اوجسوز بوجاقسيز بوزقير
1398/03/19
بولگه لر سرويسي: بير آن دهشته هوپولدو. شاشقين- شاشقين اوجسوز بوجاقسيز بوزقيري گؤزدن کئچيردي. قوراقليقدان سوساميش قيسير تورپاقدان باشقا بير شئي گؤره بيلمه‌دي. شيمالين ان اوزاقلاريندا گونشين شوعالاري آلتيندا گوموشويه چالان کپير- کيران داغلاري بير آن سئچه بيلدي. آنجاق اودا گجيلين شيددتله اسمه‌سيندن توز- تورپاق آرديندا ايتيب، باتدي. گؤزلري گؤينه‌دي. آغيزيندا تورپاغين شورلوغونو تامسيندي. بورانين‌هارا اولدوغونو، بورايا نه ته‌هر گليب چيخديغيني دوشوندو. آخي او قبريستانا گئتمک ايسته‌ميشدي. اورادا توختاقليق دالينجا گزردي چوخدان بري. بس ايندي نييه گليب بورايا چيخميشدي؟!!
يئنيجه گون باتارا ساري اييلن گونشين قيزمار شوعالاري قيسير قومسال تورپاغي قوووروردو. قورا آيي‌نين ايلک گونلرينده بئله بير ايستي کيشيني داهادا چاشديريردي. بير آن گجيل قاناديندا قوم تپه‌لري‌نين آرديندان گلن زينقيروو سسي کيشيني اؤزونه گتيردي. قولاقلاري شکلندي: -“بو سس نه سسي‌دير؟!هارادان گلير گؤره‌سن؟!”
گئتديکجه سس ياخينلاشدي؛ آيدينلاشدي. سس شيمال طرفدن گليردي. آز سونرا توز- تورپاغين آرديندان قارالتي‌لار بللندي. – “کؤچري کارواني‌دير سانکي… اؤزودور،هارادان گلير بو کاروان؟!- دوشوندو. “آخي بو صحرادا نه بير يولدان ايز- نيشان وار، نه بير جيغيردان …!!”
کاروان ياخينلاشدي. کؤچري ائلات‌ايديلار. قويون، قوزو، آت، قاطير … –”نئيسان آيي تازا چيخيبدير. بونلار بو زامان داغدان آغناييب‌هارايا گئديرلر…؟!
کاروان ياخينلاشديقجا کيشي‌نين گؤزلري بؤيويوردو. او دالي- دالي چکيليب، بير دالدالاناجاق يئري آختاردي. آمما بوزاق کولونون قوروموش قول‌لاريندان باشقا بير شئي تاپمادي.
ايستر- ايسته‌مز کاروانين توتدوغو يولدان آزجا آرا آچيب، داياندي. بير آز اوول توز- تورپاقدان قي‌ييلان گؤزلري ايندي ائله بؤيويوب کي آز قالير چاناغيندان پيرتلاييب، ائشيگه آتيلسين. –”نئجه اولا بيلر بوو…؟!”
گؤردويونه اينانميردي. کاروانين اؤنجولو بورما بوينوز بير گئچي‌دي. توک‌لري يئرينن سورونوردو. کئچي دالي آياقلاري اوسته يئرييه‌رک، ال‌لري‌ايله کاروانا يول گؤستريردي. –”ياني بو اوبابئيي‌دي؟!…”. گئچي‌نين دالينجا آداملار گليرديلر. آروادلي- کيشيلي. کورک‌لرينه پالان باسيليب، يوکلنميشديلر. کيشي‌لرين بوينونا زينقيروو، آروادلارين‌ايسه قومروو بويونباغيسي آسيلميشدي.
يوک آلتيندا لهله‌ين دوشگون آداملارين چوخو دؤرد ال- آياغلي يول گئديرديلر. اونلارين آردينجا يهرسيز، يوون‌سيز آت، قاطير، پالان‌سيز اوزون قولاق‌لار، اووسارسيز دوه‌لر گليرديلر.
قوچ‌لار، قويون- قوزولار کاروانين يانينجا گئديرديلر. اونلارين چوخو دالي آياقلاري اوسته يئريييرديلر. قوچ‌لار دالا قالان آداملاري چاروالاري بوينوزلاييب، ايره‌لي ساليرديلار. ايت يئرينه پورسوقلانميش پيشيک‌لر کارواني گودوردولر.
حئيرته دالميش کيشي داشدان يونولموش بير هئيکله دؤنموشدو سانکي. يئريندن بئله ترپنميردي. کاروان خئيلک اوندان آرا آچيب، اؤز يولونا داوام ائديردي. کيشي يئني‌دن اؤزونه گلدي. ايستر- ايسته‌مز کاروانين ايزين توتوب گئتدي.
بير آز سونرا اؤنجول گئچي گئرييه دؤنوب الي‌نين ايشاره‌سي‌ايله کارواني اوتورماغا چاغيردي. کاروان داياندي. قوچ، قويونلار يوک‌لري آچديلار. آداملاري اوتلاماغا بوراخديلار. آج- سوسوز آداملار بير زامان او هنده‌ورده دولاشديلار. آمما او قيسير تورپاغدا بير چيمديک قده‌ري گؤيرتي، بير دامجي قده‌ري سو بئله تاپمادان يورغون، اوميدسيز باخيشلاريني آزمان گئچي‌يه زيلله‌ديلر. گئچي يوموشاق- يوموشاق گولومسه‌دي. سونرا بوزقيرين ال چاتماز، اون يئتمزينده لپه‌له‌نن گوموشو سولاري اونلارا گؤستردي. آداملار بير آن بئله دورمادان سولارا ساري يوگوردولر.
قوچ‌لار چاديرلاري قورماغا باشلاديلار.
قويونلار ايسه ساغمال آت- ائششه‌يي دوه‌لري ساغديلار؛ سود امر قودوق‌لاري دايچا‌لاري اميشه بوراخديلار. سونرا چاديرين آلتيندا کؤلگه‌له‌نيب، يئييب- ايچمه‌يه مشغول اولدولار…
کيشي دوشرگه‌دن آز آرالي دايانيب، برلميش گؤزلري‌ايله صحنه‌يه باخيردي. سو دالينجا گئدن آداملار گؤزدن ايتميشديلر. سانکي لپه‌له‌نن سولارا باتميشديلار.گونئي‌ده قاسيرغالار مئيدان اوخويوردولار. گاهدان بيري اژدها ساياغيندا باش قالديريب، گيرده‌له‌نيب گؤيه چکيليردي؛ اؤز دؤوره‌سينه هرله‌نيب، دليجه‌سينه دولانيب، مئيدان وئريردي. سونرا داغيليب، يوخا چيخيردي.قيزمار گونش دوشرگه‌يه اود ياغديريردي. سوسوزلوقدان جانيخميش حئيوان‌لارين ديلي بير قاريش قده‌ر ساللانميشدي. تکجه بير موتال پيشيک چاديرين کؤلگه‌سينده يئمه‌يين يئييب خومارلانيردي. دوداقلاري ساللانميش نر بير دوه حسرتله اونو سوزوردو.
نر آستا- آستا پيشيگه ياخينلاشدي. کوله قويروغونو قالديريب، بولادي. پيشيک خوشاللانيب، يئريندن قالخدي. نر يئني‌دن قويروغون بولادي. پيشيک دوه‌نين يالتاقليغيني گؤروب، لووغالاندي. آستا- آستا ائنه- بويا وئريب، پيلندي. نر قويروغون بولاديقجا پيشيک هوندورله‌يير، شيشمانلاييب قافلان گؤرونوشو آليردي. دوه‌ايسه سانکي اريييردي. گئت- گئده سيسقاليب کيچيليردي. نهايت نر ديزلرين قاتلاييب، چؤکدو. سونرا ياواش- ياواش اؤزونو پيشيگين آلتينا وئريب، کؤلگه‌لندي.
بوتون اوباني آياغي‌نين آلتيندا گؤرن پيشيگين مغرور باخيشي اوفوقلرده گزيردي. بير آن دوه اونون يادينا دوشدو. باشيني تمکين‌له يئنديردي. بير داها کؤلگه‌سينده دالدالانان نري تحقيرله سوزدو. پيشيک قافلان باشيني قالديرديقدا بيردن- بيره گؤزلري قورو بير کولون داليندان بويلانان آغجا سيچانا دوشدو. لاپدان يئريندن سيچرادي.
پيشيگين دهشتدن چيخادريغي سس بئل- بوخونو ازيلميش زاواللي دوه‌نين نريلتيسينه قاريشيب، کيشيني سيلکه‌له‌دي. کيشي توواراق يئريندن قالخدي. ديزي، قاباغينداکي چارپايايا ايليشدي. اونون اوستونده‌کي فينجان‌لا قت‌دانين هره‌سي بير طرفه توللاندي.
ديوانا سؤيکه‌نن آرواد باشيني قزئتدن قالديريب ، تعجوب‌له کيشي‌يه باخدي. –”سنه نه اولدو؟!”- دئيه، سوروشدو. کيشي – “چوخ عجيب بير يوخو گؤردوم.”- دئدي. آرواد داهادا تعجوب‌لندي:-“يوخو گؤردون؟ اوتوردوغون يئرده؟ گؤزون باخا- باخا گؤردون؟!”.آرواد آغيزي آچيلي، نيگران گؤزلريني کيشي‌يه زيلله‌دي. کيشي جاواب وئرمه‌دي. او هله‌ده تورپاغين شورلوغونو آغيزيندا تامسينيردي.
منبع :