بلکه‌ده کؤلگه‌لر بئله دانيشار

بولگه لر سرويسي:گونده بو چاغلاردا اول کوچه قاپيسي، سونرا دهليزين، لاپ آخيردا دا اوتاغيمين قاپيسي ايکي يولا تيققيلدار.

مجيد راستي

بولگه لر سرويسي:گونده بو چاغلاردا اول کوچه قاپيسي، سونرا دهليزين، لاپ آخيردا دا اوتاغيمين قاپيسي ايکي يولا تيققيلدار.
دئمک بيلير هامي آلا چيي يوخونون ايچينده‌دير. چوخ ياواش بارماقلاري اوسته يئرييه-يئرييه سوزولور ائوه. اوتاغيمين قاپيسيني اؤز ائوي سانان بيريسي کيمي آچيب، تپيلير ايچري. گيرمه‌ييني گؤرمه‌ييرم ها، بير آن بير شيريق ايشيق دوشور گؤزلريمه، سونراسي ايتير اوتاغين قارانليغيندا و من اونون سس‌سيزجه ياخينلاشماسيني دويورام. باشيم اوسته دايانير. گؤزلريمي آلا آچيرام. باشيمي قالخيدماق ايسته‌ييرم آنجاق زينه- زينه آزجا قالخيب، ياستيغا باسيلير. آلا آچيق گؤز قارشيمدان زيرپي بير کؤلگه اويان بويانا گئدير. دايانمادان يئريير، اوچور دووارلارا، تاوانا. مازالاق کيمي بيتير. بير آن ياييقلانير. آختاريرام اونو. دووارلاردا، اوتوراجاغيمدا، کامپييوتئر ماساسينين ديبينده. سانکي بو عجيبه مازالاق دايانيب، منده اوشاقلارا تاي ساپ اليمده گؤزله‌ييرم. بوندا عجيبه خصلتلري آنلاياراق هارا سوزوله‌جه‌ييني سئزنميرم. مومکوندور بؤيرومه سوخولوب، يئره دوشه. باخيرام يان يؤرمه. هر شئي آنلاشيلماز گلير منه. آزدان سانيرام چيخيب گئديب. سئوينيرم يوخلوغونا. آنجاق تئزجه پوزولور بو سئوينج. سينمده بير يئکه آغيرليق حس ائديرم. بوغولان کيمي اولاراق چئچه‌ييرم. باشيمي اوچ بارماق ياستيغدان آيريرام. آغا اوتوروب سينمده. بو يوخوداکي چکيلمه‌يير گؤزلريمدن. چکيلسه‌يدي، دورارديم آياغا، ياپيشارديم بو کؤلگه‌نين خيرتله‌ييندن، دئيه‌رديم: »نه ايسته‌ييرسن جانيمدان؟ هن؟ گئد، قوي ياتاق.«
ذاتن بونو دئمزديم. اوتانجاق بيري‌يم من. زيلله‌نرديم اوزونه بلکه اوتانسين. اوندا اؤزو بونلارين هاميسيني دوياردي، دويمازدي ياني؟ آمما بو اوزو گؤتوندن قيرميزيلارداندي. داليسي منه‌دير. يونگول گولور. انلي کوره‌يي قيميلدايير. يوزه يوز بو آندا او بيري اوتاغدا آنامين و او بيريسينده‌ ده باجيلاريمين سينه‌لرينده اوتوروب کي منيم ساياقلاماغيما هئچ بيريسي آييلمايير. بو چاغلاردا آداما يولداش احتياج‌دير. گليب، بوجور دارقاشاييردين گؤتوندن ووروب، سالسين چؤله. اليني اوزالتسين آداما دوغرو، قالخيدسين. هئي، يولداش. منه دئين يوخ ايتين قودوران واختي يولداش آدامين ائوينده نه دارتير؟ لاپ اولسون، نه‌يه يارار؟ بو قابيليتلي مازالاق، اونوندا سينه‌سي اوسته بيتردي. دئييرم: »گئده، ها گئده سنله‌نم. دور، دور باس ائشييه.«
يئريندن ترپنمه‌دن اولور ايکي، اوچ، بلکه‌ده مينلر مين اؤزونه تاي کؤلگه‌ يانيندان آيريليب، بوشلانير بيزيم ائوه. آزدان توآلئتين، اوتاقلارين، حيط‌ين، حتي يخچه‌ل قاپيسينين آچيليب اؤرتولمه‌سي گلير. ساعآت آلتي‌ني چالمايينجا بو سس‌لر وار و خاپدان او کؤلگه کيمي ياييقلانير. سحر ائرکن، قارانليق يئر اوزريندن اوزولمه‌ميشدن اؤنجه، هامي يوخوندان آييلار و دار دانيشيق باشلانير. ياني باشلانمير ها. آنا توآلئتدن هايين آتير باشينا.
– بو قيراغي کيم باتيريب؟سونرا نه دئدييي آنلاشيلمازدير. آمما ائله او گوجده، يوکسک سسله چيغيرير. يورقانين گوشه‌سيني قاتلاييرام سينه‌م اوسته. اللريمي باشيمين آلتينا قويوب، دئييرم؟ يوخ، چيغيريرام. آخي توآلئت کوريدورون لاپ ديبينده‌دير. ال اوزوموزو‌ده اوردا يوواريق و بو چاغلاردا بير بيريميزه سؤز دئمه‌لي اولساق چيغيرمالي‌ييق. چيغيريرام: »ال اوزونو سودان چک.«چيغيرير: »هن؟«
دينميرم. ديليمي آغزيمداکي بير ايکي بوش ديش يئرلرينه سورتورم. بو ايش چوخ خوشوما گئدر. او بيري اوتاغدان فيدان دئيير: »سس سالمايين.«
– هن بالام، نه اولوب؟
– من اؤلوم قويون ياتيم، چوخ يورقونام.
دوروب، اوتورورام يئريمده. يورقاني آتيرام سولوما. ساغيمدان زيرشالواري گؤتوروب، چکيرم اهينيمه. آنا قاپيدا دايانيب.
– گؤرورسن؟. يئنه با…
– گؤرورسن گؤرورسن ائله‌مه کي، بيردن ايش‌دير دا بيري تومانچاق ياتيب.
– سيچالار بئله شانسين ايچينه، سيچالار.
آغلاياراق دئييردي. اؤنجه آنا آرخاسيجا من قاچيريق قيزلارين اوتاغينا. فيدان بيزي گؤرجک دئيير: »سيچالار، سيچالار«
ساققيزي توکوندن آيرانماييب تپيکله چکير ملانين يانينا.– دور باخ، باخ پوخونا.
اودا سايمادان ساغينا چؤنوب، يورقاني چکير باشينا.– مال‌دير با مال.– واللاه يورولموشام سيزين اليزدن. بو بوراميز.
دينمير. سانيرام بورايا فيکيرله‌شير. باخير منه. آنلاييرام ايسته‌دييين.– کئچ گؤرک، من يوماياجاغيم.
اليمي گؤيه آتاراق آياغا دوروب، آشپازخانايا دوغرو گئديرم.– اوغول بؤيوتموشوک نه‌يه؟
داليما دؤنمه‌دن دئييرم: »بؤيوتمه‌يه‌يدين.«
گئرچکدن آتا آنالار اوشاقلاريني نه‌يه اميزديريرلر؟ بوندان باشقادير کي بير ايش دارتيب، اونون ايچينده چوبالانمايا دوشورلر يادا يوخ بير بؤيوک حس اونلاري چکير کؤرپه‌لييه، تانيماديقلاري دونياني آچيقلاماق ايسته‌ييرلر. بير بلک اوشاغين دوداغلارين ياپيشيديريللار دؤشلرينه. سومورماغي اؤيره‌ديلر بو کؤرپه‌يه. سونرالار بو نئچه داملا بوغازيميزا دامان سوت اولور بؤيوتموشم. زحمت چکيبسن تانيماديغين دونياني تانيماق ايسته‌ييبسن. بونلار ايچيمده اولاراق يخچه‌لي آچيرام. هاييمي آتيرام باشيما: »خاماني کيم بارماقلاييب، هن؟ من بيلمه‌رم. گتيريب، قويارسيز يئرينه.«يخچه‌ل قاپيسيني چيرپيرام. آنا داليمدادير.
– اوشاقدا باخ هيرسه. دلي شئيطان دئيير قوي چيخ گئت، جانيني قورتار.
قورتاردا. نه‌يه دؤزورسن بئله ناتاراز اؤولادا. بيليرسن سئويريک و بونو آنلايان مينر آدامي. يخچه‌لين قاباغيندا اوتوروب، اوپئنه دايانيرام. بئليمي تئزجه آيريرام اوندان. سئوميرم يوخونون ايستي‌لي‌يي چيخسين جانيمدان.
– کاشي اوسته اوتورما.
گليب، دورور ديبيمده. باخير اوزومه.
– بالامسان دور. ناز بالام‌دير.
ملان دا آييليب. گؤزو ايليقلي تپيلير آنانين ديبينه.
– بيز سنه تاي دئييليک کي، دور دا.
ائله‌بيل آدامدان زاتدان دئييلم من. »بيز سنه تاي دئييليک کي«، ديل دوداغيمدا يانسي‌لاياراق گئديرم توآلئته دوغرو. قاپيني آچيرام. سويلا سيناييرام، هئچ ائتکيسي يوخ. برکيميش بير شئي‌دير. بورانين سيراميکلرينه باخماياراق ائله اون ايل اؤنجه‌سينه تاي‌دير. ياني بونون تايي بيتردي عيني يئرده و بابام سويلا سيناردي. آخيردا اوستونو پارچايلا باسديراردي. اوف، او گونلر بئله دئييل‌دي کي، گؤستريجي بارماق، اورتا بارماغا ياپيشان کيمي ايديک بيز. تيلويزيونا بير تزه فيلم گلميشدي. بير آي ايدي گئجه گوندوز دئييردي: »قودزيلا گيرجک.« فيدانين بويو منيم قاريشلاريملا سگگيز، ملان‌دا يوخويدو ذاتن. من اؤزوم بابانين قاريشلاريلا ايکي ياريمي دوغروتموشدوم. دئييرديلر کيشي اولموشام. بابا اويان بويانا گئديردي. برکيميشله گوله‌شيردي اؤز دئديي کيمي. معمار گتيردي. برکيميشين اوستوندن سيراميک دوزدوردو. آمما چوخ سيميتن چيخدي او. سيراميکي پاتلاديب، گؤيردي. ائله او گون بابا اعتراف ائتدي. گوله‌رک دئدي: »بو ده‌ده‌مين برکيميشيدير.« سونرا سيراميکي او برکيميشله بيرليکده قازيب، آييردي. الينه آليب، گئتدي ائشييه. داها قاييتمادي. دئمک ميللتي ييغميشدي باشينا، برکيميشي گؤرسه‌درک باغيرميشدي: »باخين، بو بيزم ده‌ده‌ميزين برکيميشيدير. ايندييه‌دک گيزلتسمده يالنيش بير ايش گؤرموشم. ايندي گوونيرم اونا.«
باش تاپمايان کيمي‌سي گولموشدو. کيمي‌سي‌ده دئميشدي: »باخ اوره‌يه.«آمما بيريسي قاباغا يئريميشدي. بابا توکلريني ساغدان آيريب گتيرردي سولا اورتاداکي دازليغي گيزلتسين. دئميشدي: »داز گئده، بيزيم بابالار سيچمازديلار.« او نئچه دنه توکلريندن ياپيشيب، سوروموشدو اونو. سونرا قودزيلا گلدي، باباني آپاردي. ياني آنا بئله دئدي. بيز قورخدوق. بيرليکده گئتديک توآلئته. بير بيريميزين پوخونو گؤر‌رک يودوق گئتدي. آمما بؤيوکلوک چوخ ازينج‌دير. اوتانيريق بير بيريميزدن. پوخلاريميز گيزلي‌ده قاليب برکييير و من بو برکيميشله گوله‌شيرم. يووا بيلميرم. يالنيز اوستونه اؤرتوک ساليب، گيزله‌ديرم. دهليزه چيخاراق سسله‌ييرم: »آياغيزي قويمايين ها اوستونه.«ملان گئدير اوزونو يووسون. منده گئديرم اوتاغيما پال پالتاريمي ده‌ييشيب گئدم چؤله.

منبع :