تولکو, تولکو, تونبکي
تولکو, تولکو, تونبکي
1396/01/20
تولکو, تولکو, تونبکي بيري وار ايدي, بيري يوخ ايدي, بير تولکو وار ايدي.
آذربايجان ناغيللاري
بولگه لر سرويسي:تولکو, تولکو, تونبکي بيري وار ايدي, بيري يوخ ايدي, بير تولکو وار ايدي.
گون‌لرين بيرينده تولکو بابا قويروغونو بئلينه قويوب چؤلده گزيردي کي, گؤرسون قوش‌دان, جمعدک‌دن بير شئي تاپارمي, يئسين.
چوخ گزدي, چوخ دولاندي, آخيردا گليب چيخدي بير قويونون باشينا. بوينونو ئوزاديب اييلدي, قويويا باخدي. گؤردو قويونون ديبينه بير پارچا آغاپپاق قويروق دوشوب. تولکو سئويندييين‌دن اويناماغا باشلادي. ئوزون قويروغونو يئرله سورويه-سورويه بير خئي‌لي اوينادي. سونرا اوز-اوزونه دئدي:»ياخشيجا عليمه قويروق دوشوب, اونو يئمسم, هئچ هارا گئتميجيم«.
تولکونون آغزينين سويو آخماغا باشلادي. ائله بيل قويروق چاغيريب اونا دئييردي: “تولکو بابا, گل مني يئ, تولکو بابا, گل مني يئ”. تولکو بابا اوزونو ساخلايا بيلمييب, قويويا توللاندي, گوپپولتو ايله قويونون ديبينه دوشدو. يازيق تولکونون ازيلمميش بير يئري قالمادي. ئوفولدايا-ئوفولدايا آياغا قالخدي, قويروغون يانينا گئتدي. آغزيني آچدي کي, قويروغو يئسين, دونوب يئرينده قالدي.
دئمه, بو, قويروق دئييلميش, بير پارچا آغ داش ايميش. تولکو بابا چوخ فيکير ائلدي, تدبير تؤکدو, ايستدي قويو‌دان چيخسين, چيخا بيلمه‌دي. چونکي قويو چوخ درين ايدي. تولکو بابا قويروغونو يانينا قيسيب, بير کونجده چؤمبلدي. آراني داغا آپاردي, داغي آرانا گتيردي, فيکيرلشدي کي, بور‌دان نه جور چيخسين. بير ده گؤردو بير ايلانلا, بير تيسباغا اونون يانينا گلير‌لر.تولکو بابا سئوينيب دئدي: ...
آ ايلان, آ تيسباغا قارداش, سيز بوردا نه گزيرسينيز?تيسباغا جاواب وئردي:تولکو بابا, بيز ده سنين کيمي اوز تاماحيميزين ئوجون‌دان بورايا دوشموشوک. کنارا چيخا بيلميريک.ائله بو واخت قويونون باشين‌دان سس گلدي.تولکو دئدي: گيزلنک, گؤرک بو کيمدي? هر اوچو بير کونجده گيزلندي‌لر. بير آز کئچميشدي, بير ده گؤردو‌لر بير شئي تاپپيلتي ايله قويويا دوشدو. باخدي‌لار قويويا دوشن چاققالدي. تولکو اونا باخيب گولدو. بو دا تولکو باباگيل کيمي آلدانميشدي. تاماحينين ئوجون‌دان اوزونو قويويا سالميشدي. تولکو برک‌دن دئدي: چاققال قارداش, خوش گلمي‌سن, بئش گتيرمي‌سن? چاققال تولکو باباني گؤروب باغيردي: آخماق آخماق دانيشما, چکيل اويانا گؤروم. قويروق اوزوموندو.تولکو بابا جاواب وئردي: آي آخماق جاققال, هئچ آجيقلانما. او قويروق دئييل, بير پارچا آغ داشدي. سني آلدا‌دان کيمي, مني ده آلداديب بورا ساليب. ايندي هاميميز بوردا آجين‌دان قيريلاجاغيق. – چاققال دوداق‌لاريني بوزوب آغلاماغا باشلادي. بو زامان قويونون باشين‌دان بير گورولتو ائشيديلدي. تولکو بابا چاققالا دئدي:آخماق آخماق آغلاييب باش گؤزوموزو آپارما. قويونون باشيندا سس-کوي وار. گل گيزلنک, گؤرک ايندي قوناغيميز کيم اولاجاق? چکيليب بير کونجده گيزلندي‌لر.بير آز کئچميشدي, بير ذوربا قويوداکي داشي قويروق حساب ائلييب آتيلدي, شاپپيلتي ايله قويونون ديبينه دوشدو.
قول-قابيرغاسي ازيلميش حالدا يئر‌دن قالخيب قويروغون اوستونه جومدو. باخدي کي, قويروق نه گزير? بو, بير آغ داش ايميش. آجيق‌لي-آجيق‌لي او طرفه, بو طرفه باخماغا باشلادي, کونجه قيسيلميش تولکونو, چاققا‌لي, تيسباغاني, بير ده ايلاني گؤردو. قورد باغيردي:يوخسا, بورداکي قويروغو سيز يئميسينيز?چاققال قورخوسون‌دان تولکونون بؤيرونه قيسيلدي. تولکو قويروغونو يئره ساللاييب قولاق‌لاريني ايره‌لي ئوزاتدي. قوردا جاواب وئردي:قورد آغا, هئچ آجيقلانما. بورا سن دئين يئر دئييل. هاميميز آجين‌دان اولجييک. سن گؤرن – قويروق دئييل, بير پارچا آغ داشدي. او داش بيزي آلدا‌دان کيمي, سني ده آلداديبدي. آخ تاماه, تاماه...قوردون قولاغي بوزوشدو, ايستدي تولکو بابايا جاواب وئرسين, قويونون باشين‌دان بير سس گلدي. بون‌لار هاميسي قاچيب گيزلندي. بير يئکه دونوز تاپپيلتي ايله قويويا دوشدو. دونوزون آياغي او قدر آغريميشدي کي, آياغا قالخا بيلميردي. قويوداکي‌لار بونا باخيب گولوشدو‌لر. دونوز آغلايا-آغلايا دئدي:
قارداش‌لار, بس, سيز بوردا نه قاييريرسينيز? تولکو بابا جاواب وئردي:هئچ سوروشما, دونوز قارداش, سنين باشينا گلن بيزيم ده باشيميزا گليب. گل بري گؤرک بو بير پارچا آز داش داها هانسي آخماغي بو تورا سالاجاق?..بو زامان قويونون باشين‌دان بير دونقول‌دانما ائشيديلدي. بون‌لار آلتيسي دا قاچيب گيزلندي. بير بؤيوک آيي گورولتو ايله قويونون ديبينه دوشدو. آيي يومشاق ايدي, هئچ يئري ازيلمه‌دي, تئز آياغا دوردو, توک‌لريني قابارتدي, آجيق‌لي-آجيق‌لي هر طرفه گؤز گز‌ديردي. قويوداکي‌لاري گؤروب دال آياق‌لاري اوسته قالخدي, گؤز‌لريني برلديب قيشقيردي:دئيين گؤروم بورداکي قويروغو هانسينيز يئدينيز? قويوداکي‌لارين ديلي توتولدو. تولکو بابا ايره‌لي يئريييب, قورخا-قورخا دئدي:آ آيي لله, بيز قويروق يئمميشيک. سن گؤردويون قويروق دئييل, بير آغ داشدي. سني آلدا‌دان کيمي, بيزي ده آلداديب بورا ساليب. هئچ آجيقلانما. بور‌دان نه سن چيخا بيلجک‌سن, نه ده بيز.آيي تولکو بابانين سؤزونه گولوب, سيچرادي کي, قويو‌دان چيخسين, اما باجارمادي. چونکي قويو چوخ درين ايدي. الاجسيز قاليب تولکويه دئدي:تولکو بابا, بس, نه ائيليک کي, بور‌دان چيخاق? تولکو بابا جاواب وئردي:من ده بيلميرم. گلين هاميميز بير يئرده ياخشيجا فيکيرلشک, گؤرک بير يول تاپا بيلريکمي? هره بير طرفده اوتوروب فيکيرلشميه باشلادي. اما نه قدر فيکيرلشدي‌لرسه, بير يول تاپا بيلمه‌دي‌لر. آخيردا هاميسي يورولدو. هره بير طرفده ئوزانيب ياتدي, آنجاق تولکو بابا ياتمادي, فيکير ائلييردي کي, بير کلک تاپسين, بون‌لارين هاميسيني آيي قيرسين, اوزو ده اونون الين‌دن قورتارسين.
او گونو اونلار آج قالدي‌لار, صاباحيسي دا آج قالدي‌لار. اوچونجو گونو تولکو گؤردو داها دورا بيلمير, آجين‌دان اولجک. يولداش‌لاريني باشينا توپلادي. اوزونو اونلارا توتوب دئدي: قارداش‌لار, گؤرورسونوز هاميميز آجين‌دان اولوروک. هاميميزين اولمييميزدنسه, يئنه ده بيريميزين اولميي ياخشيدي. قويون من بير ماهني اوخويوم, هر کيمين آدي آخيرا دوشسه, اونو يئيک.يولداش‌لارينين هاميسي بونا راضي اولدو. تولکو آياغا قالخيب اوخوماغا باشلادي. گؤر نه جور اوخويور?
تولکو, تولکو, تونبکي قويروق اوسته لونبکي.
آيي آخماق, دونوز توخماق,قورد ئولاووش, چاققال چاووش,ايلان قامچي, تيسباغا چاناق,
بيز اونا قوناق. هامي بير-بيري‌نين اوزونه باخدي. تولکو اوزونو آيييا توتوب دئدي:آ آيي لله, سن بيلير‌سن کي, بيز بوردا نه سو تاپاجاغيق ايچک, نه آرپا, بوغدا تاپاجاغيق اولچک. اونا گؤره ده بيزه چاناق ساخلاماق لازيم دئييل. من نغمني اوخودوم. من‌دن دئمک, سيز‌دن يئمک.اونلار تؤکولوب تيسباغاني يئدي‌لر.آيي دئدي:تولکو بابا, بون‌دان بير شئي اولمادي. بير ده اوخو.تولکو اوخوماغا باشلادي:تولکو, تولکو, تونبکي, قويروق اوسته لونبکي.آيي آخماق, دونوز توخماق,قورد ئولاووش, چاققال چاووش,ايلان قامچي, بيرجه دامجي يئنه هامي بير-بيري نين اوزونه باخدي. تولکو دئدي: آ آيي لله, دئ گؤروم, بيزيم بوردا آتيميز, ئولاغيميز يوخ, قامچي نييميزه لازيمدي? من نغمني اوخودوم. من‌دن دئمک, سيز‌دن يئمک.
تؤکولوب ايلاني دا يئدي‌لر.آيي دئدي:تولکو بابا, بون‌دان دا بير شئي اولمادي. بير ده اوخو گؤرک کيمه دوشور.تولکو اوخوماغا باشلادي:- تولکو, تولکو, تونبکي,قويروق اوسته لونبکي.آيي آخماق,دونوز توخماق,قورد ئولاووش,سسي بايقوش.يئنه ده هامي بير-بيري‌نين اوزونه باخدي. تولکو دئدي:آيي لله, ئولاووش بيزيم نييميزه لازيمدي? ائله اصلينه باخسان, او ئولادي کي, بيز بو گونه قالديق. ايندي آجين‌دان قيريليريق. من نغمني اوخودوم. من‌دن دئمک, سيز‌دن يئمک.آيي او ساعت قوردو قارمالادي. باسيب اونو دا يئدي‌لر. او گونو ده بئله کئچيريب صاباحي ائلدي‌لر. آيي اوزونو تولکويه توتوب دئدي:تولکو بابا, آجين‌دان اولورم. دورما اوخو, بير ناحار ائليک.تولکو اوخوماغا باشلادي:تولکو, تولکو, تونبکي,قويروق اوسته لونبکي.آيي آخماق,دونوز توخماق...يئنه ده هامي بير-بيري‌نين اوزونه باخدي. تولکو دئدي:آيي لله, دئ گؤروم توخماق بيزيم نييميزه لازيمدي? من‌دن دئمک, سن‌دن يئمک.آيي او ساعت پنجسيله باسيب دونوزون بئليني قيردي. هره‌سي بير طرف‌دن اونون اتيني پارچالاييب يئميه باشلادي‌لار.بير نئچه گون ده دونوزون اتي ايله دولاندي‌لار. تولکو دونوزون اتين‌دن بير قدر قولتوغوندا گيزلتميشدي. بورنونو قولتوغونون آلتينا ساليب اونو يئييردي. آيي اونو گؤروب دئدي:تولکو بابا, اتي هار‌دان آليب يئيير‌سن? منه ده وئر.تولکو بابا جاواب وئردي: هئچ هارا‌دان آلميرام. اوز قولتوغومون اتيدي, سؤکوب يئييرم. سن ده اوز قولتوغونون اتيني سؤک, يئ. آيينين آغلينا باتدي, اوز قولتوغونو ديشي ايله سؤکدو. قان باشلادي سئل کيمي آخماغا. او قدر قان آخدي کي, آخيردا آيي تاقت‌دن دوشدو, يئره ئوزانيب اولدو. تولکو: “من دئينده آيي آخماق, منه گولور‌لر”, - دئييب گوله-گوله آيينين اتين‌دن پارچالاييب يئميه باشلادي. بير مدت ده آيينين اتي ايله دولاندي. سونرا يئنه ده آجليق باشلادي. تولکو آجليغا داوام گتيره بيلمييب, برک‌دن واققيلداماغا باشلادي.
تولکو واققيلدايا-واققيلدايا دئييردي:آخ, تاماه, آخ تاماه!.. سن نه پيس شئي‌سن. اگر تاماحيمي ييغسايديم, بورا دوشمزديم!بير اووچو اوردان کئچيردي. تولکونون سسيني ائشيديب, قويونون باشينا گلدي. ايپ ساللاييب تولکونو قويو‌دان کنارا چيخارتدي, دئدي:آي تولکو, جامااتدا تويوق قويمادين, چؤل‌لرده قوش قويمادين, يازيق‌لارين هاميسيني بوغوب يئدين. ايندي ده من سني بوغوب اولدورجيم, دريني سويوب بوغازين‌دان چيخارداجاغام.اووچو تولکونو بوغوب, کنارا آتدي. او, ائله بيليردي کي, تولکو اولوب. بيچاغيني ايتيلييردي کي, اونون دريسيني سويسون.
بير‌دن تولکو يئر‌دن سيچراييب گؤتورولدو. اووچو سسه قانريليب باخدي کي, تولکو اودو تپه‌نين باشيندا. سس ده اونون سسيدي, دئيير? اووچو قارداش, آدام ايشين بيريني قورتارماميش, او بيرينه باشلاماز. هله بير باخ, گؤر, بوغوب اولدوروب‌سن, يا يوخ, سونرا دريسيني سويماغا حاضرلاش.اووچو بير سؤز دئمدي. گؤردو کي, تولکو دوز دئيير, کور-پئشمان ائوينه قاييتدي.
منبع :