سئوگي چاناغي

بولگه لر سرويسي:کدده يئني يئتمه اوغلان اوشاقلاري هره بير قيزي ايسته ييرکن؛يولداش آراسي گلن عومورلوک گونونه پيلان توکنده ائلجان دا اوزلرينن وارلي کارلي اولان قارشي طايفادان اوزون زامان آرالاريندان داوا دالاش اولماغينا باخماياراق؛اوشاقليق صينيف يولداشي اولاراق آلما ياناقلي سرتاجي گوزوآلتيندا ياتيرتميشدي کي اونونلا حيات قوروب عومور گونون سئويديگي بير حييات يولداشي ايلا ياشاسين

آذربايجان حئكايه سي
بولگه لر سرويسي:کدده يئني يئتمه اوغلان اوشاقلاري هره بير قيزي ايسته ييرکن؛يولداش آراسي گلن عومورلوک گونونه پيلان توکنده ائلجان دا اوزلرينن وارلي کارلي اولان قارشي طايفادان اوزون زامان آرالاريندان داوا دالاش اولماغينا باخماياراق؛اوشاقليق صينيف يولداشي اولاراق آلما ياناقلي سرتاجي گوزوآلتيندا ياتيرتميشدي کي اونونلا حيات قوروب عومور گونون سئويديگي بير حييات يولداشي ايلا ياشاسين؛هردن اورک سوزون ائوده گلين باجي سينان(قارداش آروادي) پايلاشاندا؛اودا بيله سينه اورک وئره ئره الين اوکه له ييب دئييردي؛جانيم آغير يئردن ياپيشميسان اونا گوره بو ايکي طايفا اوزون ايللريديرکي بيربيرلرينن دالاشيرلار؛امما سئوگي سرحد تانيمير دِئييه ائلجان گلن گونلرينه اومود باغلاييب هردن باغ باغچا آرا قيزينان خلوت ائله ييب اورک دويونتولرينن اوپوش گوروش ائله ينده  لاپدان سرتاج ديسکينيب قارداشلاريم گلر دِئييه يايليقي الينده قيرقي کيمين اوغلانين الينن قوتاريب ائولرينه دوغرو قاچاردي؛بوسوز کند آراسي ياييلاندا ائلجانين آدام نفري اوغلاني  بوايشدن واز گئچمه يين ايسته ينده  سئوگيسي آلووي گوندن گونه آرتيب؛ اوزو اوزونه  ياناراق ويرقينليق شوئکه سي ايچريسينده قورائله ينده يوخ سرتاج سندن گئچه بيلميرم دئييه آغيلاسيغماز ايشلره ال ويريردي؛قيز آتاسي بو ايشين سونونو تهلوکه ده گورنده دويه دويه سرتاجي اوز قارداشي اوغلونا وئرمک ايسته ينده ائلجاندا قيزي قاچيردارام دِئييه تک باشينا بوايشين قاباغين آليب مانعه چيليک توره دنده علاوه دن نئچه يول ايکي طايفا آراسيندا قانلي داوا دوشندن سونرا قيز طرفي يازيق اوغلاني ايتير باتير ائله ييب سس سوراغين کسيرلر؛بو قاپالي حاديثه دن سرتاج اوره يي عاقلينا غلبه چالارکن اوزون اوتداييب خلاص ائلمک ايسته ينده عيبجره حالا دوشنده داها عم اوغلوسودا اونا رغبت ائلمه ييب آييري قيزينان حييات قورور؛ ؛اوزون موددت بو اولايين اوستونن گئچندن سونرا ائلجانين آدام نفري قارشي طايفاني محکمه يه وئريب هيچ بيلگي الده اولماياندا محکمه ده قطعي قرارقبول ائلمه ييب آرادا بير اينسانين ايتيب باتماغي معمالي شکيلده قالاندا اوغلان آناسي بوظولومه دوزمه ييب اودا گوزو يوللاردا قالارکن حيياتيني ايتيرير؛گئد گئده بو اولاي بولگه ده ياييلاندا سئوگي چاناغي باشيندا سينان سرتاج داها گوندن گونه خسته له نيب باشينا هاوا گلنده هر گون يول اوسته اوتوروب گليب گئدندن ايتيرديگين سوروشاند ا ظولوم ظولوم آغلاييب هردنده باش بيرچه ينه قارا دوواق باغلاييب مچيده منبره يخينتي دوشنده اوره ينده ائلجانا اولان سئوگيسي ايله عشق روسوا سي اولاراق اونون آتاسي بو درده دوزمه ييب دونياسين دئيشيب؛ امما اوزو عيبجرده اولسا خالق ايچينده ياشايير؛لاپدان جاماهات بايرام گونلري  قبيرصانديقا گئديب اوز اولولرينين مزاري اوسته آغلاياندا سرتاج دا اوزون بيلمه دن اونلارا قوشولوب داشلار آراخاسيندا  الينن توپراقدان دوزلتديگي قبيري قوجاقلاييب هاي هايينان آغلاردي؛طالعي بئله گتيرميش عشق يانيقيسي اولان سرتاج اورتا ياشلاريندا دونياسين دئيشرکن اوز الينن دوزلديگي قبيره قويولور بئله ليک له اولمه مزليک سئوگي هيکلي يارادارکن اوزونو عشق آلووندا يانانلار کولونه قاتير

منبع :