سئودا (پووئست)
سئودا (پووئست)
1400/08/09
بولگه لر سرويسي: اوتورارکن بدري‌دن سوروشور:– آا جان‌لا دانيشدين؟
نريمان ناظيم
بولگه لر سرويسي: اوتورارکن بدري‌دن سوروشور:– آا جان‌لا دانيشدين؟
– هه، دانيشديم.– نتيجه‌سي نه اولدو؟– هئش زاد! – دئيه، بدري آه چکيب، ديزلرين قوجاقلادي.– معلوم‌ايدي نه دئيه‌جک! يوخ داي، فايدا ائله‌مز، والسلام فايدا ائله‌مز!حاج اکرم خانيم آجي- آجي گولومسه‌يير:– ياني سن حاجي‌نين جاوابين قاباقدان بيليردين؟– حدس ويريرديم نه دئيه‌جک.– وئي بالام! بس نه اوچون بدريني ائو ائشييندن آوارا ائله‌دين؟– ايسته‌ديم او دا جرياندا اولا. بير ده سنه ثابت اولا کي هئش کيمين اليندن بير ايش گلمير. هئي اوتوروب دئمييه‌سن منيمکي‌لر منه يانميرلار.
فخري اينجيک باخيشلا آناسين سوزور، سونرا دئيير:– آي آبا، آي آبا من سنه نه دئييم؟! واللاه بئجاها يئره اؤزووو يورورسان. او گون ده سنه دئديم، دئديم آبا آغير اوتور باتمان گل. بوندان آرتيق اؤزووو يونگول ائله‌مه. او آرواد بوشانان دئييل. باخمادين. آخي سن هئش کسين سؤزونه باخميسان کي. باخسايدين بو اويونلار بيزيم باشيميزا گلمزدي. آخي گؤر سن الله هانسي ديوانه اؤزو اؤز آياغيلا گئدر اؤزونه گونو آختارار؟! آمما سنين بئينيوي مچيدده ائله دولدوردولار کي اؤزون بو ايشه قول قويدون هئچ، اؤزگه‌لري ده چکدين آرايا. سن بو ايشله تک اؤزووو يوخ، آآجاني دا بدنام ائله‌دين. گؤر ايندي جماعت اونا نه گؤزده باخير. من کي صؤحبتي دوشنده اوتانديغيمدان اريييب يئره گيريرم واللاه. سن بيزيم باشيميزي آشاغي ائله‌دين. ايندي کي ايشي يئتيريبسن بو يئره، اقليکم قوي دايانيب بوردا قالسين. بوندان آرتيق آبير تؤکدو ائله‌مه. کيشيني داها دا خاراب ائله‌مه! اوننان کئچنده او يازيق آروادين گوناهي نه‌دير؟ بئله آبا، بيز اونون ائلچيليگينه گئتميشيک، او کي گليب بيزيم قاپيني دؤيمه‌ييب. آللاها خوش گئتمز آخي. نئجه‌کي بويون آل، صاباح بوشا! ياني خلقين زنده‌يانليغي اويون اويونچاغدي؟! آداما نه دئيرلر، بو سؤز ائودن ايشيگه چيخسا داي اونو ييغيشديرماق اولماز. دونن بير، بويون ايکي، منيم اريمين فاميل‌لري منيم باشيما چاليرلار. هله من هئي اؤرتوب باسديريرام کي بو قضييه‌ني دويمويالار؛ آمما آروادين بو ائودن کؤچمه‌سيندن شهله‌نيبلر، هئي قوردداليرلار گؤره‌لر نه خبر وار.
فخري بير لحظه دورومسونوب سونرا دئيير:– خيلاصه دئييم آبا، باخ، باشيوي قات اوروش نامازيوا؛ سسيوي چيخارتما، والسلام! يوخسا اگر بو فيکيرده اولاسان کي آروادي بوشاتديراسان، باخ بو خام خيالدي، داي بو فيکري باشيندان چيخات!حاج اکرم خانيم يئلي آلينميش پيره‌موس کيمي گورولتودن دوشور. هاچاندان هاچانا بوغوق سسي ائشيديلير:– يوخ باجي باشيوا دؤنوم من بو زيپپيلتييا دؤزه بيلمه‌رم. هئش دئميرم ده اونو بوشاسين؛ آمما ايکي کل بير چيمنده اوتداماز. ايندي کي خيرچا گلدي سيش خييارادي؛ ائله مني قورتارسين. کبينيم حلال جانيم آزاد، والسلام. مني قورتارسين.فخري سارسيلميش حالدا دئيير:– آي آبا سن الله بير شئي دئ قوي عاغيلا سيغان اولسون!
فروغ استهزايلا قيميشير:– بئله سؤز دئيير کي پيشميش تويوغون گولمه‌يي گلير!
حاج اکرم خانيم ايتي باخيشيلا اونون سؤزون کسير:– پيشميش تويوق غلط ايليير سنين قيريلميشيننان منه گولر. آلله ويرميش آدامين نه‌يينه گولرلر؟! بئله چکمميرم باجي، چکمميرم. بئله خيففته دؤزمميرم، قانيرسان؟ دؤزمميرم. دو گئت ارين کوپويوغلويا دئ قوي بوشاتديرسين مني. دئ آرخايين اول مطلبيوه چاتدين. دئ گئتسين ننه‌سي‌نين قبري اوستونه موشتولوق وئرسين، دئسين اکرمي ويرديم يئره!
فروغ آناسي‌نين اؤزوندن چيخماسيني گؤرجک يئريندن قالخير:– آي آبا يئي، آلله آتاوا رحمت ائله‌سين بيزي قارالاما! ائششگه گوجون چاتمير پالاني نييه تاپداييرسان؟ او سن، او دا ارين. اؤزون بيلرسن. هر نه ائليرسن ائله. آنجاق بونو بيلميش بيل کي هئش بير ايش گؤرمميه‌جکسن. فقط او بئچاراني ديغلاداجاقسان، والسلام!حاج اکرم خانيم دئيير:– او ديغلييان دئييل. سن آرخايين اول. او تزه سنين اريوين اوجوباتينا گونه چيخيب. نييه ديغلير. من ساده ايميشم. ايندييه‌جن اونو تانيماميشديم. دئمه چاديراسيزليقدان ائوده قاليب. نه جور اولدو بس؟ منه گلنده نيققيلتيسيندان باش قولاغيمي آپاريردي، آمما ايندي تکه کيمي داغا داشا ديرماشير؟ آغا جاوانلاشيب. اوسته چيخاندا پيلله‌لرين اوچون بير ائله‌يير. او ديغلييا؟! او تزه گؤتوايله قويماغا دوشوب!فروغ قاپي آغيزيندا دايانديقدا ديل اوجو دئيير:– اونون ديغلاماسينا دئييل کي، اگر من سني تانييرام، سن ديغلادارسان آخير.بو دؤنه حاج اکرم خانيم لاپ اود توتور:– ديغلار دا کي ديغلار. جهننمه ديغلار، گورا ديغلار. لاپ ديغلاداجام. جا‌نين دا آلاجام. هر نه اولاجاق قوي اولسون. او سققل کي مندن گئديب هاندا وارا گئده ايتين گؤتونه ياپيشا! بورا باخ بورا! باخ منيم قارنيمنان چيخان بو عيفريتييه! گؤر نئجه مني ساشماغا فرصت تاپيب؟! ساغ اليم باشيوا اولسون فروغ. منه سؤز آتيرسان، هه؟ اوره‌ييمه داغ قويورسان؟ بودا منيم پيس گونومده داريما دورماغيندي سنين؟ آللااااه اؤلدور قوتار مني، آللااااه! قوتار مني بو ذيللتدن، قوتااار…بونلاري دئيرکن ال آتير ساچلارينا. فروغ توواراخ قاپي‌دان چيخيب اکيلير. بدري اؤزون يئتيرير آناسينا. اونون قولوندان آسلانير. فخري يخچالا طرف قاچيب بير ليوان سويلا ايکي دانا حب گتيرير. گوجي بيلاه‌ايلا حب‌لري آناسي‌نين بوغازينا ساليب سويو ايچيردير. حاج اکرم خانيمي يئرينه ساليب اوستون چکيرلر. ايکي باجي اوزون زامان سس‌سيز اوتورورلار. حب‌لر تاثيرين باغيشلايير. حاج اکرم خانيم زاريلتيدان دوشور. بدري ديزلرين قوجاقلايير. فخري شاما بير شئي حاضيرلاماق اوچون آياغا قالخير؛ تنه‌بيني ايکي يئره بؤلن قاپي‌نين تايلارين باغلايير. حاج اکرم ياتان بؤلومون چيراغين سؤندورور. او بيري تايدا سيفرا سالير. بدري ديزين قوجاقلاييب ايچين- ايچين آغلايير. فخري اونو سيفرا باشينا چاغيرير. بدري لئچگي‌نين اوجويلا گؤزونون ياشين آلير، سيفرا‌نين باشينا کئچير. باجيسيندان سوروشور: – بس اکبر آغا فخري؟…
–»او ماموريتده‌دي«- دئيه، اونون بوشقابينا خؤره‌ک چکير. بدري ايکي اوچ تيکه يئييب يئمه‌ميش کنارا چکيلير. سوروجو گؤزلرين فخريه ديکير:– فخري گؤره‌سن نه جور اولاجاق؟
فخري »نه دئييم واللاه!« – دئيه، سيفراني قاتلايير. سونرا باجيسي‌نين سوروجو باخيشيندان قاچا بيلمه‌دن ديله گلير:– سن ده اوولدن ايشين ايچينده اولسايدين بير بئله گيجلمزدين. شيخ مفيدين تبليغاتي، جيجي- باجي‌لارين ييغيشيب سفئهله‌مه‌لري آباني بدبخت ائله‌دي. عمده باعث دا شيخ مفيد اولدو…فخري باشلايير ماجرا‌نين تفصيلينه… قاپي‌نين او اوزونده، حاج اکرم خانيم ياري اويغو ياري اوياق، بلکه ده هيککه‌سيندن بايغين بير حالدا اوزانميشدي. او فخرينين سؤزلرين ائشيدير، آرا – بير باشا دوشوردو:– شيخ مفيدين سؤزلري آروادلارين ايچينه ولوله سالميشدي…بو جومله‌ني ائشيدجک، شيخ مفيدين سؤزلري گورولتويله حاج اکرم خانيمين ذهنينه ياييلير…
– آي باجيلار، آي ننه‌لر، بو گون هامي‌نين بوينوندا تکليف وار. هره اؤز پاييندا ايثار ائله‌مه‌ليدير. چتيندير بيليرم، آمما بو ايشين ثاوابي قورتولان دئييل باجيلار. اونا گورا کي سيز اؤز اورک‌لريزدن ايثار ائله‌ييرسيز. سيز اؤز قلب‌لريزي طبق اخلاصه قويوب تقديم ائله‌ييرسيز. گؤر نه بؤيوک مقامي‌دير. گؤر نه عظمتلي‌دير بو مقام!…
فخرينين هله ده سسي گلير. حاج اکرم خانيم بيرين ائشيدير، بيرين ائشيتمير. بير لحظه آييخير، يئني‌دن اويغو عالمينه دالير:
– دئييرم آخي حاج اکرم خانيم بيز اينديه‌جن نئيله‌ميشيک کي بوننان بئله نئيله‌يک. باشيميز قاريشدي اوشاقلارا عؤمور سوووشدو. هئش بيلمه‌ديک هاردان گلدي هارا گئتدي. من اؤزومو دئييرم باجي، باخ او اوروش-نامازي دا دوز- تؤره‌لي يئرينه يئتيره بيلمه‌ميشم. بو سرطان سهته‌‌نين قاباغيندا کيم دايانا بيلر آي باشيوا دؤنوم. جار جاوانا رحم ائله‌مير، هاندا قالميش اولا بيزلره. يوخ باجي بئله اولماز، بيز گره‌ک اؤزوموزه بير گون آغليياق. صاباحکي گون نه جاواب وئره‌جه‌ييک؟ اونون بونون سؤزون ساققيز ائله‌ديک سالديق آغيزيميزا، چئينه‌ديک بوتون عؤموروموز قئيبته گئشدي. خانيمتاش خانيم رحمته گئد‌ه‌ن گوندن مني فيکير خيال گؤتوروب، دئييرم آخي بئله بو اللي نئجه ايلده من دالي يانيما نه قويموشام ؟! آغزيما داش تورپاغ، منيم باشيما بير ايش گلسه الي بوش گئديب او دونيادا نه دئيه‌جييم من؟
شکوفه خانيمين سؤزو بورا يئتيشنده حاج اکرم خانيمين اوتوردوغو يئر بير قويو آغيزي کيمي لاپدان آچيلير، حاج اکرم خانيم گورولتويله قويونون ديبينه دوشور. ظولمت هر ياني بورويوب. اوزاقدا قاپييا بنزر بير شئي قيزارير. حاج اکرم خانيم اوزون زامان اولدوغو يئرده کيريييب قالير. سونرا هانسيسا آدامين دهشتلي باغيرماسيندان يئريندن سيچراييب ايشيغا ساري قاچير. ياخينلاشديقجا ايستي شيددتلنير، ايره‌لي‌له‌ديکجه قيرمانج کيمي اونون اوز – گؤزون اودا چکير. ساچلاري آلازلانير. گئري قاييديقدا غافيلدان باشقا بير قاپييا توققا گلير. قاپي اوزونسوو بير دالانا آچيلير. دالا‌نين او تاي بو تاييندا يوزلرجه قادين آسيليب: کيميسي قيچيندان، کيميسي ساچيندان، کيملري ديليندن. آسيلانلارين بعضيسي تانيشدي، آمما حاج اکرم خانيم اونلارين آديني يادينا سالا بيلمير.
منبع :