سن تصادفه باخ!

بولگه لر سرويسي: بونو دئييب دؤزمه‌دن گيردي ايچري:

ايکنجي بولوم

مسعود آذر

– سالام مهرعلي. نئجه‌ وارسان؟–
 سالام غلام کيشي. سن نئجه‌سن؟
بو جمله‌ني دئيينجاق بير اووج آغزي‌نين تورتاسين سپدي غلام کيشي‌نين اوزونه‌. الله‌دان نه‌ گيزلين؛ توپورجه‌يي‌نين ياريسي‌دا تؤکولدو جيز- بيزين ايچينه‌.
– ساغ اول مهرعلي، بو نايلون قالسين بوردا قاييديم گؤتوروم.
– هه‌، عيبي يوخدو. قوي اورا. هارا ايشالله‌؟
– کوچه‌باغلي رسول تصادف ائلييب، مشه‌ ابراهيمينان گئديروخ اونون گؤروشونه‌.
– به‌ من ده‌ گليرم. هاني ابراهيم؟
– يوخ قارداش، من اؤزوم ده‌ زوراکي سوخولموشام ابراهيمين قولتوغونا. ناخوشون وضعيتي ياخشي دئييل، ملاقاتا قويمورلار. دوکتور قداغا ائلييب.
– به ‌سيز نييه‌ گئديرسيز؟– قارداش خاطييا قالديق ها، ايسته‌ميرم، منيم نايلونومو وئر من گئديم.
– سيزه‌ نه‌، من اؤزوم گئديرم.
مهرعلي بونو دئييب پئشگيره‌سين چيخارتدي، اوز توتدو شاگيردينه‌:– قنبر توکانا باخ، من تئز قايديرام!
– باش اوسته‌، آرخايين اول. من وارام.
بو حالدا مشه‌ ابراهيم کي ائشيکدن اونلارين چکيش- برکيشينه‌ شاهيد ايدي، ايچري گيريب دئدي:– مهر علي سن اولماز. انشاا… سن ده‌ صاباح گئدرسن. قوي هله‌ گؤروم غلام کيشيني نئجه‌ يئر به‌ يئر ائليرم.
– سنين ايشين اولماسين، من اؤزوم دوزلدرم.
– دده‌ن ياخشي، ننه‌ن ياخشي، نه‌يي دوزلدرسن؟ دييرم دوکتور دييب ملاقات اولماسين، سن دييرسن دوزلدرم؟
– من دوزلدرم.
بونو دئييب اودا بير ايکي کيلو مئيوه‌ آليب، آغير آغير يولا دوشدولر. مشه‌ ابراهيمين هئچ گئتماغا اياغي گلميردي. هاندان هانا گليب چاتديلار رسول‌گيلين قاپيلارينا. مهرعلي قاپي‌نين زنگيني باسيب باخدي ابراهيمين اوزونه‌، گولومسه‌دي. قاپيني آچماغا بيرآز گئجيشديلر. مهرعلي ال آپاردي بيرده‌ زنگي باسسين، مشه‌ ابراهيم اليندن توتوب دئدي:– بيرآز دايان، باش گتيرمييبسن کي!
مهرعلي هئچ نه‌ دئمه‌دن الين چکيب داياندي. بو حالدا حيطدن بيري سسلندي:
– کيمسن؟
ابراهيم دئدي:– رحيم! بيزوخ.
رحيم گليب قاپيني آچدي، گؤردو اوچ نفر دايانيب قاپيدا. اوز توتدو ابراهيما:– مشه‌ ابراهيم خئير اولا؟
– والله‌ اوزوم قارا، گلميشوخ رسولون عيادتينه‌.
– چوخ ساغ اولون. ممکن دييل. دوکتور دييب ملاقات قداغاندي.
– داي گوذشت ائله‌، بوراجان گلميشوخ، اياغ اوسته‌ رسولو ايکي ديقه‌ گوراخ گئداخ.
– بابا تلفوندا دئدين، من ده‌ دئديم يوخ. اصرار ائله‌دين دئديم اؤزون گل گؤر گئت. ايندي اوچ نفر گليبسيز؟
بوحالدا گؤزو توخوندو مهرعلي‌يه‌، دوداقلاري قاچدي، تئز اؤزونو ييغيشديردي، حيرصينن دئدي:– بونو نه‌يه‌ گتيرميسن؟
– والله‌ من گتيرمه‌ميشم، گؤردو گليريخ ملاقاتا، اؤزو باشين ساليب گليب. من ده‌، بو غلام کيشي ده‌ نئچه‌ دؤنه‌ دئدوخ اولماز قوي قالسين سورويا، قبول ائله‌مه‌دي.
غلام کيشي ديله‌ گلدي:– آي رحيم، چتين توتما ايکي ديقه‌ گوروب دوراجاغيخ.
– آغا غلام، بابا بيز اونو پيش مؤهره‌اينن باغلاميشيخ. او دوغرودان ساليم آدام دييل کي. دوکتور دييب نه‌ دينسين، نه‌ دانيشسين، نه‌ اينديرين، نه‌ دينديرين، نه‌ گولدورون. ايندي بو مهرعليني گؤرماق همين، هيريلدييب لخلييه‌جاق. نمنه‌ پيش مؤهره‌سي وار آچيليب تؤکوله‌جاق. خواهشن گئدين بير ايکي هفته‌ سونرا گلرسيز.
ابراهيم دئدي:– آي رحيم سن دوز دييرسن. بيز گره‌ک گلمييدوخ. بيرآز گؤبودلوق اولدو. سن اوزولمه‌، بيز تئز دوراجاغيخ، سؤز وئريرم گولماق گولدورماق يوخدو. دانيشديغيميز اؤلومدن، تصادفدن، آجي خبرلردن اولار کي گولماق اولماسين.
رحيم باشين توولاييب قاپيدان چکيلدي کنارا، قوناقلار ايچري گيرسينلر.
– نه‌دييم والله‌، سيز داها نه‌ جور آدامسيز، بيلميرم!
يالله‌، يالله‌ دييب ايچري گيرديلر. سلاملاشيب اوتورماق ايسته‌ديلر. رسولون خانيمي اوشاقلاريندان سوواي قايناناسي، قاينآتاسيدا ائوده‌ايدي‌لر. رسول مهرعليني گؤرماق همين باشلادي هيريلداماغا.
رحيم دئدي:– داداش سنه‌ الله‌ بيرآز گؤزله‌. نئچه‌ گوندو ياتماميشيق. اؤزون ده‌ کي بوگونده‌سن. باشيوا دولانيم گولمه‌.
ابراهيم دئدي:– رسول، قوربانين اولوم بيرآز دايان، باخ رحيم زورونان بيزي ايچيري قويوب. سن گولسن بيزي اؤتورجاق ائشييه‌. هله‌ نئجه‌‌سن؟ شوکور اللها ائله‌بيل دئييشلردن بيرآز سازالييبسان.
– هن ياخشييام. فقط بو اياغيم کي گؤيدن آسيليب بيرآز اذيت ائليير. قالانينا تابلاشيرام. سيزدن نه‌ خبر؟رسول سن دانيشما. بيز ده‌ بيرآز اوتوروب گئديروخ. انشالله‌ کئفين بيرآز سازالدي گليب دويونجا صؤحبتده‌شروخ.
 آردي وار

منبع :