بولگه لر سرويسي:تخمينا 20 ايل بوندان اول تبريز دانشگاهيندا حقوق رشته‌سيندن قبول اولوب و کنددن تبريزه گلديم. قوجا تبريز اوزون ايللردن بري اوره‌ييمده بسله‌ديگيم و حسرتيني چکديگيم افسانه‌وي بئشيک اولسادا، من تبريزده تک و غريب ايديم. همي‌ده کؤکسومده بير وحشي و سرکش اوره‌ک واريدي کي او هله کندين گئنيش کؤيشن‌لرينده قاراداغين اوجقار مئشه‌لرينده و دره‌لي تپه‌لي چؤللرينده داريخار و اوزون بير قوش کيمي سينه‌مين ديوارلارينا چيرپاردي، هاندا قالسين بير غريب شهرده بير کيچيک ياتاق‌خانادا. تام بئله بير چتين و يالقيز زامانيمدا بير انسان گلدي، آرايب آختاريب تاپدي مني، آتامين دايي‌سي اوغلو مهندس اکبر برزگري. بو عائله باره‌سينده قاباقجادان و اوشاقليقدان بري چوخ ائشيتميشديم، هم اؤزونون و هم رحمتليک آتاسي‌نين نئجه قلم صاحيبي و اديب اولدوغونو دفعه‌لر اوردا بوردا ائشيتميشديم، اما بير وار ائشيده‌سن، بير وار گؤره‌سن. اکبر برزگري‌له چوخ چوخ تئز بير محکم ايلگي قوردوق، بلکه بير هفته چکمه‌دي کي درين بير دوستلوق کؤرپوسو ياراندي آراميزدا، بلکه بو کؤرپونو بيزدن نئچه نسيل قاباقداکي‌لار ياپميشدي و بيز آنجاق اونو يئني دن تاپيب يئني‌له‌ديک. نه ايسه؛ او زامان تبريزين زعفرانيه محله‌سينده بير ائوي واريدي، او ائوين يولون اؤيرنندن سونرا تقريبا هر گون اوردايديم سونرالار منه ائوين کيليدين ده وئرميشدي کي او ائوده اولمايان زامانلار گئديب قاپيدا قالماييم، اوزاقدان ياخيندان ائشيتميشدي کي شعر يازيرام، مندن ايسته‌دي کي شعرلريمدن اونا اوخويام، بير نئچه شعر اوخودوم و مني چوخ چوخ جدي شکيلده آلقيشلادي و من ايندي او شعرلره باخيرام و گؤرورم بو انسان نئجه اوره‌يي بؤيوک آدام ايدي و او اوشاق شعرلريني نئجه محبتله قارشيلاييردي. اکبر برزگري هم چوخ ساوادلي بير انسان ايدي، هم چوخ دوشونجه‌لي، هم چوخ متواضع. اولدوقجا ادعاسيز بير انسان ايدي. بوتون بو ايللرده اونون هئچ نه‌يه قارشي بير ادعاسيني گؤرمه‌ديم، عيني حالدا چوخ چوخ نجيب بير انسان ايدي، هئچ عقيده‌يه توهين ائتمک، هئچ فيکري تحقير ائتمک، هئچ کيمين داليجا دانيشماق اونون مراميندا يوخ ايدي. بيزيم کنديميزي ادبيات لا تانيرلار و اکبر برزگري حقيقي معنادا »مولان ادبياتي« نين وارثي ايدي، هئچ بير شرايطده ادب دن و ارکاندان چيخمازدي، حتي بوتون بو 20 ايلده منيمله ده چوخ ادب چرچيوه‌سينده دانيشاردي؛ گويا کي آتاسي رحمتليک ده بؤيوک صاحب قلم و اديب بير انسان ايميش، اما اؤزو داها دا فرقلي بير اديب ايدي. عين حالدا کي بيزيم کلاسيک ادبياتيميزي دريندن بيليردي، آشيق ادبياتينا دا اشرافي واريدي و هجايي شعر دونياميزين بوتون کلاسيک‌لرين اوخوموشدو، بونلارينان ياناشي اکبر برزگري غرب فلسفه‌سين چوخ دقيق و چوخ درين اوخوموشدو. ائله بير انسان ايدي کي اونونلا هم فضولي‌دن، هم آشيق العسگردن، هم ميلان کوندرا دان و هم ايمانوئل کانت‌دان و حتي معاصر يازارلاردان، ماريو بارگاس‌يوسادان يا گابريل گارسيا مارکز دان دانيشماق اولاردي.اکبر برزگري نين عين حالدا چوخ درين و دقيق حقوق ساوادي واريدي، اؤزو هر زامان بو باره ده دئيردي کي بو منه »ارث پدري« دير. آتاسيندان ارث آپارسا دا حقوق دا خصوصا حقوق خصوصي ده ساواديني يئنيلميشدي و بوتون حقوقي شرح‌لره مسلط ايدي. من ياديمدادير دفعه‌لر حقوق مدني‌دن دوشونمه‌ديگيم مطلب‌لري گليب اوندان اويره‌نرديم و او يا رحمتليک امامي‌دن يا رحمتليک کاتوزيان‌دان دقيق سندلرله منه جواب وئرردي. عموميتده اکبر برزگري چوخ دقيق بير انسان ايدي، دقيق بير دونيا گؤروشو واريدي، دقيق بير حافظه‌سي واريدي و دقيق بير باخيشي واريدي اجتماعي مساله‌لرده. اکبر برزگري نين بوتون دوشونجه دونياسي »انسان« محورينده قورولموشدو. دين‌دن آسيلي اولمايان، ديلدن آسيلي اولمايان، ائلدن آسيلي اولمايان، سويدان آسيلي اولمايان و هئچ نه ايله محدود اولمايان »انسان« و »انسان اوغلو« اونون ان بؤيوک دغدغه‌سي و ان بؤيوک آمالي ايدي. اونو او قدر کي آذربايجاندا آنا ديلي‌نين ياساقلانماسي اينجيديردي، او قدر ده آفريقادا آجليق چکن و يا تحصيلدن محروم قالان اوشاقلار ناراحات ائليردي. شعارچي دئييلدي اؤزونو اؤين، اؤزونه دوشونجه‌دن، کيتابدان دفتردن دوکان آچان آدام دئييلدي. اوره‌يينده بوتون انسان اوچون چوخ بؤيوک و چوخ شرافتلي آرزيلار واريدي.سون دفعه منه زنگ ووراندا من تبريزين راهنمايي قاباغيندا ماشين سوروردوم، تخمينا بير آي بوندان اول ايدي؛ سوروشدو هارداسان؟ دئديم ماشين سورورم، دئدي ماشيني چک بير يئرده پارک ائله سورا دانيشاق، – قانونا مقيد بير آدام ايدي- ماشيني قيراقدا ساخلاديم، بير درين نفس چکدي و بالاجا بير سکوت ائله‌دي، سورا دئدي: – من بيلميرم منده اولان بو خسته‌ليک نه دير و هاچان باشلانيب، اما ايستيرم سنه دئيم کي من سرطان مرطان تانيمارام، هر نه اولورسا اولسون من بونو شکست وئره‌جم، سورا گوله گوله دئدي: آي بابا من اؤزوم ائله سرطانام داي، سرطانا نه سرطان؟ اليمدن گلديگي قدر اومود وئرديم، هرچند اؤزو اومودلا دولو ايدي و نئچه منيم کيمي‌لره اومود وئرردي… اکبر برزگري‌نين اؤلوم خبريني ائشيدنده اورکدن سارسيلديم، هرچند کي نئچه آي قاباقدان اؤزومو حاضيرلاميشديم بئله بير خبره. ايستر ايسته‌مز اييرمي ايلليک دوستولوق و اييرمي ايلليک اوستاد – شاگيردليک دونياسي بير سينما پرده‌سي کيمين چکيلدي گؤزومون اؤنونه. هئچ اينانا بيلميرم ائله بير حيات دولو انسانين اؤلومونه، اما حياتدي … ايستر ايسته‌مز اونون بير شعري ياديما دوشدو و دوشونوردوم کي عائله‌سيندن خواهيش ائله‌ييم او شعري باش داشينا يازسينلار. منيم “گوزومده بير دوداق دويغو” کيتابيمي ويرايش ائدرکن او کيتابين سون شعرينه بير بند علاوه ائتميشدي، کيتابي منه وئرنده دئدي بو بير بند ده قوي مندن يادگار اولسون، دئديم باري اؤز آدينا يازئيدين، دئدي شعر »بيت المال« دي، دئييب گولدو. همن او بير بند له اونون گؤزل و گؤزلليک دولو روحونا دؤنورم:قايدام محبتدير، اونونچون ساغام، باسيلماز قالايام، اييلمز داغام، بير يوللوق گئتميرم، قاييداجاغام، سني خطاب ائدير روحوم بو سؤزله اوتور يول اوستونده يولومو گوزله
تخمينا 20 ايل بوندان اول تبريز دانشگاهيندا حقوق رشته‌سيندن قبول اولوب و کنددن تبريزه گلديم.