آذربايجان ناغيللاري قوجا و يوخسول کيشي بير گون اوغلونا دئدي:اوغول، داي گليريم يوخدو، قوجالميشام، اليمدن بير ايش گلمير. ايسته¬ييرم سني اؤزومله آپارام آيري ماحالدا بير ايمکانلي کيمسه‌يه نؤکر و يا چوبان وئرم و کئچينه‌جييم اوچون پارا آليب گتيرم، سن بو سؤزه‌راضيسان يا يوخ¬¬؟ اوغلو دئدي:– راضيام، حتا مني ساتيب خرجله‌سن ده‌راضيام و اينجيمرم.آتادئدي:– اوغول، بس حاضير اول صاباح سني بير آيري کنده آپاراجاغام.صاباح اولور. آتا اوشاغيني دا گؤتورور و آيري بير ماحالا گئتمک اوچون يولا دوشورلر. اونلار يول آراسيندا بير بولاق باشينا چاتيرلار. آتا دئيير: – اوغول بورادا بير آز دينجلک.ال- اوزلريني يويورلار. آتا بير اووج سو ايچيب، دئيير: »يزيده لعنت.«اوغلان دا بير اووج سو ايچيب دئيير: »اوخقاي!« بو آندا بولاق پارچالانير و ايچيندن بير کيشي چيخير و دئيير:– امر بويورون قوربان! من‌سيزين قوللوغونوزدايام.آتا بالا کيريخ قاليرلار و اورک‌لرينده »آللاه بو نه ايش‌دي؟!«دئييب مات قاليرلار. بولاقدان چيخان آدام سؤزون بير داهادا تيکرار ائدير. آتا – بالا بير-بيريلرينين اوزلرينه باخير و حئيرتلنيرلر. آتا دئيير: »آغا، بيزيم سيزينله ايشيميز يوخدو.« سودان چيخان آدام دئيير: »سيز مني سسله‌دينيز و من ده گلديم.« آتا دئدي: »يوخ بيز سني سسله‌مديک. من سو ايچندن سونرا دئديم يزيده لعنت و اوغلوم دئدي اوخقاي. هر ايکيميز ايسته‌ديک آللاه‌دان تشکور ائدک«. کيشي دئدي:– سيز دئدينيز اوخقاي، منيم ده آديم اوخقاي‌دي من ده گلديم ائشيگه کي گؤروم منيمله نه ايشينيز وار؟آتا دئدي:– بيز بيلمه‌دن سيزين آدينيزي ديله گتيرميشيک.سودان چيخان کيشي دئيير:– ايندي دئه گؤروم‌هارا گئديرسير؟آتا دئيير:– بيز اوغلوما ايش تاپماق اوچون آيري ماحالا گئديريک.سودان چيخان کيشي دئيير:– ايندي دئه گؤروم اوغلون نه ايش باجارير؟آتا دئيير:– هر ايش باجارير چوبانچيليق، نؤکرچيليک و…سودان چيخان کيشي دئيير:– آللاه سيزي منه ياخشي يئتيردي. من ايش گؤردورمگه بير نفر ايش آدامي‌آختاريرديم، وئر من آپاريم ايشه.آتا دئيير:– يوخ من ايسته‌ييرم کي هر زامان گؤيلومه دوشنده گئديب اوغلومو تاپيم، اونا باش ووروم. سيزي‌هارادن تاپا بيلرم؟ سودان چيخان کيشي دئيير:– خيالنيز‌راحت اولسون، هر واخت ايسته‌سز گليب بورادا مني سسلرسيز من و سنين اوغلون بير‌ليکده گليب بورادا خدمتيزده حاضير اولاريق. ايندي دئه گؤروم اوغلونو نئچه‌يه قوللوقچو وئره‌جکسن؟آتا بير آغير پول ايسته‌يير کي سودان چيخان آدام اوزاقلاشسين. اوخقاي ايسه اونون دئديگينين ايکي برابريني اؤده‌مک ايسته‌يير. اليني سالير جيبينه و پوللاري قوجا کيشييه وئرير. قوجا کيشي گؤردوگونه مات قالير و او قدر پولو گؤروب حيرانليقدان بير سؤز دئيه بيلمير. اوغلوندان وداعلاشيب آيريلير و ائوينه ساري يولا دوشور. اوخقاي دا اوغلانين اليندن توتور، بولاق آرادان پارچالانير و اوخقاي‌لا اوغلان غيبه چکيليرلر. اوخقاي اوغلاني قيزينين يانينا آپارير. اوغلانا دئيير:– بوندان سونرا سنين ايشين منيم بو قيزيمدان گؤزتچيليک ائتمک‌دير. او هر نه امر ائتسه گرک سن اطاعت ائده‌سن.اوغلان اليني گؤزونون اوستونه قويوب، »گؤزوم اوسته« – دئيير. اوخقاي گئدير آيري ايشلري‌نين داليسيجا و اوغلان قالير قيزين يانيندا. اوغلان چوخ دا گؤزل ايدي. او اؤز گؤزلليگيني گيزلتمک اوچون باشينا بير دري پاپاق قويوردو. قيز ايلک باخيشدا اونون دري پاپاغيني گؤروب، دئيير کي دري پاپاغي باشيندان گؤتور. اوغلان دري پاپاغي باشيندان گؤتورور و قيز اوغلانين سون درجه ده گؤزلليگيني گؤروب، حيرانليقلا دئيير:– نييه بو بؤرکو قويورسان؟اوغلان دئيير:– ايکي دليلي وار، بير بو کي ايسته‌ميرم منيم گؤزلليگيمي‌بيري بيلسين. بيرده بو کي بو گؤزلليکده بير آدامي‌نوکر آپارمازلار.قيز اورکدن اوغلانا وورغون اولور و اوغلانا دئيير:– سن دوز دئييرسن، بو گؤزلليکده بير انساني قييب، نوکر ائله‌مزلر.اوغلان دري پاپاغيني بير داها باشينا قويوب، گؤزتچي‌ليگي ايله مشغول اولور. اوغلان بيليجي ايدي. او بونو تئزليکله اؤيرندي کي اوخقاي غير عادي ايشلر باجارير. مثل»اسمه‌جين« اوخويور و اووساري هر شکيله ايسته‌سه سالا بيلير. مثلا اووساري، آت، دوه، ال – حئيوانلارين شکلينه سالا بيلير و آپارير بازاردا ساتير، و‌لي ساتاندا دئيير: «من بو حئيواني اووسارسيز ساتيرام. بونا گؤره کي بوتون سحر- دادي‌لار او اووساردا ايدي کي حيوانلار اونون اختياريندا اولوردولار و اونلاري آپاريب بازاردا ساتا بيليردي. ميثالن دوه‌ني ساتيردي؛ گئجه سحر و جادو ائيليردي کي غيب اولسون. دوه‌ني آلان شخص ده بئله دوشونوردو کي حتما گئجه ياريسي اونو اوغورلاييبلار. هر گون ده بير تزه قيافه‌ايله بازارا گليردي کي تانينماسين. بو مدت ده اوغلان اوخقايين ايشيندن باش چيخارميشدي و يواش يواش اونون فندلرين اؤرگشميشدي. بير گون اوخقايين قيزي اوغلاندان سوروشور: – سن آتامين ايشلريندن باش چيخاردميسان يا يوخ؟اوغلان دئيير:– بلي، بير شئي‌لري اليمه گليب. قيز اوغلانا دئيير:– ايندي کي باش چيخارميسان، من سنه گره‌ک بير شئي‌لري گؤرسدم.اوغلانين اليندن ياپيشيب، اؤزويله آپاريب و بير قيفيللي قاپيني آچير. اوردا قيرخ اوتاق واريدي. او اوتاق‌لاردان اوچ دؤردونون قاپيسين آچيب و اوغلانين اليندن توتوب اوردا اولانلاري اونا گؤرسدير. آردي وار
بولگه لرسرويسي:گونلرين بير گونونده، بير ولايتده بير قوجا و يوخسول کيشي ياشاييردي. گليري ياشاييشيني اؤده‌مه‌ين او قوجا و يوخسول کيشينين بير اوغلو واريدي.
بولگه لرسرويسي:اوغلان گؤرور کي بوردا چوخلي جنازه واردي.