آياغا قالخيرام. ائله بيل‌هامي‌يئرينده قورويوب. دلي‌جه قاپي‌ني دؤيمه‌دن ايچه‌ري کئچيرم. سالامسيز اوتوراجاقدا اوتورورام. دوکتور به‌ي قلم الينده‌ قورويوب ماساسينا باتيب. باشيمي‌چئويريب اوتاغينا گؤز آتيرام. آکواريوم دا باليق‌لاري ياتيب، ائله‌بيل اونلاردا زامانسيزلاييب لار. کيتاب‌لار قفسه‌ده سس‌سيزجه هويوخوبلار. سول اليمده روحسال خسته‌ليگي ايله ايلگي‌سي اولان تابلولار دووارا آسيليب‌لار. اونلاردا هوروت- هوروت منه باخيب، سانکي قاش  قاباق ساللاييبلار.بيرآن دووارلاردان مه‌له‌مه سسي قولاغيمي‌کار ائله‌يير. ال‌لريمي‌قولاقلاريما آپاريرام، آما سسه مانع اولا بيلمه‌ييرلر. آمان آللاهيم. بيلميرم نه ائده‌م. “من نه اوچون گلميشديم بورا؟” اؤزومدن سوروشورام. ديليم سوسور. باشيم يئرينده قورويور. دوکتور ترپنمه‌دن دانيشماغا باشلايير: - خانيم دردينيزي بويورون… - من گلميشم دئيه‌م… دئيه‌م کي… ديليم سوسور قويمور دانيشام… ساعاتين عقربه‌لري سورعتله آرخايا ايشله‌يير. اوتاقدان‌ چيخيرام. قاييديرام ايکي ايل بوندان اؤنجه‌يه.رسول آناسي ايله آشچي خاناميزدا دانيشير، من‌ده‌هالا توزسوران چکيرم. قيزلاريم ايسه کارتونا باخيرلار.رسول، آناسينا اوچونجو دفعه اولاراق آتا اولماسينين خبريني وئرير: - آنا، گولناز دؤرد آي دير بويلودور… قايين‌آنام، دوداقلارين بوزوب، باشين توولاييب، قاش-قاباغين ساللاييب دئيير: - باشيني يئسين، حتمن يئنه قيزدي… - بلي، قيزدي… بو دفعه آدين سيز قويون… - اوغول بو سنين اوجاغيني کور ائله دي… مين دفعه دئديم بونو بوشا گئتدسين… سايمادين کي سايمادين… دده‌نين قول- قانادي اوغول‌دو… سنين ده کي يوخوندو… - آنا نه فرقي وار کي… اوغلان يا… قايين‌آنام ايجازه وئرمير رسولا دانيشا آشچي‌خاناداکي صندلي ده اوتوروب، دالين منه چئويريب يئنه داوام ائدير: - آپار سالديرسين بو اوشاغي… سونرادا بوشا گئتدسين… سن هله جاوانسان… قيزلار يالوارار سنه گلسين… اوشاقلارين دا 3-4 ياش لاري وار… بو اوجاغي کورودا تئز اونودورلار… - آنا نه دئييرسن… نه بوشاسي… ائله حيات بو ساده‌ليک ده… ائله بير سؤز دئييرسن کي… - سندن آدام چيخماز اوغول… اودو قارداشين آروادينا باخ… ايکي دنه گول تکين اوغلان وئريب قارداشينا… سنده… يازيق اولدون گئتدين…! سونرا دا اوز-گؤزون بوزوب، باشيني توولايير.سسيمي‌چيخاردا بيلميرم. بوتون کدريمي،‌هايقيريتمي، سينيرلريمي، اورکده قالان سؤزلريمي، ياواشجا ايچيمده ساخلاييرام.

قئيين‌آنام، سسيني آزالديب، اوغولونو قورماغا چاليشير. توزسوراني سؤندورورم. اليمه سيله‌جک گؤتوروب، ماسالارلا موبل‌لاري سيلمه‌يه باشلاييرام. نه‌قدر چاليشيرام نه دئديک‌لريني هئچ ائشيتميرم. بيرآز بوندان اؤنجه توزسوران ايشله‌يه- ايشله‌يه اوجا دانيشيردي منده ائشيدم، آما ايندي توزسورانين سسي کسيليب، قئيين آنام ايسه چوخ ياواش پيچيلداشير.آشچي‌خانادان چيخيب، چاديراسيني آسقي‌دان گؤتوروب، من‌له قيزلاردان ساغوللاشمادان، گؤزلريندن، آجيق، نيفرت يامان- يوووز يئره ياغا- ياغا قاپيني چيرپيب گئدير.رسول يانيما گلير. آجيقلي سس‌له اوشاقلارين اوستونه چيغيرير:- دورون جهنم اولون اوتاغينيزا… ائله بو ننه دن، سيزين کيمي‌يئتيمچه‌لر اولار… اوشاقلار تله‌سيک تئلويزيونو سؤندوروب اوتاقلارينا گئتديرلر.رسول، موبل اوستونده اوتورور. گؤزلريندن قان ياغير. حيرص کلله‌سيندن ديرماشيب گؤيه چيخير. تئز- تئز سول آياغيني اوينادير. بللي‌دير استرس چکير. سورعتله آياغا قالخير. منه ساري باخيب حيرصله دئيير:- ائششک کؤپه‌يين قيزي… دا بو سئري، من قيز-ميز ايسته‌ميرم… صاباح آپار سالدير….

هئچ اينانميرديم ائشيتديکلريمه. رسول هئچ واخت بئله دانيشماميشدي. يئريمده دايانيب قالديم. ايچيمده‌کي بوتون آرزولار بير- بير يئره تؤکولوب سينديلار. ديل- دوداغيم دا سو قالمادي. گؤزلريم ايسه آغلاماق يئرينه قورودو.  زامان ايچينه‌ دوشدوم. هرنه باشيما فيرلاندي. ساعات سورعتله چاليشيردي. دوکتور بير داها سوروشدو:- خانيم نه اوچون گليب‌سيز؟ دووارلاردان قان آخيردي، مه‌له‌مک سسي قولاقلاريمي‌سؤکوردو. گؤزلريم يومولدو. بوغازيمدان ساده‌جه کلمه‌لر ائشيگه آتيلدي: - آغا دوکتور، من قاتيلم… ايکي ايلدي قاتيلم… دوز ايکي ايل… اؤز اليم‌له قيزيمي‌اؤلدورموشم… سقط ائله‌ميشم… من… من اؤلدورموشم… ائشيديرسن دوکتور… داها دؤزه بيلميرم… آغا دوکتور من قاتيلم…

کلمه‌لريم سونا چاتان لحظه، آکواريوم پارتلاييب، باليق‌لاري داغيلير، کيتاب‌لار قفسه‌دن يئره تؤکولوب، دوکتور گئت- گئده مندن اوزاقلاشدي، دووارلاردان مه‌له‌مک سسي زجر وئريجي اولوب، قولاقلاريمي‌دارما- داغين ائتدي، تابلولار بير- بير جيريليب يئره سه‌په‌لنديلر، پنجره‌دن گؤرونن آغاجلارين يارپاقلاري، سانکي پاييز، يايين يئريني آلدي دئيه ساراليب تؤکولمه‌يه باشلاديلار، لامپا سؤندو زامان ايتدي، ساعات دا بوتون عددلر، صيفير اولدو، هر يئردن اوشاق آغلاماسي گليردي و من زامانين ايچينده بوغولدوم.