بولگه لر سرويسي:– سلام جئيران باجي! بازاردان گليسن؟ نه تئز قاييتدين؟ هله ساعات اون بير اولمويوب، نه آلميسان؟ – سلام، باجين اؤلسون باجي! بيزيم کيشي‌لريميز کيشي دئييل‌لرکي. د‌ده‌م ياندي قول‌دان دوشدوم. تون‌به‌تين‌ـين اوغلو دئيه‌سن ات يئمه‌سه عملي آشماز! بيرآز ات‌دن قيويرزيويردان آلميشام؛ سن هارا؟ – بازارا گئديرديم، ات آلاجاغام. آللاه‌دان گيزلين دئييل سندن نه گيزلين؛ بيز ار- آرواد گونده بئش کيلو ات يئمه‌ساخ دولانانماريق. بيزيم کيشي ات‌سيز خؤره‌يه اصلاً ديلينده وورماز.– سن اونو دئييسن…! کيشي‌لرين تيفاغي داغيلسين. او بيرزاد دئييل کي. بيزيم کيشي هرگون تک‌جانينا بئش کيلو اتي ائله صوبحانيه بير يئرده يي‌ير، دورار آياغا.– سن اونو دئييسن…! آي جئيران باجي او نمنه‌دير کي، بيزيم قردش‌گيل بير آزدا اوشاقلي‌ديلار، گونده ناهار بير قويون کسمه‌سه‌لر ائولرينده قان سو يئرينه آخار.– سن اونو دئييسن…! جاوان جانيوا آند اولسون، بيزيم غلامحسين هرگون ساعات دؤردده گئده‌ر ساللاخ‌خانيه بير جانلي بيزوو کسديريب، گتيرر ائوه؛ کلّه‌پاچاسين صوبحانيه، قالانيندا ناهاراجا ياوان-ياوان اوجاق اوسته يي‌ييب، دورارلار آياغا. اوغلانلارينين پئيسري ائله‌بيل مال پئيسري‌دير. اويان بويانا دؤنمز. – سن اونو دئييسن…! رحمت‌ليغين قيزي خبرين يوخدور؛ بيزيم يوسوف‌گيل‌دن دئسم اينانماسان. يالان دييه‌نين ائوي ييخيلسين؛ بالالاري اؤلسون. دونن سحر يئکه بير اينک کسميشديلر، ناهار چاغي ائولرينده ات اوسته داوايدي. خارابادا بير پونزا ات تاپيلميردي گؤزه سوتماغا. ائوي ييخيلماميش‌لار ائله‌بيل اؤژدورلر.– سن اونو دئييسن…! يازيق گؤرمه‌ميسن کي يالان ديسم بئله سحره چيخمي‌ييم؛ اوچ بالامين جانينا آند اولسون؛ بو اؤلو اوزومه باخاسان؛ بيزيم زولئيخاگيل گونده ناهارا بير ده‌وه، شاما بير ده‌وه، ناهارا بير ده‌وه شام بير ده‌وه. ديي‌ييرم قارينيز شيشسين بير بئله اتي نجور يي‌ييرسيز آخي؟ – سن اونو دئييسن…! کاش بير دفعه يولون دوشه بيزيم رجب‌گيله، گؤره‌سن يئماخ نه‌جور اولار. باخما ها اونون بير قاريش بويونا! يالان دئسم ايکي گؤزوم کور اولسون. سنين جانيوا، بالالاريمين جانينا، بالالاريوين جانينا، جاوان قارداشيمين جانينا، جاوان قارداشيوين جانينا آند اولسون، ديليم لال اولسون ايه بير کلمه يالان دئسم؛ نفر حئسابي هرگون آداما صوبحانيه ده‌وه، ناهارا ده‌وه، شاما ده‌وه يئمه‌سه‌لر او گون آخشام اولماز. تون‌به‌تين‌‌ين قيزينا دي‌ييرم آخي نه خبريزدي؟ بير بئله ده‌وه يي‌يرلر؟ ده‌وه يئماخدان اؤزوزده ده‌وه اولموسوز. اودا دي‌يير قرده‌شيوه دئ با، بير گون ده‌وه پيشيرمه‌سم مني بوشار. باغيشلا جئيران باجي بير آز تر-تلسيک اولدو. ايجازه وئرسن گئديم ايندي کيشي ايشدن، اوشاخلار مدرسه‌دن گلرلر. اه، کيشي‌لرين آتاسينا لعنت. قويمازلارکي آدام ايکي کلمه دانيشسين. سن ده کي هميشه آدامين سؤزون ياري- ياريمچيليخ قويارسان….
سلام جئيران باجي! بازاردان گليسن؟ نه تئز قاييتدين؟ هله ساعات اون بير اولمويوب، نه آلميسان؟