درين بير يارا ايزي

آنا ديليميز:هه دئييرديم، قايين آرواديسي بي جينگيلينمايا دوشوب هااا گل گؤره‌سن. او دا من گئتديگيم آراييشگاهدئيدي. ايچه‌‌ري گيرجه‌يين آرايشگره دئدي مني بئله بزه تالاردا بارماغنان گؤرستسينلر.

  سولماز جمالي

فاطيمه الي‌نين ايچ طرفيني ادا ايله دانيشان نسرين‌‌ين اوزونون اؤنونده ترپه‌ديب سوسماغيني ايسته‌دي: هله او هايدي هايدي‌دا چؤنوب منه نه دئسه ياخجيدي؟.- او گؤزلريني بيزيم اوچوموزون آراسيندا گزديردي،- دئييردي او قدررر گزديم بازاري دئديم گرک مجليسده تک من پاريلدييام. هم باهالي پال پالتاريمنان هم باهالي بر-بزه‌ييمنن، قيزيللاريمنان. اوره‌‌ييمده دئديم آغزين تؤکولسون سانکي بيز سنين قارين آغرو بيلميريک.
بو سؤزلري فاطيمه قاتي هيجانلا دئييردي، آرادا گؤزلريني سوزوب اونون آغزيني دا اييردي. اونلاري دينله‌يه-دينله‌يه بير-بيرينه دانيشماغا آمان وئرمه‌ديکلريني، ديديشمکلريني گؤروب آينازلا باخيشيب گولوشوردوک.
نسرين باشيني آستا-آستا ترپه‌ديب اونون سؤزونون قوتينده کوپپوش اللريني بير بيريندن آرالي ساخلادي: هله بي پيتديغا دؤنوب هااا، دوز بو ائنده، ياني اينان بو تالارين قاپيسيندان کئچمز.
قفيلدن ماهني اوجادان ائله سسلندي کي سس‌اوجالديجي‌لارا ياخين اولانلار ديک آتيلدي‌‌لار.
نسرين اليني قولاغينا قويوب بير گؤزونو يومارکن قيشقيردي: بي تاج دا قويوب باشينا گل گؤره‌‌سن … ياني گلين زات مئيداني ديير ده باجي.
باخيشيم بير آن باشينداکي يئکه‌پر تاجا سوروشور؛ گولومسه‌ييرم. خيردا گوزگوسونو ماسانين اوستوندن گؤتوروب ايري دوران تاجيني دوزلدير.
-آز هله هاراسيدي. دوز دئييبلر يئميشين ياخجيسين چاققال آپارير. گؤر او قيبيل کيشي کيمه قيسمت اولوبئه؟! چاققالا اوخشار آروادا، کيشي‌ده بي پول وار بي پول وار، يئريم ده يانير گؤيوم ده. آروات بي رومانتويي ساليب آياغي‌نين آلتينان سورونور. خالخ دا اره گئتدي بيز ده.
آيناز بو سؤزو دئيرکن اللريني آچيب بويون‌‌باغين اوزونلوغونو گؤرستدي سونرا ميوه قابيندان آلما گؤتوروب حيرصلي-حيرصلي سويماغا باشلادي. قاپ-قارا ساچلاري اوزونه تؤکولوب ياشيني اولدوغوندان داها آز گؤرسه‌ديردي. بوينونا نئچه دؤور دولاديغي بويون‌باغيسي‌نين ايشيلتيسي گؤزلريمي قاماشديردي.
فاطيمه، يادينا اؤنملي بير سؤز دوشن آداملار کيمي دولو آغيزلا باشيني ترپه‌ديب بير اليني يومرولئييب آغزي‌نين اؤنونو توتدو بير اليني ده گؤيه قالديريب بيرآز گؤزله‌مه‌ميزي ايسته‌دي. سونرا بيردن قيشقيريب منه ساري چؤندو: وااااي ساناز … سنه دئيه‌جم گلينيميزين جئهيزيندن، سن دونن يوخيدون کي جئهيزگؤردوده،-او اليني قالديريب بارماقلاري‌لا هايلايت اولونموش ساچلارينا اينجه‌ليکله توخوندو؛ ياشيل لنزين آرخاسيندا گيزله‌‌تديي قارا گيله‌‌لريني بير نئچه سئري ترپه‌‌ديب داوام ائتدي: من ائوه کئچديم به دئديم عتيقه زات توکانينا گئتميشم. ايلاهي نه وساييل‌لر نه وساييل‌‌لر. هاميميزين آغزي بئله،- آغزيني ياريم-آچيق آچيب گؤرستدي،- آچيق قالميشدي. ياني او کي وار اللري جيبلرينده اولوب ده، قيزيرغانمئييبلار اصلا.
او بيرآز اييليب آينازين سويوب دؤرده بؤلدويو آلماسيندان بير تيکه گؤتوردو.
نسرين او يان بو ياني سوزه-سوزه ساختا اوزون کيرپيک‌‌لريني بارماقلاري‌لا تومارلادي: داي اؤز آراميزدي گرک ده جئهيزي قشح اولوردو ده. ايندي دوزدو دوستوموزدو ولي داي قاليق حساب اولوردو، تورشوموشدو. بو ياننان دا آخي آي باشووا دؤنوم نه بير فرلي-باشلي قير-قيافه‌‌سي وار نه دوز-عمللي ات-اندامي. والله گئنه ساغ اولسون بو کيشيني، من دئييرديم داي هئچ کيم قاپيلارين دؤيمز.
دانيشيق طرزينه دوداغيم قاچسا دا ساغ اليمي قالديريب شوخلوغا قاشلاريمي چاتديم: اوووف قيزلااار انگيز قيزيشيب ها؛ بو گون او کي وار گه‌وه‌زه‌له‌ديز، سانجيليبسوز صندلييه. دورون … دورون بيز ده تيتره‌‌دک.
نسرين آياغا قالخا-قالخا گؤزلريني سوزدوررک دئييندي: ديليميزي قوياق قارنيميزا دا هه؟
چؤنوب گولومسه‌يه‌رک ياري ساري-ياري گؤي رنگه بوياميش ساچلارينا زيللنديم، ديشلريمي آغارداراق: بئله آز-مازئه. ايشيميزه گوجوموزه باخ ده، اولماسا آجيغووي منه تؤکرسن!
نسرين آغزيني آچيب »زهرله‌دون دنه بيزي« دئيه‌رکن فاطيمه اوجادان آسقيردي، تئز اللريني قالديردي: ايلش ايلش صبير گلدي.
قاشلاريمي قالديريب لاپ-لاپ اوزلرينه باخديم. اوچو ده قاييديب يئرينده اوتوردو.
فاطيمه اليني بئلينه قويوب زاريدي: قيزا هئچ من اوينييا بيلمرمئه، هله ده قارنيم تؤکولور، بو ميراس قالميش ساکشن نه چتين‌ايميش، برکدن آسقيراندا دوز اؤلورم.
نسرين بئزميش آداملار کيمي اللري‌له قولاقلاريني قاپاييب گؤز قاپاقلاريني اؤرترکن آيناز دا گؤزونو سوزدوروب ديلي‌‌نين آلتيندا،-سيختيميزي سيويردين داي. سن ده بئکار قالميشدون.-دئيه ميزيلداندي.
فاطيمه‌‌نين اوزو دؤندو؛ موبايليني الينه آليب مئساژ يازارکن بير ياندان دا آلتدا قالماماق اوچون سرت بير شکيلده جوابلاريني وئردي: ديل آغيز ائله‌‌ميسوز باري باش‌‌آغري دا وئرمييون.
قيزلار بير-بيرينه ديمه‌سين‌لر دئيه گولومسه‌يه‌رک گؤز ووروب اوجادان ديللنديم: ياخجي داي زير گئتمييون گؤرک بي … هه دئيين گؤرک هاردا قالميشدوز؟
اونا باخا-باخا گلينه دغرو گئتدي. يئنه آياق ساخلاييب باخدي. حولقومو ترپنه-ترپنه بير ده دؤنوب باخدي. بيرآز سونرا گرگين-گرگين الي‌له تزه‌جه جوجرميش ساققاليني تومارلاييب فيکيره دالدي. گؤزآلتي اونون لئچک‌له برک-برک اؤرتولموش ساچلارينا، هاماردا قالان آغ بودلارينا، بزه‌‌کلي اوز-گؤزونه باخدي.
بي‌يين ياراشيقلي اوزو کدرله دولور، ائنلي قاشلاري چاتيلير توتقون صيفتي بيرآز داها توتولوردو؛ اونا ائله باخيردي سانکي او دونياداکي تک قادين‌دير. او دفعه‌لرله يئرينده قورجالانيب قرارسيز اليني خيرتده‌يينه آتيب کراواتي‌نين دويونونو بوشالتدي.
سؤزسوز، صحبتسيز، ديلسيز باخيشلاري سس‌‌سيزجه باغيريردي؛

منبع :