مني سئومه‌سه لرده بئله من اونلاري سئوه جاغام
1398/11/06
بولگه لر سرويسي: نووروز بايرامي‌گلمه‌ميشدن؛ گئتميشدي. داي او قَدَر ائو سيليب سوپورمکدن– او قدَ‌ر ماراقلا يئدي لووون آليب آخير چرشنبه‌ني گؤزله‌مکدن- شال ساللاماقدان- يومورتا دؤيوشدورمکدن- گؤروشه گئديب گلمکدن- بايرامليق آليب وئرمکدن، خبر يوخويدو.
بايرام گونلري پيسدن-ياخشيدان يئل‌کيمي‌گليب سوووشموشدو. مدرسه‌لر آچيليب کيلاسلار قورولموشدو. اوشاقلار گليب بيربير انشالارين اوخويوب يئرلرينده اوتوروردولار.اينشانين قونوسو (نووروز بايرامينين خاطيرالاري) ايدي. هرکس گليب،دوغرو- يالان، گئديب يا گئتمه‌ديگي سفرلردن؛ دال بادال دوزدويو جمله‌لري اوخويوب بير نومره آليردي. سيرا کريمه چاتدي. کريم اوجا بويلو آريق و ساري يوزلو، قاش‌قاباخلي اون‌دؤرت ياشيندا بير اوغلان‌ايدي. نورمالدا کيمسه ايله دانيشمازدي. دوغروسو کيمسه‌لر اونونلا دانيشمازديلار و سانارديلار بير اسکي‌يويان و فرش توخويانين اوغلويلا دوستلوق ائتمک، اونلارا باش آشاغيليق گتيرر. کريم ويقارلي آدديملارلا کيلاسين اؤنونه گئچيب دفتريني آچيب انشاسيني اوخوماقا باشلادي. کريمين سسي کيلاسي بورودو.
اوشاقلار اونون سسيني سايمادان بيربيرلريله قونوشوب دئييب گولوردولر. آما گئتديکجه کريمين اوخودوغو جمله‌لر چکيش سسي تکين قولاقلاريندان گئچيب قافالاريندا اوتوروردو. دانيشيقلار بيربير کسيليب قافالار کريمه ساري دؤنوب؛ گؤزلر کريمين آغزينا تيکيليردي. معلّم‌کي کيلاسين پنجره‌سيندن حيطه باخيردي؛ کريمه ساري دؤنوب کريمين آغزيندان چيخان کلمه‌لري قولاقلاريلا اوتوردو. کيلاسي آغير سيکوت بوروموشدو.
کريمين سسي کيلاسدا جينگيلديردي:«…..گؤزل آنام… او گؤندن کي، منله باجيمي‌بوراخيب آتامين يانينا کؤچدون، بيز آغير گونلر گئچيريريک. ايلک گونلر قوهوم قونشو گليب گئديرديلر، آما گون گئچديکجه گليب گئتمه‌لرده آزاليردي. داي بو گونلر کيمسه بيزدن ياد ائتمير. دوزدو سن گئديب راحاتلاشدين، آما بيزي کيمه تاپشيردين؟! ياخشي بيليرم کي خسته حالينلا نه قَدَر چاليشاردين اونون- بونون پالتارلارين يوياسان و بوش ساعاتلاردا بيزيله برابر دزگاه باشيندا اوتوروب ايلمک دويونله‌يه‌سن کي قاباللار تئزتئز بيتيب اربابدان پول آليب دردلريميزه وئره‌سن.ياديندادي آنا، بير گون نازلي کيچيک باجيم تله‌سيکدن بارماغيني کسدي؛ آما سن دونيانين زورلوغونون آجيسيني اوندان چيخارتدين و اونون بارماقينين قانينا باخماييب؛ اينجه بدنيني پيچرقاجين آلتينا سالدين!؟ باجيم آغلييا- آغلييا دئييردي :-“آنا… سن دئييرسن تئزتئز دوتله‌دا؛ منده تله‌سيک دوتله‌ييرديم بيردن بارماغيم پيچاق آلتينا گئتدي….
”باجيم ايچين چالا-چالا، آجي آغليردي؛ دؤزه بيلمه‌دين اونو باغريوا باسدين، سنده آغلادين؛ منده آغلاديم. نئجه گون پيچرقاجين يئرلري اونون بدنينده زول- زول شيشيب گؤيرميشدي.ياديندادي ايلمک سالا سالا ، ايلمکلرين ديليله اوخوياردين :” گينه صف باغلاييب باخيرسيز منه؟!قانلارين رنگيدير بويويوب مني اينجه بارماقلارلا مظلوم بالالار گئجه‌لر ياتماييب توخويوب مني ..”ياديندادي آنا…صبح گون چيخمادان دزگاه باشيندا اوتورارديق، مدرسه ساعاتي چاتينجا اوسدوموزون تويلرين سوپورگه‌ايله سوپوروپ تميزلردين، بيزده گولرديک کي مه‌يه بيز يئريک يا فرشيک کي اوستوموزو سوپورورسن !؟نه سنين حووصله‌ن اولاردي بيزيم باشقا نييازلاريميزا چاتاسان ونه بيزيم بؤش واختيميز اولاردي کي آرتيخراق درسلريميزه چاليشاق. دوشوک نومره آلاندادا سئوينرديک کي اَن آزي سنين ساوادين يوخدورکي بيله سن. آما سن اؤزووو سينديرمازدين، دفترلريميزي آليب باش آشاغي ترسه توتوب باخيب، مظلوم گولوب گينه بيزه گئري وئرردين. من چوخ زامانلار کيلاس مشقلرين يازا بيلمزديم نييه‌کي وقتيم اولمازدي. آغا معلّم ساناردي بس من اوزلو و دانقاز اوشاغام. اودوکي آغا معلم ايسته‌مه‌ميش اليمي‌آچارديم تا گونده‌ليک شووومو وورسون، اما شاديديم کي بونلاري سن بيلميرسن.
سن اؤلن گوندن نئچه گون سونرا، ارباب بيزه گوونمه‌ييب گليب دزگاهي گئري آپاردي. قورخوردو بيز فرشي پوزوب ريه‌لي توخوياق. ايندي من مدرسه‌دن چيخان زامان بير باشقا فرش کرخاناسينا قاچيب فرش توخويورام. آما باجيمي‌قويماديم کرخانايا گئتسين، آخي بيليرسن آنا! کرخانالاردا، کيفير سؤزلر دانيشيلديغي اوچون بير قيز اوچون اويقون يئر دئييل.گئجه‌لرگليب هم اؤز درسلريمه، همده باجيمين درسلرينه چاليشيرام. سنه سؤز وئريرم سنين ايسته‌يين کيمين درس اوخويوب دَيَرلي اينسان اولاق.جمعه گونلري سنين يانيوا گليب سنله دانيشيريق. بيليريککي سسيميزي ائشيديرسن. البت سنين پوزقون قبريوي گؤرنده اوره‌ييم کدرلنير. سنين قونشولارين قبيرلري ايکي اوچ قات، آينا کيمين قيرانيت داشلارداندي، آما سنين قبرين قارا سيميت‌دندي..! سانيرام سن خسته اولان زامانلار بو گونلري دوشونوردون‌کي دئييردين:کاشکي قبرين ايچي جنت اولا، اوستندن نه فايدا….؟
آنا….! بو گونلر بايرام گونلريدي و بو گونلر سنسيز بيزه چوخ زور گئچيري. چاليشديم بايراما بير کيچيک سوفره آچام. باجيما قيرميزي باليق‌دا آلديم.آنا…! بيز قوهوملارين گؤروشونه گئتديک؛ آما دئيه‌سن بيز يوخوق، کيمسه بيزي گؤرمه‌يه گلمه‌دي!بوگون مدرسه‌نين ايلک گونودو. اگر منله باجيم تازا پالتار گيمه‌ميشيک، آما پالتارلاريميز تميزديلر. اگر يئمه‌ييميز ياغلي دئييل، آجدا دئييليک. اگر اوشاقلار گئتديک‌لري سفرلردن وآلديقلاري هديه‌لردن يازيبلار، منده سنين قبريندن يازاجاغام. سنه وئرديگيم سؤزلردن يازاجاغام. چاليشاجاييق ياخشي نومره‌لر آليب روحووو شاد ائد‌ک. اگر آغا معلّم و صينيف يولداشلاريم مني سئومه‌سه لرده بئله، من اونلاري سئوه جاغام. روحون شاد اولسون آنا.»
کريم انشاسيني بيتيريب کيمسه‌نين اؤزونه باخمادان يئرينه ساري يولا دوشدو. نيه کي ايسته‌ميردي اوشاقلار اونون گؤزونده اولان ياش دامجيسيني گؤرسون. آما بيلميردي اوشاقلاردا دينمز سويله‌مز آغلاييرديلار و اوتانيرلار کي بوگونه قَدَر نييه بو بؤيوک اينسانا، ياخشي دَيَر وئرمه‌ييب واونون دَيَريني پالتارلاريلا اؤلچوبلر. آغا معلّم‌ده گؤزلويونو گؤتوروب ياش دامجيلاريني اوزوندن سيلدي.کيمسه‌دن بير سس چيخميردي. آغا معلّم بو کيچيک ياشلي، بؤيوک اينسانين آياغينا قالخيب باش اَيدي. کيلاس بيردن بيره بومبا کيمين آچيليب آلقيشلاما سسي گؤيه يوکسلدي.
منبع :