يقين او دا بيلير بيز نييه گلميشيک. گؤزوم دووارداکي، آغ اؤرپکلي، گؤيچک اوشاغين سوس دئيه، بارماغيني دوداغيندا ساخلايان شکيلده قاليب.آشپازخانانين سکي‌سينه سؤيکه‌نيب، دئديم: »گئتميه‌جه‌يم!« گلين باجي آغ يايليغيني بوخاغي‌نين آلتيندا سانجاقلادي. قار چرچيوه‌لي گيرده گؤزلويونون اوستوندن منه باخدي: »آنان بير شئي بيلير دا، دئيير گئت…!«بيردن ديليمه گلدي دئييم کي، »آخي سنه نه دخلي وار، گلين باجي!« ايسته‌مه‌ديم گلين باجيني اينجيديم. تئلويزيونو آچيب، گؤزلريمي‌اکرانداکي اوچان قوشلارا زيلله‌ديم. آنام، قاشيق الينده آشپازخانانين سکي‌سينه ديرسکلندي: »اليميزده کاغاذ اولسا، بير سؤز دئينده تپه‌ريک گؤزلرينه.«گلين باجي آنامين سؤزونو کسدي:»گؤرمه‌دين، آناسي زهر تولوغويدو!؟« وئرمزديز دا- دئديم.آنامين الينده‌کي قاشيق سکي‌نين اوستونه دامجيلادي. »گئنه باشلاما!« دئدي.»تک سن دئييل سن‌هاااا…سندن سونرا ائوده ايکي قيز دا وار.« دينمه‌ديم. گؤزوم اکرانداکي قوشلاردا قالميشدي. تدقيقاتچيلار نيشان قويماق اوچون حالقالاري قوشلارين آياقلارينا برکيديب، بوراخيرديلار.»نه ائيله‌ييم. ائلچي‌لر قاپيني يئريندن چيخاردير آخي… «آنام ايدي يئنه آشپازخانادان سس‌لندي. گؤزوم اکراندا- »بير دفعه دئه اليمده قالميشدين دا…« دئديم. گلين باجي يئنه گؤزلويونون اوستوندن منه باخاندا، ائله بيلديم جيزگي فيليم‌لرده‌کي گؤزلوکلو بوتؤو آيدي.گوموشو ساچلاريني آغ يايليغي‌نين آلتيندا گيزله‌ديب.»قيسمت قيزيم قيسمتي نه گؤرموسن!« دئدي.»من اؤزومه گووه‌نيرم . کاغاذ نه‌يه لازيم‌دي؟«گؤزلمه اوتاغيندا، دووارداکي سوس دئين قيز، باشقا اوتورانلارا باخمير. گؤزونو آنجاق منيم اوزومه تيکيب. نومره وئره‌ن هردن –هردن منه، بير ده يانيمداکي قومرال ساچلي قيزا باخير. ائله بيل بيزدن سونرا، بوردا باشقا بير آدام يوخدور.آنام بير منه باخدي، بير ده گلين باجي‌يا. قاشيغي اوجاق اوستونده کي بوغلايان قابلامانين قيراغينا ووروب،» قورخورام گلين باجي‌يا چکه‌سن« دئدي.قاشيغي قابلامانين اوستونه قويوب، اوجاغي سؤندوردو. سوروتمه‌لريني سوروتله‌يه-سوروتله‌يه تنه‌بييه گلدي. اليمدن ياپيشيب، گلين باجي‌نين يانيندا اوتوردوب، دئدي: »سن بير سؤز دئه گلين باجي! بو قيز کؤنز‌دي« گلين باجي آياقلارين اوزالديب گولدو. ساختا ديشلري، ميرواري دنه‌لري کيمي‌آغ-آپباغ ايدي. »قيزيم! بلکه بيزيم زامانيميز کيمي‌يئنگه-موشاتا قاپي‌نين داليسيندا کئشيک چکه!«»ايندي او زامان دئييل!« دئديم »بيز دانيشگاه گؤرموشوک. هر شئيي بيليريک.« آنام دا گلين باجي‌نين يانيندا موخدّه‌نين قاباغيندا يئره اوتوردو. »کؤنزليک ائله‌مه. گلين باجي‌نين توي گئجه‌سيندن بري، ائل- طايفانين گؤزو قورخوب، اليميزده کاغاذ اولسا ديليميز اوزون اولار.«گلين باجي، ساغ ياناغيندان آخان گيله‌لري يايليغي‌نين اوجويلا سيلدي. ياييليغي سورمه رنگينه بوياندي. گؤزلويونون آلتيندا، سول گؤزونون چوخوروندا بير گيله قالدي..تئلويزيون کنترلونو يئره چيرپيب آناما باغيرديم: »گئتميه‌جه‌يم….بيلديز…گئتميه‌جه‌يم!«دئديم گئتميه‌جه‌يم؛ امّا گلديم. اوسته‌ليک يانيما بير يئنگه ده قوشدولار. آداخليمدان علاوه باجيسي دا بيزيم‌له گلدي. کاشکي اونون يئرينه گلين باجي گليردي.گؤزلمه اوتاغي‌نين آغ چيرکه سوْو چارپايي‌سي يانچاقلاريما باتير، ميخدي سانکي. آداخليم يئرينده قايناشير. سانکي اونون قيزليغي‌نين مؤهورونو کاغاذا باساجاقلار. يانيمدا اوتوران قومرال ساچلي قيزين عطير قوخوسو، بورنومو آجيشديرير. قيز منه باخيب، دووارداکي شکلين آلتيندا ايله‌شن قاديني گؤسترير. او دا قومرال ساچلي‌دير. قيرميزي ديرناقلاري آغ‌‌آپباغ اللريني قات-قات گؤزل گؤستريرير. آياقلاريني بير-بيري‌نين اوستونه آشيريب. باشماقلاري‌نين اوجا دابانلارينا باخيرام. قيز »مامام! « دئيير.»يانيمداکي دا آداخليم« آداخلي‌سينا باخميرام. ماماسي، ماتيکلي دوداقلاري‌لا اوزومه گولومسه‌يير. ماتيکي ديرناقلاري‌نين لاکي رنگينده‌دير. »سيزده ماينايا گليب‌سينيز؟« آداخليمين باجيسي مندن قاباق اورتايا آتيلير: »بلي، بو جومه تويلاري‌دي!« دئيير. جانيمي‌قيزيشما باسير. آداخليم ياواشجا قولومو دومسوکله‌ييب،گولور.اوره‌ييمده بير شئي قايناشير. سانکي دامارلاريمي‌سيخير. آز قاليرام دوروم نومره وئره‌ن کيشي‌نين ميزي‌نين اوستونده‌کي کاغاذ دله‌ني آداخليمين باشينا چيرپيم. آغ رنگلي کوره‌کن کت-شالواري گؤزومه چيرکه سوو گلير. گؤزومو، دووارداکي سوس دئيين قيزين دوداقلارينا تيکيرم. قيز دوداقلارين بوزوب، آداخليما باخير. گلين باجي‌نين گؤز چوخورونداکي ياش گيله‌سي هله قوروماميشدي. » من يازيلماميش آغ-آپباغ کاغاذ کيمي‌ايديم« دئدي. يايليغيني باشيندان آچيب، بير ده سانجاقلادي. »او زامان حکيم-قابيله يوخ ايدي کي قيزيم!« سونرا باغداش قوروب، بير ده دئدي»موشاتانين سؤزو حکم ايدي.« آنام: »گلين باجي! هله طايفا داعوالاريندان دئه با..«گلين باجي دئدي »هله اؤز عمواوغلوم ايدي‌ها…، اؤزگه دئييلدي کي…!«گؤز اوجو آداخليما باخيرام. ماينا سؤزونه گولوب، قولومو دومسوکله‌ينده، بيلميرم نه‌دن اؤز يانيمدا دئديم بلکه اؤزگه‌دي يانيمدا اوتوروب. تاکسي لار دا، اؤزلريني قادينلارا سورتن کيشي‌لر ياديما دوشدو. بير آن دئديم بس، اوندان زهلم گئدير. ميز آرخاسينداکي نومره وئره‌ن کيشي پول سايير. يانيمداکي عطيرلي قيز منه ساري اييلير. اليني قولاغيما طرف گتيرنده، اوزون، ماوي مانيکورلو ديرناقلاري ياناغيما باتير.»سن ده قورخوسان؟«»بير آز«ديرناقلاري ياناغيمي‌اينجيدير.»دئييرلر بو قابيله اؤز ايشينده باجاريقلي‌دير. ترميمي‌ده ياخشي بيلر، هن…«»ترميم نه‌دي؟«»هئچ زاد بابا، قيزليغي تيکيرلر دا…« »نه بيليم. بيرينجي دفعه‌م‌دي گليرم«قيزين ايستي نفسي ياناغيمدان اوزاقلاشير. دوداقلاري پاريلدايير. دووارداکي قيز، گؤزلريني ميزين اوسته‌کي درگي‌لره زيلله‌ييب. درگي‌لرين اوزه‌رينده‌کي اوشاق شکيل‌لري سوس دئين قيزا اوخشاميرلار.هامي‌سي‌نين دوداقلاري ماتيکلي،گؤزلري سورمه‌ليدير. شکيل‌لرين بيريني قومرال ساچلي‌يا گؤستريرم »گؤره سن بو اوشاقلار، بيزيم ياشيميزا يئتيشنده، اونلاردان دا قيزليق وثيقه‌سي ايسته‌يه‌جکلر؟« آردي وار
بولگه لر سرويسي:هله نوبه‌ميزه قالير. ميز آرخاسيندا اوتوران نومره وئره‌ن؛ قارا بوغدايي ساچلي، اورتا ياشلي کيشي‌يه باخماقدان اوتانيرام.
بولگه لر سرويسي:قومرال ساچلي، شکيله باخيب گولومسه‌ينده ماينا اوتاغي‌نين قاپيسي آچيلدي. قيزين گولوشو دوداقلاريندا دوندو اوچ نفر ائشيگه چيخديلار.