من گونه‌باخانلار شهريندن گلميشم
1398/03/27
بولگه لر سرويسي: شکيلي بيچيميندن آييرماق نه دي کي؟ آييريب، اويانادا کئچه رم. هله کوکلا تئاتري کيمي‌ايپدن آسلاييب، نئجه ايسته‌سم، اليمده ده اوينادارام!«
راوينين شيلتاقليغي توتوب. فرقلي بير حيکايه يازماغي گلير. گاهدان موراويانين طرزي کيمي،گونده‌ليک حياتين آخيميندا، جينسيت دن آسيلي اولان دوشونجه‌لره، اؤزوندن اؤزگه‌لشمه قونولارينا توخونماغي گلير. بلکه‌ده نيشانه شناس، امبرتو اکونون بائودولينا رماني کيمي‌باشلانيشدا کاراکترين ديليندن يازيليمش بول- بول املايي غلط‌لرله يازسين دئيه، دوشونور. نه ده اولسا منيم اون آلتي ياشلي کاراکترلريم بائودولينايلا ياشيدديلار.هانريش بُل ون تلخه‌ييندن ده کئچه بيليمر. اونون کيمي‌روايت ائده بيلسه‌ايدي، اؤزونو راوي‌لرين راويسي آدلانديرا بيلردي. اما من بير يازيچي اولاراق بعضن راوي‌ايله راضيلاشا بيليمرم. بوراسي نه ايتاليا، نه ده آلمان اؤلکه‌سي‌دير. بو مکان آذربايجانين اوره‌يينده چيرپينان مکان‌دير. بير باخيسان، ارگ هله ده سينميش بئلي‌ايله دايانيب. تاريخي گونلري يانسيدان تربيت کيتابخاناسي اونونلا اوز- اوزه، گؤز- گؤزه باخير. دردلري دئشمک قصديم يوخدور. ويترينينده سيرايلا دوزولموش، اوخومانماغي گؤزله‌ين کيتابلاردان هئچ سؤز آچميرام. آلمانلي لارين تيکدييي ساعات بيناسي هله ده ديم- ديک يئرينده دايايبب. يانميش کيتابلارين سيس- دومان خاطيره سي، بعضن ساعاتين عقربه‌لريني ائله اويودور کي، آي‌لار سورور، هله عقربه‌لر يوخودان آييلا بيلميرلر. گؤي مسجيدي پاساژلار چئوره‌له‌سه‌ده، اونون کناريندا کي 4000 ايل قدمتي تمثيل ائدن مزارلار هله ده گؤزدن ايتيله‌سي دئييل.
خاسا بئيينلي راوينين بئينينه باتمير کي، من گونه‌باخانلار شهريندن گلميشم. تبريزده، عئينالي اته‌يينده،گُسل اوستونده تيکيلميش بير آپارتماندا اَيلشيرم. نه ايتاليانين حال-هاواسين آنلاييرام، نه ده موراويايلا، اکونون طرزينده يازاماغي باجاريرام. اؤزومو اودا- کؤزه وورسام دا، روايت قلميم،هانريش بُل قلمي‌اولا بيلمز. گل ده بو سؤزلري يئددي رنگه چالار راويمه قبول ائتدير. دينله‌مير کي، دينله‌مير! شکيل لري بيچيميندن آييرا بيلرم، دئيير.
ساعاتلاردير اوتوروب، ايکي معصوم شکيله گؤز تيکميشم. او قدر بکر، او قدر دوغال باخيشلاري وار کي، » بو معصوميته هئچ حيکايه يازماق اولماز« دئييرم. هفته خيال راوينين اليندن بئزميشم. آز قاليرام ،اونون قولاغيندان توتوب، حيکايه‌دن ائشييه آتيم. باشقا بير راوي تاپا بيلمه‌سم ده، اؤزوم کئچيب اونون يئرينده ايله‌شه رم. نه ده اولسا اوشاقليقلاريم ناغيل دينله‌مک‌له کئچيب. مليک محمدين کسيلميش، اوستونه دوز سپيلميش بارماغي يوخودا اوره‌ييمي‌آجيشديريب. گئجه‌لر قمر وزيرين خيالي‌ايله ياتميشام، شمس وزيرين فيکير‌ايله گوندوزه گؤز آچميشام. مدرسه‌دن دؤندويومده ساکين دربندلرده، مادر فولادزره آز قاليب کؤلگه‌مي‌ياخالاسين. ايندي‌نين اينديسي،ياشاميمي‌شوشه‌دن نازيک، اينجه سؤزلرين ايچينده توتموشام. هله‌ده دئولرين الينده سينماسيندان قورخورام.
من حيکايه يابانجيسي دئييليم کي! رواي‌ليک نه دير کي؟ اوچ- بئش کاراکتري يان- يانا دوزوب، اونلارين آغزينا نه ايسته‌سن قويوب، ديللريندن نه ايسته‌سن دينله‌يه بيلرسن. اما منيم راويم کؤنزدي. بير سوژه بئينينه باتديغيندا، دونيانين اوستا جراح‌لاري بئله اونو بئينيندن چيخارا بيلمز، هله قالسين منيم کيمي‌اوزو يوموشاق يازيچي اولسون. ايکي آياغين بير باشماغا تپيب، ايکي جينسيت‌دن، ايکي شکيلي، ايکي گون بير يئرده قوناقلانديريب، اونلاري ايزله‌مه‌يي گلير. بير-بيرلرينه نئجه، نه تَهَر داورانديقلاريندان حيکايه يازماق ايسته‌يير. چاره سيز قالميشام. نه دئيه بيلرم کي!
منيم معصوم شکيل لريم، ايللر بويو اونودولموش آلبوم دان تانيماديقلاري بير مکانا يول آزيبلار. جغرافياسيز بير يئرده قاپيسيز بير مکان‌دي. دؤرد ديواري وار يوخسا ايکي ديواري، بللي دئييل. ايکي شکيل. آغ- قارا، اون آلتي ياشلي؛ آلا گؤز ايله، قاراقاباق…
آلا گؤز، هؤروکلريني يئني‌جه آچميش، قيوريم ساچلاري ايکي طرفيندن سينه‌سينه دوغرو شلاله‌لنميش بير قيز. گؤزلري خمار دئييل. هئچ شاعيرين غزل قايناغي اولماييب. دوداقلارينين رنگي، هئچ شعره بزک وئرمه‌ييب. باخيشي اورکک مارالين باخيشي دي. قاراقاباعين دوداغينين اوستونده سئيرک گؤيرتي، غرورولو ، استرس لي باخيشلاري اوزاقلارا باخير. راوي فيکيره داليب. چاليشير شکيل لري بيچيم لريندن آييرسين. ساپدان آسيلميش قولچاق کيمي‌اونلارين دويغولارين نماييشه قويسون. منسه ديليمي‌ديشيمده سيخيرام. بو قونودا راوي يه هئچ بير يول گؤستره‌ميه‌جه‌ييمه قرارلييام. راوي چاره سيز قاليب. منيم اوره‌ييمه سانکي سرين سو سپيرلر. بيليرم؛ شکيل لري هئچ کيم بيچيميندن آييرا بيلمز”. راحات اوتورا بيليمرم. زهر ديليم‌له راويني سانجيم، دئييرم :» فيکر ائله سين به ليلي مجنون يازاجاخسان! يوخسا شيرين له فرهادي؟«
رواي منيم سؤزومو ائشيتمه‌ميش کيمي‌گؤزونو اؤنونده کي صحيفه‌يه تيکيب. اوجا سس‌له باغيريرام:
»خبرين وار‌هانسي يوز ايلده ييخ؟«
منه قولاق وئرمير. سؤزوم هئچ دخلينه دئييل. آلا گؤزله، قاراقاباغين شکيل‌لرينده، ايتيب، باتيب، سانکي. راوينين اوزنه ساري اَييليرم. شکيل‌لره باخماغينا مانع اولورام:» 2013 ده ييخ‌هااااا«
راوي آغزين اَييب، تمسخرله منيم سؤزلريمي‌اؤزومه قايتارير:»2013 ده….2013 ده…بيليرم دا… دئييرسن به من نظامي‌يم؟ من کيم اولارام کي، فرهادلا -شيريني يازيم؟! باخ گؤر بو شکيل لرده، سن تئشه گؤرورسن يا قايا ؟؟؟«
عصبي حالدا اونون باشينا باغيريرام:»بو معصوم شکيل لردن ال چک!«.
آلا گؤزله، قارا قاباغين باخيشلارينين معصوميتي اوره‌ييمي‌تيتره‌دير. شکيللري راوي‌يه گؤستردييمه پئشمانام. حيکايه اوچون اونلارين معصوميتيندن فايدالانديغيما، اؤزومو گوناهکار حيس ائديرم. بير داها راوي‌يه اوز توتورام: » بوش وئر بو حيکايه ني. گل باهاليقدان، دلاردان، نفت دن يازاق. اصلا سن هر نه ايسته سن يازاق. آنجاق بو شکيللري بوشلا. سؤزلر، بوايکي معصوميتي تصويره چکه بيلمز!«
رواي ترسه- ترسه منه باخير:»معصوميت؟ کيم دئيير من معصوميت دن يازاجاغام؟ اؤزون دئدين‌ها 2013 ده‌ييخ!«
ائشيتديغيم سؤز، اورييمه قورخو سالير. بئله اوزو قيرميزي، ديل اوزون راوي يه هئچ راستلاماميشديم:» به ندن يازاجاقسان؟«
راوي گؤزونو گؤزومه زيلله‌ييب» دؤز!« دئيير.
نه ائده‌جه‌ييمي‌بيلميرم .آزقالير حيکايه‌نين فايليني يئرلي- ديب لي کامپيوتريمدن سيليم. بلکه کاراکترلرين معصوميتدن، راوينين خاسا خياللاريندان، مني ايچينه چکن نوستالژيادان ياخامي‌قورتاريم .
حيکايه ني بوراخيب، اؤز فيکير- خيالمدا دولاشيرام. راوينين سئوينجک سسي مني اؤزومه گتيرير: » ايهيم!… باشلاندي«
قاراقاباق يئرينده قيميلدانيب، آلا گؤزه ساري دؤندو. آلا گؤز اؤزونو بيلمه‌مزلييه وورسادا، گؤز آلتي اونو سوزدو. منسه ال- قولوم سوستالدي. راوينين آرخاسيندان بويلانيب، اونلارا باخديم.
آلا گؤز باشيني يوخاري قالديردي. قاراقاباغا باخيب، کوسه‌ين قيزلار کيمي‌دوداقلارين بوزدو. قارا قاباغين دوداغي قاچدي.
گؤردوکلريمه اينانا بيلمه‌ديم. يئنه ده راوينين باشينا باغيرديم: » اونلاري هيپنوتيزم ائله دين؟«…
راوي سانکي نه دئدييمي‌ائشيتمير. سايماز يانا اؤز ايشينده دي. مني يازيچي دئييل، آدام حسابينا بئله قويمور. گؤزلري گولور. قاراقاباغين شکيلي آياق توتوب، آستا- آستا آلا گؤزون شکيلينه ياخينلاشير. اونون اؤنونده دايانير. گولور. آلا گؤز اورکک باخيشلارين اونون گؤزوندن قاچيرا بيليمر. اوتانقاچ – اونانقاچ گولور. باخيشلارين يئره تيکير. قارا قاباق اليني اونا ساري اوزالدير…
راوي آز قالير سئوينجکدن قانادلانيب، اوچسون. منسه آلا گؤزله قاراقاباغين معصوميتينه توخونماغا تحملم يوخدور. هله قالسين کي توخونان شخص حيکايه‌مين راويسي اولسون. دلي کيمي‌باغيريرام:»شکيللر بيچيميندن آيريلا بيلمز«…راوينين قولوندان ياپيشيب، حيکايه‌مين قاپيسين آچيب، اونو ائشييه ساليرام…
منبع :