بتر آدام اولدون

بولگه لر سرويسي: دوشموشدو قويونون تکينه – گورولو‌ـ‌گوپباز. قاچيب دوشموشدو يا ايته‌لميشديلر؟ ايت‌لر قوپالاغا گؤتورموشدو، يا آتلي‌لار؟ بيلميردي… نه آت يادينا گليردي، نه ايت… دوشمک ياديندا ايدي.

فرانک فريد 

بيراينجي بولوم

چؤلون آراسيندا بير اوغلان اوشاغي بويان اويانا قاچيردي. بير جاناوار وار ايدي باشيندا؛ اوغلانين ايکي باشي يئکه‌ليکده، قارا‌ـ ‌قونور چيرکين توکلو بير حئيوان. دؤره‌يه توپلانان‌لار داش آتيرلار حئيوانا. چيغيرير: “آي، اوشاغا ده‌يـَر! او منيم اوغــلوم ـــ دي. آمان دي…” قاچير اوغلونا ساري. قويودان چيخانمير…
ائله گوم‌ـ‌گوپ دوشمه‌ميشدي دونيانين تکينه کي… هر قولو بير اؤلو آغيرليقدا؛ هر قيچين بيري چکير. اؤلولر داراشيبلار بونون قبيرينه. تزه اؤلوسونه داراشيبلار، کؤهنه اؤلن‌لر… هره بير يانا چکير جمده‌گين؛ بيرقيچ‌ـ‌قولوندان بهشته، بير قيچ‌ـ‌قولوندان جهنّمه.
قبيرلر آغيز آچيب. قارانليقدا ال‌ـ‌آياق چالير. قير دير ال‌ـ‌ آياق چالديغي قاتي قارانليق. ال‌ـ ‌آياق چالديقجا قويلانير. داها قول‌ـ‌ قيچي ترپنمير. قير سوويوب. قير قوپماز…
قبير سويوغو دي… قبير‌هاواسي… قبير داراشليغي… قبير داشي آغيرليق ائلير اوستونده. دوشوب اؤز باشينا. اؤزو اؤزونون قبيرداشي اولوب. اوزو قويلو دوشوب، قالخانمير. کورَگينده زوو چکير، قيپ‌ـ‌قيرميزي قامچي‌ يئرلري. کورَگينده يازيليب يا قبيرداشيندا: “مراد غيرتي فرزند حسن…” گؤزون آچماغا اؤزون زورلايير. يوخ، اؤلوم تاريخي يوخدو! اؤلمه‌ييب هله! قبيرلري آختارير. سورونور؛ دؤرد ال‌ـ‌ آياقلي چکير اؤزون، ال‌لرين سورته‌رک صورات‌لارا. دده‌سي‌نين صوراتين تانير. الي‌له اونون گؤزلرين يومور، دده‌سي دوروب اونو بو حالدا گؤرمه‌سين، باري.
قويونون دووارلارين قوجاقلير. آغيرليغين سالير دووارلارا، دؤره دولانير. يوخ! قويونون دووارلاري بونو قوجاقلييب، هئي دؤره دولانديرير. قويونون قوجاغي هئي دارالير. هئي کيچيلير. اوزاي‌لارين قارا چوخورونا دوشوب، بلکه… دارتيلر، پارچالانير. بؤلونوب آتيلر. “کيچيک تيکه‌ن قولاغين اولاجاق”، سؤزو قولاغين تيکه‌لير.گوپ دوشور يئره؛ اوجا بير يئردن ده دوشور -يوخودا ديکسينن کيمي. ياتميشدي ياني، دوشور يئره؟ دونيانين هرزادي تؤکولور باشينا. دونيا بوتون اوزونده‌کي‌لرله فيرلانير…
بير تاققيلتي قولاغينا چاتير؛ چاتير دا، چاتمير دا. سسلنمک ايستير. سسي چيخمير؛ چيخانمير. بوغازي باغلانيب. ديش‌لري قيفيللانيب… گؤزلري آلاقولاي بير چيراغ ايشيغين حس ائدير. ايشيق دا فيرلانير. گئجه گوندوزلوک بيلينمير. او دونيادا نه گئجه، نه گوندوز؟
باشي اوسته مهتابي بير چيراغ ‌دير‌ يانير؛ بوزارميش ايشيغي‌له. سکّي‌لرده اؤلولر. دده‌سين يووُر. دده‌سي‌نين جاني آغ ‌دير‌. تقي‌ني يوور. تقي‌نين جاني يانيق‌دير‌. عسگري يووُر. عسگرين کورَگينده داغ يئري، شالّاق ايزي. قيوريليب قارنينا او شستلي‌ليکده ايگيد. قرار يئرينه نه قدر قالميشدان، بوي‌‌ـ‌بوخونو گؤزه گلردي اونون. نريمانين آياق‌لاري‌نين آلتي شيريم‌ـ‌ شهره ‌دير‌. شهيني يووا بيلمير.
 نئجه يوسون اونو؟ اوجادان چيغيرير. سسي ميرده‌شيرخانا دووارلاريندا عکس اولور. “دونيانين سونو ‌دير‌، ميرده‌شير زاد دا يوخدو؟!” بونون اؤلوسو ‌دير‌ يووُر اؤلولري؟ ديري ديري‌ گتيريرلر بو آرايا اؤلولري. بيردن صوراتين، ياش کاشي‌لاردا گؤرور. اؤزونه بنزه‌مير.
 اؤزونون ساققاللي اؤلوسونه بنزير. او دونيادا اوزون قيرخا بيلمز کي… شهينين قارا گؤزلري، اوزانديغي يئردن اونا زيلله‌نيب. آغ ‌دير‌، جاني. بوزارميش آغ. گئدير اونون گؤزلرين باغلايا. ديري گؤزلرينه باخماق اولمازدي، اونون. آدامي‌توتاردي. قالسين اؤلو گؤزلرينه؛ اؤرتولمه‌ين اؤلو گؤزلرينه. گؤزلرين باغلاياندا ديکسينير. گؤزلري آچيلير تزه‌دن. قرار باشيندا باخيشين اَکردي آدامدان ، اؤزو بيلردي باخيشي نئجه چکيجي‌دير. ايندي اَکمير، هوروت هوروت بونون اوزونه باخير. بلکه هئيبتيندن قورخور بونون؛ بئله ساققاللي گؤرسلـليگيندن.آييلان کيمي‌دير‌. سيميت دووارلار اوستونه گلير؛ بير ده همن ايي. همن ايـيين داها قاتيسي، داها غليظي. “دده واي” سسينه آييلميشدي. “گئده، گئنه ده؟… يئکه دَوه!” ايستي بير ايسلاقليق حيس ائلير آلتيندا. “دده واي بو آغيرليقدا يورقاني يوماق اولماز، قيشين شخته‌سينده.” اوتانجدان آغير کورسو يورقانين باشينا چکير. ننه‌سي سيلکه‌لير دورسون… ننه‌سي اوّل آپارير بونو يوور، مطباغين چالاسرينده.
 قورولور، تميز شالوار گئيديرير. سونرا تشتي گتيرير قويور يورقانين ايسلاق يئري‌نين آلتينا. بونا دئيير، سو تؤکسون. آغير ميس آفتافاني ايکي‌اللي گؤتورور. بو زيققينا زيققينا تؤکور، ننه‌سي دئيينه دئيينه يووُر… کورسونون تووُندا گئنه يوخو آپارير بيله‌سين. يون ايي قاريشير سودوک ايينه، دولور بورنونا. قويون ايشه‌ييب سانکي. يوخونون شيرينليگي زور گلير او ايستيده. ايي اونودور. ياتير.
سويوق، اوشوتمه گؤزون آچديرير. همن اوشاقليغيندان قالان ايي بورنوندا، بو سفر او بوم‌‌ـ‌بوز اوتاقدا، سيميت‌ دووارلار آراسيندا. باش سوروجو ايشه‌ميشدي اوزونه، حالدان گئدنده. آييلميشدي سودوک ايليقليغينا، ائله کي آييلميشدي. اؤزون بله‌ميشدي ده، گؤره‌سن؟ ساققاليندان يون اييي گلير.
 داها قاتي سادير اييي. ايي بورنوندا يوخو توتور. اؤلولر قاريشير ديري‌لره گئنه، دولوشورلار بونون او بير دامچا سلّولونا. هره بير ياندان دانلاشديرير بيله‌سين… “چيخارين يوخ ايدي …” “دؤزه بيلمه‌يه‌جاق ايدين…؟”همن سس گلير؛ همن تاققيلتي. داها ياخين ‌دير‌ سس. سلولون دمير قاپيسي‌نين سورمه‌سي چکيلير. قاپي جييير آچيلير. مئژمئيي سيميت اوسته چکيلتي ايله ايته‌نير ايچري. آلتينداکي قوم‌لارين جيغيلتيسي اورک جيزير. سسلنمک ايستير. جانآتير سوروشسون گؤرسون اونلاري دا توتوبلار. اينيلتيه ده گوجو اولمور. قاپي تاققيلتي ايلا باغلاناندا ديکسينير.
 قرار يادينا دوشور. هئچ ‌يئري ترپنمير، قالسين کي ديک دورا بيلسين. داشلانماق حيسّي، جانين لوت برق سيمي‌کيمي‌توتور. تکجه گؤزقاپاق‌لارين بير آنليق قالديرا بيلير، آنجاق کي. گؤرور سيميت قازاماتيندا دير. دووارلار اوستونه گلير، بير ده اورا دولوشان‌لار. قالير دانلاق آلتيندا گئنه ده. “باريتين بير آتيمليق ايميش، بدبخت؟” بوينون ترپَدير. “آي خلقي سعادته چاتديراجاق ايميش؟”
کيريييب قاليب دونندن يا ناواختدان. اوزو قويلو نئجه دوشوب، دوشوب. “آي قدرته مئيدان اوخوردون!” همن چيراغ يانير باشي اوسته. چيراغ کي واختي گؤرستمز. “نه تئز تومانيوي باتيردين؟” قولو قاليب آلتيندا قورويوب. بيرقولاي ترپَدير الين، شالوارين اووجلور. ياش دئييل. بيلينه بيلينمه‌يه، نم دي. “نه تئز پوخ يئديمه دوشدون؟”
“آچيلين اوستومدن، گلمه‌يين اوستومه ـ نه ايستيرسيز جانيمدان؟ گلمه‌يين اوستومه.” دئيير اوره‌گينده. “خفه‌لنين ـ”
“بلبل کيمي‌دانيشاندا خفه‌لنئيدين با.” “سعيدي قينادين تئز ديله گلدي؟” “ائشيکده نفس ايستي يئردن چيخار، ايستي ـ ! ” بيردن ايستي باسير بيله‌سين.“قرارين واختين ترسه دئديم.”“يئرين کي دوز دئدين! ” “گونون کي دوز دئدين! دا نه قالدي؟”
“بيه گلمه‌ديلر بوگون” بَــ بيلديلر توتول ـــ” “بيلللر، حتماً بيلللر… کاش بيلميش ـــ”… عسگرين باغيرما سسي فيکرين کسير. چتين‌ليک‌له دؤنه بيلير آرخاسي اوسته. کوره‌گي گؤينور، زوو چکير. جاني چيخير…
منيژ باشي‌نين اوستونده. الين آلنينا چکير يا گؤزلرينه. ننه‌سي اؤزون دؤيور. منيژين گؤزو اونون قانچيل آياق‌لارينا دوشنده، هوشدان گئدير…
“جلسه بيزده. ائولي آداما شک ائله‌مزلر،” سؤزون منيژ‌ـ‌ه دئمير؛ اورگينده دئيير. بو سؤزو يولداش‌لار‌هاميسي دئيردي. اوغلونون ونقّه ونقي گلير. منيژ اوشاغي ساکيتلدنمير. جلسه اوتاغينا دا دولور سس. چيخير، “آبيريم گئتدي، بير ايش گؤر، منيژ” دئيير.
“گؤر کيم آبيريدان دانيشير!”
“آبيري ساخلادين اؤزووه؟”
“هووَ به هووَ ديينده آبريوا فيکيرلشئيدين.”
“سانجي‌دي، نئينيم؟” دئيير منيژ. اوشاغين ونقّه ونقي قاليب قولاغيندا. او ونقيلتي اؤزوندن چيخير بو يول. آياق‌لارين باغلاييبلار تختين آشاغاسينا. کابلين ويژيلتيسي اوّل‌هاواني يارير، سونرا آياق‌لاري‌نين دريسين… ويـــــژّا ويژ…
دده‌سي شوو الينده، حيطده داليسيجا قاچير. بو دا حووضون باشينا دولانير. چله‌سر اوستوندن آتيلير. شووُ هردن‌هاوايا چالير. کوشولتوسو قولاغين اسديرير. “گئده، دئمه‌ديم آدام اول؟” بيري يانينا دَيير، بيري کورَگينه. آغريدان اوره‌گي کئچير. ننه‌سي پيلّه‌لردن اؤزونون حيطه آتير. “کيشي، دا بسدي! آدام اولار.”
“والّله آدام اوللام.” دده‌سينه دئيير.
“بتر آدام اولدون.” “آدام لوُوا وئرن!”
آردي وار

منبع :