سئودا (پووئست)

بولگه لر سرويسي: اينانما بالا، اينانما، يالان سؤزدو. قويروق اله وئرمير او. دانيشيقدان قاچير. گئديب ايليشسه اورا، اوش گونه قاييتماز. اونو من تانيرام. هاميني آتيب فقط اونو توتوب. من باشارماديم دا آ، نئينيم. قوجا قودوردان معجونون دوزتمه‌سين من باشارماديم. فخري‌يه دئديم. دئديم اونو ائو – ائشييندن ائله‌مه! چکيب گتيرمه اونو، باخمادي. سني ده چکدي گتيردي، آمما فايدا ائله‌مز. داي نئينيم؟! آلله‌دان قورخماييديم اؤزومو وصل ائلييديم برقه، هامي‌‌نين جاني قوتارييدي. اوتوز سکگيز ايلدن سونرا من بو ائوده آرتيق تيکه اولدوم دآآ، آرتيق تيکه!…

 نريمان ناظيم

بولگه لر سرويسي: اينانما بالا، اينانما، يالان سؤزدو. قويروق اله وئرمير او. دانيشيقدان قاچير. گئديب ايليشسه اورا، اوش گونه قاييتماز. اونو من تانيرام. هاميني آتيب فقط اونو توتوب. من باشارماديم دا آ، نئينيم. قوجا قودوردان معجونون دوزتمه‌سين من باشارماديم. فخري‌يه دئديم. دئديم اونو ائو – ائشييندن ائله‌مه! چکيب گتيرمه اونو، باخمادي. سني ده چکدي گتيردي، آمما فايدا ائله‌مز. داي نئينيم؟! آلله‌دان قورخماييديم اؤزومو وصل ائلييديم برقه، هامي‌‌نين جاني قوتارييدي. اوتوز سکگيز ايلدن سونرا من بو ائوده آرتيق تيکه اولدوم دآآ، آرتيق تيکه!…
بدري ساخلاشا بيلمه‌ييب آغلايير. حاج اکرم خانيمين لحني اوخشامايا چئوريلير:
– آلله سن اؤزون منه بير انجام چک آلللاه! سن اؤزون من‌نن قاسيم‌ين ديوا‌نين ائله آلللاه!! گؤر نئجه منيم ايستي آشيما سويوخ سو قاتدي. گؤر نئجه مني اؤز ائويمده ذليل ائله‌دي. داي نئينيم قاسيم، آلله قاباغوندا بورج ائله‌سين! سن کي مني يانديردين، جيياريوين باشي آلازلانسين به حق فاطيمه زهرا! آخي نئيله‌ميشديم، پيس قئيننه‌‌ايديم سنه؟ اؤزومون، بالالاريمين بوغازيندان کسيب سني ائو ائله‌ديم، منيم قاباغيما بئله چيخاسان؟! داي نئينيم، آلله قاباغيوا چيخارتسين! سن کي منيم امه‌گيمي ايتيردين به حق غريب آغا امام رضا زحمتيوين بهرين گؤرمه‌يه‌سن، هئش قازانديغيوي يئمييه‌سن!
قاپي چالينير. گلن فروغ‌السادات‌دير. ايکي باجي قوجاقلاشيرلار. بدري باشين بؤيوک باجيسي‌نين چيينينه قويوب هؤنکورتويله آغلايير. فروغ سوروشور:
– بو سؤز- سووا گؤره آغلاييرسان، يوخسا آيري بير شئي اولوب منيم خبريم يوخدو؟
بدري دئيير:
– داي نه اولاجاغ‌ا‌يدي؟ آخي بس نييه قويدوز بئله اولا؟! انصافيزا نه گلميشدي؟ کئشگه يولدا ماشين آشايدي، من اؤلئيديم، آباني بو حالدا گؤرمه‌يئيديم. سيز کي بوردايديز بس نييه بير ايش گؤرمه‌ديز؟
فروغ در حال دويور کي آناسي بدريني دولدوروب. گؤز اوجو آناسيني سوزه‌رک دئيير:
– بالام مسئله صاحاب اؤزو ايسته‎يه – ايسته‌يه بيزيم اليميزدن نه گله بيلردي. بودو باخ ايما‌نيندان دئسين، يوز دفه يالواريب دئمه‌ديم آبا سال الدن، بئله ايشلر بيزه ياراشماز؟ دئمه‌ديم آبا اونون بونون سؤزونه آللانما. يوز دفه دئديم، دئديم آبا شيخ مفيد چيخير منبره آغيزينا آغيلينا گلني‌ دانيشير؛ ايمانيم الله آماناتي بلکه ده اؤزونه يول آچيردي. نئجه ده کي آچدي. گئتدي بيرين آلدي گتيردي اوتورتدي يوخاري باشدا. هله بو ظاهيردي، الله بيلير دالدا نه وار… ايشيم اوندا يوخ، بيزه نه؟ آمما يالوارديم دئديم آبا آللاها خاطير بيزي سؤز – سووا سالما، سؤزه باخ! باخمادي قيررا مير ياپيشدي کي حاجي بيرين آل! ثاواب‌دي. قوي ائو ايشيگه او يئتيشسين من ده مر – مچيديمه يئتيشيم. بيلميرم، حضرت فاطيمه خانيمي يوخودا گؤرموشم. او دونيادا نه جور اولار، نه ته‌هر اولار…، خلاصه بيز نه قده‌ر چوخ دئديک بو آز ائشيتدي. ايندي باجيما قوربان ايش – ايشدن سوووشاندان سورا منيم اليمدن نه گلر؟ واللاه بيلاه هئش نه گلمير. نه منيم نه اؤزگه‌سي‌نين اليندن بير ايش گلمير. بئله باجي دالدان آتيلان داش توپوغا ده‌ير.
حاج اکرم خانيم گؤزون قييب آلتدان – آلتدان فروغا باخير. فروغون سکوتون گؤروب دئيير:
– خوب! داهي؟ قالميشي؟!
فروغ يئني‌دن باشلايير:
– واللاه او دا کي قالير حاج آغايا، آدام اؤله‌جکدي، راضي دئييلدي. ياني اوول کي شوخلوق بيليردي، سورادا کي گؤردو جيددي‌دي؛ ايندي اللهي‌يعلم اورکدن دئييردي يا تره‌زي گؤتو يئره دؤيوردو، آنجاق دئييردي منه ياراشماز. منيم آبير حيثيتيم وار، گلينيم، کوره‌که‌نيم وار. ياراشماز. جاماعات منه گولر، بوشلويون! آمما آبا گيردي قيليغينا؛ ايندي الله بيلر نئجه قوش ديلي اوخودو، آنجاق راضي ائله‌دي. ايندي باجي، هاميني بوراخيب ياپيشيب من‌نن قاسيمين ياخاسيندان. من کي هئچ، اوول بير گوندن من يازيغين دوواري آلچاق‌ايدي؛ آمما دئييرم آبا، قاسيم اؤزگه اوغلودو. بير بئله قيسناما دووارا اونو! بير بئله قارقيش ائله‌ييب نيفرين چکمه! اؤزو جهنم، ايندي اوتانمازليقدي منيم اوغلوم جبهه‌ده‌دير. ايندي بو ساعات او توپ توفک قاباغيندادي.آخي بس، انصاف…انصافيوا…
قه‌هر فروغون بوغازين بيچير، سؤزون ياريدا قويور. فخري ده فروغا قوشولوب ايکي باجي آغلاشيرلار. حاج اکرم خانيم سرت باخيشيلا صحنه‌ني سوزور. مظلوميت ايزي اوز- گؤزوندن چکيلير. صيفتي آجي نيفرتله بويانير. باجي‌لار خئيلک آغلاشيب سونرا اوونورلار. حاج اکرم خانيم اوزون زامان بئزگين گؤزلرين قييب فروغا باخير. سانکي اونون سؤزونون قالميشيني گؤزله‌يير. دوداقلاري بير- بيرينه سيخيلديقدان رنگين ايتيريب عننابي‌يه چالير. انگي تيتره‌يير. فروغ دانيشمادان الينده کي توخومما ميلي‌ايله خالچاني دئشه‌له‌يير، گاهدان بير ده ايچين چکير. حاج اکرم خانيم سوکوتون اوزانماسيندان بئزيکير، چتينليکله اؤزون توپلاييب کسگين لحن‌ايله دئيير:– دئديگين سؤزلرين هاميسين دوز دئدين، نه بير کلمه اويان دئدين، نه بير کلمه بويان؛ آمما اصلي مطلبه چاتاندا باشلادين قاراچيليغا. بوراخ تولکولويو فروغ! دئميشم من، منيم سن‌نن ايشيم يوخدو. سؤزوم سنين ارينده‌‌دي. دئ قوي سؤز ايچ اولسون! دئ قوي بو دا بيلسين منيم باشيما نه گلدي!
فروغ يورغون لحن‌ايله سؤزه گلير:
– آلله آمان! يئنه دئديگين دئيير هاا! بابام قران بيزه قنيم اولسون اگر بيز بو ايشي بيله – بيله گؤرميش اولاق. قارا يولا من بؤيوک اولئيديم. کئشکه منيم قيچيم سينئيدي گئتمه‌ييديم بو ايشين داليجا. آخي اؤزوز يوللاديز داا ناانصاف. مگر سن اؤزون اوتورماميشدين حاج آغا دئدي فروغ قاسيمينان گئدين بير موناسيبين تاپين قويون آبا‌نين سؤزو کسيلسين. آخي بس من نه دئيئيديم؟ دئيئيديم گئتميرم!
فروغ اوزون بدري‌يه چئويريب سؤزونون داليسين توتور:
– سوروشدوق دئديلر بنيادين آلبومو وار، گئديرلر اورا عکس‌لره باخيب سئچيرلر. گويا قاسيمين اوردا تانيشي واريمش، سوروشور، دئيير بئله بير شئي يوخدو. اؤزوز گئدين ائشيکدن بيرين تاپين، بيه‌‌نين آلين. البته بنيادين اوشاقلاري دا ائلييه بيلرلر معرفي ائلييه‌لر. سورا قاسيم اوياننان بوياننان سوراخلاشميشدي بونو دئميشديلر…
سؤز بورا يئتيشنده حاج اکرم خانيم قندا‌نين گؤتون يئره دؤيه‌رک باغيرير:
– هه!!…ائله سؤز بوردادي‌ هاا، اصل سؤز بوراسيندادي. دئييرم آخي ديلين آغيزيندا قاراقانچيل اولسون قاسيم، ياني اولمازدي اوننان واز کئچه‌سن، ياني اوننان سووايي يوخودو؟ ياني سن اونو تانيميردين قاسيم؟ بير بئله بئناوا بئچارا‌نين اري شهيد اولوب هاميسين بوشلادين گئتدين ياپيشدين يوز گوماشتا يولا سالميش او سليطه‌دن؟ ياني سن بيليميردين او نه قيليخدا بير آدام‌دي؟ آخي من ثاواب داليجا گزيرديم، يوخسا ميتخانا آچيرديم؟ توو سنين او ذاتي سوتووه لعنت! آخي انصافيلا دانيش فروغ آز مؤحنتين چکميشديم اونون؟ او کي ننه‌سي توممه‌تين‌ايدي، اون ايکي ايل تمام باشيمدا اکدي، بئينيمده سوووردو؛ سسيمي چيخارتماديم، دئديم اولسون، اونون ائوينده منيم کسيگيم وار؛ بو دا بالاسي‌دي! آخيردا سود چکدي آپاردي. آخيردا زهرين تؤکدو منه. گئتدي بير عوضي آرواد  تاپدي گتيردي سئيد اوجاغين ميندارا چکه!…

منبع :