ايسلاق يارپاق¬لارين آلتيندا
ايسلاق يارپاق¬لارين آلتيندا
1397/08/20
بولگه لرسرويسي: شاعر يولداشي‌نين اؤلوم خبريني بير ده اوخودو. اووجو ترله‌ميش، سيقاري دا قورتارميشدي داها موبايليني يئره قويوب پئنجه‌ييني گئيدي.
آيري بير اس. ام. اس گلديکده، ائودن ائشييه چيخدي. خياباندا ياغيش چيله‌ييردي. کوچه آغزينداکي دوکاندان بير پاکات سيقار آليب بيريني آليشديردي. پولونون قالانيني آلمادي. يولداشي ايندي خيابان اورتاسيندا اوزانميش، قان آخيردي اوندان.
اونون آچيق گؤزلرينه دوشوندو. او اؤلدويو شهرده ياغينتي‌لارين چوخ اولدوغونو سؤيله¬ميشديلر ساعات اون¬دؤرد خبرلرينده.
بلکه ده، ايندي قار ياغير اوردا. شاعرين جنازه‌سي قار آلتيندا قالير ياواش ياواش. قاپي¬لاري آغزينداکي پيشيک مييولدايير. قاپيني آچيب اوشويه اوشويه ايچري کئچير.
موبايلي هله ده يئرده، آچيق کيتابي¬نين اورتاسيندا. کاناپه¬ده اوزانيب‌هاوا قارانليقلايانا کيمي‌سيقار چکير دالبادال.
موبايلي‌نين زنگييله يوخودان آييلدي. پئنجه‌ييني اينيندن چيخاريب سيقار کؤتويويله دولو کول¬قابينا باخدي. آغزي آجيميش، بوينو ايسه آزآججا آغريييردي. بيردن يولداشي‌نين اؤلومو يادينا دوشدو.
موبايلي الينه گؤتوروب سؤندور دويمه¬سيني باسدي. بلکه ده باشقا بير يولداشين اؤلوم خبريني اونا دئمک ايسته¬ييرديلر. موبايلي خالچانين اورتاسينا آتيب بوينونون داليني اووکه‌لدي. بير گون ده، اونون اؤلوم خبري ياييلاجاق بو شهردن او شهره.
بير حئکايه چويله شاعرين اؤلومو نه قده‌ر فرقلي اولمالي‌دير دئيه دوشوندو. ائوين سيقار توستوسويله دولدوغونا گؤره، آياقا قالخيب پنجره¬ني آچدي. ياغيش يئنه چيله¬ييردي. ياش خيابان‌لاردا احتياطلا گليب گئدن ماشين¬لارا باخدي.
يازيچي¬يا خيابان اورتاسيندا اؤلمکدن چوخ، بئشينجي قاتدان کلله¬سي اوسته دوشمک ياراشير. يوخ، هئچ کس اونون انتيحارينا اينانماز. نئچه دقيقه، ائله پنجره قاباغيندا ايکن يولداشي¬نين شعرلريني خاطيرلادي.
تاکسيچي‌يا‌هارا گئتديييني دئمه¬دي. دال صندلده، قوجا بير کيشي‌نين بؤيرونده ايله‌شيب الينده‌کي کامئراني قوردالادي. راديوداکي قادين، باشقا بير ديلده اؤلکه‌نين‌هاوا دورومونو آچيقلاييردي. قولاغيني شکله‌دي.
يولداشي اؤلدويو شهرده، سئل گلمک احتمالي وار ايدي لاپ. اوندا، شاعرين جنازه¬سيني سئل آپاراجاق ايميش. ترلميش شيشه¬دن ائشييه باخدي.
تر آرخاسيندان هئچ زاد بللي دئييلدي. پئنجه‌يي قولويلا تري سيلمک ايسته¬دييينده، کامئرا الينده آغيرليق ائله‌دي. يانينداکي قوجا کيشي اؤسکوردو. باياقدان بري قوجانين الينده‌کيني چليک کيمي‌دوشونن يازيچي، اونون دسته‌لي بير چتير اولدوغونو آنلادي.
يولداشي شعرلرينده‌کي آدام‌لارين‌هاميسي چتيرسيز،هاميسي ايسه ايسلانيردي ياغيش آلتيندا. سوروجويه ساخلا دئييب بوکده‌لنميش بير کاغيذ پول اوزاتدي اونا ساري. يئددي گؤز کؤرپونون قاباغيندا آياق ساخلادي. داش دؤشه‌مه‌لرين اوستو آغاج يارپاغيندان دولموش، پارکدا‌هاي¬کوي سالان هميشه کي اوشاقلاردان ايسه هئچ خبر يوخ ايدي. پئنجه‌يي‌نين دويمه‌لريني آچيب کامئراني قولتوغونون آلتينا آلدي.
اوزاقدان بير قادين گليردي. جيبيندن سيقار پاکاتيني چيخاريب بيريني آليشديرماق ايسته¬ديکده، پاکاتين بوش اولدوغونو گؤردو. بوش پاکاتي يئنه جيبينه قايتاردي. قادين باشي¬ اوسته چتير توتموش، ياواش ياواش اونا ياخينلاشيردي.
اليني باشينا چکيب ايسلاق توک‌لريني بير يانا دارادي. سو دامجي‌لاري آلنيندان بوينوناجاق سوزولوب کؤينه‌يي‌نين ياخاسينا هؤپدو. کامئراني قولتوغو آلتيندان چيخاريب، سسي چيخار چيخماز ـ «مندن عکس ساليرسيز؟!»، دئدي.
قادين آتماجا ائشيتميش کيمي‌ايتي آدديم¬لارلا اونون قاباغيندان سوووشدو. بير آز اويانليق آنجاق، آياق ساخلاييب اونا ساري دؤندو.
او بير سؤز دئمه¬دن کامئراني قادينا ساري اوزاتدي. قادين کامئراني چتيرين آلتيندا ساخلاييب گؤزلويونون داليندان اونا باخدي.
او اليني جيب¬لرينه ساليب کامئرايه زيللندي. قادين ـ «بير، ايکي، اوچ… » دئدييينده، او گولومسه¬يه بيلمه¬دي.
شکيلي قاباغينا قويوب بير ده اونا باخدي. ايسلاق يارپاق¬لار آلتيندا باسديريلميش شاعر جنازه¬سيندن باشقا، کؤرپونون ياريسي گؤرسه‌نير، بير ده قادينين گؤزلرينه دونوخموش اؤزو.
جومجولوق سودور. اؤلوب گئتديييندن سونرا، يئنه بوردا، ائله ياغيش آلتيندا دوروب شکيله باخان‌لارين گؤزلرينه زيلله‌نه‌جک. ترحيم اعلاميه‌سي اوچون ياخشي شکيل‌دير يوخسا يوخ دئيه دوشوندو.
گؤره‌سن يولداشي‌نين‌هانسي شکيليني ديوارلارا ياپيشديرديلار؟ بيردن بو شکيلي اونون اعلاميه‌سينه وورسالار، چتيرله آدديملايان قادينين گؤزلري اونا ساتاشيب بير نئچه آدديم اويانليق حتمن آياق ساخلاياجاق.
سونرا، بلکه اعلاميه¬ني اوخومادان تئز يولونو توتوب گئتدي. بلکه ده يئنيدن ديوارداکي اعلاميه‌يه باخدي.
هلبت اعلاميه‌ده اونون تصادوف اوزره اؤلمه‌ييني ده يازاجاق‌لار. خيابان اورتاسيندا اوزانيب گؤيه دونوخوب‌دور. اوستونه ياغيش ياغير، گون شاخير، قار ياغير… موبايلي بير آز اويانليق دوشوب.
باياق يئنيجه آلديغي سيقار قوطوسونون دا ايچي قانلا دولموش. موبايلينا بير اس. ام. اس گلير. يئريندن هئچ ترپنه بيلمير.
خيابانين او تاييندا بير قادين الينده چتير توتموش، اونون سوزوله سوزوله ايرلي گئتدييي قانينا باخير. شاعر يولداشي دالبادال اس. ام. اس يوللايير.
منبع :