کومودا ساري گئديب، اوچ دنه‌ ده زيبيل نئيلونونو، کت شالوار، کؤينک، بويون باغي، جين شالواري، ايدمان شالواري، بلوز و آياق قابي‌لا دولدوردو. قوتولاري ياتاغين آلتيندان چکيب چيخارتدي. اورادا ييغديغي بوتون قيويرـ زيويرلاري گؤتوردو. آلت قات‌دا تمام سي‌ دي‌ لري، کيتاب‌ لاري، شکيللي رمان‌لاري، حيکايه‌ لري، سياحت و کامپيوتر سوراق کتابلارين و سئچيلميش شعر کتابلاريني آلت اوست ائله‌‌دي. سونرا تؤوشونو آلماميش عکس آلبوملاري، مکتوب‌لار، قابا توتولموش شکيل‌‌لر و کيچيک چيني تؤحفه‌‌لره ساري گئتدي. بونلارين‌هاميسيني ييغيب صاباح زيبيلچييه وئرمک ايسته‌‌ييردي. آخيردا اوز قويدو آنبارا ساري. اورادا جيهاز جعبه‌‌سي، آيري اشيالار و چوخلو درده ديمه‌‌ين شئيلر گؤردو. بوتون رف‌‌لري، سيييرتمه‌‌لري ائشييه تؤکملي وسايله گؤره آختاردي و سونونجو ايشکاف‌ده، اونلاري، باغ‌چيليق الجک‌‌لري آلتيندان تاپدي.

اونون قيرخينجي دوغوم گونونده، کيشيسي شنليک ائتمک اوچون آتشبازليق لوازيمي‌آلميشدي. بو ايل اونون دوغوم گونونون ايلنجه‌‌لي شام قوناغليغيني آتشبازليق گونو کيمي‌توتماق ايسته‌ييردي. آمما اونلاري هئچ واخت ايشله‌‌ده بيلمه‌‌ميشدي. چون کي اري قورولتاي‌دا ايشتيراک ائتمک اوچون سوئيندينه گئتميشدي و اونو بو قوناغليغدا يالقيز بوراخميشدي. ايندي بئش آي‌دان سونرا يئنه‌‌ده گؤزونه دَيدي. اونلارا بير آنليق باخيب، کدره دولدو. سونرا اونلاري الکتريک وسيله‌‌لرايله برابر زيبيل نئيلونونا قويوب، ائوه قاييتدي. اؤزونه بير آياق برندي تؤکوب، يورغون ـ آرغين، کاناپئيه سؤيکندي.

هاوا قارانليقلاشيردي. ايکينچي ايچکيسيني ده تله‌‌سيک ايچيب، يئني‌‌د‌ن آتشبازليق لوازيمي‌فيکرينه دالدي. ائشييه گئديب قوتونو زيبيل نئيلونوندان تاپيب چيخارتدي. ماتباخا قاييديب، اونون ايچينده‌کي‌لري ديققت‌له سئير ائتدي. همه‌شکي شئيلرايدي: فيش ‌ـ فيشا چارخي، ايکي د‌نه فيش ـ فيشا، تاراققا، ايکي يا اوچ دنه‌ ده موشک. اونلاري چيخاراندا بير نوتا يئره دوشدو. اوندا بئله يازيلميشدي:

منيم سئوگي موشکيم

سمامي‌ايشيقلانديريسان

سئوگي‌ ايله. ر

وسايلي جعبه‌سينه قويوب، باخچايا گئتدي. فيش ـ فيشا چارخيني آرخاداکي چرچيوه ‌نين اوستونه قويدو. نوتاني بورمه‌‌لييب، نازيک و اوزون فورما سالاندان سونرا اونون ايچينه کيبريت چوپو قويدو. شام پولويو کيمي‌ياواشجادان ياندي. پولوکو يانماق‌دا فيش ‌ـ فيشا چارخي فيرلانماغا باشلادي. قيغيلجيم‌لار قارنليقدا گؤيه قالخيرديلار. بو آن بير قيز اوشاغي چپرد‌ن گؤرسندي.

»نه ايش گؤرورسونوز،« دئيه، سوردو. »شنليک‌‌مي‌ائديرسينيز؟«

سونرا تاراققاني آليشديردي، چيمن‌ليک‌ ده اوجا سسله سيچرادي. بالاجا قيز قورخوب، گئري دؤندو. بير آز سونرا نئچه جيلفير آدام‌لا قاييتدي. قونشولارين نئچه‌سي‌ده چپرين آراخاسينا توپلاشميشديلار.

»ايلين بو واختيندا تاراققا فيش ـ فيشالاري‌هاردان آليبسان؟«

»بو ايش‌لرينين سببي نه‌دير؟«

قادين اونلاري وئجه آلماياراق، قوتونو بوشالتماغا داوام ائديردي.

آنجاق سونونجو موشکه يئتيشدي. لاپ بؤيوکونو ساخلاميشدي. اونون شنلييي‌نين عظمت‌له سونا چاتماسيدي. موشکين ديبين يئره قويوب، پولويونو قالان بورگه‌لنميش نوتاايله يانديردي. گئري چکيليب، اينتيظار قالدي. پولويو آليشديقدا فيسيلتي‌ييب، سونرا سؤندي. قونشولار کؤکس اؤتوردولر. يئني‌ دن چاليشدي. سونوجو يوخ ‌ايدي. ماتباخا گئديب، بير قوطو کيبريب تاپيب، قاييتدي. بير دنه کيبريت چوپونو پولويون يانينا قويدو. 

يئنه ‌ده بير ايش گؤره بيلمه‌دي. قوتودان بير تيکه جيريب پولوک يئرينه ايشلتدي. کارتون آلوولاناراق پولوک يانماغا باشلادي. موشک اوجا سس‌ ايله گؤيه توللاندي. قونشولار نفس‌لري کسيلميش آلقيشلاديلار؛ خيرداجا قيز ائولرينه قاچدي. سونرا قورخونج بير سس‌ ايله برابر خاريقه‌لي ايشيق ساچان بير صحنه گؤي اوزونو دولدوردو. هر طرفه ياييلميش الوان و گيرده اود پارچالاري، يئره دوشدوکده پارتلاييرديلار. باغچادا دالغاـ دالغا هيجانلاشديريجي ايشيق‌لار اويناييردي. سونرا بير اينيلتي‌ ايله هر شئي توکه ‌نيب، قارانليق يئني‌ دن کؤلگه‌سيني سَردي.

قونشولار هدف‌سيز هميشه‌ کي گئجه دَب‌لرينه قاييتديلار. اودا آتشبازليغين بوش قوتوسون ييغيب و کيشي‌سي‌نين ديگر وسايلي‌ ايله برابر ائشييه قويدو.‌هاوا سويوموشدو، چيمن‌لر قيروو باغلاميشدي. آرخاليغينين دؤيمه ‌لرين باغلاييب، ايچري گيردي.