بولگه لر سرويسي: قبير کيمي سويوق، بوز کاناپه‌نين اوستونده اوزانميش، پنجره‌دن قارا بولودلو گؤيه باخيردي.

 قار ها ياغدي ها ياغاجاق؛ سويوق، پنجره‌نين چاتيندان سيزيب قيچلاريني بوز پارچاسينا دؤندرميش. ائوين کونجونده يانان سوبا بئله ايچينده‌کي قيشي ايسيده بيلميردي. اصلينه باخسان او يايين اورتاسيندا دا بو سس‌سيز ائوده اوشويوردو. گؤزلريني زيلله‌دييي ديوارداکي ساعات نظرينده ديبي دئشيک، ساييلي دنه‌لري آزالديقجا آزالان بير قوم ساعاتي کيمي جانلاندي. ساعات اون‌بيري ايگيرمي بئش دقيقه کئچيردي. دوز ساعت دوققوزو اون دقيقه کئچن يوخودان دوروب، گوجله ايستي يورغان-دؤشکدن آيريليب، ال-اوزونو يومادان، نازيک گئجه پالتاريني ده‌ييشمه‌دن، ايکي ساعات اون بئش دقيقه ايدي بو کاناپه‌نين اوزه‌رينده گاهدان اوتوروب، گاهدان اوزانيب فيکره دالميشدي. هئچ اؤزو ده ياتاغيندان چيخيب بورا گلمه‌يي‌نين نده‌نيني بيلميردي، آخي اونون گؤرمه‌يه هئچ ايشي يوخويدو. اونسوزدا توم گئجه‌ني آلاتورانا دک گؤز يوما بيلمه‌ميشدي.

گؤزويله آکواريومداکي ساکين-ساکين اوزن رنگلي باليقلاري تعقيب ائدير. ايل‌لر بويو، هر زمان، هر نه‌دن‌ اوزگون اولورسا اولسون بو آکواريومون قاباغيندا اوتوروب باليقلاري سئير ائدرکن دينجلميشدي؛ اما ايندي اونلارا باخماق‌لا داها دا کدرلنير، سيخيلير. ائوين هر کؤشه‌سينده‌کي اشيالارا باخيب، اونلاري نئجه خصوصي ذوق‌لا سئچيب آلديغي گونلري خاطيرلايير: کاناپه‌نين يانيندا دوران چوخ سئوديگي سانسئوئرييا ديبچگي، ديوارداکي گوموشي آنقا قوشو تابلوسو، آغاجدان يونتالميش ظريف جئيران هئيکلي، ننه‌سين‌دن قالان عنتيقه کاسا. هاميسيني بيربه‌بير گؤزدن کئچيرير. دونيانين آلچاقليقلاريندان، آجيماسيز حادثه‌لريندن جاني ياناندا، يورولاندا بورايا سيغيشميشدي، اما هر حالدا، ياشاييشيندا بير اکسيک‌ليک دويموشويدو، تزه دمنلميش چاي قوخوسونو پايلاشماق اوچون ايستي بير نفس. چوخدانيدي بو ائوين مبل‌لاري‌نين اوستونه هئچ بير کؤينک آتيلماميش، مبل‌لارين آلتيندان هئچ بير جوراب تايي تاپيلماميش. قاپي داليسيندا بئله بير جوت باشماقدان سئواي آيري باشماق جوتلنمه‌ميش.تئلفونو گؤتوروب کانتئکت‌ ليستينه باشدان-آشاغي‌يا باخير. آدلاري بير-بير اوخويوب کئچير. سحر، سيما، علي؛ يئتيشير باجيسي‌نين آدينا دويمه‌يه باسير؛ ايلک زنگ چالمادان تئلفون آچيلير.– باشيوا دولانيم باجي، مگر دئمه‌ميشم منه زنگ وورما؛ بو قودوز ايندي ائوده، بيلسه سنله دانيشيرام، والله گونومو قارا قويار. قادان گلسين منه اؤزون بيليرسن دا سن بوشانيب تک ياشاياندان سونرا سنله ترس دوشوب. بالام جاني اوره‌ييم سندن اؤترو چوخ داريخير، اما علاجيم يوخدو؛ من ده بونون اسيري‌‌يم دا، قادان آليم مندن اينجيمه، ايندي قطع ائله، اؤزوم ائلييه بيلسم سنه زنگ آچارام.– اما من فقط … .تئلفون قطع اولور. او دؤزولمز باش آغريسي يئنه باشلايير.گؤزلريني تاوانا تيکيب، قيچلاريني تئز-تئز ترپه‌دير؛ موبايل اليندن زويوب اوزونه دوشور؛ بورنونو اووخالايا-اووخالايا گوشيني گؤتوروب يئنه کانتئکت‌لريني تپ-چئوير ائله‌يير. بير آدين اوستونده دونوب قالير. بارماغيني کال دويمه‌سي‌نين اوستونده گزديرير. او دويمه‌يه باسماغا حقي اولماديغيني بيلير. »اؤزگه‌سينه قيسمت اولان جاهي جلاليم نئجه‌سن؟«* ديل آلتي ميزيلداييب، »نئچه‌ ايلدير او سسه حسرت قالميشام، بو ايکي آي دا اونون اوستونده« دئييب موبايلي يئره قويور، اما عاغلي هله او آدين يانيندا، «گؤره‌سن ايندي هاردا؟ يقين ايندي قاديني‌نين يانيندا اوتوروب، بلکه ده ماشيندا آناسي‌گيله ساري گئديرلر؛ جمعه ناهاري اورادا قوناقديلار. آخي، او زامان‌لار دئيردي جمعه ناهاري منيم آنام‌گيله گئتمه‌لي‌ييک. قاشقاباغيمي تؤکوب دئيَرديم »بس منيم آنام؟ منيم آنا-آتام يوخدو؟« گولومسه‌ييب، ياناغميدان چيمديکله‌يه-چيمديکله‌يه، »سنه ده قوربان، آنانا دا. قاش-قاباغين تؤکمه منه، ياخشي شاما دا گئده‌ريک سنين آنان‌گيله« دئيردي. بير آنليق اولسا دا بو قيسمت اولمايان سئودانين خاطيره‌لري دوداغينا گولوش قوندورور. باش آغريسي داها دا شيدتله‌نير؛ دوروب حب‌لريني آختارير؛ بير ليوان سو دولدوروب حب‌لريني آتير. ايشيق دامارلاري، اللرينده تيتره‌ين سو بارداغيندا چيرپينير. کيتريني سو ايله دولدوروب اوجاق اوسته قويور. اوجاق باشيندا دوروب سويون قايناماغيني گؤزله‌يير؛ سويون داشماق سسي‌ ايله اؤزونه گلير؛ بيرآز قورو چاي آتير چايدانا؛ قاينار سويو تؤکور اوستونه؛ سويون بوغو بورولا-بورولا اوزونه ساري قالخير. چايداني کيتري‌نين اوستونه قويوب، گئيينمه‌يه گئدير. قارا پالتو و باش اؤرتوسونو گئيينيب آشپازخانايا قئييدير. دملنميش چايي ايستکانا سوزور. اللري‌نين تيتره‌مه‌سي اونو عصبلشديرير. الينده‌کي تيتره‌ک ايستکاندا ايشيق دامارلاري چيرپينير. آجي چاييني ياريمچيليق ايچيب، ائشييه چيخير.اللريني پالتوسونون جئبينه سوخوب ياواش-ياواش آدديملايير. بو‌ْز کؤينکلي گؤي، جمعه گونونون سيخيجيليغيني داها دا آرتديرميشدي. گون اورتا اولماغينا رغماً تکم سئيرک آچيق اولان دوکانلارين ايشيقلاري يانيردي. هردن دوروب بير ماغازانين ويترينينه باخير، بير شئي آلماق ايسته‌مه‌دييي حالدا بير پالتار مغازاسينا گيريب بير-ايکي پالتار تؤکوشدوروب، قيمت سوروشور، اما ساتيجي‌ قيز ايل‌لرين تجريه‌سي ايله اونون آليجي اولماديغيني بيليب، اونا ايري-ايري باخاندا، ائشييه چيخماق مجبوريتينده قالير.باشيني قالديرير. سانجيلي بولو‌لاردان دوغولان قار دنه‌لري يئره اوتوران همي اريييب، قيسا عؤمورلري باشا چاتير. آستا-آستا آغاران يان گزينتي‌دن اتوبوس دوراغينا ساري آدديملايير.ياريم ساعاتدير بوم-بوش دوراغين بير کونجونده بوزوشوب اوتوروب. بير کؤک آلچاق‌ بوي قادين تؤوشييه-تؤوشييه گليب بيرآز اوتايليق اوتوروب، بير نئچه دقيقه‌دن سونرا گؤزلويونون اوستوندن گؤزلريني قول ساعاتينا زيلله‌‌ييب، »دئيه‌سن بوگون اوتوبوس گئجيکيب« دئيير.