بير حئکايه حئکايه‌سي
بير حئکايه حئکايه‌سي
1400/09/07
بولگه لر سرويسي:يازي‌لارلا دولو، چيرکدن آغ رنگي سارييا دونموش توکوک ديوارلي صينيفدا، قارا مغنعه‌لي قيزلار، پاسلانميش، اوست‌لري ياديگارليق قازينتي‌لارلا دولو نيمکت‌لر داليندا سيخيشيب اوتورموشدولار.
ريحانه پورغني
بولگه لر سرويسي:يازي‌لارلا دولو، چيرکدن آغ رنگي سارييا دونموش توکوک ديوارلي صينيفدا، قارا مغنعه‌لي قيزلار، پاسلانميش، اوست‌لري ياديگارليق قازينتي‌لارلا دولو نيمکت‌لر داليندا سيخيشيب اوتورموشدولار. مبادا معلم تخته قاباغينا چاغيرا دئيه، هره‌سي گوزلريني بير طرفه تيکيب، معلم‌له گوز-گوزه گلمک‌دن چکينيرلر. بير تک اونون دالغالي، جوشغون گوزلرندن سئواي. خانم قراجه‌داغي قارا پارلاق ساچ‌لاريني مغنعه‌نين آلتينا تيخيشديريب، باخيشيني گوزلوگونون اوستوندن صينيفدا گزينديرير. او گوزلريني معلمين اوزونه زيلله‌ييب، صبيرسيزجه خانم قراچه‌داغي‌نين ايري گيله‌لي قارا اوزوم کيمي أتلي، پارلاق دوداق‌لاري‌نين آراسيندان آدي‌نين چيخماسيني گودور. سوبانين ايستي‌سي ايله قيزلارين نفسي بيرلَشيب، بورکولو صينيفا مورگولنمه هاواسي چوکموشدو.
– پاشايي، دور پنجره‌لردن بيريني آچ. معلم دئدي.
قيزلازين بيري صينيفين او تاييندان: »خانيييم، سن الله قوي صبا گليب اينشاسين اوخوسون. هامي‌نين يوخوسو قاچار، بيز ده پنجره قاباغيندا سويوقدان دونماريق.« گولوشمه سسي گويه قالخدي. دوغرودان دا، او يازي‌لاريني اوخوياندا سانکي اطرافينداکي هاوا دالغالانيب، يوخو بورکوسو صينيف‌دان داغيلاردي. صينيف جانلانيب، چيرک باسميش ديوارلار بئله ايشيلداييردي. گوزلريندن داها دنيز يازي‌لاري، اوزمک هوسي وئريردي اينسانا، خيال دالغالارينا توتوشدوروب آپاريردي اينساني.خانم قراچه‌داغي گولومسه‌نه‌رک: »اينشا اوخوماقدان قاچماغا ياخشي بهانه تاپيبسيز» دئدي، سونرا «صبا اينشاسين اوخوماقدان قاباق اونا و سيزلره بير ياخشي خبريم وار، صبانين اوخول‌لار آراسي حئکايه ياريشماسينا گوندرديگي حئکايه، بيرينجي مقامي قازانيب. بو گون وزارتخانادان بير مکتوب گليب، صباني تهرانا، اودول توره‌نينه دعوت ائديبلر. صبا، سني اورک‌دن تبريک ائديرم.«
کيلاسي آلقيش سس‌لري بورودو. صبا سئوينج‌دن قيشقيريب، معلمين قوجاغينا آتلادي. اوزونه حاکيم اولا بيلمه‌ييب معلمين اوزونه اوپوش‌لر ياغديردي. خانم قراچه‌داغي دوروخاراق، صباني اوزودن آييريب، »ياخشي‌دا اوزوندن چيخما، ايندي اينشاني اوخو گورک بوگون بيزه نه يازيبسان«
او گون‌لري خاطيرلاياراق گوزلرينين دنيزيندن، دوداق‌لارينا گولوش‌لر آخير. سويو آچيب اوزونه بير آووج سو سپير، ائشيگه چيخيب سالونون کونجونده‌کي کيتابليغين أن اوست قاتيندان رنگي سولموش أسکي بير دفتر چيخاردير. آتاسينين بو دفتردن خبري يوخويدو، يوخسا بو دفتر ده او کيتاب‌لار کيمي ياغيش آلتين‌دا داغيليب يوخ اولاجاقدي. او پاييز آخشاميندان بير بو دفتر قالدي بيله‌سينه، بير ده اوره‌گينه دامغالانميش کدر داغي. بوتون شعرلري، حئکايه‌لري، يازي‌لاري بو دفترده يازيلميشيدي. يازيچي اولماق هوسي بو دفتري يازا-يازا اوره‌گينده کوک سالميشدي. اما نه يازيق‌کي قوجامان بارلي بير آغاج اولمادان، کوورک بير فيدان اولاراق کسيليب، قورودولدو.
دفتري تومارلاييب، بيراز ورقله‌يندن سونرا، بوکوب يئرينه قويور. ساعاتا باخير، بيري اون بئش دقيقه کئچير. کئچيب سالونون بوجاغينداکي موبلون اوستونده اوتورور. يانينداکي آباژورون ايشيغيني يانديرير، ياشيل ايشيق آباژورون اطرافيندان ساللانان کريستال‌لاردا مين پارچايا بولونور. موبايليني ألينه آليب، تئلئگراميني آچير. بير حئکايه کاناليندان، حئکايه اوخوماغا قرار وئرير. بلکه يوخو گوزلرينه دولا. ايلگي‌سيني چکن بير حئکايه تاپماق اوچون کانالي آلت-اوست ائدير، بارماغي ايله اسکريني اوسته چکير، يازي‌لار سرعتله گوزونون قاباغيندان کئچير، بيردن بير يازي گوزونه ساتاشير،»قيسا حئکايه ياريشماسي«. بير ادبي درنک طرفيندن بير اعلان وئريليب، مهر آيي‌نين سونونا قدر زماني وار، سئچيلميش اثرلر بير کيتابدا ياييملاناجاقدي. بو ياريشما اون‌بئش ايل بوندان قاباق اولسايدي، هئچ ترديد ائتمه‌دن اونا قاتيلاردي، اما ايندي نئجه؟ کوکسونو اوتورور. أل‌لريني گوزلرينين قاباغينا توتور. گونده‌ليک ائو ايش‌لريندن ظرافتيني ايتيرن بو بارماق‌لار بير داها قلم توتا بيلرمي؟ بئيني نئجه؟ او ياراديجيليق هله ده او بئيينده ديري‌ديرمي؟ قلبينده‌کي حيس‌لر هله ده اوقدر دورو و ايشيق‌ديرمي؟
بالکونون قاپي‌سيني آچير، ملايم بير أسينتي، آي ايشيغي گوزلرينده رقص ائدن تور پرده‌ني اوخشايير. پاييزين سرين هاواسي اوزونه جالانير. قونشو ائولرين پنجره‌لري يوخودادير، بير تک اونون ياشيل ايشيغي اونونلا يانير. مطبخه گئديب سماوري يانديرير، بير چاي دمله‌ييب، ايستکانا سوزور. بير دفتر و قلم گوتوروب بالکونا چيخير. سايريشان اولدوزلارين آلتين‌دا، آغ ماسانين داليندا اوتورور. يئل بالکونون مَهَججرينه دولاشان تيترک، احتراصلي سارماشيقا ساريليب قولاغين‌دا محبت ماهني‌لاري پيچيلداييردي. درين بير کوکس آليب، ديبچکده‌کي شمعداني‌لرين قوخوسونو ايچينه چکير. او يوخوسوز گئجه‌لرين حئکايه‌لريني کاغاذا آخيتماق وقتي گلميشدير. قلم أل‌لرينده تيتره‌يير، دامارلانميش أل‌لريندن، سوزجوک‌لر ياواش-ياواش آخيب آغ کاغاذي جانلانديرير. اون‌بئش ايلليک حسرتين باشي آچيلير، دورمادان يازير. او حسرت دامغاسيندان يازير، بو گونه‌دک قلبي‌نين گيزلي صانديقدا ساخلانان آرزولاريندان يازير.
سوپورگه‌چي‌نين خزل‌لري سوپورمک سسي‌ايله اوزونه گلير، گونشين قيزيل ايشيغي گوزلرينين ماوي دنيزينده چاخناشير.
سون کلمه‌لري يازير، حئکايه‌سي‌ني بيتيريب، قلمي يئره قويور. دوداغيندا بير گولوش، قيزيني اويانديرماغا گئدير
منبع :