سئودا (پووئست)

بولگه لر سرويسي: سئودا دئديگين هر کسه ميدان اولا بيلمز » صمد وورغون«

 نريمان ناظيم

بولگه لر سرويسي: سئودا دئديگين هر کسه ميدان اولا بيلمز » صمد وورغون«
– … من بيلميرم نييه هامي گلير منيم اوستومه؟! نييه هامي مني قارالييب؟! فروغ گئدير فخري گلير، فخري گئدير ميرآغا گلير، او گئدير حاج مؤحسون گلير؛ ايندي ده بو يازيغي يوز آغاج يولدان چکيب گتيريبلر کي نه‌دي نه‌دي خانيم انتر اوينادير، بويور گل تاماشييا. بولار گؤردوکجه من آبيريما سيخيلميشام داهي دا يئينليرلر. داي دئميرلر کي بابام، آدامين طاقتي‌‌نين بير حددي وار. يبر بئله قيسناميياق دووارا بونو. يازيقدي آخي‌ي! تکجه مني قارالييبلار، بيري‌نين آغيزيندان وار گلمير دئيه اوتور يئرينده آرواد!
فيرتانا ده‌بتمه بو ائوده! بسدي،… ال چک آخي‌ي! نه خئير، ال چکن دئييل او. اونو تانيرام من. منيم آبير – حيثيتيمي بو شه‌هرده آپارميينجا بوشلييان دئييل او! او بيري‌لري ده اونون تاييديلار، هامميسي بير بئزين قيراغي‌ديلار، هاميسي. برمالا ال بير اولوبلار مني ديغلادالار. بيري تاپيلمير دئيه بابام ائرمني مسلمان ائليرسيز؟! بوراخين بو يازيغي، بوراخين بئش گون عؤمورو قاليب قويون اؤز دردينه يانسين قورتولسون. بئله نه ايستيرسيز بونون جا‌نيندان، نه وئريب آلا بيلميرسيز؟!
قيز ايچين چکير، يئني‌دن آغلاماغا باشلايير:
– سيز الله عصباني اولمايين آااجان! سيز کي آبا‌نين قيليغين بيليرسيز، اؤزوز بير جور يولونا سالين. راضي اولمايين دوس – دوشمان ايچينده باش آشاغي اولاخ. بيزه رحم ائله‌يين آااجان، رحم ائله‌يين!
– بالا سنين هئش بير زاددان خبرين يوخدو آخي. نه‌يه آغلاييرسان؟ گؤزووون خيراسين آخيدينجا دور گئت بؤيوک باجي‌وين يا‌نينا، بير سوروش گؤر جريان نه ته‌هرايميش؟ ياني من قودورموشدوم عؤمورومون بو واختيتدا اويونا گيرم، خلقي اؤزومه گولدورم؟ عاغليمي يئميشديم؟ بابام واللاه بيلاه اؤزو ائله‌دي. قير- ساققيز کيمي ياپيشدي ياخامدان ال چکمه‌دي، يوخسا منيم نه وئجيمه‌ايدي اؤزومو سالام دردسره؟ اؤزو اؤلچوب، اؤزو بيچيب، ايش ايشدن سوووشاندان سورا باشلاييب اربعين شبئهينه.
قيز لئچگي‌‌نين اوجويلا گؤزونون ياشين سيلير. حاجي مير قافار تازاشدان دوو گؤتورور:
– ثاواب دالينجا گزن کؤپک، دي اوتورسون چکسين دآآ! نه جور اولدو بس؟ مؤمون – مقدس خانيمين بيردن بيره اوزو دؤندو، قاراچي کيمين اؤزون باشا چالير! اوشاق گؤزو قوخودور؟ او اونون خام خيالي‌دي، بير د‌فه يئريمدن اويناديم بسدي. او پوخ يئديگيمه دوشور دوشسون، آمما من توپوردويومو يالييان دئييلم. اؤزون آساجاق آسسين، بوغاجاق بوغسون، والسلام!
قيز يئني‌دن آغلايير. دوزونه باخسان آغلاماقدان سوواي آيري بير ايش ده گلمير اونون اليندن.
ايکي آي تمام‌دي ائوده سؤز- سوو گئدير. دئييب دانيشمالار هئچ بيريئره چاتماييب، هامي يورولوب اوتوروب، آمما بو هله تازه‌ نفس‌دي. آدي بدرالسادات‌دي. ائوده بدري چاغيريلير. ائوين سون بئشيگي‌دير. هاميسي بير ايلدي ار ائوينه گئديب. باشقا بير شه‌هرده ياشايير. اورتانجيل باجيسي فخرالسادات تلفن واسيطه‌سيله اونون کورکونه ائله بيره ساليب کي بيرجه لحظه دايانمادان چاديرا – باشماق اولوب بيرينجي ماشينلا يولا دوشوب گليبدير. حاج اکرم خانيم دا بونا چوخ اومود باغلاييب، دئيير بلکه آتاسي قوربت يئرينه دوشموش سون بئشيک‌لري‌نين اوره‌ييني سينديرماياجاق؛ آمما نظره گلن بو دا بير ايش گؤره بيلمه‌يه‌جک. چونکو حاج مير قافار قيزي‌نين ايلک باسقيسيني سوووب، اونون تووون آليبدي. ايندي ايسه صؤحبتين بير آن‌جا آرا وئرمه‌سين فرصت سانيب بورکون گؤتوروب يئريندن قالخير. -»قيزيم، سن يولدان گليبسن يورقونسان، بير آز دينجل، من ده گئديم دوکانا بيرباش چکيم گليم!«- دئيه، اوتاقدان چيخير.
حاج اکرم خانيم اونون آياق سسيني ائشيدير، آياغا دورور، پرده‌‌نين قيراغيندان حيطه باخير؛ حسرتله آرخادان ارين ايزله‌يه‌رک کؤکس اؤتوروب، قاييدير گلير اوزانير. بير نئچه لحظه‌دن سونرا بدري اوتاغا گيرير؛ بير بوجاغا سيغينيب اوتورور. گؤز آلتي‌لا آناسينا باخير؛ اوزانديغي يئرده باخيشي تاوانا ديره‌نيب قالميشدي. باخار کورايدي سانکي. اوزون زامان هئچ بيري دانيشمير. نهايت حاج اکرم خانيم اؤزيله دانيشان کيمي ديله گلير:
– گئتدي؟
بدري اودقونوب دئيير:
– گئتدي دوکانا بير باش چکه گله.
حاج اکرم خانيم آه چکيب دئيير:
– هميشه‌کي ماهناسي‌دي. اکيلير گئده اورا. بو آلتي آيدا هاميسي ييرمي گون دوکاندا اولماييب. شاييردلاريندان سوروشموشام. دئين يوخدو آخي ناانصاف قوربتدن گلن قيزيوين يا‌نيندا اقليکم بير ساعات اوتورايدين! دؤزممه‌دين، قورخدون دوداغي اوچوخلويا؟!
بدري دئيير:– آبا، دئدي قاييديرام.حاج اکرم خانيمين سسي سانکي قويودان چيخير:

منبع :