آللاه يانديران چيراغ

بولگه لر سرويسي: گون لرين بيرين ده شاه عابباس نان آللاه وئردي خان وزير كي هر گون دوشَرديلر درويشي ليباسي نان ايصفهانين بير منطقه سين دولانارديلار ، دولانا – دولانا گليب گؤردولر جماعت هاميسي ياتيب آمما بير ائوين چيراغي يانيق دير .

بولگه لر سرويسي: گون لرين بيرين ده شاه عابباس نان آللاه وئردي خان وزير كي هر گون دوشَرديلر درويشي ليباسي نان ايصفهانين بير منطقه سين دولانارديلار ، دولانا – دولانا گليب گؤردولر جماعت هاميسي ياتيب آمما بير ائوين چيراغي يانيق دير .
شاه عابباس دئدي وزير بو قاپيني چال گؤروم بو ائوده نه خبر وار ؟ قاپيني آللاه وئردي خان وزير چالير .  ائوصاحابي سسله نير كيم دي كي وزير  دئيير :” بيز درويشيق .
 بير يئره پناه آپارانماديق بو گئجه سنين ائوين اؤزوموزه پناه بيلميشيق . ” قاپيني آچاندا گؤردولر بير قوجا كيشيدي . دئدي : ” بابا درويش خوش گليب سن . بويورون ايچري يه . ” بونلاري گئچيرتدي ايچري يه  و اوتوردولار دانيشيق صؤحبته كي گؤردولر بو قوجا چوخ شاددي . چاي قاباق دا يئمك قاباقدا بير قوجا آرواددي بير قوجا كيشي . هم آرواد شاددي هم كيشي . شاه عابباس دئدي : ” سيز چوخ شاد آدام لارسيز . نه ايش گؤره رسن بَيه ؟
 ” دئدي : ” منيم ايشيم كفاش ليق دي . گونده گئده رم بازارا و آللاه منه گونده بير قيزيل روزي يازيب دي . ايكي قيزيل دئييل ها گونده بير قيزيل . او قيزيلي قازاننام و هرنه لازيم دي آللام گتيرره م ائوه . دا فيكريم اوردا اولماز بوقيزيلي خَش له ديم بلكه صاباح اوقيزيل گلمه يه جك قالاجاغام پولسوز .
 آللاه گينه يئتره ر.  سحر گئده رم گينه قازاننام گتيرره م . اونا گؤره ده من شادام .” يئييب ايچيب  گئجه نين بير واختي اوردان چيخاندا شاه عابباس آللاه وئردي خان وزيره دئدي : ” من بونون روزوسون كسه جه يم . “
صوبح شافاق آتاندا جماعت ايستير گئده ايشه كي شاه عابباس دستور وئردي جارچي لار جارچكسين لركفاش ليق قدغن دي ايصفهاندا . هئچ كسين حقّي يوخدور كفاش ليق ائلي يه .مأمورلار بيريني توتسالار قورقوشوم اَريديب تؤكه جك لر بوغازينا . “
قوجا كولباش صوبح دوروب زنبيلي  اَلينده گئدير او يئرده كي  كفاش ليق ائلي يه جه ايدي گؤردو جارچي لار جار چكير .قولاغين بئله وئرنده گؤردو دئييرلر كفاش ليق قدغن دي . تا بونو ائشيدنده دئدي :
 ” دوبردين داغيلسين شاه عابباس! من روزي مي هاردان  گتيره جه يم ؟ ” قوجانين ائله بيل باشينا بير تَشت سويوق سو تؤكدولر كور پئشمان قاييتدي ائوه . حَيَط قاپيسندان گيرنده آرواد دئدي كيشي نينه قاييتدين كي دئدي شاه عابباس كفاشليقي قدغن ائلي ييب . آرواد دئدي به كيشي نئيله يه جك سن كي دئدي : ” گؤروم نئيله يه جه يم . آللاهين نئچه قاپيدان روزي سي وار . من ائله او قاپيدان روزي ايسته ميرم كي دؤننه م آيري قاپي سيندان روزي ايسته رم .” گؤزون دولانديردي بير حَيَطه گؤردو سيجيم اوردادي و ايكي باشلي قازما دوواردا . بئله باخدي دئدي آرواد تاپديم يولون . سيجيم له قازماني گؤتوردو ودئدي : ” داغ ياخين دي . داغدان بير شَله اودون دئشه لي جه يم آپارام شَهَرده ساتام . روزي مي اوننان تاپارام دا .” گئتدي داغدان بير شله اودون دئشه له دي و آپاردي بازاردا ساتدي ايكي قيزيلا. گونده بير قيزيل قازاناردي بو گون ايكي قيزيل قازانميشدي اودور كي چوخ شاداولوب هر نمنه دن ايكي برابر آليب آپاردي ائوه .
 دئدي : ” خانيم گونده بير قابلاما غذا قويوردون بوگون ايكي دنه ائله . گونده بير چاي پز چاي دمليردين بو گون ايكي ائله  . گونده بير چيراغ يانديراردين شاه عابباسين آجيغينا ائله گينه ايكي دنه.  ” گئجه نين بير واختي دي ، اَل آياق كسيليب شاه عابباس دئدي دور وزير بوگون قوجا بير قيزيلي قازانمي ييب گئده ك گؤره ك احوالاتي نه جوردي .. گينه ده شاددي ؟ ” گلدي لر و كوچه قاپيسينا يئيرنده گؤردو گينه قوجانين چيراغي يانيري .
 قاپيني چالديلار و وزير دئدي بيز ائله دونن كي درويش لريق گينه اَلميزه هئش زاد گلمي ييب پناه گتيرميشيق بورا . قوجا قاپيني آچيب دئدي بويورون . شاه عابباس ايچري گيرنده گؤردو هر زاددان ايكي دنه دي و دئدي:
 ” بَيه بيليردين بيز گله جه ييق ؟ ” قوجا دئدي نئجه بَيه؟  دئدي : ” گونده چيراغ بيردنه ياناردي بوگون ايكي دنه يانير. گونده بير چاي پز چاي دم لردين بوگون ائلي ييب سن ايكي دنه . خولاصه هر نمنه دن ايكي دنه دي . اؤزوده هر گون گوندن چوخ شادسان .” دئدي : ” يوخ بابا درويش بيلميرديم گله جه سيز .
 توفاقي داغيلسين اوشاه عابباسين كي بوگون دوردوم گئتديم بازارا كي گؤردوم جارچي لار جار چكير كفاش ليق قدغن دي . قاييتديم ائوه . او دئيير به منيم روزيم اونون اَلين ده دي . داغدان بير شله اودون دئشه له مي شم گونده بير قيزيل قازانارديم بوگون ايكي قيزيل قازانميشام . هر نمنه دن ده شاه عابباسين آجيغينا ايكي دنه قويموشام .
 ” وزير بير شاه عابباسين اوزونه باخدي و اَيْله شيب يئييب ايچندن سورا گئجه نين بير واختي چيخيب گئتديلر . شاه عابباس دئدي : ” وزير سحر بونون من روزي سين كسه رم گؤرسون دونيا كيمين اَلين ده دي . ” آللاه وئردي خان وزير دئدي : ” قوربان سن بو ايشي گؤرمه . سن اونون روزو سون آلانماسان اَلين دن . ” دئدي يوخ كسه جه يم .
صوبح آچيلاندا دستور وئردي جارچي لار جار چكسين هم كفاش ليق هم ده داغدان اودون درمك و شهرين ايچينده اودون ساتماق قدغن دي . سحري قوجا كولباش ايكي باشلي قازماني قويوب چيي نينه گئدير داغدان اودون دئشه له سين كي گؤردو جارچي لار جار چكيرلر . قولاغين بئله وئرنده ائشيتد يكي هم كفاش ليق هم داغدان اودون درمك هم شهرده اودون ساتماق قدغن دير . هر كسي توتسالار شاه عابباسين مأمورلاري قورقوشوم اَريديب تؤكه جك لر بوغازينا . بونو ائشيدنده دئدي :” ائوي ييخيلميش او شاه عابباس من نن عداوت باشلادي ها . من ائله هانسي ايشه بخيرام كؤپك اوغلو او ايشي قدغن ائلير . ”  كيشي قاييتدي ائوه و حَيَط قاپي سندان گيرنده آرواد دئدي كيشي به نييه قاييتدين كي دئدي شاه عابباس من نن عداوت باشلي ييب . بو گون اودون ساتماغي دا قدغن ائله دي . قالميشدي فيكره كي نئيله سين گؤزون دولانديردي گؤردو حَيَطين قيراغيندا بير بؤيوك كوزه واردي .
 اؤز اؤزونه دئدي شاه عابباس او قاپيني باغلادي دؤنه رم آيري قاپي يا . اِهمالجانا كوزه ني يويوب تميزله دي دولدوردو اَنگين دن سرين سويونان و بيردنه بارداق آلدي اَلينه دوشدو ايصفهانين بازارينا و بارداق – بارداق باشلادي سو ساتماغا .  سويو ساتيب قورتولاندا گؤرور اوچ قيزيل قازانيب دي .
 گئچدي بازارا و هر نمنه دن اوچ برابر آلدي . قاييتدي ائوه و آروادينا دئدي شاه عابباسين آجيغينا هر بيرزاددان اوچ دنه ائلي يه جك سن . چيراغي دا ائلي يه جك سن اوچ دنه . بيرين قوياجاقسان بو باشا بيرين او باشا بيرين ده شاه عابباسين آجيغي نا قوياجاقسان وسطه . گئجه نين بير واختي شاه عابباس دئدي وزير بو گئجه بيلميرم قوجانين حالي هايا نا چيخاجاق . آجيندان ايندي گؤر نه وضع ده دي . گلديلر كوچه نين آغزينا و گؤردولر قوجانين چيراغي گينه يانير . شاه عابباس دئد ي آجين دان ياتانماييب بينوا . گئچديلر قاپيني چالديلار و قوجا سسلندي كيم سن كي آللاه وئردي خان وزير دئدي : ” بابا درويش دي . گينه بير يئر تاپانمي ييب پناه گتيرميشيك سنه . ” دئدي منيم قاپيم قوناغين اوزونه آچيق دي . ايلّا دا درويش لرين اوزونه آچيق دي . بويورون خوش گلمي سيز .”
قاپيني آچيب شاه عابباس گيل ايچري گئچنده گؤردولر چيراغ اولوب اوچ دنه . چاي پزله قابلامادا اوچ دنه دير . . گئچيب اَيْله شديلر ايچري ده  دئديلر هر نمنه دن ائلي ييب سن اوچ دنه بيه نه خبردي كي قوجا دئدي :
 ” صوبح گئديرديم اودون درمه يه كي گؤردوم مأمورلار جار چكيرلر هم كفاش ليق همي ده داغدان اودون درمك قدغن دي كي ائوه قاييداركن گؤزوم ساتاشدي حَيَط ده كي كوزه يه و كوزه ني  سرين سويونان دولدورب آپارديم بازاردا ساتماغا كي بوگون اوچ قيزيل قازانديم . شاه عابباسين آجيغينادا هر زاد دان اوچ برابر آلديم . بونو ائشيدنده شاه عابباس دؤندو وزيرين اوزونه باخدي و قوجا كيشي دئدي : ” او چيراغي كي حق يانديرار بنده نين ايشي دئييل سؤندوره . او چيراغي دا كي حق سؤندوره جك بنده نين ايشي دئييل يانديرا . ”
 شاه عابباس دوردي قولون سالدي قوجانين بوينونا و دئدي قوجا عمي دوز دئييرسن  سنين روزون شاه عابباسين اَلين ده دئييل . آمما منه دئه گؤروم اگر بيرگون شاه عابباس بيله ن دربارا ايسته سه و بيله ن يئكه بير پول وئرسه كي گل دربار نيشين اول قبول ائله رسن يا يوخ كي قوجا دئدي: ”  يوخ . من نئليره م او كؤپك اوغلونون پولون . مني او آللاه ياراديب دي .  آردي وار

منبع :