هِيوا
هِيوا
1400/09/21
بولگه لر سرويسي:ائو اولدو زيل قارانليق، گؤز گؤزو گؤرمه‌يير، آما اوشاغين سسي هر ياني گؤتوروب. بالاخان اللريني او يان- بو يانا چکرکن اوشاغين سسي گلن يئره ساري گئتدي و هئي “هِيوا، هِيوا، جاواب وئر” دئيه سسلنيردي. “
داود_پيرعليلو
بولگه لر سرويسي:ائو اولدو زيل قارانليق، گؤز گؤزو گؤرمه‌يير، آما اوشاغين سسي هر ياني گؤتوروب. بالاخان اللريني او يان- بو يانا چکرکن اوشاغين سسي گلن يئره ساري گئتدي و هئي “هِيوا، هِيوا، جاواب وئر” دئيه سسلنيردي. “هِيوا، نه اولوب، ندن دينمه‌ييرسن؟ باشينا دولانيم هِيوا، جواب وئر نه اولوب؟” گؤردو هِيوادان سس گلمه‌يير. ائله او قارانليقدا اللريني چکرکن الي بيردن هِيوايا دَيدي، گؤردو هِيوا ياتيب، اوشاق دا سينه‌سينين اوستونده چيغيرير. بالاخان ال- آياغيني لاپ ايتيرميشدي. بيلمه‌ييردي نه ائيله‌سين. تئز اوشاغي هِيوانين سينه‌سيندن گؤتوروب قوجاغينا آليب هاوار تَپيب دئدي، “آللاه ائويم ييخيليب دا. . . اي گؤزل آللاه هِيوانين باشينا نه گليب؟ نَدن جواب وئرمه‌يير؟” اوجا سس ايله دئييب آغلاييردي.
بالاخان اوشاغي قوجاغينا آلدي، گتيرديگي، فانارا ساري گئتدي. فاناري يئل سؤندورموشدو. اوشاغي يئره قويوب اللري تيتررکن نئچه کبريت ئ سونرا فاناري يانديردي. سونرا يئنيدن اوشاغي قوجاغينا آليب فاناري دا گؤتوردو، ايشيغيني هِيوانين اوزونه ساليب يئنه ده سسلدي، “هِيوا؟ هِيوا؟ گؤردو يئنه سس وئرمه‌دي. اوشاغي آغلايا- آغلايا يئره قويدو، اوزو ده کي جومجولاق سويون ايچينده، گؤزلريندن ياش آخارکن اليني هِيوانين بيله‌يينده‌کي دامارين اوستونه قويوب گؤردو دامار وورور، آما نه وورور؟ چوخ ضغيف‌دير. اليني هِيوانين آلنينا قويجاق گؤردو آنلي بوز کيميدير. تئز قولاغيني اورگينين اوستونه داياييب گؤردو اورگي وورور، آما چوخ ياواش وورور. اوجادان هاوار تپدي. قونشولار بالاخانين سسيني ائشيتديلر، تؤکولوب بالاخان گيله گلديلر.دئمه هِيوانين قانينين فشاري آشاغايا دوشوب، هوشدان گئديبدير. قونشولاريندا بير ياشلي قادين وار ايدي، چوخ بيليجي ايدي.
ياشلي قادين اوشاغي بالاخانين اليندن آليب، هاميني اوتاقدان ائشيگه اؤتوروب، بير آيري قاديني دا يانيندا يارديمجي ساخلاييب، دئدي:-هئچ زاد اولماييب، قورخمايين بالاخان، سن گئييملريني او بيري اوتاقدا دگيشينجه، آلله بويوران اولسا هِيوا دا اؤزونه گليب اوشاغينا سوت وئريب اووردار.اوتاغين قاپيلاريني باغلاييب، تئز سماواردان بير سئيين ايستي سو آچدي، هِيوانين اللريني- اياقلاريني يويوب، سونرا اوت- علف‌دن بير درمان دوزَلديب، قاشيق- قاشيق هِيوانين بوغازينا تؤکدو. هِيوانين اللرينه ياواش- ياواش ايستي گلدي، سوزالا- سوزالا گؤزلريني آچدي، دريندن بير نفس آليب، دئدي:-اوشاق آجدير، گتيرين اميشديريم آغلاماسين. نه اولوب، بو نه قوخوسودور گلير؟ سيز بوردا نه ائديرسيز؟قاري اليني هِيوانين باشينا چئکيب، دئدي:هئچ زاد اولماييب، قورخما چيراغ آشيب نفتي توکولوب يورغانين اوستونه اونون قوخوسودور.قاري بال شربتيندن و ودوزلتديگي درماندان هِيوايا ايچديردي. هِيوانين حالي ياواش- ياواش دوزلينجه دئدي:– آي گوهر ننه، سيزي ده زحمته سالميشام باغيشلايين
گوهر ننه اوشاغي هِيوانين دؤشونه ساليب دئدي:– آي بالا اوشاغي بير اَميشدير، قوي آغلاماسين. بيز ده بو يورغاني دَييشيب، بير آيري يورغان گتيريب سالاق.هِيوانين سسي بالاخانين قولاغينا چاتينجا، بالاخان اوجادان دئدي:– آلله سنه چوخ شوکور حيات يولداشيمي منه يئنيدن پاي وئردين.بونو دئييب، بيردن هؤنکور- هؤنکور اوره کدن آغلاماغا باشلادي.او آغلاماق سئوينج آغلاماغي ايدي، سانکي تانري دونياني بالاخانا پاي وئرميشدي.
گوهر ننه ده تر- تَلَسيک»قيش دامي«ني، يعني هِيوانين ياتديغي اوتاغي سليقه سهمان ائله‌دي. (کندليلر او اوتاغا قيش دامي دئيرديلر. قيش داميندا کورسو قورولاردي، ائوين بوتون عائله‌سي قيشدا کورسوده اوتورب يا ياتارديلار. ). گوهر ننه‌نين ايشي باشا چاتديغيندا گؤردو خوروزلار دا بانلادي، شاواق آتماقدادير. زاهينين يئريني دوزَلديب، بالاخاني چاغيردي، دئدي:– آي بالاخان، هِيوانين يانيندا اول، من گئديم اوغلومون چاي- چؤرگيني قويوم يئسين. نئچه داواريميز وار اونلارا اوت دوغراياجاق، دوغراناقلي اوتلاري دا قورتولوبدور. اوتلاري دوغراييب، داوارلاري يئملسين، من تئز قاييديم گليم هِيوانين يانينا. ساري ياغدان قويماق پيشيره‌جاغام يئسين، بلکه تئز قوت تاپيب آياغا دوروب ايشلريني اؤزو گؤرسون.هِيوا، او حالي ايله بيلميردي گوهر ننه‌دن نئجه ديل- آغيز ائله‌سين. گوهر ننه او بيري قادينا دا دئدي:– آي بالا سني گؤروم بخته‌ور اولاسان، دونيادا نئيلييم- نئجه ائلييم دئمه‌يه‌سن.
گل سني ده ائوينيزه اؤتوروب اوردان ائله گئديم، بلکه تئز قاييدا بيليم.گوهر ننه او قاديني دا گؤتوروب بيرليکده گئديب اونو ائولرينه اؤتوردو، سونرا اؤز ائوينه گئتدي. حيطه گيرجَک گؤردو داوار آجيب، اونون سسيني ائشيتمک همن باشلاديلار مَله‌مه‌يه. قونشولاردان ياتاني اولسا اويناماسين دئيه، اوغلونو ياواش چاغيردي.
ياواش- ياواش چاغيرارکن اوغلونون ياتديغي اوتاغا گيريب گؤردو، اوغلو ائله ياتيب مين يوخونون ايچينده‌دير سانکي. اوغلونو يوخودان اوياتماغا اوره گي گلمه‌دي. ايسته‌دي داوارلارا بير آز قورو سامان تؤکوب تئز هِيوانين يانينا قاييتسين. اوتاغين قاپيسيني اؤرتوب، اوردان چيخاندا قونشونون کؤپَگي بيردن هوردو. بونلارين دا کوپک‌لري اونا باخيب اوجادان هورمه‌يه باشلادي.
گوهر ننه‌نين اوغلو ايتلرين سسينه اويانيب، ائشيگه چيخاندا گؤردو آناسي حيطده‌دير. گوهر ننه بيردن دئدي:-آي اوغول، اوره گيمدن گلمه‌دي شيرين يوخوندان سني اويالدام، بو حيوانلاري گؤروم نه دئييم اولسونلار سني يوخودان اوياتديلار. ايندي کي اوياندين داوارلارين يونجاسي، اوتلاري قورتاريب، دوغراماق ايسته‌يير. ائله قارا گيله‌لرينه آنان قوربان اولسون، داوارلارين اوتلاريني- يونجالاريني دوغرا، اوخوردا تؤک قاباقلارينا قوي يئسينلر. من گئديرم بالاخان گيله، عائله‌سي اوشاق گتيريب اونا يئتيشم. بيردن ناهاردا دا گله بيلمه‌سم رَفده تويوق يومورتاسي قويموشام،گؤتوروب ساري ياغ ايله ياغا ساليب اوجاقدا پيشيريب يئيرسن.
گوهر ننه بو سؤزلري دئييب، ائولريندن چيخدي، بالاخان گيلين ائولرينه ساري يولا دوشدو.گوهر ننه گلنه قدر، بالاخان بيلميردي سئوينجيندن نه ائيله‌سين. هم اوشاق سلامت ايدي هم هِيوا سلامتليگيني اله گتيرميشدي. بالاخان گاه هِيوانين او ال- بو الينه گئچيردي، گاه اوشاغين اوزونه باخيب اوخشاييردي، گاه دا گؤزل آللاها شکر ائديردي. او حالدا گؤردو اوستونده دمير يئزه اولان حيطلرينين تاختا قاپيسي برک چاليندي. تَلَسيک قاپيا گئديب، سس وئردي، “قاپي دؤين؟”، گوهر ننه سسلنيب دئدي:
-بالاخان قارداش، منم گوهر ننه. قاپيني آچ گليم گؤروم هِيوانين حالي نئجه‌دير. يئمگينه- ايچمگينه يئتيشيم.
بالاخان قاپيني آچدي، اؤزو طوله‌يه ساري گئدرکن گوهر ننه‌يه دئدي:-آي ننه، آلله اورگينين حاجتيني يئتيرسين. من طؤله‌ده داوارلارا گئديرم باخام، اوت- موت‌دان، سامان‌دان- زاددان قاباقلارينا تؤکم. سيز ده هِيوايا يئتيشين. او، بو کندده آدامسيزدير، باجي- قارداشي يوخدور، غريبدير، آلله سنين ايشيني راست گتيرسين.گوهر ننه، بيردن هِيوا يوخودا اولسا اويانماسين دئيه، ياواش- ياواش آدديملاريني گؤتوررک، قيش دامينين قاپيسيني لاپ ياواش آچاندا، بيردن قاپي جيريلدادي، هِيوا قاپينين سسينه يوخودان اويانيب، دئدي:
-آي گوهر ننه سنسن؟گوهر ننه جواب وئردي:-منم قيزيم، راحات اول دينجل. من سنين يانيندا بير- ايکي گون قالاجاغام.هِيوا بيلميردي نئجه گوهر ننه‌دن تشکر ائديب، اونا دعا ائيله‌سين.گوهر ننه اوچ گون هِيوانين يانيندا قاليب، اونا و اوشاغا يارديم ائديب، ايشلريني گؤردو. اوچونجو گون سوروشدو:-هِيوا ايندي حالين نئجه‌دير؟ اليني- اياغيني سرين سويا وورما بير زاد يومالين اولسا، قوي بير طرفده قالسين من گليب آپاريب بولاقدا يويوب گتيررم.گوهر ننه گؤردو هِيوا بونون زحمت چکمه‌سينه گؤره اوتانير، مين ديل ايله بوندان ديل- آغيز ائديب دعا ائيله‌يير.
منبع :