گنج قيز ايله آداخليسي گوله-گوله قاپي‌يا ساري گئتديلر. اونلارين آرخاسيندان گلن قادينين الينده، اوزون، ائن‌سيز بير پاکات واريدي نومره وئره‌ن کيشي، قومرال ساچلي‌يا گؤز اوجو اشاره ائله‌ييب »سيزين نوبه‌زدي« دئدي. قومرال ساچلي‌نين گؤزو اؤنوموزدن کئچن قادينين الينده کي پاکاتدا قالميشدي. آنام آشپازخانادان گلين باجي‌يا گؤز ائله‌دي اؤز يانيندا دئدي بس گؤرمه‌ديم.»هله سلطان عمّه‌قيزيني دئه با…»گلين باجي آياقلاريني اوزالداندا، آغ دونونداکي ساري کپنک‌لر سانکي اتگيندن يوخاري‌يا اوچدولار. »يازيق سلطان عمّه‌قيزي« دئدي. ايسته‌ديم دئييم: »گلين باجي! منه گئجه ناغيلي دانيشما.« گلين باجي، گؤزلويونون شوشه‌لريني هوْولاييب، يايليغي‌نين اوجويلا سيلدي »اونون گوناهي يوخ ايدي کي! بي‌بي اوغلويلا دوشمان‌چيليقلاري وار ايدي آجيغيني اوندان آچميشديلار. قيزليغيني پوزموشدولار.«ديليمين اوجوندايدي آز قالميشدي دئييم: »آخي سلطان عمه قيزي‌دان، منه نه وار؟« گلين باجي اودقوندو »توي گئجه‌سي- عمّه خانيم، موشاتانين اووجونا پول باسميشدي کيمسه‌نين دابان قانيني شوشه‌يه دولدوروب دسمالين اوزه‌رينه توکمه‌ييني موشاتايا تاپشيرميشدي. دئمه بس قان قورويوب. هارا چاتاجاق! موشاتا،ها شوشه‌ني چالخاميشدي، بير داملا قان بئله دسمالا تؤکولمه‌ميشدي. او گئجه هم موشاتا، هم ده سلطان عمّه‌قيزيني اؤلدوسونه دؤيموشدولر.« آنام، آشپازخانادان سس‌لنير:»هله دئييرلر سلطان عمه قيزي، بير ايل ياتاليق ياتدي.«گلين باجي‌نين گؤزوندن يئنه ده ياش آخدي. »بونلارين هئچ بيري، خالا قيزي‌نين قيزي کيمي‌نيسگيل‌لي دئييلدي. اونون قيزليغين پؤزاندان سونرا،کبينيني بير قوتو شيريني ايله ائولرينه گؤندرميشديلر. يازيق خالا قيزي، ايکي آي چکمه‌دي قيزين غصه‌سيندن فيججه‌له‌دي. اؤله‌نه قدر قيزي‌نين قبريني بئله گؤرمه‌دي« نومره وئره‌ن کيشي، ميزين سورگوسوندن تئلويزيونون کنترلونو آليب، دوواردا پايا اوزه‌رينده‌کي تئلويزيونو آچدي. يئنه دوننکي قوشلارين فيليمي‌نين تکراريني گؤستريردي. قوشلارين آياغينا مئتال حلقه وورودولار. قومرال ساچلي‌دان سونرا، سيرا بيزه چاتاجاق ايدي. اوره‌ييم گوپ-گوپ گوپبولدايير. دئييرم بس آداخليم دا بو اوره‌ک دؤيونتولريمي‌ائشيدير آنجاق اونون ايسه گؤزو تئلويزيوندا‌کي قوشلاردان يايينمير. باجيسي تبسّوم‌له اييليب »ايندي بيزيم نوبه‌ميزدي« دئيير. منيم دوداغيم قاچير. دووارداکي قيزا » بو زهلم گئتميش گلمه سيدي اولمازدي‌ها…«دئييرم. قيزين بارماقلاري‌‌نين آلتيندا دوداقلارينين گولومسه‌يير. مطبّين قاپيسي هوژمونن آچيلاندا دووارداکي قيز ديسکيندي. گولوشو دوداقلاريندا قورودو. من ده ديسکينديم. ايکي قادين، گنج بير قيزين قولوندان ياپيشيب ايچه‌ري گيرديلر. قيزين آياقلاري يئرده سورونور. ريمل‌لري‌نين قاراسي قيپيقلارينا ياييليب ياناغيندان چنه‌سينه آخينيب. اؤرپه‌يي‌نين آلتيندان يايينيب ائشييه چيخان تئللرينده‌کي گول، آلماس کيمي‌پاريلدايير. ماتيک‌سيز دوداقلاري جادارجاداردي. اونلارين آرخاسينجا، اوتوز ياشلي بير کيشي ايله ايکي چارشابلي قادين ايچه‌ري گيريب نومره وئره‌ن کيشي‌نين اؤنونده دايانيرلار. قادينلار قيزدان بير آز آراليدا، چيرکه‌سوْو صندل‌لرين اوستونده اوتوربلار، کيشي ايسه نومره وئره‌ن‌له دانيشير. قار کوتونون کورک حصه‌سي قيريشيق‌دير. ائنلي کؤره‌يي، نومره وئره‌ن کيشيني گؤرمه‌ييمه مانع اولور. يالنيز سسيني ائشيديرم. »نوبه‌سيز اولماز!« دئيير. کيشي‌نين الينده گيزلتديگي سيگار، توستوله‌يير. نومره وئره‌ن »سيگاري ائشيکده چکين.«دئيير. شکيلده‌کي قيز الي‌آغيزيندا اؤسگورور. کيشي، الينده‌کي سيگاريني چارشابلي قادينلار گؤستريب»من ائشيکده‌يم!«دئيير. ريملي ياييلان قيزين گؤزو اونون قيريشيق کوتوندا قاليب.بالديزيم، قيزين يانينداکي قادينلارا اييلير:»سيز نه اوچون گليب‌سينيز؟«قادين:»دونن گئجه تويلاري ايدي« دئييب الينده‌کي کاغاذي گؤسترير »اليميزده کاغاذ دا وار، ائله بو خانيم دوکتور وئريب«دئيير.گلين باجي‌نين گؤزونون چوخورونداکي ياش گؤزومده پاريلدايير. اوتانيرام قيزين ياييلان ريمل‌لرينه باخيم.گؤزوم ماينا اوتاغي‌نين قاپي‌سيندا قاليب. قومرال ساچلي، باييرا چيخير. آداخليسي قولوندان توتوب. ماماسي آرخاسيندان گليب. پاکاتي کيفينه قويور. قيز اوزومه گولومسه‌يير. آداخلي‌سيندان آيريليب، منه ساري گلير. اييليب قولاغيما »قورخما! چتين دئييل« دئييب آداخلي‌سي‌نين اليندن ياپيشيب، گئدير. ماماسي‌نين ديک دابان‌لاري‌‌نين سسي گئت-گئده اوزاقلاشير. نومره وئره‌ن کيشي، منه اشاره ائله‌دي. آداخليم‌لا بالديزيم منيم‌له بيرليکده قالخديلار. آداخليمي‌بالديزيما گؤستريب، دئديم: »اولار بو گلمه‌سين؟« او ايسه يئنه ديشلريني آغارتدي. »اصل‌کار او‌دي دا…«دئدي.اوزونه گولمه‌ييم گلمه‌دي: » زهلم گئتميش گولنده، نئجه ده دوزسوز اولور!« دووارداکي شکيله دئديم. اونلاردان قاباق ايچه‌ري گيريرم. قابيله خانيم اوزومه گولور. اوندان خوشوم گلير. گلين باجي کيمي‌گؤزلويونه باغلاديغي زنجير، اوزونون ايکي طرفيندن ساللانيب. اوتوردوغو صندله ياراشير. ماوي چرقدينين آلتيندان قارا تئل‌لري قاشقاسينا تؤکولوب. مانتوسونون بير دويمه‌سي قيريقدي. قيرميزي بلوزو گؤرونور. اوزومه گولور »پرده‌نين آرخاسينا کئچين!«دئيير.پرده‌نين آرخاسيندا سوس دئيين اوشاغين اکيز باجيسي دوواردان منه باخير. اوتاقدا، نابلد تخته اوخشار بير شئي وار. مريض‌خانالارين تخت‌لري کيمي‌دئييل. کئچميشده آپانديس عملياتي اوچون مريض‌خانادا ياتميشام. قابيله خانيمين سسي گلير:»شالواريني سويون! قالخ اوزان ماينا تختينه گلديم.«آداخليمدان آديني، شهرتيني سوروشور. منيم قيزليغيمدان اونون آدينا نه دخلي وار بيلميرم. ماينا تختينه نئجه چيخاجاغيما معطّل قالميشام؛ اوجاليغي منيم سينه‌مه‌جن‌دير. اورتاسيندا گيرده بير دئشيک، آلتيند ايسه ايستيل بير قاب وار. ايکي طرفينده آياقليق کيمي‌اوجا پايا گؤرونور. قابيله خانيم، اللرينده طبّي الجک پرده‌نين دالينا گلير: »بس بئله نييه؟ شالواريني چيخار، اوزان تخت اوسته!«.بالديزيم پرده آرخاسيندان سس‌له‌نير»کؤمه‌يه گليم‌مي؟« قابيله خانيم»ايسته‌مز« دئيير. نه ياخشي کي، »ايسته‌مز«دئدي. او زهلم گئتميش گلسه‌يدي، چيخيب قاچاجاغيديم.شالواريمي‌چيخارا-چيخارا شکيلده‌کي سوس دئين قيزدان نه‌سه اوتانيرام. قابيله چارپاياني آياغيمين آلتينا ايته‌له‌يير. گوجن بيللاه ماينا تختينه چيخيب، اوزانيرام. قابيله »آياقلاريني، آياقليقلارين اوستونه قوي! جان کؤينه‌ييني بير آز يوخاري قالدير« دئيير.دووارداکي شکيل منه باخير. مني گؤرمه‌سين دئيه، گؤزلريمي‌يومورام. گلين باجي گؤزلويونو چيخاريب، موخدّه‌يه داياندي.گؤزونون چوخورونداکي ياش قوروموشدو. دئديم:»سونرا نه اولدو گلين باجي؟« سوسدو؛ ائله‌بيل سؤزومو ائشيتمه‌دي. بيلميرم گؤزلريمدن قولاقلاريما آخان نه‌دير. ريملي ياييلان قيز کيپريکلريمين آراسيندان گؤزلريمه گيرير. گلين باجي يئريندن قالخيب پنجره‌يه ساري گئدير. نومره وئره‌ن کيشي ساعاتينا باخيب، اوتورانلاري سايير. سلطان عمّه‌قيزي ياتاليق ياتيب. خالاقيزي‌نين قاپي‌سيني دؤيوب، شيرني قوتوسو اوستونده‌کي پاکات ايچينده قيزي‌نين کبينيني وئريرلر… قابيله خانيم»قالخا بيلرسن« دئيير.گؤزلريمي‌آچيرام. شکيلده‌کي قيز گؤزلرين يوموب. قابيله خانيم الجک‌لريني چيخاراچيخارا »بوتؤو قالاجاق، قيزليغين گيرده‌دي« دئيير.آداخليم بارماغيني استامپا باتيريب.کاغيذين اوزه‌رينه باسديقدان سونرا بارماغيني شالوارينا سورتور. آغ شالواريندا جوهر لکه‌سي قالير….
بولگه لر سرويسي:هله نوبه‌ميزه قالير. ميز آرخاسيندا اوتوران نومره وئره‌ن؛ قارا بوغدايي ساچلي، اورتا ياشلي کيشي‌يه باخماقدان اوتانيرام.
بولگه لر سرويسي:قومرال ساچلي، شکيله باخيب گولومسه‌ينده ماينا اوتاغي‌نين قاپيسي آچيلدي. قيزين گولوشو دوداقلاريندا دوندو اوچ نفر ائشيگه چيخديلار.