بولود قاراچورلو «سهند»؛ (کيملييني آراييب، شعرلشديرن شاعير)

بولگه لر سرويسي: بولود قاراچورلو(سهند)- نون بوتونلوکله شعرلريني( روايي چارپارا،.. سربست شعرلري ) احاطه ائدن »قارداش آندي« ياشماقچيلار وريندن قوجامان سهنديميزه اردمينه ياراشان گؤزو- روحو اوخشايان، هرآذربايجانليني اؤيوندورن بير دورومدا صحافي، چاپ اولونوب چاغداش ادبياتيميزين ساحه‌سيني ايشيقلانديرميشدير داها دوغروسو. بو قالين، حجيملي اثري اله آلديقدا هر آذربايجانلي‌نين وجودونو سونسوز غرور، گوونج هم ده سئوينج دالغالاري بورويور.

 جعفر بزرگ‌امين

بولگه لر سرويسي: بولود قاراچورلو(سهند)- نون بوتونلوکله شعرلريني( روايي چارپارا،.. سربست شعرلري ) احاطه ائدن »قارداش آندي« ياشماقچيلار وريندن قوجامان سهنديميزه اردمينه ياراشان گؤزو- روحو اوخشايان، هرآذربايجانليني اؤيوندورن بير دورومدا صحافي، چاپ اولونوب چاغداش ادبياتيميزين ساحه‌سيني ايشيقلانديرميشدير داها دوغروسو. بو قالين، حجيملي اثري اله آلديقدا هر آذربايجانلي‌نين وجودونو سونسوز غرور، گوونج هم ده سئوينج دالغالاري بورويور.
 نه ايسه ادبي تنقيدچي بو گئرچه‌يي تام دويدوقدا، ان دوغما جاني کيمي اولان ملي اثريني جوشغويلا- ملي تعصوبدن قيراق، او اثره ادبي تنقيد آچيسيندان ياناشديقدا اونون تاريخي ائتگيسيني، رولونو گؤز اؤنونه آلاراق، اساسدا اونون ادبيتي- ساختاري- زيبايي شناختي دورومويلا باغلي اولان بديعي گؤزلليکلريني آچيقلاماليدير
.»قارداش آندي» آذربايجانيميزين ادبي- معنوي وارليغي‌نين اساس ساحه‌لريندن اولماسي دانيلمازدير. «قارداش آندي» اؤز دؤورونده(راسيست پهلوي رژيمينده) ادبي وارليغيميزلا، کيملييميزي قابارديب گؤز اؤنونه چکديگي، اونلاري قورودوغو دانيلمازدير. »قارداش آندي« ادبي اثرين ساغلام تورکجه ديله يييه‌لنمسي دانيلمازدير.
»سهند« يئنيچي بير ملتچي(ناسيوناليست)، سولچو شاعير اولماسي ايله ياناشي، گلوبال دوشونجه‌لي، دموکراتيک بير آذربايجانلي چاغداش شاعير اولماسي دانيلمازدير. »سهند« اؤز ملتي‌نين ديلينه، کيمليينه داياق دوران، اونو قورويان بير ملي شاعير اولماسي دانيلمازدير. »سهند« اؤز ملتي ايله باشقا ملتلرين فرهنگي- معنوي حاقلاريني مدافعه ائدن بير شاعير اولماسي دانيلمازدير. »سهند« بعضي شعرلرينده يئني دوشونجه، باخيشلا – اوخونوشو اوزه‌ره آوانگارد- مدرن دوشونجه لي بير شاعير اولماسي دانيلمازدي»
آما «قارداش آندي»‌نين ادبي تنقيدي آراشديرماسيندا يوخاريداکي دانيلماز‌ديرلرينين تام قورونماسيلا ياناشي، يالنيز اونون ساختاري- زيبايي‌شناختي دورومويلا باغلي‌ديرلنديرمه‌لييک. بو‌ديرلي اثرين ادبي تنقيدينه گيرمه‌دن بير اؤنملي قونونو آچيقلاماق زوروندايام . ايراندا يوزوملاناسي شاه اثرلره گؤروندويو کيمي چوخلو شرحلر، آچيقلامالار يازيلميشدير. اؤرنک اولاراق مولوي‌نين مثنوي‌سينه 18 شرح يازيلميشدير.
 من بيله‌ني( سونونجوسو اوستاد کريم زماني‌نينکي‌دير). يا حافظين ديوانينا اونا تاي. يا همين بو »قارداش آندي« ادبي اثريميزين اولينده آذربايجان يازارلاري، عاليملري وريندن سهندين شعرينده اولان دوشونجه- مضمونويلا باغلي نئچه آچيقلاما يازيلميشدير. منجه بير شاه اثره يازيلان شرح‌لر يا آچيقلاما کيمي اؤن سؤزلر اوخوجو – مخاطب ايله اثرين آراسيندا آراچسيز دوشونجه قازانماغا، يوزوما بير دووار، بيرمانع يارانديقدا اوخوجونون متنيدن باغيمسيز آلا بيله‌جه‌يي يوزوم-آنلام انگلله‌نيب، اونا اؤنجه‌دن شرح ائده‌نين اؤز ذهنيتي ايله يوزومو يوکله‌نير. »قارداش آندي« اثرده ده بو اوغورسوزلوق اولايي باش وئرميشدير منجه. بير نئچه‌ديرلي عاليميميز سهندين شعرينين تاريخي رولويلا، شعرينده اولان دوشونجه‌لريله باغلي آچيقلامالار اؤنجه‌دن اوخوجويا بير ذهنيت، بير يوزوم يوکله‌ديکده اونون متنيله اؤز مستقيم باغلانا بيله‌جه‌ييني انگللميشدير. نه ايسه بو اؤن سؤزلر قارداش آنديندا
يئرلشن شعرلرينين ادبيّتي- زيبايي‌شناختي دورومويلا آزاراق باغليديلار. بو اؤن سؤز کيمي يازيلارين بوکيتابدا يئرلشمه‌لري منجه تام يئرسيز اولموشدور. کئشگه بو يازيلار يازيلماسايدي، کئشگه اوخوجولارا اؤزلري شعرلرين کاراکتئري ايله، دوشونجه‌سيله ايلگيلنمه‌لرينه فورصت وئريلسه‌يدي.
هر حالدا آذربايجانيميزين دوشونور-تنقيدچيسي حؤرمتلي سولئيمان اوغلو سهندي، شهريارلا بير‌سيرادا اوزان شاعيري کيمي‌ديرلندير ميشدير. بو‌ديرلنديرمه منجه تام دوغرودور. بو تنقيدي اوخونوشوم ياشماقچيلار يايينلاديقلاري سهندين »قارداش آندي« اثري اساسيندا ساغلانميشدير.
 بو اثرده يئرلشن سهندين آزاجيق اوغورلو فارسجا، هم ده تورکجه سربست شعرلريندن واز کئچديکده، يالنيز روايي چارپارا، قوشما قاليبلاريندا يازديغي اوغورلو شعرلري‌نين ائستئتيک- ساختاري جهتلريني آراشديريب اينجه‌لنميشدير. سهندين اساس شعر ياراديجيليغي، اوزان(آشيق) سؤي قاليبلاريندا (قوشما، گرايلي، باياتي)، چاغداش کلاسيک قاليب اولان چارپارا قاليبيندا اولموشدور. سهند آزما- چوخ فارسجا، تورکجه سربست فورمادا شعر يازماق ايسته‌سه‌ده نه ايسه شعري‌نين تمل کاراکتئري، ساختاري، ديلي، تخيلي، ائستئتيک دورومو، شعري‌نين فضالاري، قاليبي اوزان سؤي دوروموندا اولاراق، سونوندا چارپارا قاليبيني آشا بيلمه‌ميشدير.
سهند چاغداش بير اوزان شاعيريدير آرتيق. سهندين شعرلري دوشونجه ايله ايچريک باخيميندان يئني، حتا مدرن‌ديرسه آما بو گونجل ايچريکلري چارپارا، بعضا ده قوشما قاليبينا دؤکرک ياراتميشدير.
 سهند دده قُورقوت بويلاريني يئني، گونجل ديل- ائستئتيک ده دوزنله‌ديکده شعري دده قورقوت داکي شعرلرين ديلي، فضالاري، ترکيبلرله، تخيولونون ائتگيسيندن اؤزگورلشه بيلمه‌ميشدير. بو ائتگي سهندين اؤز روايي چارپارا قاليبيندا يازديغي شعرلرده بئله دده قورقوت يئرينه قويوب روايتي ايره‌لي سورمه‌سينه کيمي گليب چيخارميشدير.
سهندين شعري اوزره يازيلان اوخونوشلار ادبي تنقيدله ايلگيسيز اولاراق سهندين يالنيز فلسفي باخيشيني، دوشونجه‌سيني، شعرلرينده يئرلشن ايچريکلريني، نه دئديگيني، نه دئمک ايسته ديگيني آچيقلاييب، اونون شعرلرينين زيبايي شناختي دورومو ديلي اوزره آراشديرما، اينجلمه گؤرونمه‌يير آرتيق. هله ماراقليسي 21- ينجي عصريده سهندي عارف، نه بيليم ماراغا عرفان حالقاسي‌نين باشچيسي کيمي ده‌ديرلنديرن ده واردير.
سهند اؤز شعرلرينده عرفاني ايچريکلردن، آنلاملارلا‌سيمگه‌لردن يارارلانسادا سونوندا تام بير سولچو – رئاليست، بومي بير شاعير اولدوغو، فيزيکي انسانا اينانديغي، هر شئي انسانين يئره‌ل باخيش- دوشونجه‌سيندن آسيلي اولدوغونو آچيقلاميشدير .
سهندين اساس شعر کاراکتئريني، شعرلرينده اولان فلسفي- دوشونجه باخيشيني، دوزه‌نله ميش دده قورقوت بويلارينين چارپارا، قوشما قاليبلاريندا يازديغي باشلانيش؛ سون سؤزلرده يازديغي شعرلرده آراماق گره‌کير منجه. بو باشلانيشلاردا سهند دده قورقوت بويلاريندان ائتديگي يئني اوخونوشو تام شاعرانه، شعريتله اوخوجونون گؤز اؤنونده جانلانديرا بيلميشدير. بو باشلانيشلارين، شعرلرينين ديلي تام ريتميک، بيرچوخ بندلرده ديل تصويري- مجازي‌دير. آخيجي‌دير.
 نه ايسه بعضي چاتيشمازليقلاردا گؤرونمکده‌ديرلر.( کيمسه بو چاتيشمازليقلارا دقت يئتيرمه‌ميش بو گونه‌دک، بلکه ده آغير پهلوي دؤرونون‌سياسي، اجتماعي، تاريخي دوروموندان آسيلي اولاراق اونلارا توخونماغي يئرلي‌ديرلنديرمه‌ميشلر).
سهندين اؤز فلسفي باخيشي، گونجل دوشونجه‌سيله، درين دويغولاريني، سئچديگي، ايسته‌ديگي ايچريکلري اوخوجوسونا کؤچوروب چاتديرماق اوچون چارپارا قاليبيني سئچميشدير. بيلدييميز کيمي چارپارا قاليبي کلاسيک شعريله چاغداش سربست شعرين آراسيندا بير کؤرپو-کاتاليزور کيمي ايشله‌نن قاليبدير.
 منجه بويلارين آرخائيک ديلي- فضالاريلا تام اويغون اولاراق اونلارين يئني اوخونوشونا ائله بو روايي- خطابي چارپارا قاليبي تام يئرلي- هونري بيچيمده سئچيلميشدير. اوخوجودا بوراخا بيله‌جک ائتگيسي باخيميندان چارپارا قاليبي اويغون گؤرونور داها دوغروسو. نه ايسه شعرين يازيلديغي‌سياسي، تاريخي، اجتماعي دورومون( فارس پهلوي راسيسمي‌نين قان قان دئين حاکميتي دؤرو، ديل-کولتوروموزون شيدتلي ياساق دؤرو) نظرده آلاراق بو شعرين چاتيشمازليغي واز کئچيله‌سي بلکه ده تام دوغاليميش. گونونده سهند بو شعرلريله اؤز ملي-فرهنگي گؤره‌ويني اؤز ملتي قارشيسيندا ايگيد‌ليکله ياپميشدير آرتيق. آما بو گون بو شعرلر بير چاغداش کلاسيک شعر کيمي يئريني آلاراق، اونلارين تنقيدي‌نين زاماني منجه گليب چاتميشدير.

منبع :