قزئت
قزئت
1401/03/29
بولگه لر سرويسي: ناهار چاغي فهله‌لرين باشچيسي باغ اوزونو قيي ووروب، ميوه درنلري ناهار يئمه‌يينه چاغيردي. فهله‌لر خؤره‌ک يئمه‌يه معين اولان يئره توپلاشديلار.
سحر خياوي
بولگه لر سرويسي: ناهار چاغي فهله‌لرين باشچيسي باغ اوزونو قيي ووروب، ميوه درنلري ناهار يئمه‌يينه چاغيردي. فهله‌لر خؤره‌ک يئمه‌يه معين اولان يئره توپلاشديلار.
ارباب ناهار يئمه‌يينه فهله‌لرين ساييجا پيتي آلميشدي.
تزه ايستي سنگگ‌ين گؤزه‌ل قوخوسو، شوربا اييسينه قاريشيب، باياقدان ايشله‌مکدن قابيغدان چيخان فهله‌لري اشتهايا گتيرميشدي. آجلاريندان اؤلوردولر.
فهله باشچيسي، بير ايکي فهله‌نين يارديمي ايله پيتي‌لري، کاسا- قاشيقلاري، سوغانلاري فهله‌لرين آراسيندا بؤلوشدوردو.
فهله‌لر اربابدان ايذين آليب اوخونموش گون قزئته‌سيني سوفرا عنواندا قارشيلارينا سَرديلر. شوربانين سويونو کاسالارينا تؤکدولر، سو آز اولدوغونا بعضيلري دويماريق دئيه، شوخلوقجا اوجاغين اوستونده قاينايان يئکه قارا چايداندان شوربالارينين اوستونه داغ سو تؤکدولر. دئيه- گوله هره‌سي بير کاسا اَتين سويونو دوغراييب شيرين- شيرين سوغانلا يئديلر.
يوسف فهله‌لرين بيري و اَن جاواني ايدي. شورباني يئيه‌ندن سونرا ديبيني ده بير تيکه چؤره‌ک ايله سيويردي؛ بير پارا سوغانلا آغزينا قويدو؛ سونرا اللريني قووزاييب شوکور ائتدي.
پيتي‌نين آغزيني اَتي يئمک اوچون آچدي؛ لاپبادان عائيله‌سي و ايکي آج بالاسي گؤزونون اؤنونه گلدي. نئچه آي اولاردي يئتيريب عائيله‌سينه اَت آلا بيلميردي. بوغازي بيچيلدي. داها او اَت اونا زَهريمار اولاردي. يئيه بيلميه‌جکدي. قَهَر بوغازيني کسيردي. اوجاغين توستوسونو بهانه ائديب، يولداشلاريندان اوزونو يان توتوب گؤزونده گيله‌لنميش ياشي اَلي‌نين آرخاسي ايله سيلدي. اؤزونه توختاقليق وئريب يولداشلارينا يالاندان: »شوربانين سويو چوخ ايدي مني توتدو.«- دئدي. بير حالدا کي او آز خؤره‌ک ايشلک گنجين يالنيز ديشي‌نين ديبينده قالميشدي. هئچ دويماميشدي.
شوربانين اَتيني هميشه چانتاسيندا اولان آغزي باغلي قابا تؤکوب، سليقه ايله چانتاسينا قايتاردي. اونو شام اوچون کؤرپه بالالارينا آپاراجاقدي.
باشقا فهله‌لر ده خؤره‌ک‌لريني يئديلر. بعضيلري ده اونا تاي اتلريني گؤتوردولر. قاب- قاشيغي ييغيشديريب بير طرفه قويدولار. سونرا اؤزلرينه چاي سوزوب، سيگارئت چکنلري سيگارئتلريني آليشديرديلار.اوجوزلو سيگارئتلرين کولونو قزئته‌نين اوستونه تؤکوب، يئربه يئر يالانچي سياستچي‌لرين، اختلاسچيلارين، اوغرولارين ساققاليني، آلينلاريندا کي ريا مؤهور يئريني اودا چکيب، دليک- دليک ائله‌ديلر و بو ايشه اؤز آرالاريندا بير سيرر اولان کيمي اوغرون- اوغرون گولدولر. سوندا يانميش قزئته‌نين کولو توزلانماسين دئيه بوکوب باغدا اولان يئکه زيبيل دولونا باسديلار.آج قارينلي‌لارا، عائيله‌سينين گونده‌ليک ياوان چؤره‌ييني چتينليک‌له تاپان اينسانلارا، قزئته‌نين يالان- يارغاني يامان- يووزدان پيس ايدي؛ يارالارينين اوستونه دوز سَپيردي. او يالانلارين، او رياکار يالانچيلارين، اوغرولارين يئري آرتيق زيبيل دولو ايدي.
اونلار يالنيز آخشام چاغيني و اَلي دولو ائوه دؤنمه‌يي دوشونوردولر. بو گونلري ده بئله کئچه‌جکدي. بس صاباح و ياشامين سايسيز صاباحلاري نئجه اولاجاق؟!
گؤره‌سن فهله‌لرين بو عصيانجيل ايشي، ياخيندا کي قابارلي اللرين، دمير يوموروقلارين، آج قارينلارين، آياق يالينلارين آجيق و عوصيان موشتولوقچيسي ايدي مي؟!
منبع :