اونلار کوچه دن داشينان گون ، بئليمين ديسکين بهانه ائديب قاپيميزين آغزيندا دايانميشديم کي مندن يارديم ايستمه سينلر ! اونلارين يئرينه " عزت آغا " گيل داشينان گون اؤزومو ياخشي آدام تانيتديرماغا گؤره بئليمين ديسکي شفا تاپدي ، قوللاريمي ديرسه ييمه کيمي چيرمالاييب بير کاميون يوکو تکيمه ائنديرديم ! عزت آغانين مندن چوخ خوشي گلميشدي :»اوغلان دئميشم سنه باااا ! ايلک گون مني ياخشي تحويل آلدين !« وظيفه م ايدي عزت آغا ! منيم اخلاغيم بئله دير ، سيزدن قاباقکي قونشوموزدا کؤچوب گئدنده ، قونشولارين هاميسي ديسک توتوب الين بئلينه قويوب باخيرديلار آما من يارديم ائديب تکيمه کاميونو يوکله ديم ! ايکي گونلوک دونيادير دااا عزت آغا ... آداما ياخشيليق قالاجاق ! آللاه ادبيني اليندن آلماسين کيشي !يئني قونشو ايله تئز صميمي اولدوق . بير ايکي گونون ايچينده گؤروشوب دانيشديقجا ، عزت آغانين بورجلو دوشوب ائو - ائشييين ساتيب سووماغيندان چوخ اوزولدوم ! هر زاد بير يانا ، اوغلونون دا تويو هفته سونو اولاجاق ايدي . ياغماسايديم دا گورولداييب تويدا اليمدن گلن ايشي گؤرمه ييمه سؤز وئرديم کي چوخ دا نيگران اولماسين ، او دا اينانيب توي کارتلارينين پايلاماغين منيم بوينوما قويدو ! البته هله کارتلار آماده دئييلدي ، عزت آغادان چوخ من تله سيرديم ! اؤز درديمي اؤتوروب اونون فيکرينده قالميشديم . آز قاليردي کي هفته چيخسين آما کارتلاردان خبر چيخماميشدي ، ايشدن تازا يئتيشيب ائوده اوتورموشدوم ، هله چاييمدان بير قورتوم ايچيب - ايچمه ميش قاپيميز دؤيولدو ! قاپيني آچيب عزت آغاني بير تليس الينده قاپيمين آغزيندا گؤردوم !سلام عزت آغا ! بو تليس نه تليسيدير ؟توي کارتلاريدير دا ... صاباح گئجه اوغلانين تويودور داااااا تو ... تو ... توي کارتلاري ؟ بير تليس توي کارتي ؟ بويور ايچري ... بويور ... بويور ... قاپي قاباغيندا پيسدير . بير تليس توي کارتين گؤردوکده او بير قورتوم ايچديييم چايين دا قندي بوغازيما قاچدي !»کيشي نه خبريندير ؟ اولمايا تبريز اهلينه قوناقليق وئره جکسن ؟ » دئديم . عزت آغا منيم کارتيمي وئريب دئدي : « بو سنين اؤز کارتين ! بو محله دن يالنيز سني تانيرام ، سن ده يئنه صلاح بيلدييين قونشونو چاغيرا بيلرسن ! « يوووو ... من گلسم ائله گؤرر ... او بيري کارتلاري نجور پايلامالييق ؟چاغيرديغيم قوناقلار ، قديم قونشولاريم ، زينب طرفي بيرده کي زينال طرفيدير ! البته قيز ائويندن ده قوناقلاريميز اولاجاق کي اونلارا دا کارت يازميشام ! دوزدور هاميسينا زنگ آچيب تويا دعوت ائتميشم آما رسمدير توي کارتي طرفين قاپيسينا گئتسين يوخسا کوسوب تويا گلمز ! بلي ... بلي ... خولاصه من خيدمتينده يم ... دئييرم عزت آغا بير آز يوبانديريبسان هااااااا ... بير بئله کارتي نجور هامينين الينه يئتيرمک اولار ؟ يالنيز بير گون واخت وار ... اؤزو ده کي من سيزين فار - فامئلين ائولرين تانيميرام آخي ... بير آز چتين اولاجاق داااااا ... اولماسا منه آيري بير ايش تاپشيريب توي کارتلارين اؤزون پايلا ! منيم صاباح واجيب ايداري ايشم وار ، گئتمه سم ايشيم يانار ! يوخ دا منيم واختيم يوخدور ، سنين راحاتچيليغينا خاطير ائله ايش گؤرموشم کي هاميسي پايلاماسي بئش دقيقه نين ايشيدير باااا کارتلاري پايلاييب گئديب ايشينه ده يئتيش داااا من سنين ال - آياغيني باغلاماميشام کي ، هر محله نين کارتين بير باغلاما باغلاميشام ، آدرسي ده اوستونده يازميشام ، سن هر باغلامي يازديغيم آدرسه يئتيره جکسن ، طرف اؤزو اؤز کارتين گؤتوروب او بيري کارتلاري دا صاحيبلرينه يئتيره جک ! مثلن بو باغلامدا 56 کارت وار ، بو کارتلار قاباقجي قونشولاريميزين کارتلاريدير هاميسين " بهشتي " چاهارراهينداکي سيگار ساتانا وئره جکسن ، او کيشي گئجه لر بيزيم قديم محله نين گؤزتچيسيدير ، هاميني دا تانير ، بيله سينه تاپشيرميشام کي کارتلاري سندن آليب صاحيبلرينه يئتيرسين ! آهان ... باشا دوشدوم ... بو باغلام دا " کوي فرهنگيان " آدرسينه گئده جک ، اوچونجو بلوکدا ايلک قاتين زنگين چاليب کارتي باجاناغيم گيله وئره جکسن ، دوزدور باجاناقدان فامئل چيخماز آما بو نئچه کارتين دا صاحيبلرينه يئتيرمه يي او بوينونا آليب !ساغولسون داااا ... بو باغلامين دا اوستونده يازيبسان : شريعتي خياواني - شاطير مورتوض ...آي ساغوووول ! شاطير مورتوض منيم دوغما - دوغار خالا اوغلومدور ! شريعتي خياوانيندا ياغلي کوکه پيشيرر ، اورا شولوغ خاياوان اولدوغونا گؤره ، کوکه پيشيرمک ايله يامان اؤزون تاپيب ! توکانيندا اوستون تيکديريب اوردا اوتورور، شريعتي ده کيمدن شاطير مورتوضو سوروشسان گؤرسه درلر ! عزت آغا ! باخ گؤر بو کارتلار دا " توحيد " خياوانينا گئده جک ؟بلي ... داييم گيل توحيد خياوانيندا اوتورارلار ، دؤرد ايلدير کي گل - گئديميز يوخدور ، اونا گؤره کوچه نين آدي ايله پلاکلارين اونوتموشام آما باخسان آدرسده يازميشام کي سول الدن ايکينجي کوچه ده آغ قاپي !!! آغ قاپي ؟ بلکه بو دؤرد ايلده قاپيلارين آيري رنگله رنگله ييبلر ! بيلميرسن کوچه نين ايچينده نئچه نجي قاپيدير ؟دوز دئييرسن هاااا ... کارتين اوستونده ياز "سول الدن بئشينجي قاپي " ! 25 نفرين کارتيدير ، گئديب تاپانمازسان پيس اولار !يازديم ! قيز طرفينين کارتلاري هاني ؟ قيز طرفي " کوي بهشتي " ده اوتورارلار ، آدرسينده يازميشام کارتلارين بيرينين اوستونه ! بو کارتلار دا گئده جک " گلپارک " دا بو يازديغيم آدرسه ، بونلاري دا آپاراجاقسان " امام حسين " مئيدانيندا بو آدرسه ، بونلار دا کي " آذربايجان " بولواريندا يازديغيم بو آدرسينکيدير ، بونلار دا " اوستاد شهريار " بولواري ... آدرسي ده اوستونده دقيق يازيليب ! دئييرم غزت آغا ! ياخشي ايش گؤروبسن ها ف يوخسا کارتلاري بير به بير هره نين کين اؤز قاپيسينا آپارسايديق بير آي چکردي !کارتلاري عزت آغادان تحويل آليب بيله سين يولا سالديم ! ايندي بير من ايديم بير ده بير تليس کارت ! گئجه ياريدان سوووشموشدو ، گؤردوم اوغلومون اوتاغينين چيراغي يانير ، بيله سين چاغيرديم : « آتابي ! آتابي ! بلي آتا ! نه ايش گؤرورسن اوغول ؟ شنبه امتحانيم وار ... درسه باخيرام !واي دده ! درسي نئيليرسن اوغول ؟ اوخودون اولاجاقسان من داااااااا ! بير دقيقه بورا گله بيلرسن ؟آتابي اوتاغيندان چيخيب منيم يانيما گلدي . من ده آدرسلري بيله سينه توضيح وئرندن سونرا يالوار - ياخار ايله تبريزين نقشه سي ايله توي کارتلاري بيله سينه وئريب کارتلارين پايلاماغين اونون باشينا سالديم ! آتابي کارتلارين آدرسين نقشه اوزويله چک ائدرک من ده اونون اليندن اکيليب باشيمي آتيب ياتديم کي سحر يوخويا قالمايام ! سحر چاغي آتابي مندن قاباق آييليب کارتلاري گؤتوروب ائودن چيخميشدي ! ايداري ايشلريمي يئر به يئر ائدندن سونرا ائوه قاييديب اوز - گؤزومه صفا وئرديم ! قاش قارالماميش عزت آغا گيلده اولمالي ايديق . آتابي هله قاييتماميشدي ، خانيمين اليندن ياپيشيب عزت آغاگيله گئتديک ، آغالارين مجليسي اوست قاتدا ايدي ، ايچري گئديب عزت آغاگيلين ايلک قوناغي اولدوق ، " کئفسيز مجيد " ين ارکست قوروپو دا بيزدن بير آز سونرا گليب سازلارين کؤکلمه يه باشلاديلار ، شام واختي اولموشدو آما قوناقلاردان خبر يوخ ايدي ، عزت آغا ايله منيم گؤزوم قاپيدا قالميشدي ! عزت آغانين صبري داشيب قولاغيما پيچيلداييب :»دار گونده قوهوم - قونشو دا آدامي اونودارميش ! اليم آشاغي اولدوغونا گؤره کيمسه قاپيميزي آچمادي ! «دئيرکن آغلادي ! منيم ده گؤزلريم دولموشدو ، »اولسون عزت آغا ! آللاه آدامي اونوتماسين ! من اؤلمه ميشم کي ... ايندي گئديب اؤز قونشولاريميزي تويا چاغيرارام ، ائله چاليب اويناياجاغيق کي دردين ياديندان چيخسين کيشي ! « قونشولاري چاغيرماق 10 دقيقه چکمه دي ، آتابي ده کارتلاري پايلاماقدان قورتولوب ايچري گلدي ، شامي يئييب جانا سينر توي توتدوق ! عزت آغانين خرجي باتسا دا ، خاطيره لي توي اولدو . گئجه ياريدان سوووشوب ائوه قاييداراق عزت آغا بيزي يولا سالاندا دئدي : « يورولماياسان عزيز قونشو ! دده بالا منيم بوينوما قارداشليق حقي قويدونوز ! سيز گئدين استراحتينيزه يئتيشين من ده گؤروم نه داشي سالماليام باشيما بو ايستکلي قوهوملاريم ايله ؟ بئله اولماز ، سحر چاغي هاميسينا زنگ ووروب گيلئيليک ائده جه يم ! » عزت آغايا ديلدارليق وئرندن سونرا ائوه گليب يورقون دوشوب ياتديق ! گؤزومو يوخو توتوب توتماميش قاپينين سسينه يئريمدن ديک آتيلديم ! سحر اولموشدو آما ائله يورقون ايديم سانکي بير ده يقه دير يوخلاميشام ؛ من هن - هون ائديب قاپيا چيخينجا ، زنگ بير داها چاليندي ، گؤردوم آتابي هله يئتدي يوخونون ايچينده دير ، زيققينا زيققينا اؤزوم قاپيني آچماق زوروندا قالديم ! قاپيني آچجاق ياخام دوشدو عزت آغانين الينه ، هويوخموشدوم ! سلام عزت آغا ! نه اولوب کيشي ؟ منيم ياخامي نيه چکيب جيريرسان ؟ من سنه نئيله ميشم ؟منيمله نه دوشمانچيليغين وار ايدي ؟ ... هن ؟ سنه نئيله ميشديم يئکه کيشي ؟ هئچ اوتانميرسان ؟ بو نه قونشولوغو ، نه يولداشچيليغيدير ؟دئميرسن کي نه اولوب ؟ هئچ زاد ، ايستيردينم نه اولسون ؟ گئجه ني سحره کيمي فيکيردن ياتانماميشام ، سحردن ده قوهوم قونشويا زنگ ووروب ايسته ميشم باسام يامانا گيلئيليک ائدم کي اونلار مني قاباقلاييب دئييبلر : » سن بيزه کارت گؤندرمه دين کي بيز ده گلک تويا !« اولمايا اونلاري آتيبسان زيبيل قابينا ! يوخ بابا ! قوي اوغلومو چاغيريم گؤروم !بيزيم سسيميزه آتابي گؤزلرين اووارکن قاپيا چيخدي ، جرياني بيله سينه تعريفله ييب دئديم :»اوغول! گئت نقشه ني گتيرگؤستر عمي جانا ، عمي جان گؤرسون کي نئجه دقيق نقشه اوزو ايله آدرسلري نيشانلاييب کارتلاري پايلاييبسان ! « آتابي گئديب نقشه ني گتيريب عزت آغايا گؤستريب دئدي :»من آدرسلري نقشه اوزويله پايلاميشام آما کارتي هانکي قاپيا آپاريرديم قبول ائله ميردي ، زور ايله کارتلاري بيله لرينه وئريرديم ، بو نقشه بو دا سيز ، باخ گؤر من هاردا ياهالميشام ؟« عزت آغا نقشه يه باخيب آتابه يين قوپالاغين گؤتوردو ! ياخشي هله آتابه يين سرعتي چوخ ايدي يوخسا عزت آغانين الينه دوشسه يدي يازيق اولاردي ! عزت آغا سويو سوزولموش يانيما قاييتدي . باخ بير ... سنين اوغول بالان " لاله " ده کي امام حسين ميدانينداکي قوهوملاريمين کارتين وئريب " ارم " ده کي امام حسين ميدانيندا نم کيمه ، قاسيم داييم گيلين کارتلارين " قارا آغاج " داکي توحيد خياواني يئرينه " طالقاني " ده کي توحيد خياوانيندا ايتير باتير ائديب ، " زعفرانيه " ده کي کوي فرهنگيانين کارتلارين آپاريب وئريب " شام قازان " داکي کوي فرهنگياندا نم هارا ... من اؤلوم ؟يامان هوشلو - باشلي دده - بالاسيز واللا ! گئديب شهرداري استخدام اولماليسيز بااااااا سيز ، سيز اولماساز 2018 ده تبريزه گلن توريستلر دووار ديبينده قالار ... آخي بيز ده ده ائله گوناه يوخدور کي ، سن گئديب تبريزين شهرداريندان شکايت ائده جکسن بااااااااا ، بير ياندان تبريزين قديمي آدلارين ده ييشير ، بير ياندان دا بير آدي تبريزين نئچه منطقه سينه سئچير !منيم سؤزلريم عزت آغاني يوموشالتماق يئرينه ، بيله سين دلي ائتدي ، الينه گله ني آليب باشينا چيرپيردي يئره ! گؤردوم آتابي ايله منه ده مشتري گؤزو ايله باخير ، تئز آتابه يين قولوندان ياپيشيب آرادان جيرديق يوخسا ايکيميزي ده آليب باشينا يئره چيرپسايدي ، ايکيميزينده قويوغوموز پارتلاردي
بولگه لر سرويسي:دووار بير قونشوموز ايله سويوموز بير آرخا گئتمزدي ، گئجه - گوندوز اليم دعادا قالميشدي کي ايکيميزدن بيريميز ائوميزي ساتيب او کوچه دن گئدک ! دعالاريم اثر ساليب قونشوموزون ائوي ساتيلدي .