دووارسيز اوتاق

بولگه لر سرويسي: گؤيون هاراسينا سن باخسان، ديک اوردان بير آي گؤيرير.

نيگار خياوي

 بولگه لر سرويسي:  گؤيون هاراسينا سن باخسان، ديک اوردان بير آي گؤيرير.
– گئنه باشلادين رومانتيک- رومانتيک دانيشماغا!
– سن باخاندا اولدوزلار آيلاشير ائله‌بيل. گؤي اوزو دولو اولور آي‌نان. قورخورام…
– آيا باخسان قورخمازسان… من يانيندا اولسام دا، اولماسام دا سن هميشه آيا باخ!سونرا کيشي گئديب بير آلايانميش شام گتيردي. گولومسه‌يرک:
– بونو اوشاقليغيمدا تاسوعا گونو مسجيددن اوغورلاميشام. شاه مسجيديندن. نذير شامي‌دي. تورشوموش قيزلارين نذير شامي. اوشاقليغيمدان ساخلاديغيم قيوير- زيويرلارين آراسينا آتميشديم قالميشدي.
قادين قالخيب بير لامپا گتيردي. شامي، لامپانين آلتينا يئرلشديردي. شامين ايشيغي چوخالدي.
- هه، ياخشي اولدو. بئله‌سينه اليم ده قيزيشير… سن هانسي يولدان گليب چاتدين منيم چاتلاغيما؟
– بيلميرم، منيم هوشوم باشيمدا دئييل کي… سووشدوغوم خياوانلارين هئچ بيريسي‌نين آديني اوخويا بيلمهديم.
– هوشونون باشينا نه گلميشدي کي بورا گلنده؟ کئشکه بير- ايکيسيني اوخويا بيلسئيدين.
– دينمه! سس گلير، گئنه ده ساچلاريني داريرسان؟
– سن گلنه کيمين هاميسي تؤکولدو. منيم ساچيم يوخدور کي.– گئنه ده ال‌لرين اوشويور؟ ساچيني داراماغي‌نين سسي مني بوراجان چکيب گتيردي .
– آي آللاه… نه‌لره فيکير وئره بيليرسن گؤر. سن ايسته‌سن تزه‌دن گؤيرده بيلرم اونلاري. ‌گؤرورسن نئجه بوشالميشام قورخولاريمدان… بير سؤز دئسم گولمزسن؟– گولسم جينله‌نرسن؟
– ايندي من اَته‌ييمي بو ياغان قارين آلتينا آچيب، اوندان بير اتک توپلاياجام. اؤزون گؤره‌جکسن. اينانيرسان منه؟‌ – سن نييه بو قدر قادينسان. نئجه باجارا بيليرسن بير بئله قادينليغي؟
– قادين قالماق چوخ گوج ايستير. بونو سونرالار باشا دوشدوم. گؤردوم ايچيمده قورخولو درين چوخورلار وار، آما هردن ديکسينيرم ده. قورخورام قادينليغيمي لاپدان دانالار. ده‌ييشکن بير شئيدير قادينليق، حيات کيميدي.
– بيز ايکيميز ده بير يانقي‌نين اورتاسيندا اَريييريک. ال‌‌لرين هله ده اوشور؟
– هارا گئديرسن؟ گئتمه. بوردا قال، قوي بيرآز هده‌رن –پده‌رن دانيشاق. سفئه‌له‌يک. -ايکي آغاج اکمک ايستيرم آديميزا عزيز. بير- بيرينين يانيندا. هئچ کسيلمه‌يه‌جک اولان ايکي آغاج… دونيادا ان چوخ سئوديگين آغاج هانسي‌دير؟
– من هر آخشام سسيمي گولداندا اَکيرم، هر آخشام. اؤزو ده کؤلگه ده. اؤزو ده يول يئرييه- يئرييه. من چوخ يول يئريميشم. اما آخيردا گئنه باشلاديغيم يئره چاتميشام. تؤوشولو تؤوشولو. چکيل بيرآز يان دور مندن. آياغيم قانا باتير. پالچيغا باتير. کؤرپه‌يه باتير. ال‌‌لريم کؤرپه‌يله دولودور. ال‌‌لريم کؤرپه تيخييلا دولودور. بير توکانين بوتون صابونلاريني آلديم، دوز بيرگون ياريم سوره‌سي حامامدا قاليب ال‌‌لريمي يودوم. ال‌‌لريمين قوخوسو گئنه چکيلمه‌دي. سونرا يوخودان آييلديم. آما تک ايديم. سن منده گيزلنميشدين. سني گيزلتميشديم.
– من اوشاقليغيمدان بَري گئجه‌لر سنين يوخونو گؤروردوم.. 9-8 ياشلاريمدان بير قادين ياشاردي منله. او سن ايدين. ايندي ده سنين يوخونو گؤرورم.
– هئچ بيليرسن من نئچه قارين دوغموشام؟ بيليرسن نئچه قارين، اوشاق زيان ائله‌ميشم؟ بو شهرين مريضخانالاريندا هرگون دوغوب، هر گون زيان ائله‌ميشم. اليمدن جانا گليب شهرين بوتون ‌مريضخانالاري دا. هرگون منه بير دار آغاجي قورولور. آسيليرام هر گون… باغيشلا! بونلاري سنه نييه دانيشيرام آخي. مني يوخولاريندا نه جور گؤرورسن، هن؟ هئچ اولماسا بيريسيني دئه، تئز اول، تئز اول دئه!
– ايسته‌ديک‌لريمي آنجاق يوخودا سنه آچيقلييا بيللم. آما سن يوخولاريما گليب گيزلنيرسن، اونا گؤره بير- بيريميزه تانينماز قاليريق. بارماقلاريوا باخ، بوز قنديلي کيمي آسلانيب. – گئنه تک قالاجام سن گئتسن. سن منه خييوو چايينين شوولوک‌لريسن. اؤزومو سندن کئچيرده بيلميرم. سندن کئچه بيلميرم. – يوخولاريمين بيرينده گؤردوم بير دره ايچينده باغيريرسان. بدني‌نين هريئريندن آچيليب يومولان آغيزلار جوجرميشدي. سن باغيرديقجا او آغيزلار يئره اله‌نيردي. سني ساچلاريندان تانيديم. يئره اَلنن آغيزلار آچيليب يومولاندا، آچيليب يومولان آيري آغيزلار ائشييه فانتالليردي. دره‌نين ايچيندن بير شهرجه آدامين باغيرتيسي گليردي.
– يوخولارين چيندي. هه ياديمدا، ياديمدا! باغيريرديم او گون. اونلارين هاميسيني من اميزديرملي ايديم. سن ده گؤردون؟ ائشيتدون؟
– هه… سني گؤروردوم. آما ها گوجنيرديم، ائشيدنميرديم. سسيني آييرد ائدنميرديم بير شهرين باغيرتيسيندان. نفس کوشولتوسو، آت کيشنرتيسي، سئل کوکره‌مه‌سي، پارتلاييش، قان آخما سسي، ماشين قيژيلتيسي. سن اونلاردان نئجه قورخموردون؟ آياغيوا ايليشن جنازه لردن ديکسينميردون به؟
– قورخونون اوزونه دورموشدوم او گونلر. آما اؤزوملوک دئييلدي کي. اؤزوم سئچمه‌ميشديم او وضعيتي. اونا گؤره ده شيشمه‌يه گلمز. هامي او گونه قالميشدي يعني. قنوولاردا لاخيم لاخيم قان. هئش کيم اؤز جاني‌نين هاييندا دئييلدي. هرکس او بيريسي‌نين هاييندايدي. دمير سسي، ‌توستو اييسي گليردي آغيزلاردان. آغيزلار ائله‌بيل بير ماققاجلا آچيق ساخلانيلميشدي، هامي دانيشيردي، هئچ کسين سسي ائشيديلميردي، گؤزلر ايسه يومولو قالديقلاري يئرده دوندورولموشدو. – سورا سني گلين آپاريرديلار قارقالار، هر آخشام اوستو. قيزلار ال- اله وئريب اوخوردولار. قارغالارين توشويلا قاچاقاچا لاپ قاباغدا اوچان قارغاني بير بيرينه گؤرسه‌ديرديلر:
گلين او دي! … يوخ او بيريسي دي!… ‌بوداخا بوداخا گلين بودو، دئييرديلر.– اصلينده من، هئچ گلين کؤچمه‌ديم کي. مني گلين کؤچورتمه‌ديلر. گلينليک دونو گئيينمه‌دن منه گردَک اوتاغي بَزه‌ديلر. دَرزي‌‌لرين باش قاشيماغا ماجاللاري يوخ ايدي. هاميسي کفن بيچيردي. قوي گؤروم … يوخ! گردَک اوتاغيم دا اولمادي هئچ منيم. دئديلر قان سو يئرينه آخير. گلينليک دونونون اته‌يي قانا باتار عاييب اولار. من ده اوتانديم. اوتانديغيمدان ياناقلاريم پؤرتدو. مني بَزه‌مه‌ديلر ده گلينلر کيمين. سونرا اؤز اليم‌له دوداغيما، ياناغيما قان چکيب قيزارتديم. گؤزل اولدوم. ديرناقلاريمي دا خينا يئرينه قاننان بوياديم. آنام جئهيز صانديغيني آچيب قيرميزي يايليق گتيردي. بئليمي باغلاماغا قاينيمي چاغيرديلار. آچيليب يومولان آغيزلارين آراسيندان آييرد ائدنمه‌ديلر اونو. آتامي فيرقه‌چيليکده آسميشديلار. اونا گؤره بؤيوک قارداشيمي چاغيرديلار منه خئير دوعاسي وئرمه‌يه، »او اؤزونو فلسطين مللتينه آداخلاييب گئديب«، بويلو آروادي دئدي. اورتانجيل قارداشيمي چاغيرديلار »دوستاقدان بير دسته چئريکنن قاچيب، نمي نيشاني يوخدو« دئديلر. کيچيک قارداشيمي چاغيرديلار،»کوکتول مولوتوفنان اوينور«، دئديلر. آتام ائويندن، خئير دوعاسيز يولا سالينديم. نيشانليم، باشيمدان قيزيل آلما آتماغا داما چيخاندا، باشيندان گولله‌لندي. الينده-کي قيزيل آلما ديبيرلاندي ديبيرلاندي گئديب گردک اوتاغيما چاتاندا پارتلادي. آنام دئدي:»سنه دئمه‌ديم قانا باتارسان؟« من اوتانديم.   – سن‌له من، آجي گرچک‌لر ييغينجاغيييق، ظاليمين قيزي! توک‌لريم بيز بيز اولور، دريم اولدوز اولدوز.– قورخورام گرچکليگيميزدن…
– سني آلماق ايستيرم.– سن گلنه کيمي مني آليب آپارديلار. ساتيلديم.– ال‌‌لرين اَرييير شام تکي. اووجونون ايچي تَر مونجوغويلا دولودور.

منبع :