيني اوخوماغا ماراق گؤسته‌رير. منسه أليم هر يئردن اوزولموش آداملار کيمي‌وصيت‌نامه‌نين کپي‌سيني کيفيمدن چيخاريب، اونا وئريرم.
پروفسور باشيني وصيت‌نامه‌دن قالديراندا گؤزلري پاريلدايير. مندن سوروشور:»قيزيم! سن بيليرسن آگورانين معناسي ندي؟«»من بيله‌سي آگورا آتن‌ شهرينده بير مئيداندي.«»هئچ بولوسن بو تبريزين اؤزونده نئچه آگورا وار؟«گؤزلريم چيخير تپه‌مه. کارمند خانيم تعجوبلنمکده مندن قاليجي دئييل.»ساعات مئيداني، شاهگؤلو مئيداني، چوپور مئيداني، کريمخان مئيداني، آبرسان مئيداني، فهميده مئيداني و… گئنه ساييم؟« حئيرتله پروفسورا باخيرام. قالميشام نه دئييم!»قيزيم! آگورا ياني شهرين مرکزينده جاماعاتين ييغينجاق مئيداني. بيرينجي دفه يونانلي‌لار بو آدي آتن شهرينين اؤزل مئيدانينين اوستونه قويوبلار. آتن‌ده‌کي آگورا هم بحث- دانيشيق يئري‌يدي، هم ده شهرين اؤنملي قرارلاري، قانونلاري بو مئيداندا گئچيريلردي. بونو بيلمه‌ليسن کي ساعات مئيداني تبريزين لاپ بئله اؤنملي آگوراسي ساييلير.«پروفسور دانيشديقجا منيم ايچيم راحاتلاشير. دونيانين آغير يوکو آستا- آستا چيينيمدن يئره قويولور. دئيه‌سن پروفسور منيم قورتولوش مله‌ييم‌دير.
اگر وصيت‌نامه‌ني دقت‌نن اوْخوساز، باشا دوشرسيز کي رحمتلي مرحومه نيشانه‌باز بير آدام ايدي. وئردييي نيشانلارا گؤره اونون منظورو آگورادان ساعات مئيداني‌دي.اوره‌ييمده دئييرم:»حتما وصيت‌نامه‌ني يازديراندا گئنه ده آنامين أنايينليغي توتموشدو«آنامين عادتي ايدي ساده بير سؤزو عجيبه- غريبه نيشانه‌لر ايله پيرتلاشديريب، دئسين.
پروفسور آرتيرير: »نظريوه نييه بو وصيت‌نامه‌ده يازيب، مني يانديراندان سونرا، تورپاغا تاپشيرمايين، بير اووج کولومدن بير شوشه‌يه تؤکوب، بئشينجي کيلاسين درس‌ليکلريله بيرگه بير ويترين ايچينده ساخلايين؟«گيجلميشم. پروفسورون سوالي تاپماجا کيمي‌ گلير. آمما ياخچي بيليرم کي آنام بئشينجي کيلاسي آنا ديلينده درس اوخوموشدور.
اونا گؤره بئش عددي و بو عددله باغلي هر نه وار ايدي، اؤزلليکله بئشينجي کيلاسين کيتابلارينا عجيبه بير علاقه‌سي وار ايدي. کؤهنه‌ليکدن ساپ‌ساري اولموش کيتابلار آنامين اؤزل اشيالاريندان ساييليردي.»مه‌يه شهرداري اجازه وئرر ساعات مئيدانيندا بير واراق کاغيذ يانديراسان؛‌هاندا قالسين آنامين اؤلوسو..؟!«
پروفسور سويوق‌قانليليقلا منه باخيب، دئيير: »وصيت‌نامه‌ني گؤرستسن بلکه سيمووليک اولاراق قبول ائله‌ديلر. منه گؤره مرحومه‌نين يئرينه بير سيموول نظرده توتون. سونرا اونون آديني سيموولون اوستونده يازيب،‌هاي کويسوز ساکيت بير واختدا اوردا يانديرين. بئله‌سي وصيتي يئرينه گتيررسيز. فيکر ائله‌ميرم بو ايش اؤلموش بير آداما ويزا آلماقدان چتين اولسون!«
دئييرم: »ياني ايندي دولودان قورتولدوم دامجي‌يا راست گلديم؟«پروفسور دئيير: »مرحومه عجب هوشولو- باشلي اينسان ايميش! بونا دئيرلر فلسفي اؤلوم. کاشکي مرحوم اؤلمه‌ميشدن اونو ياخيندان تانييارديم.«آنامين وصيت‌نامه‌سيني آليب، قاپيدان چيخا- چيخدا اؤز- اؤزومه دئييرم: »بويور! بو ساعاتدان شهرداري مصيبت‌نامه‌سي باشلاندي! گل ايندي اورداکيلارا دوشوندور کي، ساعات مئيداني ائله همان آگورادي!«

منبع :