بولگه لر سرويسي: هئچ اؤزوم ده اينانميرديم زهرا ايکي ياشينا کئچير. سحرچاغي يوخودان دوراندان، اون دفعه؛ »آللاه سني تانيمايانا لعنت! آللاه سنه مين شوکور« – دئميشم. علي آلتي‌دا ايشه گئدنده‌ ده نئچه دفعه تاپشيرديم »آخشام ائوه گلنده الي بوش گلمه ها… اوشاغا دوغوم گونو کئيکي آل، ياددان چيخماسين سن آللاه!«.بلي، هامينين دا ياديندان چيخسا، منيم ياديمدان چيخماز کي.

 فيکريم مين يانا گئديردي. آخشام کيم هارادا اوتوراجاق. کيم نه دانيشاجاق. اؤز-اؤزوم‌له دانيشا-دانيشا، گاهدان دا زهرانين اوتاغينا گئديب اييليب بويون-باشيني اييله‌ييرديم. بيلميرم نييه بو قدر اوشاغين دونيايا گلنده ياش‌ياريم، ايکي‌ياشينا کيمي گلن قوخوسونون دلي‌سييم. بلکه ده زهرانين اييي‌سي منه خوش گلير. الميدن گلسه ايدي، بو اييي‌نين عطيريني، اودکولونونو دوزلتديررديم.
بالامين اييي-قوخوسونا دا قوربان اولوم اؤزونه ده. منه خوشبخت‌ليک گتيرن بالاما. ايکي ايل بوندان اؤنجه‌لر ياديمدان چيخماز هئچ واخت. چيخا دا بيلمز. ايندي ده ياديما دوشنده ال-قولوم اسير. ديل-دوداغيم قورويور. اوره‌ييم دؤيونور. نه عذاب‌لار چکديم. نه سؤزلر ائشيتديم او زهراسيز گونلريمده. بالديز بير ياندان، قاينانا بير ياندان اوستومه گليرديلر.
او سيسقا، بورنو يئکه آداما بنزمز بالديزيمين آجي سؤزلري، هله ده بير زهريمار کيمي بوغازيمي يارا-يارا قارنيما دولور. قاينانامين آتماجالاري بير اوخ کيمي، جانيمدا ساغلام بير يئر قويماييب قالا. بويانا کئچيرديلر علي‌ني قوروردولار، اويانا کئچيرديلر علي‌يه قوش‌ديلي اوخويوردولار! بير گون اولسون بئله، ائويمه داعوا سالماقدان نه دويوردولار، نه يورولوردولار.هه! گلين گؤرون زهرالي گونلريمي! گلين گؤرون، آدينا قوربان اولدوغوم خانيم فاطيمه‌-يي زهرا (س)، نئجه بيزه، گول کيمي پاي آلدي آللاهدان. اللري قيريلسين خانيم فاطيمه‌ي زهرانين جانينا قييانلارين.زهرامين آديني قويماغي دا منه چوخ گؤرودولر. بو آدي قوي! او آدي قوي. آد گرک بيز دئين اولا. کيم دئييب آد گرک سيز دئين اولا؟ بو اوشاغين آناسي يوخدور؟ آتاسي يوخدور؟ هله قاريميش بير قيز اونا آد قوياجاق يا آغ بيرچک‌لريندن اوتانمايان بير قاري؟
واي اونو نه دئييم اولسون! گون اولمادي، هفته-آي اولمادي اريمي منيم جانيما سالمايالار. هله ده ساغ بؤيرومده سانجي وار. علي سن آللاها نئجه جاواب وئره‌جکسن؟ ووردوغون تپيک‌لره نه جاوابين وار؟ هه؟بلکه مني خسته‌خانايا آپاراندا من سيرريمي دوکتورا دئمه‌يه‌يديم. بلکه من اؤلرديم؟ نه جور دوکتورلار اوشاق‌لا آنانين ديري قالماق ريسکيني ياري-ياري دئيه-دئيه سن قبول ائله‌دين؟ اولسون عيبي يوخدور دئدين. اينشاللاه هئچ نه اولماز بويوردون!جانيم بو فيکيرله ائله آجيييردي، هردن اونودوردوم بوگون بالامين دوغوم گونودور.ائو-ائشييي سيل-سوپور ائدرکن، زهرا دا يوخودان اويانيب بير آز سود ايچيب حه‌يط‌ده اويناماغا گئتدي. او بيري کند اوشاقلاري کيمي، تويوق-جوجه‌لردن او قدر خوشو گليردي، گونون، اونلارلا اويناماق‌لا آخشام ائديردي.او حه‌يط ده اوينارکن، اؤز خياليمدا فيکيرلشديم ناهارا بير يونگول‌وار يئمک حاضيرلاييم و دويو-تويوغو دا شاما بيشيريم. قوي دوغوم گونوموز اعلا اولسون.حه‌يط‌دن بير آز تره-توره دريب ناهاري بيشيرمک‌له ائله باشيم قاريشدي، هئچ بيلمه‌ديم نه زامان گون‌اورتا اولوب.
ناهاري بيشيررکن ايچيمده‌کي نيگرانچيليغي نه اودا بيلديم نه سوسدورا بيلديم. من‌له قالدي کي من‌له قالدي. نه قدر اؤز خياليمدا آخشام سئوينجيني توخوسام دا، بير آن‌دا نم هارادان بير عجاييب غم-غصه اوره‌ييمه دولوب ايچيمي پارتلاديردي.
بير دفعه ده چؤلمه‌يين قاپاغيني گؤتوروب آشين دادينا باخديم گؤروم بيشيب يا يوخ. سونرا دئديم، گئديم زهراني دا گتيريم بير آز آش‌دان ايچسين بير آز دا ياتسين، اوياديم يويوندوروم آخشاما گول کيمي اولسون. من ايندي ده بيلميرم نه اولدو! اوجاق باشينا کيمي ياديمدا. اوندان اويانا سئيرک باش کيمي، سئيرک خيال‌لاردي. نه اوجو بللي‌دي نه ديبي. بيلميرم دونيا نه جور باشيما گلدي. بومبا پارتلادي؟ زلزله گلدي؟ قاز پارتلادي؟ نه اولدو؟ کيم دئيه‌جک کي؟ سحرچاغي‌لارين يوخوسو کيمي، ياري اوياق-ياري يوخولو کيمي بير شئيدي. من يئره ييخيلميشديم و ديوراداکي ساعاتين عقرب‌لري باشيما فيرلانيردي. زهرانين گولومسه‌ين شکيلي، آغلاييردي و بيردن بيره يئره دوشدو. رؤيامدا بئله بير شئي‌لر وار. بعضاً ده زهرانين شکيلين آغلايان کيمي دوشونورم و بئيناوا اوشاق او قدر آغلايير قاب دولور گؤز ياشي ايله و قرق اولور… توبه-توبه! لاپ سفئهله‌ميشم من. هامي سفئهله‌ييب بلکه ده!علي کي نه دانيشير نه دينير! گاهدان زهرام-زهرام دئييب باشينا چالير.منه بيري تاپيلمير دئيه نه اولوب! خانيم دوکتور سيز بيليرسينيز نه اولوب؟ من نييه گلميشم سيزين يانينزا؟ بو سؤزلري سيزه تعريف‌له‌ديم نه جور تعريف‌له‌ديم؟دئييرم زهراني حه‌يط‌دن گتيرين ايچري دوغوم گونودور هئچ کيم سايمير! خانيم دوکتور پنجره قاباغيندان گلين بورا! خانيم دوکتور سيز نييه دانيشميرسينيز؟

منبع :