بو چاغين اؤزل ناغيلي
بو چاغين اؤزل ناغيلي
1400/10/05
بولگه لر سرويسي: ياديما ملّا نصرالدين درگيسي¬نين يازاري دوشور. واختيلا او دوشونجه¬لي متفکر نه چتينليکلرله ال به ياخا اولوب. چئوره¬سيني آلانلار بوسبوتون عقلدن کَملر، موهوماتچيلار، نلر- نلر اولدوقدا »جليل محمد قليزاده« يازيردي، يازيردي نهايت جانيندان بئزنده ايسه، نه قدر يازيريقسا دا، »بو دنيا دوزلميرکي، دوزلمير« دئييردي.
حسن_عجبشرلي
بولگه لر سرويسي: ياديما ملّا نصرالدين درگيسي¬نين يازاري دوشور. واختيلا او دوشونجه¬لي متفکر نه چتينليکلرله ال به ياخا اولوب. چئوره¬سيني آلانلار بوسبوتون عقلدن کَملر، موهوماتچيلار، نلر- نلر اولدوقدا »جليل محمد قليزاده« يازيردي، يازيردي نهايت جانيندان بئزنده ايسه، نه قدر يازيريقسا دا، »بو دنيا دوزلميرکي، دوزلمير« دئييردي. عاليمين يازديقلارينا نظر سالديقدا گؤرونور يازيچي نئچه ساحه¬لي اديبدير. يازيلاري¬نين تحرير تاريخينه دؤندوکده 1896? م توت گل 1925? م دک، تخميناً 125 سوره¬جينده بيزده او يازديقلاري¬نين يوزه- سکسني دگيشمز حالدا دورور. بو او دئمکدير توپلوم هله ايرليلمگه جان آتمايير.
اؤلولر پيئسي، دانا باش کندي¬نين احوالاتي، دليلر ييغينجاغي، آنامين کتابي، ايراندا حريّت، خانين تسبيحي، بلکه ده قايتارديلار و… و… و… چوخلاريندان آد چکمک اولار. بونلارين هاميسيندا بير عِيبه¬جرليک گؤزه دگير. عيبه¬جرليکدن آماج، توپلومدا دويولان آخساقليقلاري صدالاماقدير. فضالاري قياس ائدرکن بير اورتاق مخرجده گليب دايانيب، يئنيدن چئوره¬ميزه باخيب، آهلانيب ايچيميزي چکيريک. ايندي اؤلولر پيئسينده بيرينجي رولو اوينايان »کِفلي اسکندر« تاپيلارمي بيزه عقل قويا؟ يوخسا »محمدحسن عمي¬نينن« يئنيدن ائششگي ايترمي گئده شهره بيزه خبر گتيره؟ ائله¬سي دليلر ييغينجاغي تکرارلانارمي؟ هيهات آنجاق بونلارين يئرينه باشقا موضوعلار گليب يئر آليب.
اينديکي دورومدا هر دوشونه¬نين الينه بير ياريم کرپيچ (زووکش موبايل تلفون) وئريبلر. اونونلا اؤز چئوره¬سينه فيرلانير. آمانلاردا بير گوندي! ائيله آنلاشيلماسين بيز نئجه دئيرلر مدرنيته¬يه قارشي دورانلاردان ساييليريق استعفرالله! آغزيما داش- توپراق! يوخ او معنادا سسلنمه¬سين، آنجاق بونو بيلمه‌لي-ييک او فضادا يازيلان سؤزلرين، ساولارين چوخونا سؤيکَنيب، آرخالانيب فکر سؤيلمه¬مه‌لي¬ييک. »جليل محمد قليزاده« دئميشکن: »قيز اؤلدو- سؤزنو دوشونوب، کؤرپو قالير چايين اوتاييندا.«
بو باشلانيشلا کئچک اينديکي چاغين ناغيلينا:
آتام دمير يولوندا ايشله¬ييردي، اؤلنلري آزالدان¬دان سونرا قالميشديق ايکي باجي، آلتي قارداش. دئملي من بئشينجي اوشاغيديم، آنامين سودونو اميب، ديرچلميشديم. اوشاقليقدا فلج خسته¬ليگينه توتولموشدوم، ياديما آزاجيق گلير، آنجاق دئييلنلره گؤره يازيق آنام حکيم قالماميشدي يوخلاتماسين. بيزيم ياشاديغيميز محله ده اوچ اوغلان اوشاغي بو خسته¬ليگه توتولموشدو، او ايکيسي ايندي¬نين- اينديسي قيچلاريني چکيرلر من ايسه، آنامين قايغيکئشليگي اوجباتيندان قيچلاريمدا آخساقليق قالمادي.
هئچ اؤزوم ده بيلمه¬ييرم ايسته¬ييرم اوخوجولاريما نه دئيم، شاعر »فکرت قوجا« نين بير تيکه شعري يادداشيمدا جانلاندي:
هئچ کسين دردينه گولمه¬ميشم من
منه آغلامايين، منه گولمه¬يين
بورا اؤز خوشونا گلمه¬ميشم من
اگر باجارسانيز سيز ده گلمه¬يين
منيم ياخين يولداشلاريمين بيري مني گؤروب، دانلاق آلتيندا ازدي: »آي اوغلان! اورک آچان يازي سندن اوخوماق منه حسرت چلنگي اولدو، ديلين «واي»¬دان باشقا آيا- ايشيغا، گونشه- سمايا آچيلمايير« دئدي. آغزيمي دولدوردوم بير سؤز دئيم توپوردوم يئره. آخي يولداشيم تزه¬جه اوغلونو ايتيرميشدي.
منيم اؤز يولداشيم آنا وطن¬نين باجيسي ساييلان ايکينجي و تن ده دنياسيني دگيشميشدي. قال- مقال حديندن آشيب، کيمسه کيمسه¬نين حاليندان خبردار اولماييردي. من ده سفيح کيمي هله ايسته¬ييرديم اؤز ناغيليمي دانيشيم. بير او قدر دانيشماغا گرچک ناغيل وار من باشي داشلييا بير دئه، آجليق ناغيلي، توخلوق ناغيلي، ايت ناغيلي، قورد ناغيلي، پوللو علي¬نين ناغيلي، کاسيب حسن خونبول ناغيلي، قورتاران دگيل.
بونلارلا بئله يئنه ده »ايت، ايت¬ليگيندن ال چکسه ده، سومسونمه¬گيندن ال چکمز« دئيبلر. يولداشلاريمين بيري دئيردي: »زنوز شهرينده بير يئلينکا چي رحيم وارايدي، نفت گالونلاريني يئلينکايا قويوب- قويماميش يازيق ائششک نفت شعبه¬سي¬نين قاباغينا دک چاپيردي.« بومنيم ناغيليم اولوب،کاغاذ- قلمي گؤرنده دئيرم بس گرک يازام. اؤزو ده نه يازام
نه باشينيزي آغريديم بؤيودوم، آنجاق عاغيلدان سيسقا قاليب، نئجه دئيرلر انکشاف ائده بيلمه¬ديم. اؤگرنديگيم ديل منه قنيم اولدو. فيکيرلشديگيمي يازييا آلا بيلمه¬ديم، دوزو- اگريدن آييرانماديم، قالديم نئچه يولون آيريجيندا. بوس- بوتون قارينداشلاريمدان خبرسيز قالديم. باشيما اويون قالمادي آچيلماسين، آدام اؤله¬جک آتام اورک- ديرک اولدو: »داريخمايين دوزه¬لر« نم- نئجه اولدو من ده داريخماديم! اما دوزلمه¬دي هيچ، بيرآز دا آرتيق اگيليب دوه بوينونا اوخشادي. هامي دئيردي دوزه¬لر. بير نفر سورمادي آخي نه دوزه¬لر؟ سونرالار باشا دوشدوم مثلاً سؤزو کيمي دوزه¬لر ديلده- ديشده.
گرن، ساققيز تکي چئينن بير زاد ايميش. بئله قراره گلديم باشيمي اينگيميز کيمي آشاغييا تيکيب، اؤزومچون اوتلاييم، تانريدان گيزلين دگيل سيزدن نه گيزلين درست- حسابي دينجلديم. نئجه دير ائله سيزه ده باش آغريسي وئرمه¬دن سؤزون ال- اياغيني بير يئره ييغيب زحمتي آزالداق. الله جليل محمد قليزاده¬يه رحمت ائله¬سين. اوخوجولاريم مني باغيشلايارلار بو دؤنه چاش- باش ويرديم، بيله¬سينيز ائوين تاپشيريقلاري ياديما دوشوب جيبيمين پوللارينا آغلاييرديم.
منبع :