پرايد
پرايد
1400/09/21
بولگه لر سرويسي: خيابانلارلا ال به ياخا اولماقدان جانا گلميشم، يازيق خيابانلار ماشينلارين اياغي آلتدا نفس آليرلار، کوچه¬لر داريخير، قاپيلار قاپالي قالماقدان يورولوب، تورپاق آياقلاري آياقلايير، توز گؤزلرين قوناقليغيندا چاي پايلايير، اؤلوم توزو آغاجلارين اوست- باشينا بله¬نيب، آغاجلارين کؤکسونه ميسمارلانميش يازي اوخونمور، بو دورومدا کهنه پرايد منيمله مسافرکشليک ائدير.
حسن_عجبشرلي
بولگه لر سرويسي: خيابانلارلا ال به ياخا اولماقدان جانا گلميشم، يازيق خيابانلار ماشينلارين اياغي آلتدا نفس آليرلار، کوچه¬لر داريخير، قاپيلار قاپالي قالماقدان يورولوب، تورپاق آياقلاري آياقلايير، توز گؤزلرين قوناقليغيندا چاي پايلايير، اؤلوم توزو آغاجلارين اوست- باشينا بله¬نيب، آغاجلارين کؤکسونه ميسمارلانميش يازي اوخونمور، بو دورومدا کهنه پرايد منيمله مسافرکشليک ائدير.
مسافرلر يوخ، خيابانلار مني يولا وئرمير. تيخاج خيابانلارا گؤز وئرسه ده، ايشيق وئرمير. دؤرد نفر يالوار- ياخارلا مسافر مينديرميشم، خط واحدلرين آرخاسيندا گازوئيل توستوسونو اودقونوب، دوغال حيات يادداشيمدان سيلينيب، اؤزومه، خيابانلارا، پرايديما يازيغيم گلير.خيابانلار- خيابانلار سيز آغلاشاندا چؤپلو شيريني يئرينه، دوز يالاديب ساکتلشديرمک ايسته¬ينلر نئچه ايللردير باشينيزا اويون قالمايب آچماسينلار، بيزه ده يولچولوق، ديلنچيليک دونو تيکيب، مثلاً ياشاديبلار، من ايسه ياشاماق يوخ، پرايديملا بيرليکده دؤرد ال- اياق ايمکله¬ميشم.پرايديم قوجاليب، اؤزومو هله گنج حساب ائتمک ممکن¬دور، ايشيمي آواندا سالا بيلميرم.ايل بايراميندا نه ائيلديمسه آناما بير دارايي آليم ييغديغيم پوللار اونون دگريني اؤده¬مدي، (قيز بس دي) بازاريندا نيشانلاديغيم شال نئچه گون مني گؤزله¬ديکدن اوجوز- اوجوز ساتيليب کوسوب گئتدي.
اونو دئيرديم: مکتبي بيتيرديکدن آتا- آنام بويوما اوخشاديلار: »چاليش يونيورسيته داخل اول همي اؤزونه بير گون آغلا همي ده بيزه باشي اوجاليق گتير.« اونلار باشي اوجا اولدوقلاريندان خبريم اولمادي، آنجاق من دوزونو دئسم هئچ گون گؤرمه¬ديم، ائله اونون- بونون کؤلگه¬سينده دالدالانديم.
البته بيليگيم آرتدي، اما ايش-گوجوم اولمادي، هئچ سوراغيمي دا، توتماديلار، بئکارليقدان داريخديم. آتام اداره¬لريندن آلديغي »بازنشستگي« پاداشي منه باغيشلادي، اونونلا بئله بو قوجا پرايدي بيزه گلين گتيرديلر.خيابانا چيخارتديقدا هامي منه ريشخندله باخيب کئچديلر. »گئده نئچه ايل درس اوخوياندان سورا شوفر اولدو«، »بئ فراستين بيري، بئ فراست«، »باشيوا داش ساليم« اوزومه دئميرديلر ها! آنجاق باخيشلاري منه هر نه¬يي آنلاديردي.ياواش- ياواش، من ده قوجاليرديم، يازيق پرايد اپريييردي، مسافرلر الدن دوشوب، آوارا خيابانلارا قوناق اولدولار.
دونن آخشام بير سوروجويه توش گلديم، بو دؤنه من اونون مسافري اولدوم. ناغيليني منه دانيشدي: قيرخ ايل عمر کيتابيمدان واراقلاميشام، بو ماشيني دا نئچه ايللر باشقا- باشقا شهرلرده فهله ايشله¬ديکدن آلميشام، اوتانديغمدان تبريزين ساعات قاباغيندا دورماقدان چکينميشم، آخي بيليرسن ساعات قاباغي منه فهله مئيداني يوخ، بلکه تبريزيمين کئچميش آنلاريني يادداشيمدا جانلانديرير.
بورا تبريزين دؤگونن اورگي، قالاق- قالاق يانديريلان کيتابلارين تونقال يئري اولوب. چوخ ماراقلي دانيشيردي آديني سوردوم »سعيدم« دئدي.
سعيدين مسافري بير من، بير ده آرخادا بير ياشلي وطنداش ايدي. سعيدين وضعيتي منيمله عيني استقامتده آدديملاييردي. آرخادا اگلشن آغا آغزيني آچيب: ايکي قيز بير اوغلان دا، من بؤيودوب اوخوتموشام، اونلار دا، سيزين وضعيتينيزي کئچيريرلر. الله اؤزو کؤمگيميزه دورسون، پيس يئرده گونو باتيرميشيق ديييب ائندي، آز آرا آچماميشديق من ده ائنيب، پرايديمين قاپي قاباغيندا چتيندن نفس آلديغيني دويدوم.
منبع :