محرم‏ليك و آنا ديليميز

ايراندا بو گونه قدر دوام ‏ائدن تاپان مركزي حكومتين تملچي‏سي بؤيوك حكمدار شاه اسماعيل ختايي‏نين رسمي اعلان ائتديگي تورك ديلي و شيعه مذهبي او زاماندان بري آذربايجان تورپاقلاريندا بيري - بيريندن آيريلمايان ايكي بؤيوك گئرچك

بولگه لر سرويسي:ايراندا بو گونه قدر دوام ‏ائدن تاپان مركزي حكومتين تملچي‏سي بؤيوك حكمدار شاه اسماعيل ختايي‏نين رسمي اعلان ائتديگي تورك ديلي و شيعه مذهبي او زاماندان بري آذربايجان تورپاقلاريندا بيري - بيريندن آيريلمايان ايكي بؤيوك گئرچك (واقعيت) اولوبلار آذربايجان ادبياتيندا بيرينجي مرثيه يازان شاعر ايسه شاه اسماعيلين معاصري اولان مولانا محمد فضولي اولموشدور و اوندان بري بؤيوك و نهنگ نوحه‏چي شاعرلر ايله اوزلشيريك و دئيه بيلريك ادبياتيميزدا مرثيه و نوحه يازمايان شاعرلريميز چوخ آز اولوبلار حتي صرفاً ساتيريك شعرلري ايله تانيلان و شرق دونياسيندا ساتيريك شعرين تملچي‏سي اولان ميرزه علي اكبر صابر كيمي بير شاعرين ده اثرلرينده نوحه و مرثيه گؤرمك ممكن‏دير آنجاق بو آرادا بير تعداد شاعرلريميز ده اولوبلار كي اؤز ياراديجي‏ليقلارين تماميله مرثيه شعرينه و عاشورا حادثه‏سينه حصر ائديبلر بو سيرا شاعرلردن دخيل مراغه‏اي، قمري دربندي  دلريش و باشقالارين آدين چكمك اولار حاج رضا صراف و راجي تبريزي كيمي بير شاعرلرين ديوانلارينين ياريسين نوحه و مرثيه شعرلري تشكيل ائدير.بيز نوحه‏لرده و مرثيه‏لرده خلقيميزين طالعي‏ايله باغلي نيسگيل‏لر، غربت حسي، ظلم و ظلمه قارشي نفرت، ايلقاري پوزماق و بو كيمي مضمونلار گؤروروك بونلاردان علاوه عاشورا حماسه‏سي ايله باغلي شعرلرده بير گئنيش سويه‏ده مضمون گئنيش‏ليگي واردير و اونلاردا ليريكا نمونه‏لري، عشق و عاشق‏ليك، قهرمانليق، دؤيوشچولوك، حسرت  آنا محبتي، آتا عشقي دالغالانير و امام حسين عليه‏السلامين اؤز اينامي يولوندا فداكارليغي تصوير اولونور و بو معصوم امام اؤز عزيزلرين  اؤز بالالارين، قارداشلارين و بوتون دونيا ايلگي‏لرين اؤز اينامي يولوندا فدا ائدير و مظلوم ياشايان كوتله‏لرين حقين ديريلتمك ايسته‏يير.
هر چند بو كوتله‏لر و بو خلق او امامين آرخاسين بوشالديرلار و اونو ميداندا يالقيز قويورلار آنجاق امام حسين عليه‏السلام اؤز وظيفه‏سين اونوتمور و اؤزونون دوغرو بيلديگي يولدا دايانير و بو يولدا شهيد اولور و بو شهيد اولماغي‏ايله تاريخ بويو انسانلارا دايانات درسي وئرير و مختلف يئرلرده مظلوم انسانلار امام حسين عليه‏السلامي اؤزلرينه اؤرنك توتاراق چوخلو عصيانلارا ال ووروبلار. بو مظلوملاردان بيري ده آذربايجاندا تورك ديلي و ادبياتي اولموشدور. بيلديگيميز كيمي بير چوخ زامانلار خصوصيله پهلوي‏لر دؤورونده ديليميزه و ادبياتيميزا اولمازين ضربه‏لر وورولدو، ديليميز يارالاندي و زمانه يزيدلري بو مظلوم ديلين باشين كسمك ايسته‏ديلر و آذربايجان خلقي‏نين ديلين اوزمك نيّتينده بولوندولار 50 ايل پهلوي حاكميتي زامانيندا كتابلاريميز يانديريلدي، مكتب‏لريميز باغلاندي، ديليميز ياد ديلي آدلاندي، خلقيميز اؤز كئچميشيندن و اؤز تاريخيندن اوزولدو، آذربايجان داهي‏لري افترالانديلار و آذربايجان شخصيت‏لرينين آدين چكمك گوناه ساييلدي بئله بير وور - ييخ زاماندا بيزي اؤز كئچميشيميز و اؤز ديليميزه باغلايان يگانه تئل عاشورا شعري و نوحه‏لري و مرثيه‏لر اولدو.دئمه‏لي بير سطر توركجه متني اوخويا بيلمه‏ين آذربايجان جمعيّتي هر محرم‏ليكده جور به جور توركجه نوحه‏لري بولبول كيمي اوخودو و بو ايش هر ايل و هر ايلين آراسيندا دؤنه - دؤنه مذهبي هيئت‏لرده تكرار اولدو و بو وسيله ايله ديليميزين كتبي فورماسي و يازيليب اوخونماسي نوحه كتابلاريندا قورونوب ساخلاندي آنجاق اوزون ايل‏لر بويو مكتبسيز قالان خلقيميز و شاعرلريميز اؤز يئني نوحه‏لرينده ديليميزين ادبي فورماسيندان اوزاقلاشديلار و بو ايش او حدّه چاتدي كي پهلوي‏لر دؤورونده يازيلان نوحه‏لر تماميله گرامر پوزغونلوقلاري ايله بيرليكده مختلف لهجه‏لرده اولدو و ايندي‏ليكده 20 ايل انقلابدان سوووشاندان سونرا و ديليميزين يئني انكشاف و ديرچليش مرحله‏سينده هله ده نوحه كتابلاريميز علمي‏لشمه‏ييبلر و هله‏ده كي وار اونلاردا (قالورام، گئدورم) كيمي يانليش فعل‏لر گؤرسنير و هله ده كي وار اونلارين جمله قورولوشلاري تماميله فارس گرامرينين تأثيرينده‏دير و بو اشاره اولوندوغو كيمي پهلوي‏لر دؤورونون شوونيستي حاكميتيندن آشيري بو وضعيته گليب دوشوبدور يوخسا اوندان اؤنجه و مثال ايچون حاج رضا صرافين نوحه‏لري تماميله ادبي ديل فورماسيندادير بونونلا دا ديليميزين قايدالارين نوحه كتابلاريندا يئريتمه‏لي و خلق ديليندن آيريلماياراق بو كتابلاريميزين دا ديل‏لرين علمي‏لشديرمگه چاليشمالي‏ييق .

منبع :