بولگه لر سرويسي:آللاه اؤلنلريزه رحمت ائله‌سين، آنام ائله پيشيک دوواردان ايري گئچنده مني قارقيش ائله‌يردي. بيلميرم، بلکي ده اوندا اوشاغيديم. پيشيک ايله، آصلان آراسيندا فرقي آنلامازديم. هر حالدا ائله کي بؤيودوم و ائولنيب اوشاق صاحابي اولدوم، آنلاديم کي اوشاقلار آتا آنالارينين باشينا تاس دگيرماني چئويرنده، دووار باشينا گؤندرديکلري او جاناوار، اصلينده پيشيک يوخ ائشگکدن ده بويوک بير اصلاندير. سني گؤورم بالا قان قوسماياسان سني گؤروم ماشين آلتيندا قالماياسان سني گؤروم بالا اريييب، يئره گيره‌سن و و و…..ايشين ايلگينج ياني دا بيليرسيز نه دير؟ بونلارين چوخو تام تامينا باشيما گلمه‌سه ده گئنه زامان گئچديکجه بنزر بير شکيلده هاميسيني بير بير ياشاديم.بلي سئوگيلي يولداشلار! آنا قارقيشيندان قاچماق مومکون دئييل. کسين بير گون گليب، ايلديرم کيمي سني ياخالار. دوزدور کي حياتيمدا من هئچ قان قوسماديم آمما نادانليقدان قوسماغين ديگر چئشيدلرينه ايليشديم. اؤزلليکله گنج چاغلاريندا کي حدديمدن، اندازه مدن خبريم يوخودو. يقين کي نه دئديگيمي آنلاميشسيز. جاوانليق جاهيلليق ايشده…ماشين آلتيندا قالماديم، آمما ماشيندان داها بترينه راست گلديم. باخين سيزه بير نصيحت! منجه اينسان گئديب دووار قيراغيندا اوتوروب ديلنچيليک ائله‌سين، حتتا آجيندان اولسون، آمما بانکالاردان بورج آلماسين. ماشين آلتيندا قاليب بيرآن جان وئرمک، بورج آلتيندا ياواش ياواش اؤلمکدن و نه کي وارينين هولا قوشولماسينا شاهيد اولماقدان داها دا ياخشيدي منجه.نه ايسه کي گؤز ياشي، بورون پوخو و البت ده خانيمين قيزيللاري، بيزي بانکانين او اون سککيز تکرلي بورجو آلتيندان ائشيگه چيخارتدي.بير خاطيره ده تعريف‌لييب، بو آنا قارقيشي قونوسونو قاپاتيم.گونلرين بير گونونده ايش ايچين سفره چيخديم. بلي ايش ايچين!بو »ايش ايچين« سؤزو ائله خوشوما گئدير کي. بو اوزدن ده اونو هئي تيکرارلاييب، دورورام.تک باشينا ائودن ووروسان ائشيگه. بير هفته، ايکي هفته. راحات بير نفس آليرسان. اوشاقلاري دا وئريرسن آنالارينين قولتوغو آلتينا. آرتيق دا اومروندا دئييل، دووار باشيندان پيشيک گئچير، يا دا آصلان. خولاصه او بئش- اون گونو ائودن اوزاقدا، قافايي دينجلديب ائوه دؤندوم. دؤنوشده ده ائو اهاليسينه هديه‌لر آلديم.کيچيک اوغلوم اويناتمالي تابانجاسيني قوتوسوندان چيخارديب الينه آلدي. موتلولوغا دوغرو قاچيب، تئروريست سالديريلارينا باشلادي.بالاجا قيزيم، پمبه رنکده دؤنونو گؤورنجه، آتيليب توشدو. پيشک کيمي دوورلارا ديرماندي. يااا..آللاهيم يا رببيم! قريبه ايشه قالديق هاااا.. بو گون بو پيشيک بيزيم حئکايه‌ميزه گيريب، چيخماق بيلمه‌دي.خانيميما گلينجه، اونا گؤزل و باهالي بير شالوار آلميشديم. آمما..آمما شالواري اينينه گئيديگينده، گؤردوم هم خانيمين قاش قاباغي يئرده گئدير، هم ده شالوارين پاچالاري.بلي، شالوارين هر قيچي تخمينن ايکي قاريش اوزونودو. يازيق جيغاز، قئيچي، ايينه، ساپي الينه آلدي. باشلادي ياواش ياواش تازا آلديغيم شالواري قيساتمايا.»بئله کي سن باشلاميسان، يئددي گئجه يئددي گوندوز سورر سنين بو تعمير ايشين.« اونا دئديم. آستا اولدوغونو تپه سينه ووردوم. هر شئيي اليندن آليب، اؤزوم ايشه باشلاديم. تئز اؤلچدوم بيچديم، شالوارين بير قيچيني کسديم. کسه کسه ده قورورلا، درزيليکده نئجه ماهير اولدوغومو و چوخ آز موددت ايچينده بو ايشي بي بي اوغلومدان اؤيرنديگيمي دئييرديم. سونرا او بيري قيچي دا قيساتديم. پاچالاريني قاتلاييب، تيکمه دن اوول، دئديم شالواري اينينه گئيسين و منيم ايکي ثانيه ايچينده بو ايشي بيتيرمه‌گيمه حئيران قالسين. هه! قالدي دا آمما.. آخي سيز آللاه! منه دئيين گؤروم، مگر آدام بوزدو کي اريسين. هله بير ده يئره گيرسين. توتاليم کي اريدي، هاردان بللي کي يئره گيره جک. نه بيلرسن؟ بلکي ده آسفالت اوستونده اريميش اولدو. اوندا هانکي يئره گيره بيلر کي. هه، شالوارا نه اولدو؟بابام! بوش وئرين شالواري. هئچ بير شئي اولمادي.دئييرم آخي رحمتليک! بو نه قارقيشيدي ائله‌دين. ايندي من بو يئکه‌ليکده کيشي نئجه اريييم آخي. اريديم بئله هارا گيريم.شالوارا نه اولدو؟بابام! حئکايه ده کي پيشيک بير ياندان، سيز ده او بيري باندان. ال چکين گؤرک باشيمدان.هئچ ذاد. شالوارين بير قيچي، اوول کي کيمي، هله ده ايکي مئتير يئرده سورونوردو. او بيري قيچي خانيمين ديزينه قدر قيسالميشدي.ياني…ياني کي بير قيچي ايکي دفعه کسميشديم.
آللاه اؤلنلريزه رحمت ائله‌سين، آنام ائله پيشيک دوواردان ايري گئچنده مني قارقيش ائله‌يردي.