قيزداش‌لار
قيزداش‌لار
1396/11/15
بولگه لر سرويسي: »قيزاوجاغين کوردو يازيق! سن نه باشا دوشرسن«- دئيه، گؤزلريني اونون اوزوندن دؤندردي. ائله بيلير قيزي اولمايان قيزليغيني ايتيرر، يادا آتار ائشييه. اؤزومده قيزايديم دا؛ قيز اولان يئرده… قيز اولان يئرده بير قاراداش اولايدين!
يئنه سسيني آتميشدي باشينا. اونون سسيني ائشيدندن نئچه گون سونرايادک داش‌لاردان قورخاردي. هر دؤنه ائشييه چيخيب، قارا داش گؤرنده، »- اي واي، پري اولمايا!«دئيه، دالي چکيلردي. ياخينا کئچمزدي قورخوسوندان؛ ائله بيلردي بيردن ياپيشاجاق بونون قيچيندان. عادتي‌دي گيزلنردي، بو کئچنده بيردن ياپيشاردي قيچيندان. بودا ديک داشلانيب، اونو قووالاردي. بير ياندان دا هر دؤنه داش جومله‌سيني ائشيدنده بير داها پري‌ايله اوينايا بيلمه‌يه‌جه‌ييني دوشونوب، بير يئرده اوتوروب، ديزلريني قوجاقلاياردي .
اوشاقليق ائولرينين يانيندا بير مچيد، اونون دا سول الينده بير قارا داش وارايدي. گؤرهسن او دا قيزداش‌ايدي؟ داشين ايچيندن بير سو بوروسو چيخارديب باشينا شير باغلاميشديلار. گئديب گلن اونو گؤروب سوسوزلاياردي. اييلرديلر، آغيزلاريني دايارديلار شيرين آغزينا، سونرا شيري آچيب، دويونجا سو ايچرديلر. قونشولوغوموزدا بير جوت باجي وارايدي، هئچ کيمه ماجال وئرمزديلر. بيري ايچيب چکيلمه‌ميش او بيريسي گلردي. آخيردا بيزيم سسيميز چيخاردي، چکيلرديلر قيراغا.
»ميشو«نون يولونداکي »جوت باجيلار« اولمايا ائله بو باجيلار ايدي. يادينا گلن اونلار قارا ده‌ييرديلر. اولمايا داشلارين دا طارازي، ناطارازي وار؛ گؤرهسن داشلارين ايچينده ده قارا/آغ، چيرکين/گؤزل، يوخسول/وارلي اولار؟
اؤزو هر بويادا داشي سئوردي. هر يئره گئدنده نئچه دانا دا داش ييغيب گتيريردي، هر بويادا، هر بويدا. هردن اونلاري گتيريب تؤکردي اته‌يينه، دويونجا باخاندان سونرا، بير سيراسيني سئچردي بويون ـ بوغازينا تاخمالي دوزلتديرسين، آمما بير آز باخاندان سونرا تزه‌دن قايتاراردي يئرينه.
گؤرهسن جوت باجيلار ائله اوردا داشا دؤنموشدولر يا ائوده، يادا شير باشيندا داش اولاندان سونرا آپاريب قويموشدولار اورا. آمما »ميانا«دا کي »قيزکؤرپوسو«نو يقين داشا دؤنموش قيزلاردان دوزلديبلر. آخي او اوزونلوقدا قيزي‌هاردان تاپيب اوردا داشا دؤندره بيلرديلر؟ گؤرهسن نئچه دانا قيزداش واردي ايچينده؟ اوندا »قاري کؤرپوسو«نو ده بو کؤرپونون قوجالميش قيزداش‌لاريندان دوزلتميشديلر؟ يا اوندان چوخ زامان اول دوزلدييينه گؤره قاري کؤرپوسو دئييرلر،؟! بلکه او واختلار قاريلاردا داشا دؤنرميشلر؟!
هر ياندا قيزداش وارايدي بونون قافاسيندان باش چيخارديردي؛ هئچ ده بيلميردي کي يالنيز آدلاريندا قيز وار يا دوغرودان قيزلاردان دوزليبلر. فيکريني جايديرماق ايچون لپتاپ‌ينين داليسيندا ايلشدي. شکيللر فايليني آچيب، باشيني قاتماق ايسته‌دي. »باکي« عکسلرينه يئتيشنده »قيز قالاسي« نين اؤنونده دايانيب شکيل چکديردييني گؤروب، يئنه قافاسي داش‌لا دولدو. گؤرهسن بو قيزقالاسيني دا قيزداش‌لاردان دوزلتميشديلر؟! جانينا قورخو دوشدو، بيردن بودا داشا دؤنسئيدي، نه ايش گؤره بيلردي؟ گؤرهسن بونودا باسارديلار بير بينانين ديبينه، آديني دا قويارديلار قيزبيناسي؟! آخي مه‌ير او بئله کؤله‌ني باسديلار ميصرين اهرامينين قات ـ قاتينا آديني قويدولار کؤله بيناسي؟!
يئنه چوخ اوللر اولسايدي داغ ـ داشين ديلي وارايدي، اونلارلا دانيشاردي، ايندي لالام ـ لال، کارام ـ کار. گؤرهسن اينانا دا داشا دؤنموشدو، اونون داش هئيکلي اولارکن نه ايچون تزه‌دن داشا دونئيدي. بلکه او قده‌ر اينانان داشا دؤنسون دئميشديلر کي‌هامينين ايناناسي داشا دؤنموشدو؟ ائله اوندان سونرا هر نه قورتارميشدي. داها قيزلارين اليندن بير ايش گلميردي. او بؤيوکلوک ائيله‌ين زامان هئچ کيم اونون سؤزوندن چيخمازدي. نييه داشا دؤنسون دئيئيديلر!هامييا يئتيشردي. نه قارا بيلردي نه آغ. کندلي، شهرلي، يوخسول، وارليسي دا يوخايدي! يقين ائله داش ائله‌مه‌يي اوندان باشلاديلار. بيليرديلر‌هاردان باشلاسينلار. دوموزي گليب هر نه‌يي وورموشدو بير بيرينه، هر نه‌يي اؤزونه گؤتورموشدو؛ ناغيللارادک اؤز طرفينه چئويرميشدي.... بيردن اؤزونه گلدي. اولمايا پريني ده داشا دؤندريب هر نه‌يين اليندن چيخارتماق ايسته‌ييرلر. داشلاريني بيرده گتيريب تؤکدو اته‌يينه. نه جور اوره‌ييندن گلردي وئرسين يونتالاتسين؟ بلکه پري اولئيدي اونلارين بيري؟
اؤزونو‌هاي کويلو يئرده حيس ائديب، هنده‌ورينه گؤز دولانديردي. پري تخت اوسته اوزانيب؛ آياقلاري داشا دؤنوب؛ آستا ـ آستا داش گؤوده‌سينه ساري يؤنليب، اوسته چيخير، آز قالير بوينونا يئتيشسين. يالنيز باشي ترپه‌نير. چنه‌سينه يئتيشنده قيشقيرير. اوزو قيزيشيب، پريني اؤنونده گؤروب، آغلار گولر قوجاقلايير اونو. قيز داها بسدي، ائله ايناناني دا بوجور داشا دؤندريبلر دا. او داشا دؤنندن سونرا قيز داها بسدي، قيز گلمه قاييت، قيز... آرايا چيخيب.
بيردن سهندين باشينداکي بؤيوجوک قارا داش‌لار يادينا دوشدو. بلکه ده يالاندان دئييرلر وولکان داشلاريدي! نه قده‌ر سئوردي اونلارين اوستونده يئريسين؛ بيرينين اوستوندن آتيلسين او بيريسينين اوستونه. قيش دا آياق قويانمازدي اوستلرينه... گؤرن ايندي گئتسه‌ايدي آياق قويا بيلردي اوستلرينه؟
داها داش‌لا باشي، هن‌له هونو آييرا بيلمير.
ايشيغين يايديغي معلومات اساسيندا عصرآذربايجان راپورونا گوره ، بو داشلارين‌هاميسيني اته‌ييندن تؤکملي‌ايدي؛ آياغا دوروب داشلارين‌هاميسيني يوخاري باشدا، بير گؤزل راحات يئره دوزور…
منبع :