آذربايجان ناغيللاري بولگه لر سرويسي:بير گون بير شاه وزيريندن سوروشور: وزير تانري نه ايش گؤرور؟ (ائله بيل، شاه دوغرودان-دوغرويا بو سورونون جاوابيني بيلميرميش) وزير بير آز فيکيره گئدير سونرا دئيير: قيبلئي عالم ساغ اولسون منه اوچ گون واخت وئر بو سورونون جاوابيني تاپيم. شاه قبول ائدير. بئله ليکله شاه وزير بير-بيريندن آيريليرلار. سحر-سحر ناماز واختي، شاه گونده‌کي کيمي اويانير دسته‌ماز آلماق اوچون ياتاق پالتاري ايله سارايين حيطينده اولان حوضون باشينا گئدير. دسته‌مازي آلديقدان سونرا، حوضون قيراغيندا اوتورموش بير گؤي بويالي قوشا گؤزو دوشور. شاه بو قوشو بير آن سئوير و اونو توتماغي دوشونور، اونا گؤره اگيله-اگيله گئديب بيردن قوشون قيچيندان ياپيشير. قوش قاناد چاليب اوچور، شاهي دا گؤيه قالخيزير. شاه قوشون بالاجاليغينا گؤره اوندا اؤزونو گؤيه قالخيزاجاق قدر گوجه اينانميردي. آما شاهين آياقلاري يئردن اوزولوب گؤيه قالخاندان سونرا قوشون آياقلاريني دا بوشلاماغي اونوتدو. ائله اونا گؤره ده او بالاجا گؤي بويالي قوش شاهي گؤتوروب آپاردي. آز گئدير-چوخ گئدير، شاهي آپاريب بؤيوک مئشه‌ليگين اورتاسيندا آچيقليق بير يئره ياخينلاشيب سالير و اؤزو اوچوب گئدير.او چاغا کيمي شاهليق ساراييندا، دؤوره‌سينده سايسيز قوللوقچولاري اولاراق دونيانين هر جورا وارليغيندان فايدالانان شاه، ايندي مئشه‌نين اورتاسيندا اؤزونو يالقيز و چاره‌سيز گؤروردو.وئيلان قالان شاه هر يئره اوز قويور مئشه‌ليکدن و گؤيدن باشقا بير يئر گؤرمور. آغاجلارين مئيوه‌لريندن بير آز يئييب گونو باتيرير. هاوا قارانليقلاديقدان سونرا، شاهين گؤزونه اوزاقدان بير ايشيق گؤرونور. شاه آغاجلارين آراسيندان کئچه‌رک ايشيغا دوغرو يؤنه‌لير. شاه ايشيغا چاتمادان اونو گونشين پارلاق ايشيغي ايتيرير. دئمه‌لي شاه گئجه‌ني سحره کيمي يول گئديب. يورغون-آرغين اولدوغو يئرده ياتيب دينجلمه‌گه مجبور قالير. شاه او گونو ده باتيراندان سونرا گئنه ايشيغا دوغرو يول گئدير. سونوندا، دان يئري آغاراندا شاه او ايشيغا چاتير.او ايشيق گلن يئر بؤيوک بير شهر ايميش. اونون بؤيوک قاپيلاريني قاپيچيلار باغليياندا شاه سسله‌نير: دايانين من چؤلده قالميشام. قاپيچيلار اونو شهره آليب قاپيلاري باغلاييرلار. شاه قاپيچيلارا آج اولدوغونو و پولسوز اولدوغونو دئيير. قاپيچيلار يئمه‌گين صالاواتا اولدوغونو بيلديريرلر.شاه شهر ده گزيب دولانير و هر نه‌يين صالاواتا اولدوغونا اينانير. بئله‌ليکله آز زاماندا شاه اورادا ياشايان جاماعاتا قوشولوب اؤزونه ائو-دولانيشيق قوروب و اورانين ياشايانلاري کيمي ياشايير. آيلار-گونلر اؤتور، شاه بازارداکي دوکان قونشوسونا ائولنمک ايسته‌ديگيني سؤيله‌يير. قونشو بئله دئيير: هر گون ناماز واختي مچيده گئدرکن ناماز قيلانلارين باشماقلارينا فيکير وئرسن اورادا بير نئچه جوت خاتون باشماقلاري دا اولور. او خاتونلار ائولنمک ايسته‌ديکلري اوچون باشماقلاريني اورادا چيخاريرلار. سن او باشماقلارين بير جوتونو گؤتوروب ساخلاسان اونون ييه‌سي سنينله ائوله‌نه‌جک.شاه بير گون نامازدان سونرا او باشماقلارين بير جوتونو گؤتورور ساخلايير. سونوندا باشماق ييه‌سي و بير نئچه آدام قالير، شاه او خاتونلا ائولنمه‌گيني سؤيله‌يير. خاتون دئيير: »ردّه« * سؤيله‌مه‌مک شرطيمي قبول ائدرسن سه، سنينله ائولنمه‌گه راضي‌يام.شاه دا اونون شرطيني قبول ائديب بئله‌ليکله ائوله‌نيرلر. گونلر خوشلوقلا کئچيردي. بير گون ياي هاوالاريندا گونون ايستي‌سي دولانيشيغي چتينلشديرميشدي. شاه توکاندان ائوه گلرکن دئيير: آرواد بو گون نه يامان ايستي‌دير. آرواد دئيير سنه نه وار؟ يارادان اؤزو بيلر و داليسيجا شاها دئيير سن »ردّه« سؤيله‌دين، شرطيميزي پوزدون، من سنده قالميرام گئديرم. شاه يالوارياخار ائدير بير داها »ردّه« سؤيله‌مه‌مگينه سؤز وئرير. آما زامان کئچير، شاه وئرديگي سؤزو اونودوب ايکينجيني و اوچونجو دؤنه تانري‌نين ايشينه قاريشيب »ردّه« سؤيله‌ديگيندن سونرا خاتون بوشانماقدان اؤتورو شاهي محکمه‌يه آپارير.محکمه اونلاري بوشايير و شرطيني پوزدوغو اوچون شاهي آسيلماغا محکوم ائدير. جللادلار شاهي اؤلدورمک‌دن اؤتورو شهردن چؤله چيخاريرلار. جللادلار شاهي سويوندوروب اونا سون سؤزونو دئمه‌گه ايمکان وئرديلر. اودا اولو تانري اوچون ايکي رکعت ناماز قيلماغي سئچدي. نامازدان سونرا سون دؤنه گؤزون سوزوب دونيايه-عالمه باخماق ايسته‌دي. آما لاپدان، اونو ايلک دؤنه اورالارا گتيرديگي گؤي بويالي قوشا گؤزو ساتاشدي. جللادلارا او قوشو توتماق ايسته‌ديگيني بيلديريب يالواردي. جللادلار گولدولر و بيري دئدي: سني اؤلوم گؤزله‌يير سن قوش توتماق ايسته‌ييرسن، گئد توت. شاه اگيله-اگيله گليب بيردن قوشون قيچلاريندان ياپيشدي. قوش قاناد چاليب گؤيه اوجالدي، آز-چوخ گئتديکدن سونرا شاهي اؤز سارايينا گتيريب چيخارتدي. و اونو سارايين ايچينده کي حوضون قيراغيندا، ايلک اؤنجه گؤتوردوگو يئره قويدو. شاه گؤردو گئدنده يئرده قالديغي باشماغي يئرينده‌دير. اونو گئييب ائوه ساري گلدي. بير آز اوجا سسله دئدي: نه ياتميسيز دورون گؤرون نه‌لر باش وئريب. شاهين آروادي دوروب دئيير ساده‌جه ناماز واختي‌دير. سن هئچ بئله هاي سالمازدين نه اولوب؟ شاه سوسدو. بير آز اويان-بويانا، و اَينينده کي پالتارا باخدي هئچ زادين دييشمه‌مه‌سيني و هر شئي‌ين اؤز قايداسيندا اولماسيني و بورالاردا زامانين کئچمه‌مه‌سيني گؤروب، اولوب-بيتنلري دوشونوب گئنه سوسدو. شاه نامازيني قيليب ايش يئرينه گلدي، بير آزدان سونرا وزير ده گلدي. شاه دئدي وزير نييه گئج گلميسن؟ وزير دئدي قيبلئي عالم ساغ اولسون من گونده کي چاغ گلميشم سن تئز گلميسن سونرا گؤتوروب دئدي: قيبلئي عالم ساغ اولسون دونن بير سورو سورموشدون، من اونو اوچ گونده يوخ بير گونده فيکيرلشديم تاپديم. اجازه بويورسان سؤيله‌ييم !شاه دئدي: وزير بو سورونون جاوابي لازيم دئييل هر شئيي اؤزوم بيلديم.
بير گون بير شاه وزيريندن سوروشور: وزير تانري نه ايش گؤرور؟