فولکلور؛ آغيز ادبياتي، خالق حکمتي و کوتله بيليکلري دئمکدير. خالق مدنيتي اينسان حياتينين ايلکين چاغلاريندان باشلاميش سايسيز ائنيش ـ يوخوشلار آرخادا قويوب، داورانيشلار سوزگجيندن کئچه‌رک بيزيم عصريميزه چاتميشدير. بيزيم آغيز ادبياتيميز دونيانين ان زنگين اسکي خالق ادبياتيندادير. بوتون ميللتر آراسيندا اولدوغو کيمي بيزيمده فولکلور خزينه‌ميزده ائليميزين اوشاقلار و ناز بالالاري اوچون ياراتديغي بول ـ بول اؤرنکلره راستلاشيريق. فولکلوروموزدا اوشاقلار اوچون وئريلن بؤلوملرده، زنگين مدنيته يييه اولان خالقيميزين، ايستک آرزي، کدر- سئوينج، عادت ـ عنعنه و دونيا گوروشلو باخشيلارين گؤرمک اولور. بو ادبيات درين دوشونجه و پاک احساسلارين توره‌نيشي اولدوغو اوچون ديلين ايفاده طرزي ساده و تميزدير. اونون اؤيره‌ديجي و بديعي اهميتي داها اؤنملي دير. آتالار سؤزو. باياتيلار، لايلالار، تاپماجالار، ناغيلار، داستانلار، ماهنيلار، حکايه‌لر، اويونلار، اوخشامالار، نازلامالار و … قوللارين درين دوشوندوکده گؤروروک کي بونلارين يارانماسي اوشاقلاريميزدا، ديله، ائله، يوردا و حياتا محبت باغليليقلارين آرتيريب گله‌جک ياشايشلارينا بوللو اومودلر توره‌ده‌رک خالق دوشمنلرينه قارشي کينه و نفرت حسي اويادير.

*اوشاغين آنا قارنيندا ياشايان دؤورو:

آذربايجان خالقلاريندا اوشاق دونيايا گلمه‌ميش، هله آناسي بويلو اولان واختلار بئله بير عادتلري وار: بير قادين بويلو چاغلارين کئچيرن زامان خصوصي ايله‌ ايلک اوشاغينا بويلو اولاندا قوهوم اقريباسي‌له ياخين دوستلاري اونو قوروياراق قارانليقدا يالقيز بوراخماييب حامام و قبير اوسته‌ تک گئتديييني مصلحت گؤرمزلر. بو قادينين اوشاغي داها هوشلو و گؤزه‌ل اولماق اوچون اونون يئريکلمه دؤورونده يئمک ايستکلرين يئرينه يئتيريب و اوشاغين هر يوندن قورونماسينا چاليشارلار. دوغوش زاماني چاتديقدا اوشاق و آنايا اولدوقجا ده‌ير وئريب قيرخ گونه قده‌ر آنا و بالاني خطر و بلالردن قوروماغي اؤزلرينه بير گؤره‌ و سانارلار. اوشاغين گله‌جکده؛ دانيشغي شيرين، واري چوخ و عؤمرو اوزون اولسون دييه باشي اوسته؛ قند، قيزيل و چؤره‌ک قويارلار.

*آد قويما گونو

کؤرپه‌نين يئددينجي گونو چاتديقدا گونو آدلانيب قوهوملاري بير يئره توپلاناراق چاليب اويناملاق و شنليک دولو ييغينجاقلاريندا ملي احساسلارينا داياناراق خالق قهرمانلارين اونوتماسينلار دييه جوانشير، بابک، نبي، ستار و کؤکو ديلرينه باغلي اولان آدلاردان سئچيب اوشاقلارين او آدلارين بيري ايله آدلانديرارلار. دده قورقود بوي لاريندا اوشاق آنادان اولدوقدا آد قويولمور. هر اوشاغين اجتماعي ده‌يري اونون جومرودلوک، قوچاقليق و ائل اوچون چاليشمالاري اوزره سئچيلير. ائلين يامان گونلرينده خالقا يارديم ائتمه‌ين قورخاق و آياق دالي قويان اوره‌کسيزلره هر يئرده نيفرت و آلچاق گوز ايله ياناشيليب و »مخنث« آدلانيرلار. اوشاقلار حيات و ساواش مئيدانيندا اؤزلريندن هنرله باجاريقلاين گؤسترديکده آدا لاييق اولورلار. اؤرنک اوچون: ديرسه خان اوغلو؛ بوغايلا دويوشدوکده اونو يئره ووروب بوغازين کسنده‌ن سونرا اوغوز بگلري ييغيليب اوغلاني تحسين ائديب دده‌م قورقود گلسين بو اوغلانا آد قويسون دئييرلر. دده قورقود اوغلانين آتاسينا واريب بير نئچه تعريفدن سونرا: »بايندر خانين آغ ميدانيندا بو اوغلان جنگ ائتميش دير. بو بوغا اؤلدورموش. سنين اوغلونون آدي بوغاج اولسون. آديني من وئرديم، ياشيني آللاه وئرسين- دئدي.« بو گون بيزيم خالقيميز اوره‌ک دولو اينام و آرزولارلا اؤز کئچمشينه داياناراق هئچ بير چتينليکلردن بويون قاچيرماييب »آماجلاري يولوندا آجي‌لار عشق اولسون« دييه چوخلو مانعه‌لردن آشماليديلار. خالقيميز اؤز دوغال حاقلارين ياساقلاردان قورتاماق اوچون بوخوولانميش ووقارلارين اؤزگورلويه چاتديرماغا هر ساحه‌ده جانلاريندان مايا قويماغا حاضيرلانمالاري يئرلي اولاجاق. ايراندا ايللر دير سيستملشميش بير آخين تورک خالقي آراسيندا آنا ديل و وارليقلارينا سويوقلوق ياراتماغا جان آتماقدادير. آنا ديل مکتبلرده تعليم اولونمادان ديل گونده‌ليک داياز دانيشيقلارا حصر ائديليب سؤزجوکلر اونودولوب ديل يوخسوللاشير آرديندا دانيشانين باشينا قاخيج اولاراق ديليني بؤتووکله آرادان آپارماغا چاليشانلارين يئرآلتي ايشله‌ييب يالان تبليغ‌لرينه اينانانلار آز دئييل کي، بو دورومون سونوجوندا يانليش دوشونن کيمسه اؤز کؤکلو وارليغنا خبرسيز قاليب حقارت حيسي دوياراق اؤزو ايله ديلين دانماغا باشلايير. اوشاغينا ائلينين گوزه‌ل کؤکلو آدلارينين يئرنه هئچ تورکون آغزيندا دوزگون دئييلمه‌ين فارس و يابانجي آدلار تاخيب و آنا ديلده دانيشماغي اسکيکليک ساناراق بير هويت سيز شخص کيمي حيات سوروب و آخيرده ايکي مسجد آراسيندا نامازسيز ياشايير. اوشاقلارا شعر اوخوماق اونلارين فيکرلرين گوجلنديرمکده و بئش دويغولارين تحريک ائتمکده فايدالي اولور. اوشاق روانلاري اوزره چاليشان بيلگينلره گؤره: بو ايش اوشاقلارين حيس و عاطيفه‌لرين تربيت لنديريب و باشقا اينسانلارين حيسلي ايله تانيش اولماغا و آيري يؤندن باجاريق و هيجانلارين کنترل دا ساخلاماغا و دانيشيق ديللرين گوجلنديرمک و درين خيالا ال تاپماق، شعر اوخوماغين فايدالاريندان اولابيلر. شعر اوخوماق؛ اوشاغين هوشلا قولاق گوجون تقويت ائديب و اوندا گؤزلليکلره درين حس يارالدار. هر سؤزجويون اؤزونده داشيديغي عاطيفي معنا اوشاغين ذهئنين گوجلنديريب و بوللو سؤزجوکلر اؤيره‌نمه‌سينه اؤنملي تاثير بوراخار. بو شعرلر خاص بير آهنگ ايله دئييلنده موسيقي هونر  سئحر ياراديجي اولدوغو اوچون سسلرين ده‌يري معنادان آرتيق اوشاغين روحوندا يئر سالير. ائله اوندانديرکي بيزيم فولکلور شعرلريميزده معنانادان باشقا ريتم و آهنگه اؤزه‌ل بير يئر وئريليب.