اوزاقلاشيردي

اوشاق اولوب آغليييردي؛ بؤيويوب مکتبه گئديردي؛ بيردن الينه چليک آليب، آستادان يئريييردي؛ چوخ کئچمه‌‌دن گلين دوروردو

بولگه لر سرويسي:اوشاق اولوب آغليييردي؛ بؤيويوب مکتبه گئديردي؛ بيردن الينه چليک آليب، آستادان يئريييردي؛ چوخ کئچمه‌‌دن گلين دوروردو.‌‌
زامانين يؤنونو ايتيررک، فصيل‌‌لر کيمي اولدوغونو دوشونوردو.
ياي‌‌دا قاپي پنجره‌‌ني باغلاييب، پئنجک گيييردي؛ قيش‌‌دا قاپي پنجره‌‌ني تاواز قويوب، بير تي‌‌شرت‌‌ايله دولانيردي.‌‌ بو دورومو قوراقليغين باشلاما‌‌سيندان بير نيشانه سانيردي.‌‌
اؤيون بير کتاب‌‌دا اوخوموشدو، سحرلر ياي اولاجاق، ناهاردان سونرالار قيش، نه گؤي گؤيرنتي بيته‌‌جک نه ده مئيوه.‌‌ يييه‌‌جک‌‌لريميزين يئرينه کاپسول آتاجاييق.
گاهدان هئچ قورخموردو، سؤزلريني ديييب‌‌ـ ديييب بوشاليردي؛ گاهدان دا سؤز ائشيديب‌‌ـ ائشيديب سوسوردو.‌‌ آج اولوردو بير نه ييييب‌‌ـ يئمه‌‌دن دويوردو.‌‌ داريخيب، ائشييه چيخيب‌‌ـ چيخمادان اوره‌‌يي آچيليردي.
 ديشلريني بيرـ بيرينه سيخيب، نفس چکمه‌‌يي ياديندان چيخارديردي. اوره‌‌ييندن آغري قالخماقدا، کؤکس دولوسو نفس آليردي.‌‌ اوره‌‌يي دوزليب‌‌ـ دوزلمه‌‌دن بير دؤشک اينه‌‌سي باشينين بير يانيندان گيريب او بيري يانيندان چيخيردي.آياق‌‌لارينين آلتي سيزيلداييردي، بارماق‌‌لاري کئيييردي.‌‌ بير يئرده اوتوروب، هئچ نه دئمه‌‌سين‌‌لر منه، دئيه قاش‌‌ـ قاباغيني تؤکوردي. کيمسه‌‌نين جينقيري چيخميردي.‌‌ گئت‌‌ـ گئده يئريني آييردي.‌‌ بالاـ بالا بير مئتر، ايکي مئتر، اوچ مئتر، چوخ آغاج‌‌لار اوزاقلاشدي.‌‌
 داها قايئتماييم دئيه، کؤرپولرين هاميسيني بيربه‌‌بير داليسيجا داغيديب گئديردي.دوداقلاريني چئينييردي، يارا اولموشدو.‌‌ يارالارين اوستو کؤزمه باغلاميشدي.‌‌ يئنه دوداقلاريني چئنيير، کؤزمه‌‌يي قوپور، قان آخير، نئچه آي‌‌دي.‌‌ دلي شئيطان دييير آناسي، کورسومون آغزيندان چالان ترسه سيلله‌‌نين تايين، بونون دا آغزينين ايچينده‌‌ن چالسين، بلکه بونون دا قادابالاسي جانيندان چيخسين.
کورسوم اوتوروب‌‌ـ اوتوروب بيردن آغزين آدامين اوستونه ائله آچاردي، آدام دييردي اينديجه بوتونلوک‌‌له اوتولاجاق.‌‌
کورسومون قادا بالاسي گئدندن سونرا بيلميشدي يازيق قيزين گؤجه‌‌لري يارا اولموشوموش، ياپيشيرميش بيرـ بيرينه.‌‌ آغزيني اوجور آچماغينين دا ندني اوايميش.تلويزيون کاناللاريني تاققاتاق دييشير.‌‌
نه تورکجه‌‌يه، نه فارسجايا، نه انگليزجه‌‌يه باخماقي گلمير.‌‌
بير ديقه ده بيرينده قالاندا، کؤکلوقدان اوتانيرسيز، ورزش نه‌‌دي، داوا يييين، داوا نه‌‌دي، هاراني آريقلاتماق ايسته-ييرسيز اورايا کرم ياخين، سونرا دا هلبت کرم ياخماقدان يورولموسوز بير دويمه‌‌ني باسين بؤتوو ايشلري گؤرسون سيزه.‌‌
کانالي تاق دييشدي، آريخليق‌‌دان بئزيشميسيز.‌‌.‌‌.‌‌ تلويزيونو باغلادي.
بير بادام گؤتوروب ديشلدي، ياريمچيق باداما باخدي.‌‌ دولوايدي بالاجا باجالارلا؛ هر باجا دا دولوايدي نارين بؤجک‌‌لرله.‌‌
 تولازلادي؛ بادام فيرلاناـ فيرلانا بير قويويا دوشدو.‌‌ ايسته‌‌ييردي قويويا باخسين، بو قويو هر نه‌يي اؤزونه چکر دئيه، بيريسي اليندن ياپيشيب، گئري چکدي.
تريبون آرخاسيندا دايانيب؛ هئچ نه يادينا دوشمور.‌‌ هامي باخير بونا. بالاـ بالا هر بوجاقدان سس اوجالير.‌‌ سس‌‌لري بيرـ بيريندن آييرد ائده بيلمير.‌‌ قارالار گئت‌‌ـ گئده چوخالير.‌‌ سرعت‌‌له قويونون ديبينه ياخينلاشير.

منبع :