بيزدن قاباق گليب قفسه يه دوزولن لري  توز – تورپاق  باساراق، آنبارين رئيسي ساري نايلونلا موشامبالاييب دير.  سانکي هاميسي بير چيلتيکين بندي ديلر کي توز کيمي يئره تؤکوله لر. مودير هر گون قدم وورا  – وورا بيزلره باش چکه رک  گاهدان دا ايراد توتوري:

  – »نييه به او خانيم اَييليب دير؟«

يادا کي: » نييه او خانيمين ساچلاري؟«

گاهدان دا ترپه نيش لريميزه ايراد توتورلار . مَثَلَن بير يول منه ايشقال توتدولار کي: » نييه موديرلر گليب کئچه رک، آياغينداکي باش بارماق  او قَدَر گؤزه  ووروري؟«

دئديم : »ندنسه ائله بارماغيم اؤزو اوزوندور و بوندان آرتيق ييغيلمايير .«

بير نئچه نفر ييغيشيب بارماغيما باخاراق  شوکر آللاها حاققي منه وئريب بيلديلر کي هئچ بير  قصديم و مرضيم  يوخ ايدي.  هردن ده يان يؤوره ده کي قفسه لردن قولاغيما بير پارا خبرلر يئتيرير کي مَثَلن ييرمي ايل بير قفسه ده اوتورماقلا، تقاعد ياشينا چاتماق اولار، البته اودا ييرمي گونون معاشيني آيليق   آلماقلا کي او خبر ده هئچ بير ماراقلي خبر دئييل. هامي نين آغزيندان يالنيزجا و دفعه لرله تکجه بو سؤز چيخير:- »او قَدَر بوردا اوتوراجاييق کي آخيردا اوتوز گون معاشلا  امکلي اولاق.«

موهوم خبرلر معمولن بيزي هيجانا ساليري، ترپه شه رک چاليشيريق کي قيفيل لانميش أللريميزي نئچه لحظه آچاراق دريندن  نفس آلاق. يئني ليک ده ائشيت ميشيک قفسه ده اولانلار حاققيندا ” آغير ايشلر ” چرچيوه سينده بير قانون چيخيب دير. اگر بو قانونا عمل اولو نورسا ،شايد بيزلر قفسه لردن چيخاجاييق و شايد ده ائده بيله جه ييک کي اؤزوموزو ديشاري چکه ک. قفسه لرده اوتورماق بيزي آياقدان سالارکن  کيريميش بير دوروم داييق. نئجه کي ده، ايسراغاگون  بير خانيم کي ايستيردي قفسه دن آشاغي يئنه  دوروب يولا دوشه رک  قيچي سيندي. هر آدديم  آتديقدا سوموگونون سسي داها آرتيق ائشيديليردي.  گيريش قاپي يا چاتماميشدي  کي آمبولانسين سسي اوجالدي.

بيز بوردا دئمک اولار عشقي ده اونوتموشوق، تکجه هردن بير ياديميزا دوشور کي يوخاري و يا کنارداکي قفسه ده  عزيزي آغا دا اوتوروبدي. بونو دا چوخ بدن لريميزين تريندن آنلاييريق. او قَدَر بير يئرده قالميشيق کي بورنوموز قوخولارا حساس اولوبدور و تئزليک له  هر اييي و قوخونو گؤيده ووروروق. اگر ائله يه بيله ک قفسه لر آراسيندان بارماقيميزي ترپه دک، مومکوندور کي يان يؤوره ده کي قفسه لره ده  بير ايشاره ائده ک کي مثَلَن عزيزي جنابلاري بيله لر من ايندي بوردا اوتورارکن اونو دوشونورم. بو تکجه ديلخوشلوغوموزدور کي ائله مک اولور بير تهر، بورانين آلچاق سقفينه دؤزه بيله ک. بوگون آمما باشقا گونلري نن فرق ائدير. ا ؤزومو بو دورومدان قورتارماق ايستيرم. يعني ايستيرم قيچلاريمي قفسه دن ائشيگه قويام. اگر بئليمي دوز ساخلاييب و ائده بيلم کي سونرا… البته عيلتي ده بودور کي يوخودا گؤرموشم کي ايکي دانا بالاجا قاناد چيخارتميشام و قفسه دن اوچا – اوچا ديشاري چيخيب، گئتميشم زئش دامين لاپ باشينا و آنبارين ايکي قات قفسه سينده يومورتداميشام.

او يوخاري دا کيمسه نين ألي آداما چاتمير و بودا منيم هميشه کي آرزولاريم دان ايدي… گؤردوگوم باشقا يوخولار دا  وار ايدي کي مني اذيت ائديرديلر، دؤش لري مين  أري ييب سويا گئتمه سي و هابئله  هر سازينان نه جور اويناماقي اؤيره نمک کيمي بير زادلار!

دئييرديم : » آغاجان! بيز اويناماق کي باشارمازديق آمما  او قدر بيزه قات قاريشيق هاوالار چالديلار کي ايندي هر سازينان اويناماغي اؤيره نميشيک . . .

ايندي ساعات اون ايکي دير، نا هاريمي يئميشم و نظريمه ايندي واختي دير، امما بيرجه چتينليک وار، او دا بو کي  ناهاري يئيه ندن سونرا آزجا اولورسا دا مورگو وورمالييام.  ناهاردان سونرا مورگوله مک  منيم حياتيمين  أن دادلي  آنلاريندان دير. روحومو دينجه لدن حبلري آتميشام و بو باعيث اولاجا ق  آزراق کابوس گؤرَم…  نشئه دولو يوموشاق وکئف وئريجي  بير يوخو  گؤزلريمي قيزديرسا دا هله ده فيکريم اوچماقدادير. ايستيرم ايستيخاره  ائده م کي گؤروره م ياتميشام و يوخودا حافيظ فالي توتورام کي گؤره م اوچماق… کيتابي ترسه توتموشدوم. دئمه آين ادا اؤزومه باخيرديم. گؤزلريمين ببه گي کي  بير زامانلار دونيانين أ ن قارا  ببک لريندن ايدي، آغ آبباغي اولموشدور. داها بيرزاد ياديما گلمير. سانکي بيري بيله مي يوخودان آييدير. آنباريميزين رئيسي ايدي کي اوجا سسله دئدي:

-» خانيم گرک شيرني وئره سن، آغير ايشلر حاققيندا کئچيريله ن قا نون سيزه ده شاميل اولوبدور. ايندي ائله يه بيلرسيز ييرمي ايل سابيقه نن، اوتوز گونون معاشيني  آلاسيز.«

  عزيزي آغاني آختاريرديم. سونونکو گونلر ايدي کي ائده بيلرديم اونو  بير داهاگؤره بيلم.. باشيمي قاباغا أيه رک آياقيمين باش بارماقين  ترپتديم. هئچ بير جاواب آلانماديم.

آنبار رئيسينين سسين ائشيتديم کي دئدي :» داليجا گزمه خانيم! دونن اوستونه نايلون چکميشيک.«