نيسگيل

نريمان ناظيم

بولگه لر سرويسي: گونش ياييلميشدي. گؤي دوم – دورو گؤز ياشي کيمي آيدين بير دنيزه بنزه‌ييردي. يالنيز گون‌باتاردا يئرلشن داغلارين داليندان بوزلو، قارالي بولوت‌لار آرا – سيرا بويلانيردي. گؤروشه تله‌سن سياره‌نين الي هئچ بير ايشه قيزميردي. ايسته‌دي بير ايکي نفر تلسديريجي مشتري‌لري‌نين پارچاسين بيچسين: »ايندي بيشسم آخشام تيکه‌رم. پيس زاددي. ايکي اوش ده‌فه قاپي‌يا گليب، الي بوش قاييديبلار…« دوشوندوکده، پارچالاري قاباغينا تؤکدو. اؤلچولر، يازديغي ان- بوي‌لار گؤزونون اؤنونده قايناشدي. مئتيرين يئرينه صابيني گؤتوردو، صابين‌ين يئرينه قيچي‌ني. اؤلچوسونده ايسه بير ايکي يول چاشدي. آنجاق هوشون بير يئره ييغا بيلمه‌دي: »خلقين پارچاسين کورلارام، قاللام خاطي‌يا …«- دئيه، ييغيشديردي. سونرا گتيريب بير چاديرانين قيراغيني چرخله‌مه‌يه باشلادي. فيکري‌نين داغينيقليغيندان اوچ- دؤرد دؤنه اه‌يري گئتدي. دال با دال خط‌دن چيخيردي. نهايت سارسيلدي؛ حؤصله‌سيزجهسينه چرخه سؤيکندي. ايللر بويو اونون سيرداشي، قولاق يولداشي اولان چرخه. بو چرخ اري‌نين ياديگاري ايدي. سليمان اؤلندن سونرا اونو دوکاندان ائوه گتيرميشدي. آياق چرخي ايدي. سياره اريندن درزيچيلييي اؤيرنميشديرسه ده، آياق چرخي‌يله ايشله‌مه‌ميشدي. آنجاق اونا عادت ائله‌مه‌يي چوخ چکمه‌ميشدي. سليمانا سينيشدييي کيمي اونا دا سينيشميشدي.گئجه- گوندوزو اونونلا کئچميشدي. ظارافاتجاسينا اونو »چؤره‌ک آغاجي« آدلانديراردي. نرگيزين »ننه، بس داوود دادي‌يا مئيوه آلميياجاقسان؟«سورغوسو اونو اؤزونه گتيردي. يئريندن قالخدي. چاديراسين باشينا ساليب، ائودن چيخدي.
مئيوه‌چي عسگر دايي مئيوه‌نين باهالي واختي سياره‌نين مئيوه آلماسين گؤردوکده سوروشدو:
– اولمويا مولاقاتا گئده‌جکسن سياره باجي؟ خياردان آپار، اهواز خياري‌دي!
سياره خيارلاري يوخلادي. عسگر دايي پاکاتي سياره‌يه طرف اوزاتدي:
– داووددان نه خبر؟
– هله کي بير خبر يوخدو.
– داريخما! اولسون. الله قاديردي. ايگيدين باشي بلالي اولار.
– داريخميش نئيلييه‌جئيم عسگر قارداش.
– دوزه‌لر. اوردان دا چيخاجاق. دانيشگاهين دا قورتاراجاق!
اؤزگه بير مشتري‌نين دوکانا گيرمه‌سي عسگر دايي‌نين سؤزون ييغجاملاشديردي:
– بعلي دئديييم سؤز دو .داريخما! منيم ديليمجهده حالين سوروشارسان.
يول اوستونده پارچا ساتان حاج ائلياس دا داوودي بهانه ائله‌ييب سياره‌ني دانيشيغا توتدو. حاج ائلياس واختي‌يلا سياره‌نين ايسته‌ين‌لريندن ‌ايدي. تک او يوخ، سليمان اؤلندن سونرا چوخلاري سياره‌يه ائلچي يوللاميشدي، آمما سياره هاميسينا بير جاواب وئرميشدي: »اوشاقلاريمي بؤيوده‌جم.« – نه‌يئنن بؤيوده‌جکسن؟» سورغوسونون جاوابيندا دا: »اريمين چرخي‌ايله، اليمين صنعتي‌له.« دئميشدي. ائله ده اولموشدو. اؤتن اون ايلده سياره‌نين تيکدييي پالتارلار کاسيبين، دؤلتلي‌نين ياراشيغي اولموشدو. او بو ايشده چوخ شؤهرت قازانميشدي.
– »منيم اله‌ييم ‌اله‌نيب، قلبيريم گؤيده فيريلدايير، بو بي‌حيا کيشي هله ده مندن ال چکمير!…« –
حميده‌گيلين قاپيسينا گليب يئتيشنده، يئني‌دن اؤزونه گلدي. اوره‌يي دؤيونمه‌يه باشلادي. يوخوسو يادينا دوشدو. سياره يوزلر قيز- گلينه پالتار تيکميشدي، پالتاري گئيديريب اونلاري دقتله سوزموشدو، آمما هئچ بيري حميده کيمين اونون اوره‌يينه ياتماميشدي. اؤز محله‌لري‌نين اوشاغي‌يدي. گؤزونون قاباغيندا بويا – باشا چاتميشدي. بونونلا بئله کئچن ايله دک مشتري گؤزويله اونا باخماميشدي. کئچن ايل حميده‌يه تيکدييي بايرام دونون اونا گئيديرنده، اونون گؤزللييي، ياراشيغي سياره‌ني اووسونلاميشدي. او گوندن بري حميده‌ني گلين ائله‌مک آرزوسو سياره‌نين اوره‌يينده يووا سالميشدي. حميده ايسه بو حيسسي دويموشدو. اونلارين هر ايکيسي اؤرک‌لرينده درين و گيزلي محبت بسله‌ييرديلر. هاچان کي داوود سياره‌نين يادينا دوشردي، بير بهانه‌ايله حميده‌گيله گئدردي. حميده‌نين آناسي دا قضيه‌دن هئچ بير خبري اولماديغي حالدا اونو حؤرمتله قارشيلاياردي. آنجاق ايندي ايسه بير دويولماز قووه اونو حميده‌گيلين ائوينه ساري چکميشدي. قاپيني دؤيدو. حميده اؤزو قاپي‌يا چيخدي. سياره حميده‌نين آناسيني سوردو. حميده »آنام گئديب بازارا، بويورون ايچري، ايندي گلر!«- دئيه، سياره‌يه يول آچدي. سياره‌نين باخيشيندان ساچان سئوگي حميده‌نين قلبين تيترتدي. حيطه کئچديلر. دايانديلار. سياره‌نين باخيشي حميده‌‌نين گؤزلرينه تيکيلدي. سونرا گؤزدن گيله‌له‌نن ياش کيمي ياناقلاريندان اؤتوب بوينوندا داياندي. سحر گؤردويو رؤيا گؤزونون اؤنونده جانلاندي. بير آن بوتون وارليغي بير آرزويا چئوريلدي: -»کئشگه يئددي لئره بويونباغي يانيمدا اولايدي!« غير ارادي بير حرکتله قوللاريني آچدي؛ حميده‌ني باغيرينا باسدي. حميده سياره‌نين گؤزلريندن آخان ياشين ايستي‌لييين اؤز بوينوندا حيس ائله‌دي:
– نييه آغلاييرسان سياره خالا؟ نه اولوب؟
– هئش اؤزوم ده بيلميرم نييه، اوره‌ييم توتولوب.
– به بويون مولاقات گونو دئييل؟ سئوينمک عوضينه آغلاييرسان؟!
– حميده…!
حميده سؤزون دالين گؤزله‌‌يه‌رک سياره‌نين آغلار گؤزونه باخدي.
– حميده، گل سن ده بيزينن گئده‌ک!
– من ؟!
– هه !
– مني مولاقاتا قويمازلار کي سياره خالا؛ اوننان کئچنده اوزاقدان باخان نه دئير؟
يارانان سکوت ايچينده حميده اؤز- اؤزونه فيکيرلشدي: »کئشگه گئده بيلئيديم…!« سونرا اؤزون دانلادي: »هاردان معلوم کي داوود دا مني آناسي کيمي سئوير؟…«
سياره ايسه دوشونوردو: »بوگون حتمن داوودونان حميده‌يه راجع دانيشاجام. کئشگه او يول دانيشئيديم. گؤره‌سن بيلير حميده نه قده‌ر ايسته‌ملي قيزدير؟ اولماسا عکسين آپاررام گؤرسه‌ده‌رم.« بير آن سياره‌نين ديزلري تيتره‌دي: »اگر بينمه‌سه، اوندا من نئيله‌رم ؟!«
***
گؤروشه گلن‌لر سيرا ‌ايلا دوستاقخانانين ائشيک حيطينده دايانميشديلار. کيميسي قول‌لاري قوينوندا آياق اوسته فيکره دالميشدي؛ کيميسي ديزلرين قوجاقلاييب يئره اوتورموشدو؛ بيريسي‌نين قولتوغوندا بير بوقچا پالتار، او بيريسي‌نين الينده بير يئمک باغليسي، يا دا بير پاکات مئيوه.
غم – کدر، نيگرانليق ييغيناقدا دالغالانيردي. گؤزلرده انتظار چيرپينيردي. هاچاندان هاچانا پنجره آچيلدي. پنجره‌نين داليندا بير مامور دايانميشدي. گؤزتچي‌نين اشاره‌سيله آد يازديرما باشلاندي: گؤروشچولر بير به بير مامورين يانينا گئدير، اؤز زنداني‌لري‌نين آدين آپاريرديلار. مامور دقت‌له اونلارين سجيللي‌لرين يوخلايير، سونرا گتيرديک‌لري شئي‌لري آليب يانيندا دايانان مامورا وئريردي. بوخچالار آچيليردي. پالتارلار تؤکولوردو؛ قابلامالار، پاکات‌لار يوخلانيردي. سونرا گؤروشچي‌لره ايچري حيطه کئچمه‌يه اجازه وئريليردي. سياره ايسه باغلي‌سي قوجاغيندا دووار ديبينده اوتوروب، نؤبه‌سين گؤزله‌ييردي. دولما قابلاماسي‌نين ايستيسي اونون سانجيلي قيچلاريندا بير نوع توختاقليق ياراديردي.آردي وار
  آردي وار

منبع :