بولگه لر سرويسي:آي قاراش بورا هانسي جهنم‌دي؟ بونلار دوز آداما اوخشاماييرلار ها من‌نن دئمک. اوندان قورخماليسي سنين ايشلريندي، ايبو من سن‌نن ده قورخورام…– اين حرفا کيلويي چنده! – عيبي يوخ، سن دئين اولسون، ايندي ايشيميزين آدي نه‌دي؟!– برادر من، محمد صبرين اولسون. گؤره‌جکسن. آره اصلاً سن دئيندي. ايشيميزين آدي يوخدي. بيز بورادا نئچه گروه‌دان تشکيل تاپميشيق تا کي نفر تاپاق اعضاميزي بيشتر و بيشتر اولا پولوموزا سود گله!– اوغلان هانسي پولا؟ اولمايا آتام گؤتورن ? ميليون وامي سنه گؤندردييينده بو آج قوردلارا وئريبسن؟!– محمد نه قوردو؟! هئچ بيليرسن بو ايشده نه سود وار. گؤره‌جکسن؟– ايبو سن ده بيليرسن بولار کيمديلر، من ده!– محمد هر کيم اولسالار دا من اعضامي ?? نفره افزايش وئرمه‌سم سودومو وئرمزلر. ايندي هله ? نفر تاپميشام. سن ده کمک ائله‌سن درست اولار…آي عزيز قارداشيم سن عاغليني الدن وئريبسن هئچ دانيشيغين، پاتلئتين و… الدن گئديب واللاه…قاپي‌نين دؤيولمه‌سي ايله، ايبو: «بسدي، سس سالما گؤرک کيمدي» – دئييب قاپي‌ني آچدي. ايکي نفر گنج اوغلان 20-19 ياشيندا ايچه‌ري گيرديلر. شهروز آدلي بيري اونلاري تورا سالميشدي. گتيرديلر من اونلارين آفيس ايشلرين باشلايام. من يولا دوشوم دئيه ايبو ميز دالينا گئديب، کاغاذ- قلم چيخارديب يازي پوزويا باشلادي.اونلارين ايشي قورتولاندان سونرا، ايبو حيرصله منه باخيب دئدي:– باخ باشي داشلي بورادا سن دئين سؤزلري آلان يوخدي! فقط پول و پول!! احمق اولسان اؤلرسن.داها حيرص باشيما وورموشدو. هم جهنمه دوشوب هم ده عاغيللي‌لارين اداسين چيخاردير، اوره‌ييمده آللاها يالواريرديم مني تئز بو جهنم‌دن قورتارا.– بئش ايل ايدي اؤزومله دئييرديم ايندي ايبو تهران دا اوجا يئرلره چاتيب، آدلي-سانلي آدام اولوب، بئش ايل ايدي سني گؤرمک حسرتينده ايديم. نه اولوب سنه ايبراهيم! قارانليقلار شهري سنين باشينا نه توي توتوب! سن کيم‌سن ايبراهيم؟ کيم اولوبسان؟ هارا گئديرسن؟ بئش ايل ايدي سنين خاطيره‌لرين‌له ياشاميشام. سن نه اولوبسان، من نه دوشونوردوم؟!– بابا برو ببينم!– نه تئز آنا ديلين ده‌ييشدي. نه تئز اورميه‌لي اولدوغونو اونوتدون. نه تئز تورک اولدوغونا ياد اولدون؟ نه تئز……؟!هويت کيلويي چنده؟سنين بئينيني هم يويوبلار هم ده بو اؤچ- دؤرد سؤز ايله دولدوروبلار. سن بير گون بارماقلاريني ايکي گؤزونه سوخاجاقسان. اوندا گئج اولاجاق. بوسؤزلري دئييب چانتامي گؤتوروب اونلار دئين آفيسين قاپيسيني چيرپيب، تيکينتي‌دن چيخديم.ائشيکده، ايبونون سسيني پنجره‌دن داليمجا آخا-آخا گليردي. آنجاق من ده اثرلري يوخ ايدي. هئچ اؤزوم ده بيلمه‌ديم نه جور اولدو، آللاه طرفي اورادان قاچماق فيکري بئينيمه گلدي.– محمد جان برگرد، همه چيز درست ميشه … دئيه- او هله ده باغيريردي! بير باشا تئرمينالا گئتديم. ساعاتلارجا اوردا معطل اولاندان سونرا ايلک اوتوبوس ايله اورمويا دؤندوم.يولدا مين بير خيالا دالديم. نه‌لر اولاجاق، نه‌لر اولماياجاق، آتا- آناما نه دئيه‌جه‌يم، نه‌لري دئمه‌يه‌جه‌يم. بو نه ايش ايدي مني تاپدي آي آللاه. آما بو عذاب وئريجي خيال‌لارلا ياناشي زامانين زيندانيندان آزاد اولموشدوم سانکي، آزاد هاوادا نفس چکيرديم. حتي اوتوبوس يوللاناندا، آزادليق مئيداني دوم-دوز يئرينده اوتورموشدو. قوشلار دا قاناد چاليب اوچوردولار. ياشاييش نه‌دير تازا بيلميشديم. من يئني‌دن اوتوبوس‌دا دوغولدوم.هئچ اؤزوم ده بيلمه‌ديم نئجه ايکي ايل منيم تهرانا گئديب گئري قاييتماغيمدان سوووشدو. ايبودان بو ايکي ايلده هئچ خبريم اولمادي. آما قزئته‌لرين بيرينده کئچن گونلر اوخوموشدوم کي، تهراندا نئچه بؤيوک خالقي چاپان باندي ياخالاييبلار. آللاه – آللاه ائليرديم، ايبراهيما بير شئي اولماسين. آما باشي داشا ده‌ييب گئري قاييتسين. بو فيکيرلرده اولارکن امکداشيم دفتريمه گليب دئدي: – ممد قارداش بير نفر سيزي گؤرمه‌يه گليب!اوره‌ييم يئريندن چيخدي. آللاه ايبودو؟ گؤره‌سن کيمدي؟قورخولو سس‌له دئديم:– کيمدي؟– دئيير تانيشلاريندانام..– دئ گلسين…آنجاق ايچه‌ري گيرن آدامي گؤردوکده، اوره‌ييم بيردن- بيره اوزولدو و يئنه اؤزونه قاييتدي.– بويورون اه‌يله‌شين آغا… خوش گلميسيز…سالام عليک ائدن‌دن سونرا بيلديم کنديميزده‌کي قونشوموزون اوغلو رسولون يولداشيدي. رسول دا کئچن ايل يايدا بيردن- بيره کنددن يوخ اولدو. آتا – آناسي دا بيلميردي نه ائدير و کيملرنن اوتوررو دورور. فقط بير نئچه سئري تهراندان غريبه نؤمره ايله زنگ آچميشدي.– آقاي محمدي بلي من رسولون يولداشييام. من ده تازا رسول‌گيله قوشولموشدوم. سيزين آغا ايبراهيم‌ده اورادايدي. فقط، من طاقت گتيره بيلمه‌ديييم اوچون ايکي آيدان سونرا اورادان قاچديم…من دؤره بيلمه‌ييب، سؤزونو کسه‌رک سوروشدوم:– ايبراهيمدان نه خبر؟ سيز اون‌نان دا گؤروشوردوز؟ سن آللاه بير سؤزلر دئيين، اوره‌ييم يئريندن چيخير آخي!رسولون يولداشي، قيريق- قيريق جاواب وئريردي. گاه دانيشيردي گاه دا، دام ديوارا زيلله‌نيردي. ائله بيل رهدن بو دونيادان قوپوب يئني‌دن قاييديردي.– جناب سيزدن سوروشدوم ها؟ ايبراهيمدان نه خبر؟ تئز دئيين سن آللاه…– واللاه … کئچن گونلر، رسول تهراندان منه زنگ آچدي دئدي پوليس دفتره تؤکولوب هاميني توتوب، شانسدان بو دا ائشيکدن دفتره قاييدان دا گؤروب ماجراني، بئيناوا ايندي فراري دوشوب…من پوليس کلمه‌سيني بيلديم فقط. قالانين ائشيتميرديم. ايبو… پوليس… زيندان … يازيق آنام، يازيق آتام…!کيتابلاريمين هاميسي قفسه‌دن چيخيب پنجره‌دن قاچديلار. قلم قابي‌داکي قلملريمين جؤوهرلري بير آنين ايچينده يئره سوزدو… هر نه گؤزلريمده يوخ اولدو. من نازلي چايي‌نين قيراغيندا يئره سره‌لنميشديم، اوستومو قوملاميشديم و فقط باشيم ائشيکده قالميشدي. ايبو باشيم اوستده داياندي و بير دولو سطيلين سويونو باشيما بوشالتدي. من آياغا قالخيب ايبونو قووالاديم. کؤرپو باشيندا اونو توتدوم، يعني توتا بيلمز ايديم، اؤزو داياندي من اونو توتام. آخي من اوندان خيردا ايديم و گوجوم چاتميردي اونا چاتام. يئره ييخيلدي، سينه‌سينده اوتوردوم، ايبو گولمه‌يه باشلادي، اورکدن گولوردو. سونرا گولمه‌ييني کسيب دئدي: – ممد بيليسن نه وار، من ائله اوجا يئرلره چاتاجاغام، يعني آرزومدو چاتام، رئيس اولاجاغام، سني ده اؤزومه چايچي سئچه‌جه‌يم، دستور وئره‌جه‌يم تئز- تئز منه ککليک اوتو چايي دمله‌يه‌سن، من شيرکته گلمه‌ميش سن چايي حاضيرلاياسان…سونرا قاهقاها ايله گولمه‌يه باشلادي و مني اوستوندن يئره ايته‌له‌ييب، چايا آتيلدي، اوزه – اوزه يئنه باغيريردي: منه ککليک اوتو چايي دمله، ککليک اوتو چايي…! و ککليک اوتو چايي دئيه- دئيه اوزه-اوزه چايي باش يوخاري گئتدي و زامان يئنه مني چارميخا چکدي…
آي قاراش بورا هانسي جهنم‌دي؟ بونلار دوز آداما اوخشاماييرلار ها من‌نن دئمک. اوندان قورخماليسي سنين ايشلريندي، ايبو من سن‌نن ده قورخورام…– اين حرفا کيلويي چنده!