درين بير يارا ايزي

بولگه لر سرويسي: باياقدان کيمين‌سه گؤزلري‌نين اوزه‌ريمده اولدوغونو حيس ائديرديم. گؤزلري تمامي‌‌ايله اوستومده دولاشيردي. آغير باخيشلاري‌‌نين آلتيندا نفسيم چيخمير قاينار سويا اوخشار بير شئي آخيردي بوتون جانيما.

سولماز جمالي

بولگه لر سرويسي: باياقدان کيمين‌سه گؤزلري‌نين اوزه‌ريمده اولدوغونو حيس ائديرديم. گؤزلري تمامي‌‌ايله اوستومده دولاشيردي. آغير باخيشلاري‌‌نين آلتيندا نفسيم چيخمير قاينار سويا اوخشار بير شئي آخيردي بوتون جانيما.
باشيمي قالديريب سارايي باشدان-باشا سوزدوم. گؤي گؤز قادينين گؤزلري هاردانسا سارايين او باشيندان گؤزلريمي چکيب چيخاريردي.
او ساچي‌‌نين اوجونو بارماغي‌‌لا اوينادا-اوينادا گؤي گؤزلريني طعنه‌ايله من‌له فاطيمه‌نين آراسيندا گزديريردي؛ نه‌سه دئمک ايسته‌ييردي.
ايچيم اوچونوردو. اليمي قالديريب دوداغيما توخوندوم.
 هميشه دوداغيمدان، بورنومون اوجوندان اوچوق چيخماميشدان قاباق بدنيمي تيتره‌‌ييش ساراردي.
بيرآزدان گؤزلريمي جانيمي اورکودن گؤزلردن قوپارماق ايسته‌ديم آنجاق؛ پيچيلتيسيني ائشيتديم: ارووين اويناشينان ديز-ديزه اوتورماغين دادي نجوردو؟
چنه‌سي‌نين آلتيندا قالماقدان کئييه‌‌ن اليني اووشدورا-اووشدورا اوشاغي‌نين بورون سويونو دونونون اته‌يي‌له سيلن قادينا باخدي.
 اوشاغي‌نين قولوندان توتوب شيدتله سئلبه‌له‌دي. بارماغينداکي يئکه قاش اوزويو اوشاغين آلنينا چيرپيلدي.
 اوغلان اوشاغي چيينلريني چکيب يوماغا دؤنرکن اوتانا-اوتانا هنده‌ورينه باخدي؛ اوزونتودن چنه‌‌سي تيتره‌يه-تيتره‌يه آناسي‌نين قوجاغينا سيغيندي.
آينازا ساري دؤنوب موبايليني ايسته‌دي؛ گئجه بويو شکيللري، فيليم‌لري اونون موبايلي‌لا چکميشديلر.
گالريني آچيب ايلک ويدئونون اوزه‌رينه توخوندو؛ قورويوب قالدي.
 ايزله‌يه-ايزله‌يه اليني اوزونده گزديريب بوينونا ساري آشاغي آپاردي. بوينو يوخ ايدي؛ نئچه قات پييلي، کوپپوش بوغازيندا الي گزدي.
ويدئونون ائتکيسينده اليني باشينا ساري آپاريب توخوندو؛ يئکه تاجي يئنيجه بالياژ اولونموش ساچلاري‌نين اوزرينده پار-پار پاريلداييردي.
 بوينونا تاخديغي جوربه جور بويون-باغي‌لاري گؤردو، باشيني اييب کؤکسونده پاريلدايان قيزيللاري گؤردو.
او بوغولوب قالميشدي؛ نفسي قاراليردي. گؤزلريني بير آن بئله ايزله‌دييي ويدئودان چکميردي؛ يئرينده اوينايا-اوينايا فاطيمه ايله بيرليکده ادا چيخاردان سانازا خئيلک باخدي. سانکي اؤزونو يوخ باشقا آدامي ايزله‌‌ييردي.
آغزيني آچيب نه‌سه دئمک ايسته‌ديکده چوروک ديشلريني، گؤي لنزين اوجباتيندان قيزاريب سولانميش گؤزلريني موبايلين گوزگويه چئوريلميش شوشه‌سينده گؤردو. گؤزونو موبايلدان آليب توپپوش اللرينه، بودلارينا باخدي.
گؤزل ماسکه‌لر دوشوردو آرتيق، چيرکين ايچ‌لر، اوزلر اوزه چيخيردي.
 ايزله‌دييي گئرچک سانازدان اييره‌‌نيردي.
موبايلين اکراني يانيب واتساپين مئساژ قوتوسو ياشيل رنگي‌له گؤز وورارکن »دينق دينق« سسي ده قووزاندي. گؤزلري تکجه بير آنليق صفحه‌يه ساتاشدي …
کيشي‌لردن بيرآز آرالي اولسالار دا نفس‌لري‌نين سسينه کيمي دويوردو. اوره‌‌ک‌لري‌نين نئجه چيرپينديغيني ائشيديردي‌.
 او آندا گؤزله‌‌شن گؤزلردن باشقا هئچ بير شئي ديقتيني جلب ائتميردي.
 باش-قولاغي اوينايان گؤزلر اؤز-اؤزونه توشلاشيب باخيشلار قوجاقلاشيردي. او باخيشلار قيسا و گيزلين ده اولسا بير بيري‌له نه‌لر کي دانيشميردي! نه‌لر کي ياشاميردي!
گون بويو قادينين کيشي‌دن نه قدر گيزلنمه‌سي آرالانماسي اولسا دا توي شنليکلري‌نين سون بير ساعاتيندا هر نه ترسه ايدي.
کيشي‌‌لرين سارايا گلمک خبريني ائشيدن کيمي هامي جوموب لئچه‌کلريني اؤرتدو.
 آز قالسين گئيديکلري ياريم مئتيرليک دونو چيخاريب چيلپاق قاليب آنجاق ساچلاريني اؤرته‌جکديلر.
گلين آياغا قالخيب آرخاسيني چئويره‌رک گول دسته‌سيني سوباي قيزلارا ساري آتماق ايسته‌دي.
 دؤردوموز ده اونا ساري يئريييب بير عؤمور خوشبختليک و قوشا قاريمالاريني آرزولاديق.
گؤزلريم تيترک گيله‌لرينه سانجيلدي؛ اونون گؤزلرينده اؤج آلماق ايسته‌يينده آليشيب يانماغيني گؤروب ديکسينيب گئري چکيلديم. او دوداغيني بئله ترپتمه‌دي آنجاق يان دؤوره‌ميزين قالاباليغيندا اونون اينيلتي‌لريني و چيلغين پيچيلتي‌لاريني ائشيديرديم.
 ايچي آلووسوز يانيردي؛ هاميميز آيري آيري اوره‌‌يينه يوک اولموشدوق.
گؤز ياشيني ايچه‌‌ريسينه تؤکه تؤکه باخيشلاري پيچيلداييردي:
 آدام کور ديير کي؛ دوست، دوشمان، پاخيل … يولداش … هاميسي بلليدي.
اؤلمک هميشه ساده‌جه آغ کفنه بوکولمکله اولمور کي؛ او ائله آغ دونونون ايچينده ان موتلو گئجه‌سينده کيندن، نيفرتدن، اؤج‌دن سيزيلداياراق اؤلموشدو.
آيناز قيزارميش گؤزلري‌‌له اؤزونو ماسانين اوستونه آتيب تلم-تله‌سيک موبايلي اليندن آلسا دا اونون گؤزو نؤمره‌ده قورويوب قالميشدي. سئيو اولونماميش نؤمره‌نين صاحيبي نه يازميشدي؟ »شکيل‌‌لرين چوخ انرژي وئردي منيم گؤزل قادينيم« يانيندا بير اؤپوش ايموجيسي‌له.
اونون بيله‌‌يينده‌‌کي دؤيمه‌‌يه گؤزو ساتاشدي.
اري‌‌نين بوينونون داليندا تزه‌‌جه گؤردويو دؤيمه‌‌ني خاطيرلادي.
اطرافينا باخدي؛ کيمسه و هئچ نه گؤزه گؤرونموردو. ائله بيل سارايي بوتونلوکله بوشالتميشدي‌لار.
قوناقلار، گلين، بي. سس‌سيزليک سارايي بوروموشدو، اونون ايچيندن باشقا.
سارايداکي بوش اوتوراجاقلار فيسيلداشيردي. اوراني گورولتولو بير سس‌‌سيزليک قاپلاميشدي.
چؤلدن هاي-قاراي سسي گليردي. ال-آياغي تيتره‌يه-تيتره‌يه پنجره‌يه ياخينلاشيب تول پردني کنارا ييغيدي.
 بو آندا ايلک گيريشده گؤزه‌‌للييي ايله گؤزونو قاماشديران لوسترين کيچيک لامپالاري‌‌نين ايشيغي بير نئچه آنليق تيتره‌‌يه-تيتره‌‌يه سؤنوب ياندي.
 سونرا چيرت-چيرت ائله‌‌يه-رک تمامن سؤندو؛ قارانليق دؤرد بير ياني بورودو.
آرخاسيني چئويريب اللري اسه-اسه پنجره‌نين ايچ طرفينه وورولموش زئبرا پرده‌نين ايپيندن ياپيشيب يوخاري قالديردي.
 پنجره‌نين تاييني آچماق ايسته‌ديکده نه‌سه باغيرتي‌لا پنجره‌يه چيرپيليب شيشه‌سيني اوووق-اوووق ائله‌دي. ايستي بير شئيين اوزونه آخديغيني حيس ائتدي.
 باشيني ايدييينده رئفلئکس دؤشه‌مه‌نين اوزه‌رينده اؤزونو گؤردو؛ اوزوندن قيرميزي قان آخيب دؤشه‌مه‌يه جالانيردي.
هر طرفدن يوزلرله قارا قاييش فيسيلتي‌لا گؤيه قالخيب شاققيلتي‌لا گلينين اوز-گؤزونه، بدنينه ائنيردي.
 بيري قاييشين توققاسي‌لا اونون قان ايچينده اولان اوزونه چيرپدي …
ديقتله باخير، ديکسينير، دالدالي يئرييه-يئرييه اورادان اوزاقلاشير.
 آلتدان-آلتدان بدنينه يئريين سويوق تري حيس ائله‌ييردي؛ اوشودوردو. قاييشين توققاسي‌لا چيرپان قادين اؤزو ايدي.
گلينين اتيني پارچالايان رنگ‌‌به‌‌رنگ ساختا ديرناقلارا گؤزو ساتاشير.
بيري الينده‌‌کي قاييشي کنارا آتيب ديرناقلاري‌لا اونون بدنيني جيرمالايير. باشقالاري دا قاييشلاري کنارا تولازلاييب بير بيري‌‌نين اوستونه شيغيييرلار. سون
 

منبع :