باغري قارا

بولگه لر سرويسي: آجليقدان قورساغيم داراليب. يئمه‌يه بير شئي تاپيم دئيه پاساژدا سوله‌نيرم. آياقلاريم داليمجا سورونور. خورشيد مئيخاناسينين پيلله‌سينده ايلشميش کورميررحيم گؤرمز گؤزويله مني گودن کيمي‌دير.

رقيه کبيري

اوشاقليق يولداشيم نوکام‌ين توکانينا دؤر- بئش آدديم قالميش تورپاق اوزرينده ساريمتيل بير آچارا گؤزوم ساتاشير: »گؤره‌سن هانسي خانباجي‌نين يَخدَني‌‌نين آچاري‌دي؟ يقين ايندي ائوينده شيطانين قويروغونو دويونله‌ييب، آچارين تاپيلماغيني گؤزله‌يير.«
ندنسه بيردن بيره اوشاقليق چاغيمدا آنامين يخدنيندن اوغورلاديغيم قند پارچالاري ياديما دوشور. اووجومو قند ايله دولدوروب، تودابانا کوچه‌يه قاچيب، قند پارچالاريني خيرپاخيرپ چئينه‌يرديم. او قندلرين دادي باشقا بير شئي ايدي. تبريز قفه‌لرينده يالنيز حاجي‌حبيب‌قفه‌چي‌نين قندلري آنامين يخدنينده‌کي قندلرين داديني وئرير. قورساغيمين دارالديغي گونلرين بيرينده قفه‌ده اوتوروب، دالبادال قندي آغزيما آتيب، خيرپاخيرپ چئينه‌يرکن، حاجي‌حبيب‌ين ترسه باخيشيني گؤرونجه قيزاريب- بوزاريرکن آنامين يخدنيندن اوغورلاديغيم قندين داديني وئرير، دئديم. او ايسه بير اووج قند گتيريب، قنداني دولدوروب، دئدي: »نوش‌جانين اولسون حاجي‌مامان، نه قدر گؤيلون چکير خيرپاخيرپ ائله! او گونلرين دادي آغزيندا قالديغينا گؤره سن چوخ خوشبخت آدامسان، من آنامي ايتيرندن بري او گونلرين داديني دا ايتيرميشم، ياديني دا.«کيمي اوزوقيرميزي‌ليقلا، کيمي ايسه لطف- کرامت گؤستره‌رک باشقاسيني شرم قويوسونا سالار. منجه شرم قويوسو يوسف‌ين قارداشلاري اونو آتديغي قويودان داها دا دريندير، يوسف پيغمبري قويودان چيخارديب، عرشه مينديرسه‌لرده، فرش‌دن ده، عرشدن ده کاسيب اولان من عؤمور بويو شرم قويوسوندان چيخماغا اوزوم اولماز.
حبيب‌قفه‌چي‌نين سؤزو مني شرم قويوسونون ديبينه سوخوب، کيچيک ديلخوشلوغومو اليمدن آلدي. او گوندن بري آياغيمي قفه‌يه قويان کيمي حبيب‌ين قندان دولو قندي ميز اوزرينه قويماغينا باخماياراق، قندانا ال اوزاتماق عاريما گلر، دوغوردان دا آتالاريميز دئميشکن، عار ايگيدين بلاسي‌دي. قفه‌ده اوتوروب، آجي چايي قندسيز ايچرکن حاجي‌حبيب صبا راديوسونو قولاغينا داياييب، قولاق آسا-آسا گيزليجه مني ايزله‌ير. صبا راديوسو آلمان استحصالي اولدوغو اوچون حبيب‌ين ايکينجي قيبله‌سي، هيتلر ايسه حبيب‌ين ايکينجي آللاهي‌دير. منسه ديلخوشلوق اوچون آرا- سيرا اويدوردوغوم سؤزلري صبا راديوسونون ديليندن حاجي‌يا ناغيل ائلرم، او ايسه هر گون سحر چاغي قفه‌نين اؤنونده دايانيب، آلمان جبهه‌لري حاقيندا ائشيتديغي خوش خبرلري دوست-تانيش ايله پايلاشار. گونلرين بيرينده صبا راديوسونون غلبه خبرلري يالاندير دئدييمده حاجي‌حبيب دئدي: »آلمان راديوسو يالان دانيشماز.«
دئديم: »حاجي، راديو آدام دئييل‌کي يالان دانيشا بيلسين، ظفر حاقيندا يالان دانيشانلار راديونو اداره ائدن گوبلز ايله هيتلرين آداملاري‌دي!«
حاجي حبيب عاغيللي دلي‌يه باخان کيمي بير نئچه ثانيه گؤزومه زيلله‌نيب، سونرا بيردن بيره منيم اوزريمه چيمخيردي: »کيشي سن کيمسن کي هيتلره يالانچي دئييرسن؟ مه‌ير بيلميرسن هيتلر آريا نژاديندادي، ايرانلي‌دي، اؤزوده کيرمان‌لي‌دي. ساوادسيزين بيري ساوادسيز! هله منه تيفليس‌ده تحصيل آلديغيني پئش چکير، سن نئجه تيفليسده تحصيل آليبسان کي بيلميرسن گرمانيا ياني کيرمان!!!«

 گوله-گوله دئديم: »حاجي، تيفليس‌ده تحصيل آلاندا منه دئييبلرگرمانيا بتهوون آدلي بير بسته‌کارين بسته‌له‌دييي موسيقي‌نين آدي‌دي.«
»بتهوون ده هارانين ايتي-قوردو دي؟« حاجي دئدي.
بتهوون‌ين ‌آلمانيالي بير بسته‌کار اولدوغونو دئيينجه حاجي‌حبيب نيشخند ايله آرتيردي: »سنين او تيفليس ساواديوا بير باغ سوُزو دا وئرمزلر، سنين هله خبرين يوخدور هيتلر ظفر چالاندان سونرا بِرلني عئيني کيرمان خريطه‌سي کيمي تيکه‌جک. واللاهي او بسته‌کار بئله گرمانيانين هارا اولدوغونو سندن ياخشي بيلير. حئيف تيفليسده حرام ائله‌دييين د‌ده‌وين پوللارينا، سنين بير بسته‌کارجان بئله هوش-باشين يوخدو!«
بيلميرم ‌حبيب‌قفه‌چي آنامين يخدنيندن اوغورلاديغيم قندلرين ماجراسيني ائشيدندن بري قندانين دولو قالديغينا گؤره سئوينر يوخسا آغزيمين اوشاقليق داديني مندن چاليب، مني ده اؤز گونونه سالديغي اوچون اؤيونور!
اؤزلويومده قوي شيطانين قويروغو دويونلو قالسين دئييب، آچاري آياقلاييب، کئچيرم. نوکام‌ين توکانينا بير آدديم قالميش پيتي اييسي هوشومو باشيمدان آلير. آياق ساخلاييرام. قورساغيمي آلداديب، اونو پيتي اييي‌سي‌له دويوروم دئيه، دريندن نفس آليب، پيتي اييسيني هاوادان قاپيرام، آنجاق منيم آج قورساغيم پيتي اييسي‌ايله آلدانان بير قورساق دئييل. بيردن بيره عاغليما بير فيکير چاتير. آرخاما دؤنوب، آياقلاييب، اوزريندن کئچديييم آچارا باخيرام. آج قورساغيمين دويونو او آچار ايله آچيلا بيلر دئيه در حال گئري دؤنوب، آچاري تورپاق ايچيندن گؤتورورم. آچارين توز-تورپاغيني شالواريملا سيليرکن، نوکام‌ين توکانينا گيريب، آچاري گؤستريب، اونون مشتري‌لريندن بيريسي‌نين اولوب- اولماديغيني سوروشورسام نوکام يوزه‌يوز مني سوفرا باشيندا ايلشديريب، پيتي‌يه قوناق ائده‌جک دئيه عاغليمدان کئچير. کورميررحيم اوتوردوغو يئردن منه زيلله‌نيب. اونو سايمادان نوکامين توکانينا ساري گئديب، قاپيني آچيرام. ايچري کئچمه‌ميش گئري دؤنوب بير داها کورميررحيمه باخيرام. او ايسه يئنه ده گؤرمز گؤزلريله مني گودن کيمي‌دير. نوکام آرخاسي قاپييا ايلشيب، يئمه‌يه مشغول اولدوغو اوچون قاپينين آچيلديغيني باشا دوشمور. ايره‌لي گئديب، گئتمه‌مکده ايکي‌هاوالي قاليرام. بير آن يئنه حبيب‌قفه‌چي‌نين قندان دولدورماسي ايله گيزليجه مني ايزلمه‌سي ياديما دوشور. بير آدديم ايره‌لي آتيرسام يئنه ده شرم قويوسونا دوشه‌بيلرم دئيه، درحال آدديميمي گئري آتيب‌، اؤزلويومده دئييرم: »اولان بير دفه بال يئييب، بلايا قالدين، ائله ائلمه بير اؤونه پيتي اوچون اوشاقليق يولداشيوين حؤرمتيني ده الدن وئره‌سن، پيتي‌ني عاغليندان چيخارت، سور گئت داش‌ماغالارا، بلکه اوردا آند-‌قسم‌له اليندن توتوب ناهارا قوناق ائده‌جک بيرينه راست گلدين.«
آچاري اووجومدا سيخيرکن، يولوما دوام ائديرم. ديليم آجييا چالير سانکي دالاغيم ديليمين اوزرينده پارتلاييب. پاساژدان چيخيب، پهلوي خيابانينا آياق قويدوغوم آن باش منيم، باش حميد ‌ديوانين5 حميد ديوان شيطان شاپالاغي? کيمي جيپ ماشيني‌نين‌کاپوتونا دايانيب، قولچوماق آجانلاري ايسه بيري ساغيندا، بيري سولوندا دوروب. بير آن حميد ‌ديوانين اؤنونه آتيليب، »پورسوق«? دئييب، اونو ديسکينديرمه‌ييم گلير، آنجاق عسگر‌قيزيل‌ديشين قورشاغيندان آسلانميش دست‌بندي گؤرونجه ديوار ديبنه سوزولوب، پهلوي خيابانينا دؤنمک ايسته‌دييمده حميد‌ديوانين سسيني ائشيديرم.
»حاجي‌زاده وايستد!«
اؤزلومده ميزيلدانيرام: »اولان جد-آبادين وايستد، بوينويوغون آجانلارين وا ايستد، حاجي‌زاده سنين باشيوا نه داش ساليب، وايستد؟!«
هر هانسي بير قاچاق يولوم اولماديغيني باشا دوشوب، ديوار ديبينده آياق ساخلاييرام. او ايسه بيغلاريني بوروب، منه ساري گلير. آدديم آتيرکن سانکي پيوه8 بوشقاسي‌دير چالخالانير. بير آدديم منه قالميش دئيير: «حاجي‌زاده تفتيش بدني اولورن، حسين وکيل صورتجلسه يازيرن!»
عسگرقيزيل‌ديش اييليب، حميد‌ديوانين قولاغينا بير شئ‌لر پيچيلدايير. حميدديوانين ياناقلاري پؤرتوشوب، آجانين اوستونه چيمخيرير: »نه دئييرن تفتيش‌ين ياخشيليغي يوخ؟ يک‌کلام، دئديم حاجي‌زاده تفتيش بدني اولورن!«
عسگر قيزيل‌ديش جيب‌لريمي آختاريرکن حسين‌وکيله اوز توتور:»ياز بير قطعه بورون دسمالي!«
قطعه‌ سؤزونو ائله ايچدن دئيير سانکي جيبيمدن بير قطعه يوزلوک خالچا چيخارديب. حسين‌وکيل ايسه الينده‌کي دفترين اورتاسيندان ايکي برگ کاغاذ جيريب، آراسينا کپيه برگه‌سي قوياندان سونرا اونون دئديکلريني يازير، منسه بويلانيب اونون نه‌لر يازديغينا باخيرام.
»بويون دسمالي يوخ، بورون دسمالي!« دئييرم.
عسگرقيزيل‌ديش آرتيرير: »اوچ گيله اوشنو ويژه، ياريم جعبه حب سينا.»
حسين‌وکيل اونون دئديکلريني دوغرو-درست سندلشديرسين دئيه گؤزومو کاغذدان آييرميرام، قورخورام بو سندلرله يئنيدن منه پاپيش تيکسينلر. يولدان کئچن‌لرين بير نئچه‌سي بيزي دؤره‌له‌يير. کورميررحيم تؤوشه- يه‌تؤوشه‌يه يولدان يئتيشيب، حسين‌وکيلين يازديغي کاغاذا زيلله‌نير. عسگرقيزيل‌ديش ايسه دونن آخشام حاجي‌حبيب‌ين قفه‌سينده اوشنو کاغذي‌نين اوزرينده يازديغيم هادارن-پاداراني زيقّيلتيلا اوخويور: »ويلون ويلونم کرد، وارد زندونم کرد، حالا که ميري به غربت، آسياوش کن بد مروت!«
حسين‌وکيل دئيير: »ائحمال-ائحمال اوخو يازا بيلم!«
عسگرقيزيل‌ديش پاپروز کاغاذيني حميدديوانا ساري اوزالديب، آرتيرير: »قوربان باش تاپماق اولمور، دئيه‌سن رمز ديلينده يازيليب، خط ده حاجي‌زاده‌نين اؤز خطي‌دي، من اونون دستخطيني تانيييرام.«
حسين‌وکيل يئنه اونون دئديکلريني قلمه آلير. حميد‌ديوان ايسه کاغاذي آليب، اؤزو اوخويور: »ويلون؟ ويولون؟ وارد تهرونم کرد ديگر چه صيغه‌اي است؟«
»قوربان من صيغه-ميغه‌دن باشيم چيخماز، دونن آخشام قفه‌ده عاغليما گلن هاداران-پاراندي، کاغاذيم اولماديغينا گؤره اوشنو کاغاذيندا جيزماقارالاديم. حاجي‌حبيب قفه‌چي ده شاهيد ايدي، اينانميرسان گئت حاجي‌دان سوروش، قلمي ده اوندان آلديم.«
عسگر قيزيل‌ديش يئنه ده يازيلارين رمز اولدوغونو وورغولايير. تله‌يه ‌دوشموش سيچان کيمي اونلارين قارشيسيندا دايانديغيم اوچون اؤزومدن آجيغيم توتور. اؤفکه‌مدن اووجومو سيخيرام. يئردن تاپديغيم آچارين اوجو اليمين ايچينه باتير. اووجوما آچيب، زوققولدايان يئرينه باخاندان سونرا يئنه يومورام.
حميد‌ديوان اوشنو ويژه‌ کاغاذيني گؤزومون قاباغيندا يئلله‌ديرکن دئيير: »سن دؤولت ايله مزاح ائله‌رن، دادگاه دا جوابيني وئره‌رن!«
»قوربان نه مزاحي؟ من کيم، دؤولت کيم؟ منيم دؤولت‌نن نه ايشيم وار؟ من دونن داريخقانليقدان او کاغاذي جيزماقارالاميشام.«
»دئه گؤروم سن ايندي نه ايش گؤره‌رن؟«
»قوربان من چؤره‌ييمي دللاليق‌نان قازانارام.«
«بير يوللوق دئنه وطن دلالليغي ائله‌رن دا.«
»قوربان، خدمتيزه عرض ائله‌ييم آچميشام ري‌ده گئنيش بير ماغازا، چوخ اوجوز قيمته هر شئي ساتيرام، آي آلان مملکت ري ساتيرام دئيين آدامين آدي ميرزه‌علي‌اکبر صابيردي، منيم آديم ايسه ميرزه‌باغير حاجي‌زاده‌دي، اوسته‌ليک منيم رحمت‌ليک دده‌مدن بير عقيق اوزوک ميراث قاليب، ال-آياقسيزليقدان نئچه ايلدي اونو ساتانميرام، وطني هاردا ساتاجاغام، کيمه ساتاجاغام؟«
حسين‌وکيل سؤزومون آراسينا گيرير: »قوربان، ائله‌بيل اووجونون ايچينده بير آيري رمز ده گيزله‌ديب.«

حميدديوان اووجومون آچماغيني امر ائدير. اووموجو آچيب، آچاري حسين‌وکيله ساري توللاييرکن دئييرم‌: »بونو دا ياپيشدير او بورون دسمالي‌نين يانينا.«
حسين‌دن اؤنجه کورميررحيم اييليب آچاري يئردن گؤتورور:»قوربان من خورشيد قاباغيندا اوتورموشدوم خوروز کيمي تورپاغي ائشه‌له‌ييب بو آچاري چيخارتديغيني اؤز گؤزومله گؤردوم.«
»کفن سويان بس دئييلدي، قازيق قازان دا يولدان يئتيشدي!« دئييب، کورميررحيمين اوزرينه يوگوردورم: »اولان دئه گؤروم سن او کور گؤزونله منيم تورپاق ائشلمه‌ييمي نئجه گؤردون؟«
عسگرقيزيل‌ديش آچاري اونون اليندن آليب، اويان-بويانينا باخيرکن آچارين هانسي قاپييا عاييد اولدوغونو سوروشور.
»رحمت‌ليک آنامين قند يخدني‌نين آچاري‌دير، يخدني ده آنامين مئيتي ايله بيرليکده گؤموبلر.«
حميدديوان نظميه‌نين تامينات اداره‌سينه آپاريلماغيمي امر ائدير. گؤزله‌ييرم عسگرقيزيل‌ديش قورشاغينداکي دست‌بندي چيخارديب، اليمي الينه دست‌بند‌له‌سين. ندنسه مني دستبندلمه‌ميش جيپه مينديريب، اؤزلريله نظميه‌يه آپاريرلار.
آياغيمي تامينات اداره‌سينه قويدوغوم آندان بري سسيمي باشيما آتيرام: »آي عدالت، آي قانون، آي مجلس، آي بيرلشميش مليّت‌لر، گلين گؤرون من دوز يولومدا گئديرکن بونلار نييه مني توتوقلاديرلار؟ آي عدالت، هارداسان، گل گؤر بونلار منيم کيمي يازيق آدامنان نه آلاجاقلاري وار؟«
سسيم اؤز باشيما دوشسه ده دورمادان باغيريب، چاغيريرام. قورساغيم بئله باغيرتي سسيمدن آجليغيني اونودوب.
هاندان هانا عسگرقيزيل‌ديش مني حبس ائله‌ديکلري اتاقدان چيخاريب، نظيمه‌ رئييسي‌نين اوتاغينا آپارير.
»حاجي‌زاده، اوشنو پاکاتي اوزرينده يازديغين يازيلارين رمز اولوب- اولماديغيني اثبات ائدينجه بير نفر سنه ضامين اولماليدي، آنجاق تبريزدن کنارا گئده‌نمزسن.«
درحال دئييرم: »حسن قره‌بيغا دئيين گلسين منه ضامين اولسون!»
عسگرقيزيل ديش دئيير: »قوربان حسن قره‌بيغ ضامين اولانماز، اوندان دا گزارش وار، نئچه گون قاباق خورشيد مئيخاناسيندا دئييب روسلار گلير. اونون اؤزونه ضامين لازيمدي.«
ايکي آياغيمي بير باشماغا تَپيرم:»منيم اوندان سورا آيري آداميم يوخدي، دئيين او گلسين، ايندي کي اوندان دا گزارش وار او منه ضامين اولسون من ده اونا.«
نظميه رئيسي بيراز دوروخوب سونرا باشينين اشاره‌سي ايله اتاقدان چيخاريلماغيمي امر ائدير.
حسن‌قره‌بيغ گلينجه مني يئنه حبس ائتديکلري اتاقدان چيخارديب، بيزي بيرليکده نظميه‌رئيسي‌نين اتاغينا آپاريرلار. رئيس قاشلاريني ييغيب دئيير:»حسن گئنه نه ايش‌لر چئويريسن؟ ائشيتميشم خورشيد‌ده دئييبسن روسلار گلير.«
حسن دئيير:»قوربان هله من ده دئييرم بس نه اولوب. هاني او تلفون؟«
نظميه رئيسي تعجوب ايله دئيير: »تلفونلا نه ايشين وار؟«
»قوربان، ايسته‌ييرم تلفون ائله‌ييم روسلارا دئييم گلمه‌سينلر!«
نظميه رئيسي گؤزونو يومور، آغزيني آچير: »کؤپح اوشاغي، قورومساقلار، بورا ماتي مئيخاناسيدي‌مي منيم‌له باش-باشا قويورسوز؟«
عسگرقيزيل‌ديش بيزي رئيس‌ين اتاغيندان چيخارديب، حسني ده منيم‌له بيرليکده دوستاقلايير. باشيما گلن‌لري حسن‌قره‌بيغا ناغيل ائله‌ييرکن دوستاغين قاپيسي آچيليب، يئني‌دن بيزي نظيمه رئيسي‌نين اتاغينا قايتاريرلار. آنجاق رئيس اتاقدا دئييل. عسگر قيزيل‌ديش ايسه ضمانت کاغاذلاريني ميز اوزرينه قويور. چيلتيک چاليب، اويناماغيم گلير، سانکي ننه‌م قند يخدني‌نين آچاريني اووجوما قويوب.
بارماغيميزي ضمانت کاغاذينا باسديقدان همن سونرا، استکاني استکانا چالان کيمي حسن‌له من استامپ ايله قارالانميش بارماقلاريميزي بيربيرينه چاليريق، عسگرين آغزي بيزه آخيب، کؤپک ديش‌لري آغزيندا پاريلدايير…
 سون

منبع :