بولگه لر سرويسي:يئنه ايچيمدهکي هيجانلي قيز باش قالديريب. کولک قولاقلاريمدا کوشولدايير. اؤنومده‌کي هئيبتلي آدامين آرخاسيجا گئديرم. آغ-آپباغ قار، اؤرپک کيمي داغ-داشي بورويور. منه دئين يوخدور بوردا نه ايشين وار! تانيماديغين کيشي ايله بيرليکده داغ-داشا گليبسن...! ايچيمدهکي قيز سسلهنير:»پيس دوشونمه؛ يولداشلاريميزين هاميسي گؤونمه ليدي«ايچيمدهکي دوز دئيير. بو آدامي ياخشي تانيماسام دا، بيلميرم نه‌دن‌دير اونا گوونيرم. هئچ ده قورخمورام. اوندان اوشونمورم. راحاتام. نه‌دن ناراحات اولوم کي!؟ نه اولسا بيزي يوخاريدان بير-بيريميزه تانيتديريبلار.داغدان يوخاري قالخاندا، يولون قيراغينداکي دامچاني منه گؤستردي:»اورا، بهلول عمي‌نين ائوي دي.«منيم گؤزوم، قاش- قاباقلي بولودلاردايدي.»ائله بيل ياغاجاق« دئديم. بولودلارا باخيب اؤزومه گولدو. » ايکي ساعت چکمز، تئز قاييداريق« دئدي.بير آندا آيي بيغان، سرت سيماسي پوزولدو. شيرين- شيرين گولوشو ايچيمدهکي قيزين اوره‌يين تاپپيلداتدي.. بيلمه‌ديم نئجه يوخاري قالخديق. باشيم سؤز-صؤحبته قاريشميشدي؛ صحبته يوخ، ائشيتمه يه. ائله دانيشيردي، سانکي بيرحزبين باشقاني ايدي. من آنجاق قولاق آسيرديم. هردن استرس‌لي مکتب اوشاقلاري کيمي سواللارين جوابلاياندا، ايچيمدهکي قيز آز قاليردي اوندان سوروشسون»آخي بو سؤزلرين ائولنمه‌يه نه دخلي وار؟«هر نه اولسا مندن يوخاري رتبه ده ايدي. سوروشسايديم منه گولردي. اؤز يانيندا دوشونردي، بلکه بير شئ آنلاميرام. يقين دخلي واردير کي، مني معلّم کيمي سورغو-سوالا چکيردي. يوخسا اللي دفعه دئمزدي؛»ائولنمه‌يه گؤره فيکيريميزي بللي ائتمه‌لييک!« بلکه ده دوز دئييردي، ياخشي بير ائولي‌ليک سورمه‌يه، مارکسيسم –کاپيتاليسمي داها ياخشي بيلمه‌لييديک!ايچيمدهکي کوسه‌ين قيز بو سؤزلره داريخيردي. قاش-قاباغين ساللاميشدي. من اونون سؤزلرينه دقت‌له قولاق آسديقدا، اوتانماز–اوتانمازگؤزونو اونون گؤزونه زيلله‌ييردي. او ايسه گؤزلرين آياغينا تيکيب، دورمادان دانيشيردي.بير ساعاتدان آرتيق‌دير اونون آرخاسيجا آشاغي ائنيرم. يوخاري چيخاندا منيم‌له آياق بير چيخدي. هر بير سؤزه مارکس‌دان بير اؤرنک گتيردي.نئچه دفعه ايچيمدهکي ديل اوتو يئميش قيز، آغزين دولدوردو سوروشسون کي،»مارکسين ائولي‌لييه گؤره دوشونجه‌سي نه‌دير؟« قويماديم. »دينمه«دئديم. دئيير بس کي، سياسي ساواديم شئهله‌نيب. ائوه گئدنده کيتابلاري واراقلاييب اوخويارام.يورولموشام. قار دنه‌جيکلري هوژمونن اوز-گؤزومه چيرپيلير، گؤزلويومه آغ اؤرتوک چکير. گؤزلويو گؤتورورم. اونو، بير قارالتي کيمي گؤرورم. آدديملاريمي ياواشلاديرام. تيتره‌ييرم. يقين اوشويورم. يووو...خ! اوشومورم. تردن ايسلانان پالتارلاريم، جانيما سوواشير. اؤنومده‌کي هئيبتلي آداميم گئري دؤنوب، منه باخير:»يورولدون‌مو؟« دينميرم. ديل اوتو يئميش قيز، آغزيني آچير، گؤزونو يومور:» دئييرسن بس منيم ده سنه تاي، بو هئيبت ده آيي گوجوم وار؟«من دوداقلاريمي ديشله‌ييرم.او ايسه»آز قالير بهلول عمي‌نين دامچاسينا يئتيشک«دئيير. اللريني جيبينه قويوب، يئنه اوزومه گولور. بيغلاريندا بوز، سيرسيرا باغلاييب. قار دنه‌لري هؤله‌سک اؤزلريني داغ-داشا چيرپيرلار. چرقديم ايسلانيب. قارا کاپشنيمين رنگي دئييشيليب، آغ رنگه چالير. يئره دوشن قاري، تورپاق اممير. قوش باشي قارين اوست- اوسته قالانماسي چوخ خوشوما گلير. يئنه ده تيتره‌ييرم. بلکه‌ده قورخورام. نه‌دن قورخماليام؟ او کي، بورالاري ياخشي تانييير. اؤزو ده گوجلو، قوللو- قووتلي‌دير. دقت‌له اونا باخيرام. ايچيمدهکي قيز دئيير:»ائله بيل قاباندي، باشيني ساليب قاباقدا گئدير«.»کس سسيني« دئييرم. بو نه سؤزدو؟ آللاه قويسا اونونلا ائولنه‌جه‌يم هاااا...!ايچيمدهکي دلي‌سوو قيز دينج دورا بيلمير. قيميلدانير. دئيير»بو هوندور هيبت‌لي هئيکله، آيي‌دان باشقا نه دئمک اولار؟«اونو حاقلاييرام،» امّا مهربان آيي!« دئييرم. »بير آزدا چؤل شوفرلرينه اوخشايير«ايلک گؤروشده، اونو اوزاقدان گؤردوکده، دوستوم پري‌يه دئديم »شوفردي؟«بيغلاري بورما دئييلدي؛استالينين بوغلاري کيميايدي. بويلو-بوخونلو،کوره‌کلي، امريکايي اوورکوت ايچنده ائله شستلي گؤرونوردو کي،»چؤل شوفري« دئدييمه اوتانديم.پري، »جاواد يولداشيميزدي« دئدي. اليني منه ساري اوزالديب گولومسه‌دي:»جوجه جاواد! منه جوجه جاواد دئييرلر.«گوله-گوله اونون آيي قامتينه باخديم. ايچيمدهکي ديل‌اوتو يئميش قيز دئدي: »اگر جوجه، آيي يئکه‌ليکده اولسا، گؤر خوروز نه اولار!«جوجه جاواد، ائله بيل ايچيمدهکينين سسيني ائشيتدي. داماغينداکي سيگاري، بارماقلاريندا توتوب، قاپي‌نين باشينداکي تابلونو گؤستردي.ساپ ساري، مخمر قانادلي جوجه شکلي‌نين اوستونده يازيلميشدي "جوجه‌کشي لاري". هله اوندا آنلاديم‌کي نييه بو هئيکل‌لي آداما جوجه جاواد دئييرلر. کولک شدّت‌له‌نيب. داغآشاغي ائنرکن هر آدديم باشي ايچيمدهکي قيزين هيجاني آرتير. »بير آز ايرهلي يئري،اليندن توت«دئيير. »يورولموشام، آياغيم سويروشور!«دئه. ايچيمدهکينين سؤزونه قولاق وئرميرم. ياواش-ياواش اونون آرخاسيجا گئديرم. آياقلاريمي قار اوستوندهکي آياق ايزلرينه قويورام. نه‌دن بو آداما اينانيب "تک آلتي"يا گلدييمي، بيلميرم. ايچيمدهکي قيزجيغاز آتيليب، دوشور:» نئجه‌کي بيلميرم؟ دئينه ازيليب، بوزولمک ايستردين دا...نه يامان دا ازيلدين...لاپ ائله شيرين سالدين ها اؤزونوووو...«ايچيمده‌کينه» دينمه، اؤز ايشينه باخ «دئييرم. يقين، مني آرتيق تانيماق اوچون بورالارا گتيريب. دئميش‌لر: يير آدامي ياخشي تانيماق اوچون، اونونلا يول- يولداشي اولماليسان. يوخسا مارکسين فلسفه‌سي، مانيفستيني، اوندا گره‌ک باغلي قاپيلارين داليسيندا، سيگارلارين توستو–دومانيندا دانيشاسان. گل داغين دؤشونده، بو گؤزل‌ليکده رومانتيک يئرده، فلسفه‌دن دانيش؛ نه اولسون کي! بيليرم مني سينايير. يوخسا بيلمير کي، هر ايشين، هر سؤزون بير يئري وار!؟ايچيمدهکي شيلتاقليق ائدير. مني راحات بوراخمير. قار دنه جيکلري داغ-داشا چيرپيلان کيمي، اؤزونو دوشونجه‌مين اورتاسينا چيرپير. »آياغين بود‌ره‌سه، تپه‌سي اوسته دره‌نين ديبينه دوشه‌جکسن« دئيير.»ياخشي واخت‌دي، گئت اليندن توت!«.دئييرم:»من‌کي يالوارماياجام، اؤزو گره‌ک بيلسين دا...« ايچيمدهکي دجل قيز، «دايان! گئتمه» دئيير. آياقلاريم، تپه‌نين يئنيشينده ميخلانير قالير.. داغ جيغيريندا، آغ-قارا هئيکله اوخشاييرام. او ايسه اللري جيب‌لرينده آستا-آستا آشاغي ائنير. دجل قيز ايچيمدن سسلهنير:«جاواد يولداش!...يولداش...» دؤنوب منه باخير. باخيشي، چوخ مهربان‌دير. »يورولدون‌مو؟« دينميرم. قارآدامي کيمي دونوق گؤزلريمي اونا تيکيرم.ياريم ساعاتا، بهلول عمي‌نين دامچاسينداييق دئييب، يولا دوشور.من هله دايانميشام. بير ده دؤنوب گوله-گوله»بهلول عمي نين چاييني ايچسن يورغونلوغون چيخار« دئيير.ايچيمدهکي دجل قيزا آجيقلانيرام. »ائشيتدين‌مي نه دئيير!؟ او دا سنين جاوابين! ايندي سسيني کس، اونون آرخاسينجا گئت«. ايچيمدهکي دوداقلارين بوزور.آز قالير آغلاسين. من ده سس‌سيزجه اونون آرخاسيجا گئديرم. هردن بير دايانيب منه باخير. اوزومه گولومسه‌يير. قار ايله اؤرتولوب آغاران بيغلاري، قيروو توتموش اوتلارا اوخشايير. اونا باخماق، يامان خوشوما گلير. گؤيرميش دوداقلاري، قارلي بيغلاري‌نين آلتيندا يقين بوز باغلاييب..گئت-گئده او دوداقلارلا اؤپولمک هوسي منده گوج‌له‌نير. دوداقلاريم يانير. بير اوووج قار گؤتورورم. اؤزومدن اوتانيرام. بهلول عمي‌نين چاييني تئزليکله ايچسه‌يديم...ايچيمدهکي کوسگون قيز دينمير؛ دانيشمير فيکيره دالميش.جوجه جاوادين ايسلانميش اوورکوتونا باخير. دئييرم»چوخ شستلي، بويلو-بوخونلودو« ايچيمدهکي، سس‌سيزجه اونون بوي-بوخونونا باخير. منيم جانيم گيزيلده‌يير.» قوجاغي اون قاديني بيردن قيزديرار« دئييرم. ايچيمدهکي منه ترس باخير. اؤزوم ده بئله دوشوندويومدن اوتانيرام.اوزاقدان هافيلتي سسي گلير. ايت‌لر هوروشورلر. يئنه اؤزومو قيناييرام »عاقلين قاچميشدي! تک باشينا، قيشين چيلله‌سينده، کولک‌ده، "تک آلتي"يا گله‌سن!؟« ايچيمدهکي کوسگون قيز دئيير: »دئمه‌دين قورددان، جيک-جاناواردان گليب آدامي تيکه-پارچا ائدر!؟«دئينده "تک آلتي" داغينا گئده‌ک، خوشلانديم. بيلسه‌يدم بو قدر سوسياليزم‌دن، کاپيتاليزم‌دن، دانيشاجاق گلمزيديم.هئيبتلي آداميم سايمازجاسينا، قوللارين توولايا- توولايا، دوشوب قاباغيمدا گئدير. اونون ايستي قوجاغي‌نين فيکري مني اوشودور. ايچيمدهکي ايله هيم‌له‌شيب، ال-بير اولورام: »گل! بير ايش گؤرک کي، هئچ اولماسا اليمدن ياپيشسين دااا...!«قار دنه‌جيکلري داغين هر طرفين چولقالاييب. ساغيم- سولوم، اؤنوم -آرخام، هر طرفه باخيرام آغ آپباغ‌دير. بيز، داغ جيغيريندا يئريين ايکي قار آدامي‌ييق. دنه‌جيکلر، قار آداملاري‌نين اوست-باشينا اله‌نير. ايچيمدهکي کوسگون قيزا دئييرم»باشليياق؟!«ايچيمدهکينين اوره‌يي ائله تاپپيلدايير کي، من ده ائشيديرم. هيجاندان نه ائده‌جه‌ييني بيلمير. تله‌سير. اؤلور بئله ايشلردن اؤترو. آياقلاريم بير آن دايانير. »بير آدديم بئله آتمياجاقسان!» دئييرم. اونو چاغيريرام؛ «يولداش جاواد! جوجه جاواد! يولداش...!»دؤنوب منه باخير. ايچمده‌کي دئيير:»کاش قوللاريني آچسين، گليب دئسين..«قوللارين آچمير، ساچلاريندا، بيغلاريندا اوتوران قاري چيرپير. دايانديم، سني گؤزله‌ييرم، گل! دئيير.ايچيمدهکي شيلتاق قيز دوداقلاريني بوزور. «بو دا کي، اخلاق يوکودو دئيير. اونا ياخين‌لاشاندا، يولا دوشوب، گئدير. ايچيمدهکي بيردن دوشونجه‌مين اورتاسينا آتيلير«بس سنين آياغين سوروشمز؟ هئچ بيلميرم نه اولور. بيردن ييخيليرام. يئرده، اوزاناقلي وضعيت‌ده، اونا ساري سوروشورم. ايچيمدهکي، »کاش اونا توخوناسان « دئيير. اوندان بير آز قاباقدا بير داشا توخونوب، دايانيرام. جانيم اينجيير. يئرده اوزاناقلي قاليرام. قايغيجيل، مهربان آيي کيمي، اييلير، اوزومه باخيب دئيير: » نه اولدو؟ آياغين سوروشدو؟« باشيمي ترپه‌ديرم »قالخا بيلرسن؟«»هه« دئمک ايسته‌ديييمده، ايچيمدهکي اورتايا آتيلير. قوللاريمي توتوب، اونا ساري اوزالدير. او ايسه، بير اليي ايله کوره‌ييمدن، او بيريسي ايله اليمدن توتوب، مني يئردن قالديرير. ايستي نفسي اوزومه ديير. دونموش ياناقلاريم قيزيشير. پالتارلاريمين قاريني چيرپيرام. ايچيمدهکي، آز قالير آغلاسين.آخشامين آلاتورانيندا، يئتميش ياشلي، هئيبتلي، اوجا بويلو، باشي پاپاقلي، ياراشيقلي،کورکو چيگينينده بير کيشي، دامچانين قاباغيندا دوروب. الينده‌کي فنري يوخاري قالديريب. بيزه باخير. آغارميش تئل‌لري پاپاق آلتيندان آلنينا توکولوب. ايچيمدهکي ديله گلير: »بو‌دا‌کي استالينين دوغماسي‌دي !«گوله-گوله سالام وئريب، خوش گؤردوک! دئيير. آغزيندان چيخان نفسي، سانکي بم موسيقي‌نين، نوت‌لاري‌دير، دونموش هاوادا يوخاري اوچور: »خانيم قيزيميز خوش گليب، خوش گؤردوک سني، آي اوغول!«ايچيمدهکي قولاغيما پيچيلدايير: » نه گؤزل سسي وار!«ايچري گيرنده دامچانين ايستيسي، اودون‌سوبا‌سي‌نين قوخوسو، ساکين‌لشديريجي درمان کيمي، وجودومو دينجلدير. بهلول عمي، بوز رنگلي لهستان چارپاييسيني سوبانين ديبينه قويوب منه باخير:»ايندي جانين قيزيشار«سونرا، ايکي استکان-نعلبکي گتيريب، سوبانين يانينداکي آغ بويالي، دمير ميزين اوسته قويور. بير آن ايچيمدهکي تعجّب‌له يئريندن قالخير. بهلول عمي، چاي‌نيکين لولويونو آغزينا داياييب، اوفورور:»بونون دا لولويو توتولوب« دئيير. جوجه جاواد منه گؤز وورور»دونيادا سنين چايلارين کيمي دادلي بير چاي تاپيلماز؛بهلول عمي!«گؤزوم استکانلارا سوزولن چايدا قاليب. بهلول عمي، کورکونو چيگين لرينه چکيب، منه باخير.»خانيم قيزين قايناناسي دئيه‌سن بيله‌سيني چوخ ايسته‌يير. سيز گلمزدن بير نئچه ساعات قاباق پيتي قويموشام. دوروم، بيرآزجا سويون آرتيريم.«قاپي‌نين يانينداکي آفتافاني گؤتوروب، پيلهتهنين اوستوندهکي گوودوشون دوواغين گوتورور، اتين اييسي بورنوما دولور. آجيمدان اؤلورم.بهلول عمي، آفتافا‌دان، پيتي‌يه بير آزجا سو تؤکوب، دوواغي قويور. ايچيمدهکي قيزين آغزي آچيلا قاليب. جوجه جاواد، بارماغين دوداغينا قويوب،گوله –گوله سوس دئيير. گؤزومو بهلول عمي‌دن آييرا بيلميرم. آفتافا الينده قاپي‌يا ساري گئدير:»سيز چاي ايچينجن، من سو باشينا چيخيم، گليم« دئيير. هئيبتلي هئيکلي قاپي‌نين آرخاسيندا ايتير. سوبانين ايستيسي قاردان ايسلانان شالواريمي قيزديرير. ايچيمدهکي هيجانلي دجل قيز، باخيشلاريني جاواد يولداشين گؤزلرينه تيکير. من اوتانيرام. ياناقلاريم قيزاريب، پؤرتوب، سير-صيفتيم توتوب.سوبا داکي اودونلارين چيرتا-چيرت سسيني دينله‌ييرم.بير آن جوجه آيي‌نين گوجلو قوللاري لهستاني چارپايينين آرخاسيندان بوينوما دولاشير. جانيم گيزيلده‌يير....
بولگه لر سرويسي:يئنه ايچيمدهکي هيجانلي قيز باش قالديريب. کولک قولاقلاريمدا کوشولدايير. اؤنومده‌کي هئيبتلي آدامين آرخاسيجا گئديرم. آغ-آپباغ قار، اؤرپک کيمي داغ-داشي بورويور.