هِيوا
هِيوا
1400/11/10
بولگه لر سرويسي: بابک دئدي:– آنا مني کندينيزه آپاراسان باهم گئدک هم سيزين کندي گؤروم هم ده ائويزي. بلکه حاجي لِيلک ده ديري اولدو، اونو دا اوردا گؤردوک.
داود_پيرعليلو
بولگه لر سرويسي: بابک دئدي:– آنا مني کندينيزه آپاراسان باهم گئدک هم سيزين کندي گؤروم هم ده ائويزي. بلکه حاجي لِيلک ده ديري اولدو، اونو دا اوردا گؤردوک.
بالابگيم دئدي:– انشالله، سؤز وئريرم يايدا سني ده گؤتوروب کنديميزه آپارام. هم ده آنا- آتاما بير فاتحه وئررم. ائويميزه ده بير باش ووراريق، بيلميرم ايندي اوچوب يا قالير. حتما ده کي صاحبسيز يئر اوچوب داغيلار، اورا دا اوچوب داغيليبدير ايندي.او گئجه بابک-ه چوخ خوش گئچدي.بابک او گئجه‌دن هي حاجي لِيلکلره فکرلشيردي. بابک هم درس اوخويور، هم ده آتاسينا- آناسينا ايشلرينده يارديم ائدير. آتا- آناسيني چوخ- چوخ ايسته‌يير. ائله اولوب کي، هر کيم اوشاغينا نصيحت وئرنده بابک-ي مثال وورورلار، اوشاقلارينا دييرلر “اودو با، بابک کيمي بير اوغول اولون، هم درسيني ياخشي اوخويور هم ده آتا- آناسينا بؤيوک بير يارديمجي اولوب”.بابک آناسينين غريب اولدوغونا گؤره، هم او آنايا قيز اولوب، هم اوغول اولوب، هم يولداش اولوب.
قيش فصلي باشا چاتدي. بايرام آيي گلدي. بابک داوارلاري اؤزو اوتارير.
داواري چؤله آپاراندا بير کتاب دا اؤزو ايله گؤتورور. داوار اوتلاياندا او دا کتاب اوخويور. يازدير، هر يئر گول- چيچگه بورونوب.داغلارا باخيرسان، سانکي ياشيل گئييم اَيينلرينه گئييبلر. بابک ده داوراي ياييب کنده گيرن يئرده بير ياماجين اتگينه اوتارير . اؤزو ده بير کتاب الينده اونا باخير. اوزاقدان گؤردو دومان- توزون ايچينده بير آرابا گلير.
اوندا دا آرابا چوخ آز ايدي. پيکان ماشيني دا لاپ تازا چيخميشدي. او آرابا گليب بابکين برينده ساخلاييب، بابکدن آتاسي آلماس‌ين ائويني سوروشدولار. بابک اگيليب آرابانين ايچينه بير گؤز سالدي، گؤردو بير گؤزل خانيم، ايکي اوشاق يانيندا او آرابادا اوتوروب .
آراباني سورن آدامدان سوروشدو:– آلماس ايله نه ايشينيز وار دير؟آرابانين دال صندلينده اوتوران خانيم دئدي:– آي قارداش تانييرسان يا يوخ؟
بابک دئدي:– آلماس منيم آتامدير، خانيمي دا بالابگيم-دير، او دا منيم آنام.
بئله‌ده او خانيم تَلَسيک سئوينجک آرابادان ائنيب، بابک-ين آياقدان باشينا بير ساي ساليب، بيردن بابکين بوينونو قوجاقلاييب آغلايا- آغلايا سئوينجک دئدي:– سن بالابگيم‌ين اوغلوسان؟
بابک مات قالا دئدي:– هن، من اونون اوغلويام!
خانيم بيردن گؤزلريني سيليب دئدي:– من سنين باجينام، من ده بالابگيم‌ين قيزيام.
بابک باجيسيني تانييب، گؤزلري دولدو، دئدي:– بيلديم منيم باجيمسان! چون مني باغرينا باساندا دئديم بس، آنام باغرينا باسدي!
بابک بيليردي ايکي باجيسي واردير، چون آناسي اونلارين گوزَم آرخاليقلاريني کي، او زمان توخوموشدو صانديقي و بير صانديقدا ساخلاميشدي، هله ده هر دن خلوت ائدنده، صانديغين باشينا گئديب او آرخاليقلاري چيخارديب باغرينا باسيب اوخشاييب آغلاياردي.بابک سئوينجک ائولريني اوزاقدان باجيسينا گؤستريب، ديير:– اورا بيزيم ائويميزدير. سيز گئدين ائوه، من ده داوارلاري ييغيب گليم.
باجيسي او آرابانين کرايه سيني چيخارديب اوردا وئردي. وسايللريني گؤتوروب آراباچيني يولا ساليب گئتدي. بابک داوارلاري بير يئره ييغييب باجيسي و اوشاقلار ايله کنده گلديلر. آناسي اوزاقدان بابکي گؤروب دئدي:
– اوغول بوگون داواري نيه تئز گتيرميسن، قويايدين اوتلاسينلار، تئزدير آخي.
بابک آناسيني اوجادان چاغيريب ديير:– آنا! آي آنا! سنه بير دورنا گتيرميشم!
اونا گؤره تئز گلديم دئديم دورنا داريخار.آناسي ياواش- ياواش بابکه ياخينلاشيب گؤردو بير خانيم، يانيندا دا ايکي گؤزل قيز، اوشاغي بابک ايله دانيشا- دانيشا، گوله- گوله گلير.
اوزاقدان دئدي:
– بابک اونلار کيمدير؟بابک دئدي:– آنا دئديم کي دورنا گتيرميشم!آناسي ياخينلاشاندا، قيزي اؤزونو آناسينين قوجاغينا سالدي. سانکي ايکي ياغينتي بولودو بير- بيرينه چاتيب،سوواشدي آناسينين قوينونا.
آناسي نئچه ايللر ايدي گؤرمه‌ميشدي اما بالاسيني تانييب باغرينا باسدي. بير- بيرينه اوردا يئتيشديلر…سوواشدي آناسينين قوينونا. آناسي نئچه ايللر ايدي گؤرمه‌ميشدي اما بالاسيني تانييب باغرينا باسدي. بير- بيرينه اوردا يئتيشديلر…او گون، بالابگيمه بير گؤزل، مقدس گون ايدي. بيلميردي نه ائيله‌سين، نه دئسين.
بابکين ده کي، سئوينجکدن چيچگي چاتلايير. او گئجه، بالابگيم دونيايا يئنيدن دوغولموشدو. بالاسي ايله، نوه‌لري ايله سحره کيمي دانيشيب، دييب، گولدولر. بير طرفدن ده کي، قيزي درس اوخويوب معلّم اولموشدو، اونا دا لاپ سئوينيردي.ياز دا قورتاردي، ياي گلدي. بابک آناسينا دئدي:– آنا منه بير سؤز وئرميسن، ياديندادير؟آناسي دئدي: نه سؤزو اوغول؟
بابک دئدي:– آنا چيلله گئجه‌سي نه دئدين منه؟ گئدک سيزين کندينيزه.آناسي دئدي:– بورا باخ! ياديمدا دييلدي. اولسون گلن هفته داوارلاري بير- ايکي گون چوبانا تاپشيريب گئدريک.
منيم ده آتام- آنام برک گؤيلومه دوشوب،کند ده مزارلاري اوسته گئديب، ياخيندان فاتحه اوخويوب اورگيمي بير بوشالدارم .
آنا- بالا هر ايشلريني گؤروب، منتظرديلر کنده بير آرابا گلسين، شهره گئديب اوردان دا کندلرينه گئده‌لر. بابک حيطلرينين اشاغاسيندا اوتورموشدو فکرده ايدي، گؤردو اوزاقدان بير دومان گلير.
بَلليدير کي، آرابادير چون يوللار آسفالت دگيلدي، آرابا گئدنده توز- دومان داليسيجا هر يئري بورويردي. تئز کندين ميدانينا ساري قاچيب، گؤردو او يئتيره‌نه آرابا دا يئتيشدي. آرابا مسافر گتيرميشدي، اونلاري يئنديردي. گئدنده بابک قاباغينا قاچيب آراباني ساخلاتديردي. آرابا سورَنه دئدي:– آي قارداش، هارا گئديرسن ؟او دئدي:-خوي-دان مسافر گتيرميشديم، خويا قاييديرام.
بابک دئدي:– اوندا بيرآز دايان، بيز ده خويا گئده‌جگيک، بيزي ده آپار.آرابا سورَن قبول ائديب داياندي. بابک تلسيک ائولرينه گلدي، آناسيني چاغيريب دئدي:– آنا گَل گئدک! آرابا گليب، ساخلاشديرميشام کندين ميدانيندا.
آناسي تئز حاضرلاشيب بابک ايله ميدانا گئديب آرابايا مينيب خوي شهرينه گئتديلر.
ائله کي آرابا خويا يئتيشدي بالابگيم چوخدان ايدي شهره گلمه‌ميشدي گؤردو شهر عوض اولوب. کندلرينين آرابا دوران يئريني سوروشوب اورا گئتديلر.
اوردا بير آرابايا مينيب کندلرينه ساري يولا دوشدولر. بير آز دان سونرا کنده يتيشنده، بالابگيم- ين اوشاقليغي يادينا دوشدو. خاطره‌لري گؤزونون قاباغيندان سينما پرده‌سي کيمي بير- بير گئچيردي.
گؤزلري کندين قديم ائولرينه ميخلانيردي. بابک آنا دييب سسله‌ينده، اؤزونه گليب جواب وئريب، يئنه فکره گئديردي. اوحالدا بابک بيردن اوجادان شوخلوق ايله آنا دييب بالا بگيمي ديکسينديرندن سونرا سوروشدو:– آنا! سيزين ائوينيز هاياندا؟ اوّل گئدک اورايا، سونرا گئدک قبر اوستونه.آناسي دئدي:– اوغول اورگيم چوخ ايسته‌ييردي گئدک قبر اوستونه، اما ايندي کي سن دييرسن، گل گئدک ائوميزه بير باش ووراق گؤرک قالير يا يوخ؟!
سونرا گئدک فاتحه اوخوياق.بالابگيم بابکي ائولرينه آپاراندا اوزاقدان گؤردو همان آغاج قالير، حاجي لِيلکلر ده او آغاجين اوستونده او يان- بو يانا ويرنيخيرلار. اوغلونا دئدي:– بابک، اوغول! حاجي لِيلکلر کي دييرديم اودولار با…...
منبع :