آذربايجان حئكايه سي حاجي روستم قاباقلار، دوست-تانيشا اوز ساليب بورج ائله‌يه‌يرک ائويني بير تورلو گئچينديردي آنجاق بورج وئرنلرين سايي گئت-گئده آزالينجا معيشيتي چتينليگه دوشدو. هر ياندان الي اوزولن حاجي روستم سونوندا علاجسيز قالاراق اوغلو کابلا زؤهرابا ايليشدي. البته،کابلا زؤهراب اؤنجه‌لري آز-چوخ دده‌سي‌نين اليندن ياپيشيب يارديم ائديردي آنجاق نه يازيق اونوندا دورمو قولايلاشيب خيرتدگه‌جن بورجا باتميشدي. بير گون کوچه‌ده بؤيوک بير قيامت قوپدو. حاجي روستم،کابلا زؤهرابين ائويني باسيب ور-وسايليني ائشيگه تؤکمک ايسته‌ييردي. ايش، پوليسه، محکمه‌يه چکدي. محکمه‌ده، حاجي روستم بير حيط قابالاسيني قاضي‌نين قاباغينا قوياراق مدعي اولدو؛ ييرمي ايل بوندان قاباق حيطيني اوغلونا کرايه وئريب اينديسه احتياجي اولدوغو اوچون بوشاتماسيني ايسته‌يير! قارشيدا، کابلا زؤهرابدا جيبيندن اپريميش بير قولنامه چيخارديب مدعي اولدو، ييرمي ايل بوندان قاباق دده‌سي حيطي ايکي يوزمين تومنه اونا ساتيب‌دير. قاضي قابالايا ايله قولنامه‌ني اوخوياندان سونرا دئدي؛ دعوا طرفلري، ايدعالاريني ثابيت ائله‌مک اوچون شاهيد گتيرملي‌ديرلر. ائرته‌سي گونو، حاجي روستم، قارداشي اوغلو، کئفلي ايسکندرين يانينا گئديب اوندان شاهيد گئچمه‌سيني ايسته‌دي. بو گؤرشدن ساعات ياريم اؤتمه‌ميش کابلا زؤهراب کئفلي ايسکندرين يانيندا ايدي. کئفلي ايسکندر اليني گؤزونه باساراق ايکيسينه ده شاهيد گئچه‌جگيني سؤيله‌دي.بو اولايدان ايکي آي سونرا، حاجي روستم ايله زؤهراب يئنه محکمه‌ده ايديلر. قاضي پرونده‌ني اوخويوب دده-بالادان اوچ-دؤرد سورغو سوروشوندان سونرا کئفلي ايسکندري شاهيد عونوانيندا يئرلشگه‌يه چاغيريب دوغرونو سؤيله‌يه‌جگينه آند ايچديردي.قاضي سوروشدو:بو حيط حاجي روستمين دير؟!کئفلي ايسکندر عميسي‌نين اوزونه باخا- باخا ميزيلدادي: يوخ! حيط حاجي روستمينکي دئييل!حاجي روستم قيزغين-قيزغين يئريندن قالخماق ايسته‌ديگينده قاضي گؤزونو بره‌لتدي؛ کابلا زؤهرابين دوداغي قاچدي.قاضي يئنه سوروشدو: بئله ايسه حيط کابلا زؤهرابين دير؟کئفلي ايسکندر بو کز عم اوغلوسون اوزونه باخا- باخا ميزيلدادي: يوخ! حيط کابلا زؤهرابينکي دا دئييل!گولوش کابلا زؤهرابين دوداغيندان قاچدي. قاضي شاشيردي: بئله ايسه حيط کيمينکي دير؟!!حيط نه حاجي رستمينکي دير، نه کابلا زؤهرابين!... اوتوز ايل بوندان قاباق بو حيط، ائل چيمنليگي ايدي. حاجي روستم، کاتدا ايسلاما بير چالخام کره، بير پتک بال، بيرده بئش يوز مين تومن پول وئره‌رک چيمني قاپسادي. البته کاتدا ايسلام تک باشينا بو ايشي گؤرمه‌دي،فرماندارين الي ايله گؤردو. فرماندار باجي اوغلوسو شهردارا بويوروق وئردي: ائل چيمنليگي شهر محدوده‌سينه داخيل ائديليسن. البته بو آرادا فرماندارين بئلي داييسي اوستاندارا برک ايدي. اوستاندار بو کيمي ايشلرده ، خالا اوغلوسو شهرچي‌ليک وزيريندن گره‌کن ايجازه‌لري آلا بيليردي ، وزير ...... قاضي توخماغيني ميز اوستونه تاپداياراق کئفلي ايسکندرين سؤزونو کسيب قاپي آغزيندا دايانان گؤزتچييني چاغيريب قولاغينا پيچيلدادي : بو کئفليني تئز ائشيگه اؤتور يوخسا اؤلکه‌ده هاميني اوغرو چيخارداجاق!!...
بولگه لر سرويسي:حاجي روستم شهرين وارلي-کارلي آداملاريندان بيري ساييلسادا سون اوچ-دؤرد ايلين ايچينده بللي اولمايان ندنلره گؤره الي داريشليغا دوشموشدو.